eb’ li kristiaan ch’utch’uukeb’ chire li ha’

Jun waklesink paab’aal, xb’aan laj Worthington Whittredge

3–9 mayo

Tzol’leb’ ut Sumwank 46–48

“Chesik’ chi anchal eech’ool eb’ li maatan q’axal chaab’il”

K’oxlaheb’ li kok’al nakatzoleb’ naq yooqat chirilb’al ru Tzol’leb’ ut Sumwank 46–48. Il ru li raqal “Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” li natawman sa’ xtiklajik li k’anjeleb’aal a’in re xtawb’aleb’ xkomon aana’leb’ li naru nakawoksiheb’.

Tz’iib’a li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixyiib’ankil xjalam-uuch k’a’ruhaq xe’xtzol sa’ li tzolok xnume’ malaj sa’ kab’l chiru li xamaan. Ye k’a’aq re ru reheb’ re te’jultikanq, wi na’ajman ru. Chirix a’an kanab’eb’ chi aatinak chirix lix jalam-uucheb’.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 46:2–6

Naru nintenq’aheb’ li was wiitz’in chireek’ankil naq kulb’ileb’ chi chaab’il sa’ li iglees.

Chiqajunilo laa’o, jo’eb’ ajwi’ li kok’al, naqaj naq k’ulb’ilo chi chaab’il ut nokok’ulub’aak. Chan ru naru nakawoksiheb’ li raqal a’in re xtenq’ankileb’ li kok’al chixk’ulb’aleb’ chi chaab’il li kristiaan sa’ li iglees?

Kok’ k’anjel naru chi b’aanumank

• Yaab’asi Tzol’leb’ ut Sumwank 46:5 ut ch’olob’ chiruheb’ li kok’al k’a’ru naraj naxye li raqal rik’in laa waatin. K’uteb’ xjalam-uuch kristiaan sa’ jalan jalanq na’ajej re li ruchich’och’. Patz’ reheb’ li kok’al b’ar wan reheb’ li kristiaan a’an li naraj raj li qaChoxahil Yuwa’ naq taqab’oq chi xik sa’eb’ li ch’utam re li Iglees? Tenq’aheb’ chixtzolb’al aawik’in chan ru xk’eeb’al aab’oqb’al malaj te’xk’e xb’oqb’aleb’ chirib’ileb’ rib’ chi xik sa’ junaq ch’utam malaj ch’ina k’anjel re li iglees.

• Kanab’eb’ li kok’al chixk’oxlankil naq jun ramiiweb’ taawulaq sa’ li ch’utam xb’een sut. Tenq’aheb’ chixk’oxlankil k’a’ru naru neke’xb’aanu re xk’ulb’al chi chaab’il li ramiiweb’. Kanab’eb’ chixtzolb’al k’a’ raj ru te’xye malaj k’a’ raj ru te’xb’aanu wi ta te’ril li ramiiweb’ chi ok sa’ li ch’utleb’aal malaj sa’ li tzoleb’aal xb’een sut.

Tzol’leb’ ut Sumwank 46:13–26

Lin Choxahil Yuwa’ nikinrosob’tesi rik’ineb’ li musiq’ejil maatan.

Chixjunqaleb’ li kok’al nakatzoleb’ a’an jun ralal malaj xrab’in li qaChoxahil Yuwa’ ut a’an narosob’tesiheb’ rik’in li musiq’ejil maatan.

Kok’ k’anjel naru chi b’aanumank

• Oksi Tzol’leb’ ut Sumwank 46:13–26 malaj “Ch’ol 20: Eb’ li maatan re li Musiq’ej” (Eb’ li Esilal sa’ li Tzol’leb’ ut Sumwank, 77–80) re xch’olob’ankil chiruheb’ li kok’al junjunq reheb’ li maatan naxk’e qe li qaChoxahil Yuwa’ rik’in lix Musiq’, ut k’a’ut naq naxk’e chaq qe. Wi naru, k’uteb’ k’a’aq re ru malaj jalam-uuch li te’reetali li junjunq chi maatan a’an. Tatxaqliiq junq sutaq re xpatz’b’al reheb’ chan ru naru neke’rosob’tesi anihaq rik’ineb’ li maatan a’an.

• K’e k’a’ruhaq naru nawotze’ re junaq ch’ina al, jo’ jun setel li kaxlan wa malaj wiib’ li b’atzuul. Kanab’ chixwotzb’al li k’a’ru xak’e re rik’in junaq chik komon sa’ li tzoleb’aal. Ch’olob’ naq li qaChoxahil Yuwa’ naxk’eheb’ chaq qamaatan ut a’an naraj naq te’qoksi re xtenq’ankileb’ li qas qiitz’in. Ye resil reheb’ junaq hoonal b’ar wi’ laa’at xat-osob’tesiik sa’ xk’ab’a’ naq anihaq chik xwotzeb’ lix musiq’ejil maatan.

reetalil li k‘utuk

Xk’utb’al li tzol’leb’: Kok’al ak ninqeb’

Tzolʼlebʼ ut Sumwank 46:8–26

Lin Choxahil Yuwa’ naxk’eheb’ chaq we li musiq’ejil maatan re rosob’tesinkileb’ li was wiitz’in.

Eb’ li maatan neke’ch’olob’aman sa’ Tzol’leb’ ut Sumwank 46—ut naab’aleb’ chik xkomon li musiq’ejil maatan—neke’chal chaq rik’in li Dios rik’in li Santil Musiq’ej. Laa’at naru nakatenq’aheb’ li kok’al chixk’eeb’al reetal b’ar wan reheb’ li maatan ak k’eeb’il reheb’—ut k’a’ruheb’ chik li naru neke’xsik’—naq yooqex chixtzolb’al sa’ komonil Tzol’leb’ ut Sumwank 46.

Kok’ k’anjel naru chi b’aanumank

• Tz’iib’aheb’ chiru kok’ setel hu junjunq reheb’ li musiq’ejil maatan neke’yeeman sa’ Tzol’leb’ ut Sumwank 46:13–26 ut sa’ Eb’ lix Raqalil li Paab’aal 1:7, ut muqeb’ sa’ li tzoleb’aal. Kanab’eb’ li kok’al chixsik’b’aleb’ li kok’ setel hu ut te’ril ruheb’ li raqal re naq te’xnaw b’ar natawman resilal li maatan a’an sa’eb’ li loq’laj hu. Chirix a’an ilomaq ru sa’ komonil Tzol’eb’ ut Sumwank 46:8–9, 12. Kʼaʼut naq li qaChoxahil Yuwa’ naxkʼeheb’ qe li musiqʼejil maatan?

• Tenq’aheb’ li kok’al chixtz’iib’ankil chiru li pizarron jun xtusulaleb’ li maatan re li Musiq’ej neke’yeeman sa’ Tzol’leb’ ut Sumwank 46. Rajlal sut naq te’xtaw junaq maatan, aatinanqex chirix chan raj ru naru na’oksiman re rosob’tesinkileb’ lee ras eeriitz’in. Li ch’olob’ahom neke’tawman sa’ li “Ch’ol 20: Eb’ li maatan re li Musiq’ej” (Eb’ li Esilal sa’ li Tzol’leb’ ut Sumwank, 77–80) naru neke’k’anjelak aawe. Ye reheb’ li kok’al naq chixjunileb’ wankeb’ xmusiq’ejil maatan. Waklesi xch’ooleb’ chixpatz’b’al re li qaChoxahil Yuwa’ naq tixtenq’aheb’ chixk’eeb’aleb’ reetal lix maataneb’ ut chan ru naru neke’roksi re rosob’tesinkileb’ li ras riitz’in.

Tzol’leb’ ut Sumwank 47:1, 3

Naru nintz’iib’a resil inyu’am.

Li Qaawa’ kixk’e xb’oqb’il k’anjel laj John Whitmer re naq tixtz’iib’a resilal li Iglees. Sa’eb’ li kutan a’in k’a’jo’ naq osob’tesinb’ilo sa’ xk’ab’a’ li resilal li Iglees li tz’iib’anb’il chiru chixjunileb’ li chihab’.

Kok’ k’anjel naru chi b’aanumank

• Ilomaq ru sa’ komonil Tzol’leb’ ut Sumwank 47:1, 3, ut kanab’eb’ li kok’al chixtawb’al k’a’ru kiraj li Qaawa’ naq tixb’aanu laj John Whitmer. K’a’ru naraj naxye li aatin “chi rajlal” li natawman sa’ li raqal 3? Chan ru naq osob’tesinb’ilo xb’aan naq naqanaw ru li resilal li Iglees?

• Wi eb’ li kok’al nakatzoleb’ wankeb’ jun xdiario, kanab’eb’ chi aatinak chirixeb’ li k’a’aq re ru neke’xtz’iib’a chi sa’. Maare taawulaq raj chiruheb’ rab’inkil junaq aanumsihom aatz’iib’ahom laa’at sa’ laa diario sa’ laa ka’ch’inal malaj k’a’ruhaq kixtz’iib’a chaq junaq aaxe’toonil sa’ lix diario.

• K’uteb’ chiruheb’ li kok’al eetalil re chan ru naru neke’xtz’iib’a resilal lix yu’ameb’. Qayehaq, naru neke’tz’iib’ak sa’ junaq li hu, te’xlatzeb’ jalam-uuch re jultikank, te’tz’iib’aq rik’in junaq ulul ch’iich’, malaj te’xchap li audio malaj li video. Tenq’aheb’ chixtz’iib’ankil xtusulal li k’a’aq re ru li naru neke’xk’e sa’ li resilal xyu’ameb’, jo’ lix nawom xch’ooleb’ chirix li Jesukristo. K’e xb’oqb’aleb’ chixyiib’ankil junaq letrero malaj junaq nimla perel hu li te’xk’am sa’ rochocheb’ b’ar wi’ tz’iib’anb’ilaq junjunq reheb’ li na’leb’ a’in re naq te’xtz’iib’a resilal lix yu’ameb’.

  ch’ina ixqa’al natzolok

  Eb’ li diario a’aneb’ k’uuleb’aal esilal.

Tzol’leb’ ut Sumwank 48:1–4

Naru nintenq’aheb’ li was wiitz’in naq ninwotz li k’eeb’il we.

Li Qaawa’ kixwaklesi xch’ooleb’ laj santil paab’anel aran Ohio re naq te’xwotz lix ch’och’eb’ ut lix tumineb’ re xtenq’ankileb’ xkomoneb’ chik laj santil paab’anel. Chan ru naru nakawoksiheb’ li raqal a’in re xtenq’ankileb’ li kok’al chixtawb’al chan ru naru neke’xwotz rik’ineb’ li ras riitz’in li k’a’ru xk’ehom li Dios reheb’?

Kok’ k’anjel naru chi b’aanumank

• K’ut chiruheb’ li kok’al jun reetalil ch’och’ re Nueva York ut Ohio (chi’ilmanq li tusleb’ aatin re 12 toj 18 re abril sa’ Kim, Taaqehin—Choq’ reheb’ li komon ut li junkab’al). Ch’olob’ naq li Qaawa’ kixtaqlaheb’ laj santil paab’anel re Nueva York ut jalan chik na’ajej naq te’xch’utub’ rib’ aran Ohio. A’b’anan, naab’aleb’ re a’an maak’a’eb’ xtumin re xyiib’ankil junaq rochocheb’ naq ke’wulak. Tenq’aheb’ li kok’al chixtawb’al sa’ Tzol’leb’ ut Sumwank 48:1–4 li kixpatz’ li Qaawa’ reheb’ laj santil paab’anel naq te’xb’aanu aran Ohio re tenq’ank. Patz’ reheb’ k’a’ raj ru ke’xb’aanu a’an re tenq’ank wi ta ke’wan Ohio sa’ li kutan a’an. K’a’ru k’eeb’il qe sa’eb’ li kutan a’in li naru neke’qoksi re xtenq’ankileb’ li qas qiitz’in? Jo’ jun reetalil a’an, chi’ilmanq li video “El abrigo” (video, ChurchofJesusChrist.org).

• Ilomaq ru sa’ komonil Tzol’leb’ ut Sumwank 48:4 ut kanab’eb’ li kok’al chixsik’b’al k’a’ruhaq kixpatz’ li Qaawa’ reheb’ laj santil paab’anel re tenq’ank chixb’aanunkil lix k’anjel. Ch’olob’ naq wi ta ke’xk’uula li tumin ke’ru raj chixloq’b’al xch’och’eb’ ut chixyiib’ankil junaq santil ochoch moqon. K’a’ru aj-e naru naqak’uula tumin re tenq’ank chixk’eeb’al chi uxmank lix k’anjel li Qaawa’? K’ut li video “¡Lo primero es lo primero!” (ChurchofJesusChrist.org), ut aatinanqex chirix chan ru naq eb’ li kok’al neke’el sa’ li video neke’xpaab’eb’ lix taqlahom li Qaawa’ re xk’uulankil li tumin.

reetalil li tzolok

Xb’oqb’aleb’ chi tzolok sa’ kab’l

Waklesi xch’ooleb’ li kok’al chixpatz’b’al reheb’ li komon sa’ xjunkab’aleb’ chirix junaq musiq’ejil maatan li neke’xk’oxla naq k’eeb’il reheb’. Waklesi ajwi’ xch’ooleb’ chi tijok ut chixyalb’al xq’eheb’ chixsik’b’al junaq maatan re li Musiq’ej neke’raj xtawb’al.

Xchaab’ilob’resinkil li qak’utum

Tenq’aheb’ li kok’al chixtzolb’aleb’ li loq’laj hu. Eb’ li kok’al toj ka’ch’ineb’ xyu’am maare ink’a’ neke’ru chi ilok ru hu, a’b’an toj chi jo’kan naru nakatenq’aheb’ chi tzolok sa’eb’ li loq’laj hu. Qayehaq, naru nakawil ru junaq li raqal ut nakakanab’eb’ chi xaqliik malaj chixtaqsinkil li ruq’eb’ naq te’rab’i junaq aatin malaj ch’ol aatin taaye reheb’.

perel re kok’ k’anjel: li Dios xk’ehom chaq we li musiq’ejil maatan