eb’ li kristiaan ch’utch’uukeb’ chire li ha’

Jun waklesink paab’aal, xb’aan laj Worthington Whittredge

3–9 mayo

Tzol’leb’ ut Sumwank 46–48

“Chesik’ chi anchal eech’ool eb’ li maatan q’axal chaab’il”

Naq yooqat chirilb’al ru Tzol’leb’ ut Sumwank 46–48, tz’iib’aheb’ li na’leb’ nakak’ul. Toja’ naq naru taapatzʼ, joʼ kixye li Elder Richard G. Scott, “Ma wan chik li tento tinnaw?” (“Cómo obtener guía espiritual,” Liahona, noviembre 2009, 8).

Tz’iib’a li nakak’oxla

Naq laj Parley P. Pratt, laj Oliver Cowdery, laj Ziba Peterson, ut laj Peter Whitmer, alalb’ej ke’el chaq Kirtland ut xkoheb’ sa’ jalaneb’ chik na’ajej re k’anjelak, ke’xkanab’ numenaq jun cient chi ak’ komon li k’a’jo’ x’anchalileb’ xch’ool a’ut b’ab’ay ajwi’ xnawomeb’ ut xb’eresinkileb’. Maak’a’eb’ li tenq’anel hu, eb’ li ch’utam re xtzolb’aleb’ laj jolominel, chi moko xpuktesinkileb’ li jolomil ch’utub’aj-ib’—relik chi yaal, yal junjunqeb’ ajwi’ lix Hu laj Mormon wankeb’ chaq rik’ineb’. Naab’al reheb’ li ak’ aj paab’anel a’in ke’k’ame’ rik’in li evangelio li k’ojob’anb’il wi’chik xb’aan li yeechi’ihom naq te’xnumsi lix ninqi ut sachb’a-ch’oolejil k’utb’esihom li Musiq’ej, jo’eb’ li ke’xnaw ru rik’in xtzolb’al li Ak’ Chaq’rab’ (chi’ilmanq, jo’ eetalil, 1 Korintios 12:1–11). B’ab’ay chik chirix a’an, ke’oksiman junjunqeb’ li jalanil paay chi loq’onink sa’eb’ lix ch’utam li Iglees—jo’ li t’ane’k chiru ch’och’ ut li jukukink-ib’ chanchan li k’anti’. Ke’wan naab’al li ink’a’ ke’xnaw chan ru xtz’ilb’al rix b’ar wan reheb’ li k’utb’esihom a’in a’aneb’ re li Musiq’ej ut b’ar wan li ink’a’. Naq kiril li sachok na’leb’ a’an, laj Jose Smith kitijok re xk’ulb’al xtenq’. Lix sumehom li Qaawa’ juntaq’eet xloq’al choq’ re li kutan a’in, naq wankeb’ li neke’xtz’eqtaana malaj ink’a’ neke’xk’e reetal li k’a’ru re li Musiq’ej. Li Qaawa’ kixk’utb’esi naq yaaleb’ li musiq’ejil k’utb’esihom ut kixch’olob’ k’a’ruheb’ a’an—eb’ li maatan re jun Choxahil Yuwa’b’ej aj rahonel, li “k’eeb’ileb’ choq’ re xchaab’ilaleb’ li ani neke’rahok re ut neke’paab’ank re chixjunil lix taqlahom” (Tzol’leb’ ut Sumwank 46:9).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 46:1–6

Chixjunileb’ li neke’sik’ok chi anchaleb’ xch’ool b’oqb’ileb’ chi loq’onink sa’ lix Iglees li Qaawa’.

Tento raj naq eb’ li ch’utam sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’aneb’ li ch’utam q’axal sa ut musiq’anb’il sa’ chixjunil li ruchich’och’. K’a’ru li na’leb’ naxk’e li Qaawa’ qe sa’ Tzol’leb’ ut Sumwank 46:1–6 chirix chan ru te’qak’ul li ani neke’wulak sa’eb’ li qach’utam? Ma neke’reek’a laa wamiiw ut laa wech kab’al naq k’ulb’ileb’ sa’ chaab’ilal sa’eb’ li ch’utam re laa teep? K’a’ru yookat chixb’aanunkil re naq eb’ li ch’utam sa’ li Iglees a’anaqeb’ ch’utam te’raj sutq’iik wi’ laa wech kab’al? K’oxlan chirix chan ru naq lix yalb’al aaq’e chixtaaqenkil li Santil Musiq’ej sa’eb’ lix ch’utam li Iglees naxjal li nakanumsi aran.

Chi’ilmanq ajwi’ 3 Nefi 18:22–23; Moroni 6:5–9; “Bienvenidos,” video, VenirACristo.org; “El entusiasmo religioso entre los primeros conversos de Ohio,” Revelaciones en contexto, 110–117.

Tzol’leb’ ut Sumwank 46:7–33

Li Dios naxk’eheb’ li musiq’ejil maatan re rosob’tesinkileb’ li ralal xk’ajol.

Eb’ laj santil paab’anel sa’ xtiklajik li Iglees ke’xpaab’ naq wankeb’ musiq’ejil maatan, a’b’an ki’ajman ru naq te’k’ehe’q xna’leb’ chirix k’a’ut naq wankeb’. Naq yooqat chi tzolok chirixeb’ li maatan re li Musiq’ej sa’ Tzol’leb’ ut Sumwank 46:7–33, k’oxlan chirix k’a’ut naq aajel ru naq junelik “najultiko’ qe k’a’ut naq k’eeb’ileb’ ” (raqal 8). K’oxlan chirix chan ru neke’xk’am rib’ li raqal a’in rik’in li aatin a’in kixye li Elder Robert D. Hales: “Ebʼ li maatan aʼin nekeʼkʼeheʼ rehebʼ li ani tiikebʼ chixpaabʼankil li Kristo. Toohe’xtenq’a chixnawbʼal ut chixkʼutbʼal li yaalil naʼlebʼ re li evangelio. Tooheʼxtenqʼa chirosobʼtesinkilebʼ li qas qiitzʼin. Teʼxkʼam li qabʼe chi sutqʼiik rikʼin li qaChoxahil Yuwaʼ (“Gifts of the Spirit,” Ensign, febrero 2002, 16). K’a’ chik ru nakatzol sa’eb’ li raqal a’in chirixeb’ li musiq’ejil k’utb’esihom? Chan ru naru tate’xtenq’a li yaalil na’leb’ a’in re naq “ink’a’ tatb’alaq’iiq”? (raqal 8).

K’oxlaheb’ li musiq’ejil maatan wankeb’ aawik’in—ut chan ru naru taawoksiheb’ “choq’ re xchaab’ilob’resinkileb’ li ralal xk’ajol li Dios” (raqal 26). Wi ak xak’ul jun rosob’tesihom li yuwa’b’ejil aj k’anjel, naru naq a’an naxye resil junjunqeb’ li maatan li k’eeb’ileb’ aawe.

Chi’ilmanq ajwi’ Temas del Evangelio, “Dones del Espíritu,” topics.ChurchofJesusChrist.org.

Tzolʼlebʼ ut Sumwank 47

Li Qaawa’ naraj naq lix Iglees tixtz’iib’a li resilal.

Lix b’oqb’al laj John Whitmer re xtz’iib’ankil resilal li Iglees a’an xkomon li na’leb’ re tz’iib’ank esil li b’aanunb’il xb’aan lix tenamit li Dios chalen chaq najter (chi’ilmanq 2 Nefi 29:11–12; Moises 6:5; Abraham 1:28, 31). Chi yaal, toj sa’ li kutan a’in toj wankeb’ li neke’k’anjelak jo’ aj k’uulanel esilal ut jo’ aj tz’iib’ahom sa’ li Iglees. K’a’ut nakak’oxla naq aajel ru choq’ re li Qaawa’ naq natz’iib’aman jun li esilal? K’oxlan chirix a’in naq yooqat chirilb’al ru lix na’leb’ k’eeb’il re laj John Whitmer chirix li k’anjel a’in sa’ li tasal 47. K’oxla ajwi’ k’a’ru xak’ul sa’ laa yu’am li tento raj taatz’iib’a resil. Qayehaq, k’a’ru xk’ut li Qaawa’ chawu li nakawaj xk’uulankil?

Naq yooqat chixk’oxlankileb’ li patz’om a’in, k’e reetal lix na’leb’ li Elder Marlin K. Jensen re li Setenta, li kik’anjelak jo’ aj k’uulanel esilal ut aj tz’iib’anel re li Iglees chalen 2005 toj 2012.

“Nokotz’iib’ak esil re tooruuq chixjultikankil. … Naqaj xtenq’ankileb’ li komon sa’ li Iglees chixjultikankil chan ru xnimal ru li k’a’aq re ru kixb’aanu li Dios choq’ reheb’ li ralal xk’ajol. … Li k’a’ru naqatzol rik’in li kik’ulman najter nokoxtenq’a chixkuyb’al li nokonume’ wi’ anajwan ut naxk’e qayo’onihom choq’ re li k’a’ru chalel” (“Se llevará entre vosotros una historia,” Liahona, diciembre 2007, 26, 27, 33).

Re xtzolb’al xkomon chirix li k’anjel yoo chi uxk anajwan rub’el xb’eresihom laj k’uulanel esilal re li Iglees, chi’ilmanq history.ChurchofJesusChrist.org.

aj John Whitmer

Laj John Whitmer kib’oqe’ chixtz’iib’ankil li resilal li Iglees.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 46:2–6.K’a’ru naru taqab’aanu jo’ junkab’al re xtenq’ankileb’ li qas qiitz’in chireek’ankil naq k’ulb’ileb’ sa’ chaab’ilal sa’eb’ li qach’utam sa’ li Iglees? (chi’ilmanq ajwi’ 3 Nefi 18:22–23). Li jalam-uuch li wan sa’ li tusleb’ aatin a’in naru taatenq’anq sa’ li aatinak chirix a’in.

Tzol’leb’ ut Sumwank 46:7–26.K’a’ruheb’ li musiq’ejil maatan naqil chiqib’il qib’? Chan ru naq eb’ li maatan a’an naru te’rosob’tesi li qajunkab’al?

Tzolʼlebʼ ut Sumwank 47.Chan ru naru taawaklesi xch’ooleb’ li komon sa’ laa junkab’al chixtz’iib’ankil resilal lix yu’ameb’ chiru li xamaan? Taaruuq taawotz junjunq raqal xatz’iib’a laa’at sa’ laa diario malaj jun seraq’ chirix junaq lee xe’toonil (chi’ilmanq FamilySearch.org). Wankeb’ li junkab’al li neke’xxaqab’ junjunq k’asal rajlal xamaan re te’tz’iib’aq chixjunileb’ sa’eb’ lix diario. Naru taawotz junjunq li patz’om li naru tixtenq’aheb’ chixtikib’ankil li raatineb’ sa’eb’ lix diario, jo’ “K’a’ru xk’ulman chiru li xamaan a’in li teeraj naq lee ri te’xnaw ru?” malaj “Chan ru xeril li ruq’ li Qaawa’ sa’ lee yu’am chiru li xamaan a’in?” Eb’ li kok’al toj ka’ch’ineb’ taaruuq te’xyiib’ xjalam-uuch li k’a’ru neke’xnumsi, malaj taaruuq taachap xyaab’eb’ xkux naq yookeb’ chi seraq’ik chirix xyu’ameb’. K’a’ruheb’ li osob’tesink li neke’chal rik’in xtz’iib’ankil jun “esilal chi tustu”? (raqal 1).

Tzolʼlebʼ ut Sumwank 48.Eb’ laj santil paab’anel sa’ Ohio ke’taqlaak chixwotzb’al lix ch’och’eb’ rik’ineb’ li neke’el chaq sa’ releb’aal saq’e re li Estados Unidos re wulak aran Ohio. Kʼaʼru naru taqawotz laaʼo re xtenq’ankileb’ li qas qiitzʼin?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Ma chaabʼil anajwan xinbʼaanu arin?” (Ebʼ li Bʼich, 143).

Xchaab’ilob’resinkil li qak’utum

Oksiheb’ li seraq’ ut li eetalil. Li Kolonel kok’ aj xsa’ kiroksiheb’ li seraq’ ut li jalajookil ru aatin re xk’utb’aleb’ li na’leb’ re li evangelio. K’oxlaheb’ li na’leb’ ut li seraq’ chirix tz’aqal aayu’am li te’ruuq chixtenq’ankileb’ li wankeb’ sa’ laa junkab’al chixtawb’al ru jun na’leb’ chirix li evangelio (chi’ilmanq Li k’utuk jo’ li Kolonel, 22).

kristiaan sa’ li iglees

Li qaChoxahil Yuwa’ naxk’eheb’ musiq’ejil maatan reheb’ li ralal xk’ajol re rosob’tesinkil xyu’ameb’ li ras riitz’in.