“19–25 abril. Tzol’leb’ ut Sumwank 41–44: “Inchaq’rab’ re xjolominkil lin iglees,” ” Kim, Taaqehin—Choq’ reheb’ li komon ut li junkab’al: Li Tzol’leb’ ut Sumwank 2021 (2020)

“19–25 abril. Tzol’leb’ ut Sumwank 41–44,” Kim, Taaqehin—Choq’ reheb’ li komon ut li junkab’al: 2021

Jalam-uuch

Jesukristo

19–25 abril

Tzol’leb’ ut Sumwank 41–44

“Inchaq’rab’ re xjolominkil lin iglees”

“Wi tattz’aamanq,” li Qaawa’ kixye, “taak’ul chi tasal tasal li k’utb’esinb’il na’leb’, chi tasal tasal eenawom” (Tzol’leb’ ut Sumwank 42:61). K’a’ru naru taapatz’ re xk’ulb’al li k’utb’esinb’il na’leb’ nakawaj ru laa’at?

Tz’iib’a li nakak’oxla

Lix junpaatil k’iijik li Iglees sa’ 1830 ut 1831—ut eb’ li k’iila ak’ komon yookeb’ chi wulak sa’ Kirtland,Ohio—jwal kireek’asi ut kixwaklesi xch’ooleb’ laj santil paab’anel. A’b’an ke’chal ajwi’ li ch’a’ajkilal xb’aan a’in. Chan ru naru te’wanq sa’ junajil jun ch’uut chi aj paab’anel li yoo chi nimank sa’ junpaat, naq yookeb’ chixk’amb’al chaq rik’ineb’ lix tzol’leb’ ut lix na’leb’ ke’xtaw sa’eb’ li jar iglees ke’el wi’ chaq? Jo’ eetalil, naq laj Jose Smith kiwulak sa’ Kirtland sa’ xtiklajik li po febrero re 1831, kixtaweb’ li ak’ komon chixwotzb’al li k’a’ru reheb’, xb’aan naq ke’raj wank jo’eb’ aj Kristiano sa’ li Ak’ Chaq’rab’ (chi’ilmanq Hechos 4:32–37). Li Qaawa’ kixtuqub’ ru ut kixch’olob’ xyaalal li na’leb’ a’in ut xkomoneb’ chik li na’leb’, ut naab’al li raatin tz’iib’anb’il sa’ li na’leb’ k’utb’esinb’il sa’ Tzol’leb’ ut Sumwank 42, li kixye naq a’an “inchaq’rab’ re xjolominkil lin iglees” (raqal 59). Sa’ li k’utb’esinb’il na’leb’ a’in, naqatzoleb’ li yaalil na’leb’ li q’axal aajeleb’ ru sa’ xk’ojob’ankil lix Iglees li Qaawa’ sa’ roso’jikeb’ li kutan, jo’ jun xnimal ru yeechi’ihom li naxk’ut chi saqen ru naq junelik wan xkomon chik li naru xtzolb’al: “Wi tattz’aamanq, taak’ul chi tasal tasal li k’utb’esinb’il na’leb’, chi tasal tasal eenawom” (Tzol’leb’ ut Sumwank 42:61).

Chi’ilmanq ajwi’ Santos, 1:116–121.

Jalam-uuch

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 41

“Ani nakʼuluk re lin chaqʼrabʼ ut naxbʼaanu, aʼan ajwiʼ lin tzolom.”

Sa’ xtiklajik 1831, yookeb’ chi ch’utub’aak laj santil paab’anel sa’ Ohio, ut ke’royb’eni xk’ulb’al li chaq’rab’ kixyeechi’i li Dios naq tixk’utb’esi aran (chi’ilmanq Tzol’leb’ ut Sumwank 38:32). A’ut xb’een wa, li Qaawa’ kixk’ut chan ru naq eb’ lix tzolom tento te’xkawresi rib’ re xk’ulb’al lix chaq’rab’. K’a’ruheb’ li yaalil na’leb’ nakataw sa’eb’ li raqal 1–5 li ke’tenq’ank raj reheb’ laj santil paab’anel chixk’ulb’al lix chaq’rab’ li Dios? Chan ru naq eb’ li na’leb’ a’in tate’xtenq’a chixk’ulb’al aana’leb’ rik’in a’an?

Tzolʼlebʼ ut Sumwank 42

Eb’ lix chaq’rab’ li Dios neke’xb’eresi lix Iglees ut naru te’xb’eresi qayu’am.

Eb’ laj santil paab’anel ke’xk’oxla naq li k’utb’esinb’il na’leb’ wan sa’ Tzol’leb’ ut Sumwank 42:1–72 a’an jun reheb’ li q’axal nim xwankil k’ulb’il xb’aan li Profeet. A’an wan sa’ xyanqeb’ li xb’eenil li ke’puktesiman, ut kiwan sa’ wiib’ li periodico aran Ohio, ut kinawman ru jo’ “li chaq’rab’.” Naab’al reheb’ li na’leb’ sa’ li tasal a’in ak ke’k’utb’esiik xb’aan li Qaawa’ chi rub’elaj a’in. Us ta moko wankeb’ ta chixjunjunqaleb’ li taqlahom kiraj li Qaawa’ naq te’xpaab’ lix santil paab’anel, chaab’ilaq raj xk’oxlankil k’a’ut naq aajel ru xk’iilasutinkileb’ li na’leb’ a’in re li Iglees li k’ojob’anb’il chi ak’il.

Maare usaq choq’ aawe rilb’al ru li tasal 42 chi kok’ jachal jo’ tusb’il arin, ut xk’eeb’al reetaleb’ li na’leb’ k’utb’ileb’ sa’ li junjunq. Naq nakab’aanu a’in, k’oxlan chirix chan ru naq li chaq’rab’ a’in re xb’eresinkil li Iglees taak’anjelaq re xb’eresinkil laa yu’am laa’at.

Eb’ li raqal 4–9, 11–17, 56–58

Chi’ilmanq ajwi’ 3 Nefi 15:9.

Tzol’leb’ ut Sumwank 42:30–42

Chan ru naq eb’ laj santil paab’anel “ke’xq’axtesi li k’a’ru reheb’ ” re xtenq’ankileb’ li neb’a’?

Jun aajel ruhil raqal re li chaq’rab’ li k’utb’esinb’il sa’ li tasal 42 a’an li kinawman ru jo’ li chaq’rab’ re q’axtesink-ib’ ut re mertoomil. Li chaq’rab’ a’in kixk’ut chiruheb’ laj santil paab’anel chan raj ru naq, jo’eb’ laj taaqenel re li Kristo sa’ najter kutan, taawanq “chixjunil li k’a’aq re ru reheb’ sa’ komonil” (Hechos 2:44; 4 Nefi 1:3) chi “maak’a’ li neb’a’ sa’ xyanqeb’ ” (Moises 7:18). Eb’ laj santil paab’anel ke’xq’axtesi li k’a’ru reheb’ naq ke’xk’e re li Qaawa’, sa’ ruq’ li obiisp (chi’ilmanq Tzol’leb’ ut Sumwank 42:30–31). Li obiisp kixsutq’isi li k’a’ru ke’raj ru (chi’ilmanq li raqal 32)—ut chi kok’ aj xsa’ a’an li k’a’ru ak ke’xq’axtesi ut xkomon chik. Eb’ li komon ke’xq’axtesi li numenaq sa’ xb’een li nak’anjelak reheb’ choq’ reheb’ li neb’a’ (che’ilmanq li raqal 33–34). Li chaq’rab’ a’in, a’an jun nimla osob’tesink choq’ reheb’ laj santil paab’anel, q’axal wi’chik choq’ reheb’ li ani ke’kanab’ank chaq re chixjunil re wulak chaq Ohio. Ke’wan naab’aleb’ laj santil paab’anel li ke’xk’e naab’al li k’a’ru wan reheb’.

Us ta jalan li naqab’aanu anajwan, eb’ laj Santil Paab’anel sa’ Roso’jikeb’ li Kutan toj neke’xyu’ami li chaq’rab’ re q’axtesink-ib’. Naq yookat chirilb’al ru Tzol’leb’ ut Sumwank 42:30–42, k’oxla chan ru taaruuq taaq’axtesi li k’eeb’il aawe xb’aan li Dios choq’ re xkab’lankil lix awa’b’ejihom ut re xtenq’ankileb’ li wankeb’ sa’ rajb’al ru.

Chi’ilmanq ajwi’ Linda K. Burton, “Laa’in chaq aj jalanil tenamit,” Jolomil ch’utub’aj-ib’ re abril 2016; “La Ley,” Revelaciones en contexto, 98–100, history.ChurchofJesusChrist.org.

Li Kristo ut li saaj aj b’ihom, xb’aan laj Heinrich Hofmann

Tzol’leb’ ut Sumwank 42:61, 65–68; 43:1–16

Li Dios naxk’e li k’utb’esinb’il na’leb’ re xb’eresinkil lix Iglees.

K’oxla naq yookat raj chi aatinak rik’in jun ak’ komon sa’ li Iglees li jwal sa xch’ool chixnawb’al naq b’eresinb’il li Iglees xb’aan li k’utb’esinb’il na’leb’. Chan raj ru taaruuq taawoksi Tzol’leb’ ut Sumwank 43:1–16 re xch’olob’ankil chiru a’an chan ru naq li Qaawa’ naxb’eresi lix Iglees rik’in lix profeet? Chan raj ru taaruuq taawoksi Tzol’leb’ ut Sumwank 42:61, 65–68 re k’utuk chirix xk’ulb’al li k’utb’esinb’il na’leb’ sa’ junesal?

Chi’ilmanq ajwi’ “Es preciso que todas las cosas se hagan con orden,” Revelaciones en contexto, 54–57, history.ChurchofJesusChrist.org.

Jalam-uuch

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 41:1–5.K’a’ruheb’ junjunq lix chaq’rab’ li tenamit, ut chan ru neke’k’anjelak choq’ re qachaab’ilal? Chan ru nokohe’rosob’tesi lix chaq’rab’ malaj lix taqlahom li qaChoxahil Yuwa’? Eb’ li komon sa’ li junkab’al taaruuq te’xyiib’ xjalam-uucheb’ naq yookeb’ chi ab’ink chiruheb’ lix chaq’rab’ li Dios.

Tzol’leb’ ut Sumwank 42:45, 88.K’a’ raj ru tixtenq’a laa junkab’al chi “wank sa’ komonil rik’in rahok”? (chi’ilmanq ajwi’ Mosiah 4:14–15). Naru teetz’iib’a malaj teeye k’a’ruyhaq chaab’il cherib’il eerib’, malaj teeb’icha jun li b’ich chirix li rahok sa’ li junkab’al, jo’ “Naq nawan rahok” (Eb’ li B’ich, 190).

Tzol’leb’ ut Sumwank 42:61.Maare taaruuq teeril ru li raqal a’in naq yookex chixb’aanunkil jun li jorb’a-k’a’uxlej. Oksi li jorb’a-k’a’uxlej re xk’utb’al chan ru naq li Dios naxk’utb’esi lix muqmuukil na’leb’—“chi tasal tasal li k’utb’esinb’il na’leb’, chi tasal tasal li nawom.” Eb’ li komon sa’ li junkab’al taaruuq te’xwotz chan ru naq li Dios xk’utb’esi jun yaalil na’leb’ reheb’ chi junjunqil li raqal.

Tzol’leb’ ut Sumwank 43:25.Maare wan k’a’ruhaq taaruuq tixb’aanu laa junkab’al re xpak’b’al lix yaab’ li kaaq re ok chi aatinak chirix li raqal 25. Chan ru naq lix yaab’ xkux li Qaawa’ a’an chanchan “xyaab’ xkux li kaaq”? Tz’ilomaq rix sa’ komonil li raqal a’in re xtawb’al chan ru naq li Qaawa’ naru tooxb’oq chixjalb’al qak’a’uxl. K’a’ru naru taqab’aanu re naq kawresinb’ilaqo chixsumenkil lix yaab’ xkux li Qaawa’?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Tinpaab’ li evangelio,” B’ichleb’aal choq’ reheb’ li Kok’al, 72; chi’ilmanq “Li na’leb’ re xchaab’ilob’resinkil li tzolok sa’ junkab’al.”

Xchaab’ilob’resinkil li qak’utum

Kanab’ chi wank li rahok. K’a’jo’ naq na’eek’aman li Musiq’ej sa’ lee rochoch a’ yaal jo’ chanru nekera eerib’ ut jo’ chanru naq wankex sa’ xyaalal cherib’il eerib’. Tenq’aheb’ chixjunil li komon sa’ laa junkab’al chixb’aanunkil li naru chiruheb’ re taawanq li rahok-ib’ ut li chaab’ilal sa’ lee rochoch, re naq chixjunileb’ te’reek’a naq neke’ru chixwotzb’al lix na’leb’eb’, lix patz’omeb’, ut lix nawomeb’ xch’ool. (Chi’ilmanq Li k’utuk jo’ li Kolonel, 15.)