29 marzo–4 abril

Li Paswa

“Laa’in li yo’yo, laa’in li kikamsiik”

Maak’a’ k’a’ruhaq chik jwal aajel ru choq’ qe chiru xtawb’al ru lix tojb’al rix li maak xb’aan li Jesukristo. K’oxlaheb’ li kristiaan te’wulaq sa’ li tzoleb’aal; k’a’ru taatenq’anq reheb’ chixnimob’resinkil lix paab’aaleb’ chirix li Jesukristo?

Tz’iib’a li nakak’oxla

Xkanab’ankileb’ chi wotzok

Naq eb’ li komon sa’ laa tzoleb’aal yookeb’ chixtzolb’al li Tzol’leb’ ut Sumwank chiru li chihab’ a’in, maare neke’xtaweb’ raqal neke’aatinak chirix li Kolonel li wan xyaalal choq’ reheb’ a’an. Tikib’ li tzolok rik’in xk’eeb’aleb’ xhoonal chixwotzb’aleb’ li raqal a’an. Chan ru naq xniman li qapaab’aal chirix li Jesukristo rik’in xtzolb’al li Tzol’leb’ ut Sumwank toj anajwan?

Xk’utb’al li tzolʼlebʼ

Li Jesukristo kixk’anjela jun “xtojb’al rix li maak li tz’aqal re ru.”

• Xb’aan naq lix tojb’al rix li maak xb’aan li Jesukristo a’an jun tzol’leb’ tz’aqal aajel ru, k’oxla roksinkil naab’al li hoonal re aatinak chirix, re naq eb’ li komon sa’ li tzoleb’aal te’xtaw ru. Re xb’aanunkil a’an naru taatz’iib’aheb’ sa’ li pizarron patz’om jo’eb’ a’in: K’a’ru li xtojb’al rix li maak xb’aan li Jesukristo? Chan ru nak’anjelak sa’ lin yu’am rajlal kutan? Chan ru nak’anjelak choq’ re lin junelik yu’am? Chan ru nink’ul li wankilal aj tojol-ix re li Kolonel sa’ lin yu’am? K’e xhoonaleb’ li komon sa’ li tzoleb’aal re naq te’xtz’il rixeb’ li patz’om a’in ut te’xsik’ raqal sa’eb’ li loq’laj hu li taatenq’anq reheb’ chixsumenkileb’. Naru te’xtz’iib’a sa’ li pizarron li raqal reheb’ li loq’laj hu ut li komon naru te’aatinaq chirix junjunqeb’ re a’an. A’ineb’ junjunq li eetalil: Lukas 22:39–44; 1 Jwan 1:7; 2 Nefi 2:6–9; Mosiah 3:5–13, 17–18; Alma 7:11–14; Moroni 10:32–33; Tzol’leb’ ut Sumwank 19:16–19; 45:3–5.

• Naru nawan xyaalal choq’ reheb’ li komon sa’ li tzoleb’aal rilb’al li video “El Salvador sufre en Getsemaní” (ChurchofJesusChrist.org) rub’elaj naq te’ril ru li raatin li Kolonel chirix li rahilal kixk’ul, sa’ Tzol’leb’ ut Sumwank 19:16–19. Chan ru naq eb’ li raqal a’an neke’xnimob’resi li qarahom choq’ re lix mayej li Jesukristo? Sa’ “Xkomon chik li k’anjeleb’aal” wan jun xtusulaleb’ li video chirix li Paswa li naru taawotz.

  

  Qaawa’ re li tijok, xb’aan laj Yongsung Kim

Tzol’leb’ ut Sumwank 76:11–14, 20–24; 110:1–10

Li Profeet aj Jose Smith kixch’olob’ xyaalal naq li Jesukristo yo’yo.

• Laj Jose Smith kiril li Kolonel waklijenaq chi yo’yo ut kixch’olob’ xyaalal rik’in wankilal naq li Jesukristo yo’yo. Re xtenq’ankileb’ li komon sa’ li tzoleb’aal chixtzolb’al lix ch’olob’ahom laj Jose Smith, naru taak’uub’eb’ sa’ wiib’ ch’uut ut taaye re li junjunq chi ch’uut naq te’ril ru Tzol’leb’ ut Sumwank 76:11–14, 20–24 malaj 110:1–10. Kanab’eb’ chixsik’b’al junaq aatin sa’eb’ li raqal a’an li na’aatinak chirix li Kolonel. Naru te’xk’e xhoonaleb’ chirib’ileb’ rib’ chixtz’iib’ankileb’ li aatin neke’xtaw sa’ li pizarron ut laa’at naru taawoksiheb’ li aatin a’an re xb’eresinkil jun aatinak chirixeb’ lix chaab’ilal ut lix wankil li Kolonel. Chan ru naq lix ch’olob’ahom laj Jose Smith naxkawob’resi li qapaab’aal chirix lix choxahilal ut lix k’anjel li Jesukristo?

• Junjunqeb’ li komon sa’ li tzoleb’aal maare xe’xchapi lix k’utum li Tzol’leb’ ut Sumwank rik’ineb’ li aatin ut li na’leb’ re li b’ich “Ninnaw naq yo’yo inKolonel” (Eb’ li B’ich, 77; chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Maare te’raj xwotzb’al li k’a’ru xe’xtaw. Naru ajwi’ teeril ru malaj teeb’icha li b’ich a’an jo’ tzoleb’aal ut teesik’ xchapb’al rib’ rik’ineb’ li raqal a’in sa’eb’ li loq’laj hu: Tzol’leb’ ut Sumwank 6:34; 45:3–5; 84:77; 98:18; 138:23. Chan ru naq naqanaw naq yo’yo li qaKolonel?

Tzol’leb’ ut Sumwank 29:26–27; 42:45–46; 63:49; 88:14–17, 27–31; 93:33–34.

Sa’ xk’ab’a’ li Jesukristo, toowakliiq chi yo’yo.

• Re xtenq’ankileb’ li komon sa’ li tzoleb’aal chi aatinak chirix li naxk’ut li Tzol’leb’ ut Sumwank chirix li wakliik chi yo’yo, naru taakanab’eb’ chixk’oxlankil naq jun ramiiweb’ malaj xjunkab’aleb’ naxpatz’ reheb’ k’a’ru naraj naxye wakliik chi yo’yo. Chan raj ru taqatenq’a li kristiian a’an chixtawb’al ru k’a’ru li wakliik chi yo’yo? Waklesi xch’ooleb’ li komon sa’ li tzoleb’aal chixtz’ilb’al rix Tzol’leb’ ut Sumwank 88:14–17, 27–31 re xsik’b’al k’a’ruhaq naru nak’anjelak reheb’. Wankeb’ chik li raqal sa’eb’ li loq’laj hu li naru neke’tenq’an: Alma 11:40–45 ut Alma 40:21–23. K’a’ raj ru taqaye re xtenq’ankil li qamiiw malaj li qajunkab’al chireek’ankil sahil ch’oolejil ut oyb’enihom li nachal xb’aan li tzol’leb’ re li wakliik chi yo’yo?

• Chan raj ru naru taatenq’aheb’ li komon sa’ li tzoleb’aal chi k’oxlak chirix li maatan re li wakliik chi yo’yo kixk’e li Kolonel? Maare naru taatz’iib’a chiru li pizarron B’antiox re li Jesukristo … ut taakanab’eb’ li komon sa’ li tzoleb’aal chixsik’b’aleb’ aatin sa’eb’ li raqal a’in li naru neke’xtz’aqob’resi ru li ch’ol aatin a’in: Tzol’leb’ ut Sumwank 29:26–27; 42:45–46; 63:49; 93:33–34. Chan ru naq eb’ li yaal neke’tawman sa’eb’ li raqal a’an nokohe’xtenq’a chirix chan ru naqil li kamk? Chan ru naq neke’k’anjelak sa’ li qayu’am rajlal kutan?

Xkomon chik li k’anjeleb’aal

Eb’ li video re li Paswa sa’ ChurchofJesusChrist.org.

“Él vive: Testimonios sobre Jesucristo”

“Gracias a que Él vive”

“Gracias a Él”

“#Aleluya—Un mensaje de la Pascua de Resurrección sobre Jesucristo”

“Su Sagrado Nombre — Una declaración de la Pascua”

“De tal manera amó Dios al mundo”

Xchaab’ilob’resinkil li qak’utum

Tenq’aheb’ li komon chixtz’ilb’al rixeb’ li loq’laj hu. “Oksiheb’ li patz’om li te’xteneb’eb’ li komon sa’ li tzoleb’aal chixtawb’aleb’ xsumenkil sa’eb’ li loq’laj hu. … Tenq’aheb’ chirilb’al naq us ta ke’tz’iib’aak najter li loq’laj hu, aran wankeb’ lix sumehom li Qaawa’ choq’ re li patz’om ut ch’a’ajkilal nokonume’ wi’ ” (Li k’utuk jo’ li Kolonel, 30).