26 abril–2 mayo

Tzolʼlebʼ ut Sumwank 45

“Li k’a’ru yeechi’inb’il … taatz’aqloq ru”

Jo’ aj k’utunel, lix kawresinkil aawib’ li tz’aqal aajel ru a’an re musiq’ej. Tikib’ xtzolb’al Tzol’leb’ ut Sumwank 45 ut tijon re xk’ulb’al aab’eresinkil rik’in li Santil Musiq’ej. Sa’ li tusleb’ aatin a’in neke’k’eeman na’leb’ li naru nakawoksiheb’. Naru ajwi’ nakataweb’ aana’leb’ sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al malaj sa’eb’ li hu Liahona malaj Amigos.

Tz’iib’a li nakak’oxla

Xkanab’ankileb’ chi wotzok

Patz’ reheb’ li kok’al ma taawulaq raj chiruheb’ xwotzb’al k’a’ruhaq xe’xtzol sa’eb’ li loq’laj hu chiru li xamaan. Sik’ ru junaq reheb’ re naq tixwotz k’a’ruhaq ut ye reheb’ li jun siir chik naq te’xtaqsi li ruq’ wi xe’xtzol k’a’ruhaq chanchan a’an.

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 45:32

Naru “tinxaqliiq sa’eb’ li na’ajej sant.”

Sa’ Tzol’leb’ ut Sumwank 45:32, li Qaawa’ kixk’ut naq eb’ lix tzolom te’xtaw xkolb’aleb’ rix sa’ roso’jikeb’ li kutan wi neke’xaqli sa’eb’ li na’ajej sant—eb’ li na’ajej ninqeb’ xloq’al choq’ re li Qaawa’. Chan ru naru nakatenq’aheb’ li kok’al chixk’eeb’aleb’ reetal li na’ajej sant li wan sa’ xyu’ameb’?

Kok’ k’anjel naru chi b’aanumank

• K’eheb’ xjalam-uuch jun ochoch, jun ch’utleb’aal, ut jun santil ochoch sa’ jalan jalanq na’ajej re li tzoleb’aal. K’eheb’ kok’ tenq’ re xtawb’aleb’ naq yooqat chi aatinak chirixeb’ li na’ajej a’an ut kanab’eb’ li kok’al chi xaqliik chixk’atq li jalam-uuch li yooqat wi’ chi aatinak. Il ru li xb’een ch’ol aatin sa’ Tzol’leb’ ut Sumwank 45:32. Ch’olob’ xyaalal naq osob’tesinb’ilo rajlal sut naq nokoxaqli sa’eb’ li na’ajej sant jo’ li qochoch, eb’ li ch’utleb’aal, ut li santil ochoch. Kanab’eb’ li kok’al chixyeeb’al k’a’ru neke’reek’a naq neke’wan sa’eb’ li na’ajej sant jo’eb’ a’an.

• Kanab’eb’ li kok’al chixtz’aqob’resinkil ru li perel re kok’ k’anjel re li xamaan a’in. Tenq’aheb’ chixtz’iib’ankil “Naru nintenq’an re naq li wochoch a’anaq jun na’ajej sant” ut “Tzol’leb’ ut Sumwank 45:32” sa’eb’ lix jalam-uuch. K’a’ru naru neke’xb’aanu re tenq’ank re naq eb’ li rochoch a’anaq jun na’ajej sant?

• Re xtenq’ankileb’ li kok’al chixk’oxlankil k’a’ru naraj naxye “ut ink’a’ te’eek’asiiq,” ye reheb’ naq te’kanaaq chi ch’anch’o chi ink’a’ te’eek’anq chiru jun k’asal. Il ru li xb’een ch’ol aatin sa’ Tzol’leb’ ut Sumwank 45:32. Tenq’aheb’ li kok’al chixtawb’al ru naq “xaqliik sa’eb’ li na’ajej sant ut ink’a’ te’eek’asiiq” naraj naxye xsik’b’al ru li k’a’ru us sa’ chixjunil li hoonal, maak’a’ na’ajman re li yooq chi k’ulmank. K’e xb’oqb’aleb’ naq “ink’a’ te’eek’asiiq” sa’eb’ lix k’a’uxleb’aal ut sa’eb’ lix b’aanuhomeb’ li tiik.

Tzol’leb’ ut Sumwank 45:44–45

Li Jesukristo taak’ulunq wi’chik.

Naq eb’ laj santil paab’anel aran Kirtland, Ohio ke’rab’i li k’utb’esinb’il na’leb’ natawman sa’ Tzol’leb’ ut Sumwank 45, li na’aatinak chirix roso’jikeb’ li kutan ut chirix li xkab’ xk’ulunik li Kolonel, ke’xk’ul chi sa sa’ xch’ooleb’. K’oxla chan ru naq taatenq’aheb’ li kok’al chixkawresinkileb’ rib’ chi sa sa’ xch’ooleb’ choq’ re li xkab’ xk’ulunik li Qaawa’.

Kok’ k’anjel naru chi b’aanumank

• Tenq’aheb’ li kok’al chixk’oxlankil k’a’ru neke’reek’a rajlal sut naq neke’rab’i naq junaq kristiaan taawulaq chirula’aninkileb’, maare xmama’eb’ malaj junaq ramiiweb’. Chan ru neke’xkawresi rib’ choq’ re li ula’anank a’an? K’ut jun xjalam-uuch li Kolonel ut il ru jun jachal malaj chixjunil Tzol’leb’ ut Sumwank 45:44–45. Ye reheb’ li kok’al k’a’ru nakaweek’a laa’at chirix lix k’ulunik wi’chik li Kolonel ut kanab’eb’ chixwotzb’al li reek’ahomeb’ a’an.

• K’ut jun xjalam-uuch li xkab’ xk’ulunik li Kolonel (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al) ut patz’ reheb’ li kok’al naq te’xwotz li k’a’ru neke’reek’a naq neke’ril li jalam-uuch. Wotz lix nawom aach’ool naq li Jesukristo taak’ulunq wi’chik.

• B’ichahomaq sa’ komonil jun li b’ich na’aatinak chirix li xkab’ xk’ulunik li Kolonel, jo’ “Naq taak’ulunq li Kolonel” (B’ichleb’aal choq’ reheb’ li Kok’al, 46–47). Rik’in roksinkil raatinul li b’ich, aatinan chirix chan ru naru naqakawresi qib’ choq’ re lix k’ulunik li Jesus, jo’ xb’aanunkil li naraj li Dios ut xk’eeb’al chi k’utunk li qasaqen chiruheb’ li qas qiitz’in.

Xk’utb’al li tzol’leb’: Kok’al ak ninqeb’

Tzol’leb’ ut Sumwank 45:3–5

Li Jesukristo aʼan laj aatinanel chiqix chiru li Yuwaʼbʼej.

Chan ru taatenq’aheb’ li kok’al chixnimob’resinkil lix paab’aaleb’ chirix naq li Jesukristo a’an laj aatinanel chirixeb’? Chan ru naq xatzol a’an aajunes aawib’?

Kok’ k’anjel naru chi b’aanumank

• Tz’iib’aheb’ junjunq li aatin ut li ch’ol aatin neke’tawman sa’ Tzol’leb’ ut Sumwank 45:3–5 chiruheb’ kok’ setb’il hu. K’e jun k’asal xhoonaleb’ li kok’al re naq te’xtzoleb’ li raqal a’an sa’eb’ lix loq’laj hu ut chirix a’an kanab’eb’ chixtz’apb’aleb’ ut te’xtuseb’ ru li aatin ut li ch’ol aatin tz’iib’anb’ileb’ chiru kok’ setb’il hu jo’ chanru naq wankeb’ sa’eb’ li raqal. Jo’ neke’xye li raqal a’an, k’a’ru naxye li Kolonel re aatinak chiqix chiru li qaChoxahil Yuwa’?

• Tenq’aheb’ li kok’al chixtawb’al xch’olob’ankil li aatin aj aatinanel. Maare te’xsik’ sa’ junaq xtusulal aatin. K’a’ru kixb’aanu li Kolonel re xk’eeb’al chi uxmank naq a’anaq raj laj aatinanel chiqix? Wotz laa week’ahom chirix li xb’aanuhom li Jesukristo choq’ qe, ut kanab’eb’ li kok’al chixwotzb’al li neke’reek’a.

Tzol’leb’ ut Sumwank 45:9

Lix evangelio li Jesukristo a’an jun saqen choq’ re li ruchich’och’.

Tenq’aheb’ li kok’al nakatzoleb’ chixk’oxlankil chan ru naq li evangelio naxkawresi li ruchich’och’ choq’ re li xkab’ xk’ulunik li Kolonel.

Kok’ k’anjel naru chi b’aanumank

• K’uteb’ xjalam-uuch jun saqen ut jun bandera, malaj ut, yiib’eb’ xjalam-uuch chiru li pizarron. Kanab’eb’ li kok’al chirilb’al ru Tzol’leb’ ut Sumwank 45:9 ut te’xk’oxla chan ru naq li evangelio a’an chanchan jun li saqen, jun eetalil (malaj jun bandera) ut jun aj k’amol esil. Wi nakawaj, naru nakach’olob’ naq junxil chaq, jun eetalil a’an jun bandera li nak’ame’ sa’ li pleetik. Nak’anjelak re naq eb’ laj pleet te’xnaw b’ar te’xch’utub’ rib’ ut k’a’ru te’xb’aanu.

  

  Li eetalil re ach’ab’aak, xb’aan laj Larry Conrad Winborg

• Tenq’aheb’ li kok’al chixkanab’ankil sa’ xk’a’uxleb’ chixjunil malaj jun raqal re li raqal 9 rik’in xtz’iib’ankil chiru li pizarron ut xsachb’esinkil junjunq li aatin sa’ xyanq.

Tzol’leb’ ut Sumwank 45:37–38

Li Jesukristo taak’ulunq wi’chik.

Maare naru neke’xuwak li kok’al naq neke’ril ru resileb’ li pleetik, li maak, ut li sache’k yeeb’il sa’ profeetil aatin naq taak’ulmanq rub’elaj xkab’ xk’ulunik li Kolonel. Chan ru naru nakatenq’aheb’ chiroyb’eninkil rik’in sahil ch’oolejil li kutan a’an?

Kok’ k’anjel naru chi b’aanumank

• Patz’ reheb’ li kok’al chan ru naq neke’xnaw naq yoo chaq chi nach’ok li hab’alq’e malaj li saq’ehil. K’a’ru li eetalil neke’xsik’? Ch’olob’ naq chanchan naq wankeb’ reetalil li hab’alq’e malaj li saq’ehil, wankeb’ ajwi’ reetalil li xkab’ xk’ulunik li Qaawa’. Ilomaq ru sa’ komonil Tzolʼlebʼ ut Sumwank 45:37–38. K’a’ru kixye li Jesus chirixeb’ li reetalil li xkab’ xk’ulunik? Re xtenq’ankileb’ li kok’al chixk’eeb’aleb’ reetal li eetalil li tento te’qak’e reetal, patz’ reheb’ li junjunq chi kok’al (malaj kok’ ch’uut) naq te’ril ru junjunq reheb’ li raqal sa’ Tzol’leb’ ut Sumwank 45 li neke’aatinak chirixeb’ li eetalil a’an. Qayehaq, naru neke’ril ru li raqal 26–27, 31–33, 40–42. Kanab’eb’ li kok’al chixwotzb’al li te’xtaw. B’ar wan rehebʼ li eetalil yookebʼ chi tzʼaqlok ru sa’eb’ li kutan a’in?

• Tz’iib’a chiruheb’ kok’ setb’il hu junjunq reheb’ li yeechi’ihom chirixeb’ li junjunq k’a’aq re ru te’k’ulmanq moqon li xataweb’ sa’ xtzolb’al li tasal 45. Junjunqeb’ reetalil li yeechi’ihom a’an neke’tawman sa’eb’ li raqal 44–45, 51–52, 55, 58–59, 66–71. Tz’iib’a chiru li pizarron xtusulaleb’ li raqal b’ar wi’ neke’tawman li yeechi’ihom. K’eheb’ li kok’ setb’il hu reheb’ li kok’al ut kanab’eb’ chiroksinkileb’ lix loq’laj huheb’ re xk’ulinkileb’ li raqal wankeb’ chiru li pizarron rik’ineb’ li yeechi’ihom. Aatinanqex chirix k’a’ru naraj neke’xye li yeechi’ihom, ut kanab’eb’ li kok’al chixwotzb’al b’ar wan reheb’ li yeechi’ihom neke’reek’a wi’ xsahileb’ xch’ool chirix li xkab’ xk’ulunik li Kolonel.

Xb’oqb’aleb’ chi tzolok sa’ kab’l

Kanab’eb’ li kok’al chixk’oxlankil junaq k’a’aq re ru xe’xtzol sa’ li tzolok li naru neke’xwotz rik’ineb’ lix junkab’al. Patz’ reheb’ junjunq naq te’xwotz sa’ li tzoleb’aal li k’a’ru neke’raj xwotzb’al sa’ rochocheb’.

Xchaab’ilob’resinkil li qak’utum

Tenq’aheb’ li kok’al chixk’eeb’al reetal li Musiq’ej. Naq yooqat chixtzolb’aleb’ li kok’al, ye reheb’ jo’q’e nakaweek’a li Santil Musiq’ej. Aatinan chirix chan ru nakak’e reetal naq wan li Musiq’ej. Qayehaq, maare sa’ xb’ichankil junaq li b’ich chirix li Kolonel nakaweek’a li tuqtuukilal malaj sahil ch’oolejil. Naq nakat-aatinak chirixeb’ li eek’ahom, a’an tixtenq’aheb’ li kok’al chixk’eeb’al reetal li hoonal b’ar wi’ neke’reek’a li Musiq’ej.