29 marzo–4 abril

Li Paswa

“Laa’in li yo’yo, laa’in li kikamsiik”

Naq yookat chixkawresinkil aawib’ chixnimankil lix waklijik chi yo’yo li Kolonel sa’ li domingo re Paswa, k’oxla chan ru naq li k’utb’esinb’il na’leb’ re li kutan a’in xchamob’resi laa paab’aal chirix naq li Kristo a’an li Ralal li Dios Junaj Chirib’il ut aj Tojol rix li ruchich’och’.

Tz’iib’a li nakak’oxla

Li 3 xb’e li po abril, 1836 a’an chaq li Paswa. Chirix xtenq’ankil chixjek’inkil li loq’laj wa’ak reheb’ laj santil paab’anel li ch’utch’uukeb’ sa’ li Santil Ochoch re Kirtland li toje’ osob’tesinb’il chaq, laj Jose Smith ut laj Oliver Cowdery ke’xtaw jun ch’anch’ookil na’ajej chirix jun tz’apleb’ t’ikr sa’ li santil ochoch ut ke’xwutzub’ rib’ chi tijok. Toja’ naq, sa’ li santil kutan a’an naq eb’ laj Kristiano yalaq b’ar yookeb’ chaq chixnimankil lix waklijik chi yo’yo li Jesukristo, li Kolonel li waklijenaq kixk’ut rib’ sa’ lix santil ochoch, ut kixye: “Laa’in li yo’yo, laa’in li kikamsiik” (Tzol’leb’ ut Sumwank 110:4).

K’a’ru naraj naxye xyeeb’al naq li Jesukristo “a’an li yo’yo”? Ink’a’ ka’ajwi’ naraj xyeeb’al naq kiwakli chaq sa’ li muqleb’aal sa’ rox li kutan ut kixk’ut rib’ chiruheb’ lix tzolom aj Galilea. Naraj b’an naxye naq yo’yo sa’ li kutan a’in. Na’aatinak rik’in xtz’uumaleb’ re li profeet sa’ li kutan a’in. Naxb’eresi lix Iglees sa’ li kutan a’in. Naxk’irtesiheb’ li aamej toch’enaq ut li ch’oolej yot’b’ileb’ sa’ li kutan a’in. Chi jo’kan naru naqaka’suti li raatin li xnimal ru xch’olob’ahom laj Jose Smith: “Chirix li k’iila ch’olob’ank xyaalal li k’eeb’il chaq chirix a’an, a’in li ch’olob’ank xyaalal … li naqak’e chirix: Naq yo’yo!” (Tzolʼlebʼ ut Sumwank 76:22). Naru naqab’i lix yaab’ xkux sa’eb’ li k’utb’esinb’il na’leb’ a’in. Naru naqak’e reetal li ruq’ a’an sa’ li qayu’am. Ut chiqajunqalo naru naqeek’a li sahil ch’oolej naq li aatin na’el: “Ninnaw naq yo’yo inKolonel!”” (“Ninnaw naq yo’yo inKolonel,” Eb’ li B’ich, 77).

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 29:5; 38:7; 62:1; 76:11–14, 20–24; 110:1–10

Yo’yo li Jesukristo.

Li Profeet aj Jose Smith kiril li Qaawa’ waklijenaq chi yo’yo naab’al sut, ut tz’iib’anb’il resil wiib’ reheb’ li hoonal a’an sa’ li Tzol’leb’ ut Sumwank. Naq yookat chirilb’aleb’ ru li tasal 76:11–14, 20–24; 110:1–10, k’a’ru naxtoch’ aach’ool chirix lix ch’olob’ahom laj Jose Smith? K’a’ut naq nim xloq’al lix ch’olob’ahom choq’ aawe?

Sa’ li Tzol’leb’ ut Sumwank, li Kolonel kixch’olob’ xyaalal lix k’anjel ut lix choxahilal. K’a’ru nakatzol chirix li yo’yookil Kristo rik’in li raatin sa’ Tzol’leb’ ut Sumwank 29:5; 38:7; 62:1? Taaruuq taak’oxla xtz’iib’ankil resileb’ li yehom jo’ a’in li nakataw naq yookat chixtzolb’al li Tzol’leb’ ut Sumwank.

Chi’ilmanq ajwi’ Jose Smith—Resilal 1:17.

Tzol’leb’ ut Sumwank 29:26–27; 42:45–46; 63:49; 88:14–17, 27–31; 93:33–34

Sa’ xk’ab’a’ li Jesukristo, laa’in tinwakliiq chi yo’yo.

Laj Jose Smith kixnaw ru li rahilal na’eek’aman naq nakam ani raab’il qab’aan. Wiib’ reheb’ li ras riitz’in, laj Alvin ut laj Don Carlos, ke’kam naq toj saaj winqeb’. Laj Jose ut li xEmma ke’xmuq sa’ ch’och’ waqib’eb’ lix kok’al chi maji’ neke’xket wiib’ chihab’ xyu’am. A’b’anan sa’eb’ li k’utb’esinb’il na’leb’ kixk’ul, laj Jose Smith kixk’ul xna’leb’ chirix li kamk ut lix junelikil k’uub’anb’il na’leb’ li Dios. K’oxlaheb’ li yaalil na’leb’ ke’k’utb’esiman sa’ Tzol’leb’ ut Sumwank 29:26–27; 42:45–46; 63:49; 88:14–17, 27–31; 93:33–34. Chan ru naq najala laa na’leb’ chirix li kamk xb’aaneb’ li k’utb’esinb’il na’leb’ a’in? Chan ru naru neke’xjal chan ru naq wankat sa’ laa yu’am?

Chi’ilmanq ajwi’ 1 Korintios 15; M. Russell Ballard, “Li k’utb’esinb’il matk’ chirix lix tojb’aleb’ rix li kamenaq,” Jolomil ch’utub’aj-ib’ re octubre 2018; Enseñanzas de los Presidentes de la Iglesia: José Smith (2007), 183–185.

Tzol’leb’ ut Sumwank 18:10–13; 19:16–19; 45:3–5; 76:69–70

Li Jesukristo kixtz’aqob’resi ru “li xtojb’al rix maak li tz’aqal re ru.”

Re xk’oxlankil li Kolonel chiru xq’ehil li Paswa, naru xtzolb’aleb’ li k’utb’esinb’il na’leb’ sa’ li Tzol’leb’ ut Sumwank li neke’k’utuk chirix lix mayej re xtojb’al qix. Junjunq reheb’ a’in naru te’tawmanq sa’ Tzol’leb’ ut Sumwank 18:10–13; 19:16–19; 45:3–5; 76:69–70. Maare taaruuq taatz’iib’a chi tustu eb’ li yaalil na’leb’ chirix lix tojb’al rix li maak xb’aan li Kolonel li nakataw sa’eb’ li raqal a’in. Re xchaab’ilob’resinkil li tzolok nakab’aanu, taaruuq taataw xkomon chik li na’leb’ choq’ re laa tustuukil aatin rik’in xtawb’aleb’ li raqal reheb’ li loq’laj hu li tz’iib’anb’ileb’ sa’ “Tojok-ix, Tojb’il rix, Tojb’al-ix” (K’utul Raqal reheb’ li Loq’laj Hu).

Wahe’ junjunq li patz’om li taaruuq te’xk’am aab’e sa’ li tzolok:

• K’a’ut naq li Jesukristo kixsik’ ru xk’ulb’al li rahilal?

• K’a’ru tento tinb’aanu re xk’ulb’aleb’ li rosob’tesihom lix mayej?

• Chan ru naru tinnaw ma yoo chi k’anjelak lix tojb’al rix li maak xb’aan a’an sa’ lin yu’am laa’in?

Qaawa’ re li tijok, xb’aan laj Yongsung Kim

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Li jolomil ch’utub’aj-ib’.Rik’in naq wan li jolomil ch’utub’aj-ib’ sa’ li domingo re Paswa sa’ li chihab’ a’in, taaruuq tatk’oxlaq chirix chan ru naq li aatin re li ch’utub’aj-ib’ (jo’eb’ ajwi’ li b’ich) taaruuq te’xnimob’resi lix nawom xch’ool laa junkab’al chirix li Jesukristo. Qayehaq, eb’ li kok’al toj ka’ch’ineb’ taaruuq te’xyiib’ xjalam-uuch li Kolonel, malaj te’xtaqsi xjalam-uuch sa’ iq’ naq neke’rab’i jun esil malaj b’ich chirix li Jesukristo. Xkomoneb’ chik li komon sa’ li junkab’al taaruuq te’xtz’iib’a chi tustu eb’ li yaalil na’leb’ neke’rab’i chirix li Kolonel. Chirix a’an, eb’ li komon sa’ li junkab’al taaruuq te’xwotz xjalam-uucheb’ malaj xtustuukil aatineb’, jo’ ajwi’ xnawomeb’ xch’ool chirix li Jesukristo.

Tzol’leb’ ut Sumwank 88:14–17; 138:17, 50.Maare taawulaq chiru laa junkab’al xk’oxlankil jun jaljookil ru aatin malaj ch’ina k’anjel re xch’olob’ankil k’a’ru naraj naxye li kamk ut li wakliik chi yo’yo—li naxk’ut li junxaqalil ut li musiq’ej chi jachjo ru, ut moqon chi junajinb’il wi’chik rib’, jo’ chanchan jun li uq’ej ut jun ramleb’ uq’. Chan ru naq eb’ li raqal a’in neke’xnimob’resi li qab’antioxihom xb’aan li kixb’aanu li Kolonel choq’ qe?

“Li Yo’yookil Kristo: Lix Ch’olob’ahomeb’ li Apostol.”Re xtikib’ankil li aatinak chirix lix nawomeb’ xch’ool li profeet re li kutan a’in chirix li Kolonel, taaruuq taaye reheb’ li junjunq komon sa’ li junkab’al naq te’ril ru jun xraqal li hu “Li Yo’yookil Kristo: Lix Ch’olob’ahomeb’ li Apostol” (ChurchofJesusChrist.org) ut te’xwotz k’a’ru xe’xtzol chirix li Jesukristo. Taaruuq ajwi’ taak’ut li vdeo “Apostle Testimony Montage” (ChurchofJesusChrist.org). K’a’ruheb’ li yaalil na’leb’ naqataw li nokohe’xmuisq’a?

“Ninnaw naq yoʼyo inKolonel.”Re xtenq’ankil laa junkab’al chixk’oxlankil li k’iila paay chan ru naq li li Kolonel li waklijenaq nokorosob’tesi anajwan, taaruuq teeb’icha sa’ komonil “Ninnaw naq yo’yo inKolonel” (Eb’ li B’ich’. 77) ut teejuntaq’eetaheb’ li yaalil na’leb’ sa’ li b’ich a’in rik’ineb’ li k’utb’ileb’ sa’eb’ li raqal a’in: Tzol’leb’ ut Sumwank 6:34; 45:3–5; 84:77; 98:18; 138:23. Maare taawulaq ajwi’ chiru laa junkab’al xtz’iib’ankil junjunqeb’ chik li tasal choq’ re li b’ich li neke’xk’ut chan ru neke’xnaw naq yo’yo lix Koloneleb’.

Re xtawb’al jun li video chirix li Paswa ut xkomon chik li k’anjeleb’aal, chi’ilmanq Easter.ComeUntoChrist.org.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Xwakli Jesus,” B’ichleb’aal choq’ reheb’ li Kok’al, 44.

Xchaab’ilob’resinkil li qak’utum

Taw li tzol’leb’ sa’ li k’a’aq re ru re wulaj wulaj. K’oxlan chirix chan ru naq li k’a’ru neke’xb’aanu li komon sa’ laa junkab’al wulaj wulaj taaruuq tixtikib’ li aatinak chirix jun yaalil na’leb’ re li evangelio (chi’ilmanq Li k’utuk jo’ li Kolonel, 4). Qayehaq, naq yoo li hab’, a’anaq jun chaab’il hoonal re aatinak chirix chan ru naq li Qaawa’ naxhoyeb’ li osob’tesink sa’ xb’eeneb’ li ralal xk’ajol.

Li Jesukristo naxk’ut rib’ chiru li Profeet aj Jose Smith ut laj Oliver Cowdery, xb’aan laj Walter Rane