saaj chirix li santil ochoch

26 abril–2 mayo

Tzolʼlebʼ ut Sumwank 45

“Li k’a’ru yeechi’inb’il … taatz’aqloq ru”

Li Awa’b’ej Russell M. Nelson kixk’ut: “Tz’iib’a li nakaweek’a ut b’aanu li k’a’ru eetalinb’il naq tento taab’aanu” (“Li k’utb’esinb’il na’leb’ choq’ re li Iglees ut choq’ re qayu’am,” Jolomil ch’utub’aj-ib’ re abril 2018).

Tz’iib’a li nakak’oxla

Xuwajel li kutan li wanko wi’ anajwan, ut wan naq nanumta qak’a’uxl xb’aan. Jo’kan ajwi’ eb’ lix tzolom li Jesus, naq ke’rab’i chi aatinak chirixeb’ li ninqi ch’a’ajkilal re li qakutan, “keʼnumta xkʼaʼuxlebʼ ” (Tzol’leb’ ut Sumwank 45:34). Eb’ laj santil paab’anel sa’ Kirtland, Ohio ke’numta ajwi’ xk’a’uxl chirix li xuwajel kutan wankeb’ wi’. Sa’ xyanq xkomoneb’ chik na’leb’, ke’wan “kʼiila bʼalaqʼil esil ut joʼmaajoʼil seraqʼ ” li yoo chixsachb’al xwankil li esil re li evangelio (Tzol’leb’ ut Sumwank 45, xjolomil li tasal). A’b’an lix sumehom li Qaawa’, sa’ li kutan a’an jo’ ajwi’ sa’ li kutan anajwan, a’an a’in: “Minumta eekʼaʼuxl” (raqal 35). Yaal ajwi’ naq wan li maa’usilal, a’ut yaal ajwi’ naq wan reetalil naq li Dios yoo chixseeb’ob’resinkil lix k’anjel. Yaal naq wankeb’ li ch’a’ajkilal li yeeb’ileb’ resil najter naq te’uxmanq rub’elaj li xkab’ k’ulunik, ut tento naq te’qak’e reetal. Maawa’eb’ ka’ajwi’ tijom chirix li xiwxiw; a’aneb’ ajb’an wi’ reetalil naq ok re chi tz’aqlok ru li k’a’ru yeechi’inb’il xb’aan li Dios. Maare xb’aan a’in naq “kʼaʼjoʼ naq keʼsahoʼ saʼ xchʼool laj santil paabʼanel” (xjolomil li tasal) naq ke’xk’ul Tzol’leb’ ut Sumwank 45—jun k’utb’esinb’il na’leb’ li na’aatinak chirixeb’ li eetalil a’in.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 45:1–5

Li Jesukristo a’an aj Aatinanel chiqix chiru li Yuwa’b’ej.

Ma aaweek’ahom junaq sut naq moko tz’aqal ta aawe aawu malaj naq maak’a’ aak’ulub’ chiru li Dios? Maare taak’ojob’aaq aach’ool rik’in li tz’iib’anb’il sa’ Tzol’leb’ ut Sumwank 45:1–5. K’a’ru xyaalalileb’ li aatin “aj aatinanel” ut “aatinak sa’ eek’ab’a’ ” choq’ aawe? Chan ru na’aatinak li Kolonel sa’ aak’ab’a’? K’a’ru xyaalalil choq’ aawe naq li Kristo a’an aj Aatinanel chawix?

Li raatin li Awa’b’ej Joseph Fielding Smith taaruuq tatxtenq’a chixk’oxlankileb’ rix li raqal a’an: “Li Jesus a’an aj Aatinanel chiqix, na’aatinak sa’ qak’ab’a’ jo’ aj b’aanuhom quuchil rik’in lix k’anjel ut lix b’aanuhom re qak’amb’al wi’chik sa’ usilal, re qak’amb’al chi ok sa’ aatin rik’in li Dios” (sa’ Conference Report, octubre 1953, 58).

Chi’ilmanq ajwi’ 2 Nefi 2:8–9; Mosiah 15:7–9; Moroni 7:27–28; Tzol’leb’ ut Sumwank 29:5; 62:1.

Tzol’leb’ ut Sumwank 45:9–10

Li evangelio a’an jun xaqxookil eetalil choq’ reheb’ li tenamit.

Najter, jun xaqxookil eetalil a’an jun t’ikr li nak’ame’ sa’ li pleet. Ke’xmolk’a rib’ ut ke’xjunaji rib’ laj pleet rub’el li t’ikr ut a’an kixtenq’aheb’ chixnawb’al b’ar te’ch’utlaaq ut k’a’ru te’xb’aanu. Jun xaqxookil eetalil naru ajwi’ nak’anjelak jo’ jun b’isleb’ naru chi b’ise’k wi’ k’a’ruhaq chik. Naq nakawil ru Tzol’leb’ ut Sumwank 45:9–10, k’oxlan chirix chan ru naq eb’ li sumwank re li evangelio wankeb’ jo’ xaqxookil eetalil chawu. Chan ru naq jalanaq raj laa yu’am wi ta maak’a’eb’ li sumwank a’in?

Chi’ilmanq ajwi’ Isaias 5:26; 11:10–12; Tzol’leb’ ut Sumwank 115:5–6.

Tzol’leb’ ut Sumwank 45:11–75

Taatz’aqloq ru chixjunil li yeechi’inb’il xb’aan li Qaawa’.

Taawanq li pleetik, li maa’usilal, ut li nimla sache’k rub’elaj li xkab’ xk’ulunik li Kolonel. A’b’anan, “Minumta eekʼaʼuxl,” chan li Qaawa’, “xbʼaan naq joʼqʼe taakʼulmanq chixjunil li kʼaʼaq re ru aʼin, taaruuq teenaw naq li kʼaʼru yeechiʼinbʼil eere taatzʼaqloq ru” (Tzol’leb’ ut Sumwank 45:35).

Naq yooqat chixtzolb’al Tzol’leb’ ut Sumwank 45:11–75, maare ink’a’ ka’ajwi’ taak’e reetaleb’ li ch’a’ajkilal li yeeb’ileb’ resil, naru ajb’an wi’ taak’e reetaleb’ li osob’tesink li yeechi’inb’ileb’ xb’aan li Qaawa’ (qayehaq, eb’ li yeechi’ihom sa’eb’ li tasal 54–59 chirix lix awa’b’ejil li Kolonel chiru jun mil chihab’). Taaruuq taab’aanu a’in rik’in xtz’iib’ankileb’ chi tustu malaj xjuch’b’aleb’ li raqal. K’a’ru nakataw li nakatxtenq’a re naq “ink’a’ nanumta aak’a’uxl” chirix roso’jikeb’ li kutan?

Tzolʼlebʼ ut Sumwank 45:31–32, 56–57

Xaqlin sa’eb’ li na’ajej sant, ut mat-eek’asiik.

Li Kolonel ut eb’ lix profeet nokohe’xtzol chirixeb’ li reetalil li xkab’ xk’ulunik li Qaawa’ re qatenq’ankil chixkawresinkil qib’. K’a’ru nakatzol sa’ Tzol’leb’ ut Sumwank 45:31–32, 56–57 chirix xkawresinkil aawib’ choq’ re li xkab’ xk’ulunik li Qaawa’? Maare taak’anjelaq aawe rilb’al ru wi’chik li jaljookil ru aatin chirixeb’ li lajeeb’ chi tuq’ixq, li natawman sa’ Mateo 25:1–13. Li Kolonel kixjuntaq’eeta lix ya’al lix saqenkeb’ sa’ li jaljookil ru aatin a’in rik’in li yaal ut li Loq’laj Musiq’ej (chi’ilmanq Tzol’leb’ ut Sumwank 45:57). K’a’ruheb’ li na’leb’ nakak’ul naq nakawil ru li jaljookil ru aatin chi jo’ka’in?

li lajeeb’ chi tuq’ixq

Li jaljookil ru aatin chirixeb’ li lajeeb’ chi tuq’ixq, xb’aan laj Dan Burr

Tzolʼlebʼ ut Sumwank 45:11–15, 66–71

Li Sion a’an jun kolb’a-ib’ na’ajej choq’ reheb’ lix santil paab’anel li Dios.

Eb’ laj santil paab’anel sa’ xkutankil laj Jose Smith ke’raj xkab’lankil Sion, li Ak’ Jerusalen, jo’ ch’olob’anb’il sa’ lix Hu laj Mormon (chi’ilmanq Eter 13:2–9) ut sa’ lix jaltesinkil ru li Santil Hu xb’aan laj Jose Smith (chi’ilmanq Moises 7:62–64). K’a’ru nakatzol chirix Sion—li najter tenamit sa’ xkutankil laj Enok jo’ ajwi’ li tenamit re roso’jikeb’ li kutan—sa’ Tzol’leb’ ut Sumwank 45:11–15, 66–71?

Sa’ li kutan a’in, li taqlahom re xxaqab’ankil Sion na’aatinak chirix xxaqab’ankil li rawa’b’ejihom li Dios yalaq ta b’ar wanko—yalaq b’ar neke’xch’utub’ rib’ li ralal xk’ajol li Dios re xkolb’al rib’eb’ rub’el “lix sumwank li junelik nakana” (raqal 9). K’a’ru naru taab’aanu re xkab’lankil Sion sa’ li na’ajej wankat wi’?

Chi’ilmanq ajwi’ Temas del Evangelio, “Sión,” topics.ChurchofJesusChrist.org.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 45:3–5.K’a’ru naxb’aanu jun aj aatinanel choq’ qe? Taaruuq teeril li video “El mediador” (ChurchofJesusChrist.org) ut tex’aatinaq chirix k’a’ut naq nayeeman naq li Kolonel a’an aj Aatinanel chiqix.

Tzol’leb’ ut Sumwank 45:9–10.Wi ta wan junaq li “xaqxookil eetalil,” malaj t’ikr, chirix lee junkab’al, re reetalinkil li rajom eech’ool chixpaab’ankil li evangelio, chan raj ru taak’utunq? Maare taawulaq cheru xyiib’ankil sa’ komonil jun t’ikr chirix lee junkab’al, ut aatinak chirix chan ru naru teetenq’aheb’ jalan chik li kristiaan chixtaqeenkil li xaqxookil eetalil re li evangelio.

Tzol’leb’ ut Sumwank 45:32.K’a’ruheb’ li “qasantil na’aj”? K’a’ru naraj naxye naq “ink’a’ too’eek’asiiq”? K’a’ru naru taqab’aanu re naq li qochoch a’anaq jun na’ajej sant?

Tzol’leb’ ut Sumwank 45:39–44.Chan ru naru taatenq’aheb’ li komon sa’ laa junkab’al chixtawb’al ru k’a’ru naraj naxye li yo’lek re rilb’al li xkab’ xk’ulunik li Kolonel? Maare taaruuq taak’oxla k’a’ruhaq chalel li taawaj rilb’al ut taawotz chan ru naq yookat chi “yo’lek” re rilb’al a’an. Malaj taaruuq teek’uub’ junaq tzakemq sa’ komonil ut texyo’leq re rilb’al naq yo’on wan re xtzekankil. K’a’ru yooko chixb’aanunkil re yo’lek re rilb’al li xkab’ xk’ulunik li Kolonel?

Tzol’leb’ ut Sumwank 45:55.Rilb’al ru 1 Nefi 22:26 ut Apokalipsis 20:1–3 naru tixtenq’a laa junkab’al chixtawb’al ru chan ru “taab’ak’e’q” laj Satanas chiru li jun mil chihab’. Chan ru naru taqab’ak’ laj Satanas sa’ li qayu’am?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Naq taak’ulunq li Kolonel,” B’ichleb’aal choq’ reheb’ li Kok’al, 46; chi’ilmanq ajwi’ “Li na’leb’ re xchaab’ilob’resinkil li tzolok sa’ junkab’al.”

Xchaab’ilob’resinkil li tzolok aajunes

Oksiheb’ li tenq’anel k’anjeleb’aal. Oksiheb’ li kok’ tz’iib’ahom sa’eb’ li perel ut li K’utul Raqal reheb’ li Loq’laj Hu re xtawb’al xkomon laa na’leb’ chirixeb’ li loq’laj hu.

nakub’e li Kristo

Lix k’ulunik li Kristo, xb’aan laj Jubal Aviles Saenz