5–11 abril

Tzolʼlebʼ ut Sumwank 30–36

“B’oqb’ilat chixjultikankil lin evangelio”

Naq yooqat chirilb’al ru Tzolʼlebʼ ut Sumwank 30–36, b’ar wan li esil nakaweek’a naq aajelaq ru choq’ reheb’ li komon nakatzoleb’? K’a’ru taamusiq’anq reheb’ chixwotzb’al li evangelio rik’ineb’ li ras riitz’in?

Tz’iib’a li nakak’oxla

Xkanab’ankileb’ chi wotzok

Maare eb’ li komon sa’ li tzoleb’aal naru neke’xwotz k’a’ruhaq xe’ril ru sa’ Tzolʼlebʼ ut Sumwank 30–36 li naxmusiq’aheb’ chixwotzb’al li evangelio.

Xk’utb’al li tzolʼlebʼ

Tzolʼlebʼ ut Sumwank 30–36

B’oqb’ilo chixwotzb’al lix evangelio li Jesukristo.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al nayeeman naq taatzolmanq Tzolʼlebʼ ut Sumwank 30–36 re xsik’b’al li k’a’ru naxpatz’ li Qaawa’ reheb’ lix misioneer ut li k’a’ru naxyeechi’i reheb’ a’an. Eb’ li komon naru te’xwotz li k’a’ru xe’xtaw. (Chi’ilmanq, jo’ eetalil, Tzolʼlebʼ ut Sumwank 30:8; 31:3–5; 32:1, 5; 35:24). Maare naru taakanab’eb’ chixtz’iib’ankil junaq hu choq’ re anihaq li wan chaq sa’ xmision malaj junaq yoo chixkawresinkil rib’ re xik sa’ li mision, ut che’roksi junjunq reheb’ lix na’leb’ ut xyeechi’ihom li Qaawa’.

• Ma nakatzoleb’ li saaj yookeb’ chixkawresinkil rib’ re xik jo’ misioneer? Wi jo’kan, naru taakanab’eb’ li komon sa’ li tzoleb’aal chixtz’ilb’al rix jun li tasal sa’ Tzolʼlebʼ ut Sumwank 30–36 ut te’xtaw k’a’ruhaq naxmusiq’aheb’ chi k’anjelak. Naru nakaye naq eb’ li misioneer neke’yeeman resil sa’eb’ li tasal a’an toj ak’eb’ ut toj b’ab’ay lix numsihomeb’ sa’ li Iglees. Chan ru naq ke’ru chixwotzb’al li evangelio? Naru ajwi’ taak’ut junaq reheb’ li video neke’tawman sa’ “Xkomon chik li k’anjeleb’aal.” K’a’ru neke’xye li video chirix k’a’ut naq tento took’anjelaq jo’ misioneer ut chan ru naru taqakawresi qib’?

• Moko chixjunileb’ ta li kristiaan wankeb’ rosob’tesihom re xik sa’ jun li mision; a’b’anan, chiqajunil naru naqab’oqeb’ li kristiaan chi chalk rik’in li Kristo ut chirab’inkil li resilal lix k’ojob’ankil wi’chik li Iglees. Eb’ li komon sa’ li tzoleb’aal naru te’xyiib’ jun xtusulal re chan ru naru “te’xte xtz’uumaleb’ re” (Tzolʼlebʼ ut Sumwank 30–36). B’ar wan junjunq reheb’ li hoonal wankeb’ qe re xwotzb’al li qapaab’aal rik’ineb’ li qas qiitz’in? K’a’ru li na’leb’ wan sa’ Tzolʼlebʼ ut Sumwank 30–36 li naru na’oksiman re xwotzb’al li evangelio chi jo’kan? K’oxla xkanab’ankileb’ junjunq li komon sa’ li tzoleb’aal li wankeb’ chaab’il xnumsihomeb’ chirix xwotzb’al li evangelio naq te’xwotz xna’leb’eb’ ut te’xsume xpatz’omeb’ li komon sa’ li tzoleb’aal.

• Li Qaawa’ kixyeechi’i re laj Ezra Thayer ut laj Northrop Sweet naq wi neke’xte li xtz’uumaleb’ re, re xwotzb’al li evangelio, chanchanaqeb’ “laj Nefi najter” (Tzol’leb’ ut Sumwank 33:8). Chan chaq ruheb’ xseeb’al laj Nefi li wankeb’ rilom rik’in xwotzb’al li evangelio? (chi’ilmanq, jo’ eetalil, 1 Nefi 3:7; 4:6; 10:17; 17:15; 2 Nefi 1:27–28). Chan ru naru nokohe’xtenq’a li seeb’al a’an sa’ xyalb’al qaq’e chixwotzb’al li evangelio?

  

  Li Qaawa’ naxpatz’ qe naq taqajultika li evangelio sa’eb’ li kutan a’in jo’ sa’ xtiklajik chaq li Iglees.

Tzolʼlebʼ ut Sumwank 32–33; 35

Li Qaawa’ nokoxkawresi choq’ re li k’anjel naraj naq taqab’aanu.

• Chan ru nokoxtenq’a li Qaawa’ chixk’eeb’al chi uxmank lix k’anjel? Jun chaab’il hoonal re aatinak chirixeb’ li k’anjel a’in, a’an xtz’ilb’al rixeb’ lix yu’ameb’ li kristiaan yeeb’ileb’ resil sa’ Tzolʼlebʼ ut Sumwank 32–33, 35. Qayehaq, naru taawotz sa’ li tzoleb’aal li seraq’ kixwotz laj Ezra Thayer chirix lix k’utb’esinb’il matk’, li natawman sa’ “Xkomon chik li k’anjeleb’aal” ut chirix a’an taakanab’eb’ li komon chirilb’al ru Tzolʼlebʼ ut Sumwank 33:1–13, li wan choq’ xtz’aqob’ jun k’utb’esinb’il na’leb’ choq’ re laj Ezra Thayer. Chan ru naq li Qaawa’ yoo chaq chixkawresinkil laj Ezra choq’ re li k’anjel naraj naq tixb’aanu? (chi’ilmanq Tzolʼlebʼ ut Sumwank 33:2). Naru ajwi’ taakanab’ jun li komon sa’ li tzoleb’aal chixwotzb’al jun esil chirix lix wanjik laj Parley P. Pratt rik’in laj Sidney Rigdon (chi’ilmanq “Eb’ li xyaab’ kuxej re li k’ojob’ank wi’chik: Lix xb’eenil komon sa’ li Iglees” sa’ Kim, Taaqehin—Choq’ reheb’ li komon ut li junkab’al). Chan ru naq ki’osob’tesiik li Iglees xb’aan li wanjik a’an? K’a’ru li eetalil naqil naq li ruq’ li Qaawa’ kiwan sa’ xyu’ameb’ li winq a’an? Maare eb’ li komon sa’ li tzoleb’aal naru te’xwotz xnumsihomeb’ b’ar wi’ ke’xk’e reetal naq li Qaawa’ junelik kiwan rik’ineb’ chi jo’kan.

Xkomon chik li k’anjeleb’aal

Eb’ li video chirix li k’anjel re jultikank (sa’ ChurchofJesusChrist.org).

“El valor de una misión de tiempo completo”

“Compartir el Evangelio”

“Tu día por la misión”

“Un deber del sacerdocio”

Lix k’utb’esinb’il matk’ laj Ezra Thayer.

Laj Ezra Thayer kixtz’iib’a naq rub’elaj lix kub’ik xha’ kiwan jun xk’utb’esinb’il matk’ b’ar wi’ “kichal jun li winq ut kixk’am chaq we jun b’orol li hu ut kixk’ut chiwu, ut jun ajwi’ li trompeet, ut kixye we naq tinyaab’asi. Kinye re naq maajun sut inyaab’asihom junaq trompeet. Kixye we: Laa’at tatruuq, yal xb’aanunkil. … Xchaq’al ru li son ki’eek’an jo’ maajun wa wab’ihom” (“Revelation, October 1830–B, Revelation Book 1”, introducción histórica, josephsmithpapers.org). Naq laj Jose Smith chirix chik a’an kixk’ul jun k’utb’esinb’il na’leb’ choq’ re laj Ezra Thayer ut laj Northrop Sweet, li natawman anajwan sa’ Tzol’leb’ ut Sumwank 33, laj Ezra kixtaw ru naq li k’utb’esinb’il na’leb’ a’an li b’orol chi hu kiril sa’ lix k’utb’esinb’il matk’.

Xchaab’ilob’resinkil li qak’utum

Tenq’aheb’ chiroxloq’inkil rib’ chirib’ileb’ rib’. “Tenq’aheb’ li komon sa’ laa tzoleb’aal chixtawb’al ru naq li junjunq reheb’ neke’tz’aqon sa’ xk’eeb’al chi eek’amank li musiq’ej sa’ li tzoleb’aal. Waklesi xch’ooleb’ re taawanq li chaab’ilal, li rahok, ut li oxloq’ink chirib’ileb’ rib’ re naq chixjunileb’ sa te’reek’a sa’ xwotzb’al li k’a’ru xe’xk’ul sa’ xyu’am, lix patz’omeb’, ut lix nawomeb’ xch’ool” (Li k’utuk jo’ li Kolonel, 15).