kaq’nab’ ha’ sa’ eq’la

10–16 mayo

Tzol’leb’ ut Sumwank 49–50

“Li k’a’ru re li Dios a’an saqen”

Naq yooqat chirilb’al ru Tzol’leb’ ut Sumwank 49–50, sik’eb’ esil malaj na’leb’ li nakaweek’a naq te’wanq xyaalal choq’ reheb’ li kok’al nakatzoleb’. Sa’ li tusleb’ aatin a’in neke’k’utman junjunq.

Tz’iib’a li nakak’oxla

reetalil li wotzok

Xkanab’ankileb’ chi wotzok

K’ut li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut tenq’aheb’ li kok’al chi aatinak chirix chan ru naq li Jesukristo a’an chanchan jun chaab’il aj ilol karneer.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 49:12–14

Naru nintaaqe li Jesukristo.

Tenq’aheb’ li kok’al chixtawb’al ru naq naru neke’xtaaqe li Jesukristo naq neke’xpaab’ a’an, naq neke’xjal xk’a’uxl, naq neke’kub’e xha’, ut naq neke’xk’ul li Santil Musiq’ej.

Kok’ k’anjel naru chi b’aanumank

• K’uteb’ xjalam-uuch kaahib’ oqej chiru hu ut kaahib’ jalam-uuch li te’reetali xpaab’ankil li Jesukristo, xjalb’al k’a’uxlej, kub’eek ha’, ut xk’ulb’al li Santil Musiq’ej. Ilomaq ru Tzol’leb’ ut Sumwank 49:12–14, ut kanab’eb’ li kok’al chixk’utb’al xjalam-uuch li yeeb’il resil sa’eb’ li raqal. Kanab’eb’ chatenq’ankil chixk’eeb’aleb’ li huhil oqej chiru li tz’ak rik’ineb’ li jalam-uuch chixk’atqeb’ ut kanab’eb’ chixk’eeb’aleb’ xhoonal chirib’ileb’ rib’ re te’b’eeq chiruheb’ li oqej. Wotz lix nawom aach’ool chirix naq rajlal sut naq naqab’aanu li k’a’ru wan sa’ li jalam-uuch yooko chixtaaqenkil li Jesukristo.

• Oksi li perel re kok’ k’anjel re li xamaan a’in re xyiib’ankileb’ kok’ muñeek li tixtenq’aheb’ li kok’al chixtzolb’al chan ru naru neke’xtaaqe li Jesukristo naq wankeb’ xpaab’aal, naq neke’xjal xk’a’uxl, naq neke’kub’e xha’, ut naq neke’xk’ul li Santil Musiq’ej.

Tzol’leb’ ut Sumwank 50:23–25

Li musiq’ejil saqen naru nawulak chi lemtz’unk chi us.

Choq’ reheb’ li kok’al toj ka’ch’ineb’ xyu’am maare ch’a’ajaq xtawb’aleb’ ru li ch’olob’ank jo’ chirix li yaal ut li musiq’ej, a’b’an naru neke’xtaw ru wi nakajuntaq’eeta rik’in li saqen jo’ naxb’aanu li Qaawa’ sa’ Tzol’leb’ ut Sumwank 50:23–25

Kok’ k’anjel naru chi b’aanumank

• B’aanu junaq ch’ina k’anjel li tixk’utb’esi chan ru naq li qamusiq’ejil saqen naru nawulak chi lemtz’umk chi us. Naru nakak’uteb’ xjalam-uuch k’a’aq re ru neke’k’ehok saqen (jo’ jun kandeel, jun pook, malaj li saq’e) ut nakakanab’eb’ li kok’al chixtuseb’ankileb’ ru a’ yaal xnimal xlemtz’unkileb’. Malaj ut, kanab’eb’ chixk’oxlankil naq a’aneb’ saqen li neke’lemtz’un chi us; choq’ re a’an, patz’ reheb’ naq te’xsulub’ b’ayaq rib’ ut te’wakliiq chi timil timil rik’in xye’b’al lix teleb’. Tenq’aheb’ chixk’oxlankil k’a’ru naru neke’xb’aanu re naq lix musiq’ejil saqeneb’ taalemtz’unq chi us.

• B’icha jun li b’ich rik’ineb’ li kok’al li na’aatinak chirix li musiq’ejil saqen, jo’ “Lemtz’un” (B’ichleb’aal choq’ reheb’ li Kok’al, 96). Ye xnawom aach’ool chirix chan ru naq li qaChoxahil Yuwa’ xatxtenq’a chixk’eeb’al chi lemtz’unk chi us laa saqen. Aatinan rik’ineb’ li kok’al chirix li saqen nakawil rik’ineb’ a’an.

Tzol’leb’ ut Sumwank 50:41–44

Li Jesukristo nikinixra.

Li Jesukristo a’an li Chaab’il aj Ilol Karneer. Laa’o lix karneer ut a’an nokoxra chi junjunqal. K’a’ru naru natenq’an reheb’ li kok’al nakatzoleb’ chireek’ankil lix rahom a’an choq’ reheb’?

Kok’ k’anjel naru chi b’aanumank

• K’ut jun xjalam-uuch li Jesukristo rik’ineb’ li kok’al (chi’ilmanq Hu reheb’ li Jalam-uuch re li Evangelio, 47, 84, malaj 116), ut patz’ reheb’ chan ru neke’xnaw naq li Jesus naxraheb’ li kok’al. Aatinan rik’ineb’ chirix chan ru nakanaw naq li Jesus nakatxra ut naxraheb’ chixjunjunqal li kok’al sa’ laa tzoleb’aal.

• Yiib’eb’ kok’ karneer rik’in hu, tz’iib’a chiruheb’ li junjunq chi karneer xk’ab’a’eb’ li kok’al sa’ laa tzoleb’aal ut muqeb’ sa’ li tzoleb’aal. K’ut jun xjalam-uuch li Kolonel ut il ru Tzol’leb’ ut Sumwank 50:41–42. Tenq’aheb’ li kok’al chixtawb’al ru li neke’xk’ut li raqal a’an chirix li nareek’a li Jesukristo choq’ reheb’ a’an. Kanab’eb’ chixsik’b’aleb’ li karneer sa’ li tzoleb’aal ut k’eheb’ chiru li pizarron chixk’atq xjalam-uuch li Jesus re naq “maajun reheb’ a’an taasachq” (raqal 42).

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 49:12–14

Naru nintaaqe li Jesukristo.

Li Qaawa’ naraj ru naq chiqajunilo taqak’ut chiruheb’ li qas qiitz’in naq naru neke’chal rik’in a’an naq neke’wan xpaab’aal, naq neke’xjal xk’a’uxl, naq neke’kub’e xha’, ut naq neke’xk’ul li maatan re li Santil Musiq’ej.

Kok’ k’anjel naru chi b’aanumank

• K’e xb’oqb’aleb’ li kok’al chixjuntaq’eetankil Tzol’leb’ ut Sumwank 49:12–14 rik’in li kixk’ut laj Pedro sa’ Hechos 2:38 ut rik’in li xkaa xraqalil li paab’aal. K’a’ru li juntaq’eet neke’xtaw? K’a’ut naq aajeleb’ ru li yaal a’an?

• K’eheb’ li kok’al sa’ ka’kab’il ut jun reheb’ a’an taareetali naq naraj xnawb’al chan ru naru naxtaaqe li Jesukristo. Li ch’ina al jun chik naru naxk’ut chiru rik’in roksinkil Tzol’leb’ ut Sumwank 49:12–14.

Tzol’leb’ ut Sumwank 49:15–17

Lix sumlajik li winq rik’in li ixq aajel ru sa’ lix k’uub’anb’il na’leb li Dios.

Eb’ li kok’al nakatzoleb’ naru neke’xtaw rib’ rik’ineb’ esil neke’jalb’ehin ch’oolej chirix li sumlaak. Tzol’leb’ ut Sumwank 49:15–17 naru naxtenq’aheb’ chixtawb’al ru li nareek’a li Qaawa’ chirix li sumlaak.

Kok’ k’anjel naru chi b’aanumank

• Ch’olob’ naq eb’ laj Shaker a’aneb’ jun ch’uut li ke’xpaab’ naq eb’ li kristiaan ink’a’ raj te’sumlaaq (chi’ilmanq li xjolomil Tzol’leb’ ut Sumwank 49). Kanab’eb’ li kok’al chixtawb’al kok’ na’leb’ kixk’ut li Qaawa’ chirix li sumlaak sa’ Tzol’leb’ ut Sumwank 49:15–17.

• Tenq’aheb’ li kok’al chixtawb’al ru k’a’ru naraj naxye li ch’ol aatin “li sumlaak k’ojob’anb’il xb’aan li Dios.” K’eheb’ sa’ ka’kab’il li kok’al ut te’xjuntaq’eeta Tzol’leb’ ut Sumwank 49:15–17 rik’ineb’ li oxib’ raqal sa’ xtiklajik “Li Junkab’al: Jun Jek’inb’il Aatin choq’ re li Ruchich’och’.” K’a’ut naq mas aajel ru li sumlaak choq’ re li qaChoxahil Yuwa’?

• B’ichahomaq sa’ komonil li xkab’ raqal re li b’ich “Taaruuq toowanq aran sa’ choxa” (B’ichleb’aal choq’ reheb’ li Kok’al, 98) malaj junaq chik li b’ich li na’aatinak chirix li junkab’al. Tenq’aheb’ li kok’al chixk’oxlankil chan ru naru neke’xkawresi rib’ re te’sumlaaq sa’ li santil ochoch sa’ jun kutan ut te’wanq jun xjunelikil junkab’al.

  jun sumal chiru li santil ochoch

  Li sumlaak wan wiʼ jun winq rikʼin jun ixq, kʼojobʼanbʼil xbʼaan li Dios.

Tzol’leb’ ut Sumwank 50:40–46

Li Jesukristo a’an li Chaab’il aj Ilol Karneer.

Sa’ Tzol’leb’ ut Sumwank 50:40–46 wankeb’ eetalil li naru naxtenq’aheb’ li kok’al nakatzoleb’ chixtawb’al ru k’a’ru nareek’a li Kolonel choq’ reheb’.

Kok’ k’anjel naru chi b’aanumank

• Yiib’ jun b’atz’unk re xk’ulinkileb’ ru ch’ol aatin re Tzol’leb’ ut Sumwank 50:40–46. Qayehaq, naru nakatz’iib’a “Mexxuwak, ex kok’al” chiru jun ch’ina setel hu li tixk’ul rib’ rik’in jun chik li tixye “xb’aan naq wehex” (raqal 41). Ilomaq ru sa’ komonil Tzol’leb’ ut Sumwank 50:40–46. Chirix a’an jek’iheb’ li kok’ setel hu chiru li tz’ak, chiru jun li meex, malaj chiru li pizarron, ut kanab’eb’ li kok’al chixk’ulinkileb’ rib’. K’a’ru neke’xk’ut chiqu li ch’ol aatin a’an chirix li Jesukristo?

• Re xtenq’ankileb’ li kok’al chixtawb’al ru naq li Qaawa’ a’an chanchan jun chaab’il aj ilol karneer, kanab’eb’ chirilb’al ru sa’ komonil Tzol’leb’ ut Sumwank 50:40–46. Chirix a’an k’ut li video “Jesús declara la parábola de la oveja perdida” (ChurchofJesusChrist.org), ut kanab’eb’ chixk’eeb’al reetal k’a’ruhaq sa’ li video li tixjultika reheb’ k’a’ruhaq xe’ril ru sa’ li hu. Chan ru naq nokoxxok li Jesus? Chan ru naru nokowan jo’ chaab’il aj ilol karneer choq’ reheb’ li qas qiitz’in?

reetalil li tzolok

Xb’oqb’aleb’ chi tzolok sa’ kab’l

Kawresi junaq ch’ina hu choq’ reheb’ li junjunq chi kok’al rik’ineb’ li aatin a’in: Patz’on we chirix . Kanab’eb’ li kok’al chixnujob’resinkil li yamyo rik’in k’a’ruhaq xe’xtzol sa’ li tzoleb’aal (wi na’ajman ru, tenq’aheb’) ut k’eheb’ li kok’ hu chiruheb’ lix t’ikr re naq te’aatinaq chirix a’an sa’ kab’l.

Xchaab’ilob’resinkil li qak’utum

Jaleb’ li kok’ k’anjel a’ yaal lix chihab’eb’ li kok’al nakatzoleb’. Naq yookeb’ chi k’iik li kok’al, mas neke’ok chi tenq’ank sa’ li tzoleb’aal. Yoo chi nimank lix nawomeb’ ut maare moko ch’a’ajaq ta chik choq’ reheb’ xwotzb’al li neke’xk’oxla. Wi nakatzoleb’ li kok’al toj ka’ch’ineb’ xyu’am, maare tento taach’olob’eb’ chi us li k’a’aq re ru. Junelik k’eheb’ xhoonal li kok’al chi tz’aqonk yal xjuneseb’ rib’ ut chirix a’an tenq’aheb’ wi na’ajman ru.

perel re kok’ k’anjel: naru nintaaqe li Jesukristo