“22–28 marzo. Tzolʼlebʼ ut Sumwank 29: “Li Jesukristo tixch’utub’ lix tenamit,” ” Kim, Taaqehin—Choq’ reheb’ li komon ut li junkab’al: Li Tzol’leb’ ut Sumwank 2021 (2020)
“22–28 marzo. Tzolʼlebʼ ut Sumwank 29,” Kim, Taaqehin—Choq’ reheb’ li komon ut li junkab’al: 2021
Li junjunq xb’een aqej taab’asmanq, xb’aan laj J. Kirk Richards
22–28 marzo
Tzolʼlebʼ ut Sumwank 29
Li Jesukristo tixch’utub’ lix tenamit
Jun reheb’ li ajom re xtz’olb’aleb’ li loq’laj hu a’an xtzolb’aleb’ li tzol’leb’, malaj li yaalil na’leb’ re li evangelio li aajeleb’ ru choq’ re li qakolb’al. Naq yookat chirilb’al ru Tzol’leb’ ut Sumwank 29 chiru li xamaan a’in, sik’eb’ li musiq’anb’il na’leb’ chirix li tzol’leb’ li wankeb’ xloq’al choq’ aawe.
Tz’iib’a li nakak’oxla
Us ta kik’uub’aman lix Iglees li Jesukristo sa’ 1830, toj ke’wan k’iila yaalil na’leb’ chirix li evangelio li toj te’k’utb’esimanq, ut ke’wan xpatz’omeb’ junjunq reheb’ li xb’eenil komon sa’ li Iglees. Ke’rileb’ ru li profeetil aatin sa’ lix Hu laj Mormon chirix lix ch’utub’ankil Israel ut lix waklesinkil Sion (chi’ilmanq 3 Nefi 21). Chan raj ru taa’uxmanq a’an? Li k’utb’esinb’il na’leb’ kixye laj Hiram Page naq kixk’ul na’aatinak chirix li na’leb’ a’an, ut xb’aan a’in naq eb’ li komon ke’raj xnawb’al (chi’ilmanq Tzol’leb’ ut Sumwank 28). Wankeb’ chik li ke’wan xk’a’uxl chirix lix t’anik laj Adan ut li xEva ut chirix li kamk sa’ musiq’ej. Li Qaawa’ kixk’uleb’ chi sa xch’ool li patz’om a’in sa’ 1830: “Yalaq k’a’ru teetz’aama rik’in paab’aal,” chan reheb’ laj santil paab’anel, “chi wankex sa’ junajil chi tijok jo’ chanru lin taqlahom, a’an teek’ul” (Tzol’leb’ ut Sumwank 29:6). Jo’kan ajwi’ sa’ li qakutan naxk’uleb’ chi sa xch’ool li qapatz’om laa’o; yal yoo chiroyb’eninkil naq toopatz’oq chiru rik’in tijok. Ut jo’ naru naqak’e reetal rik’in xninqaleb’ ru li tzol’leb’ k’utb’esinb’ileb’ sa’ Tzol’leb’ ut Sumwank 29, wan naq a’an nasumen rik’in xk’eeb’al qe li yaal ut li nawom li neke’xq’ax ru li xqapatz’ sa’ xtiklajik.
Li na’leb’ re xtzolb’aleb’ li loq’laj hu aajunes
Li qaChoxahil Yuwa’ kixkawresi jun k’uub’anb’il na’leb’ tz’aqal re ru choq’ re li qakolb’al.
Tzol’leb’ ut Sumwank 29 naxk’ut naab’aleb’ li yaalil na’leb’ chirix lix k’uub’anb’il na’leb’ li Dios choq’ reheb’ li ralal xk’ajol. Naq yookat chirilb’al ru, sik’eb’ li yaalil na’leb’ nakatzol chirixeb’ li na’leb’ a’in re li k’uub’anb’il na’leb’:
-
Li yu’am naq maji’ nokoyo’la (che’ilmanq li raqal 36–37)
-
Li yo’ob’tesink (che’ilmanq li raqal 31–33)
-
Lix t’anik laj Adan ut li xEva (che’ilmanq li raqal 40–41)
-
Li yu’am sa’ ruchich’och’ (che’ilmanq li raqal 39, 42–45)
-
Lix tojb’al rix li maak xb’aan li Jesukristo (che’ilmanq li raqal 1, 42–43, 46–50)
-
Li wakliik chi yo’yo (che’ilmanq li raqal 13, 26)
-
Li raqb’a-aatin sa’ roso’jik (che’ilmanq li raqal 12–13, 27–30)
K’a’ruheb’ li ak’ na’leb’ xak’ul? Chan raj ru laa yu’am wi ta ink’a’ xanaweb’ li yaalil na’leb’ a’in?
Naru taatzol xkomon chik li na’leb’ chirix lix k’uub’anb’il na’leb’ li qaChoxahil Yuwa’ sa’ “El Plan de Salvación” (Predicad Mi Evangelio: Una guía para el servicio misional, rev. ed. [2018], ChurchofJesusChrist.org/manual/missionary).
Li Jesukristo tixch’utub’eb’ lix tenamit rub’elaj li xkab’ xk’ulunik.
Li Jesukristo na’aatinak chirix xch’utub’ankileb’ lix tenamit “jo’ chanru ajwi’ jun xan kaxlan naxch’utub’eb’ lix kok’ kaxlan rub’el xxik’ ” (Tzol’leb’ ut Sumwank 29:2). K’a’ru naxk’ut li na’leb’ a’an chirix li rajom xch’ool li Kolonel re aach’utub’ankil? Naq yookat chirilb’al ru Tzol’leb’ ut Sumwank 29:1–8, sik’eb’ li na’leb’ chirix k’a’ut naq naqach’utub’ qib’, ani te’xch’utub’ rib’, ut chan ru naru tootenq’anq chixch’utub’ankileb’ li “sik’b’ileb’ ru” (raqal 7).
Sa’ li qakutan, xch’utub’ankil Sion a’an naraj naxye xch’utub’ankil qib’ sa’ junajil sa’eb’ li oqech re Sion chiru chixjunil li ruchich’och’. Chan ru naq xch’utub’ankil qib’ jo’ aj santil paab’anel nokoxtenq’a re “tookawresimanq sa’ chixjunil li k’a’aq re ru” choq’ reheb’ li ch’a’ajkilal te’chalq rub’elaj xkab’ xk’ulunik li Kolonel? (raqal 8; che’ilmanq ajwi’ li raqal 14–28).
Chi’ilmanq ajwi’ Eb’ lix Raqalil li Paab’aal 1:10; Russell M. Nelson ut Wendy W. Nelson, “Juventud de Israel” (ch’utam choq’ reheb’ li saaj sa’ chixjunil li ruchich’och’, 3 junio, 2018, ChurchofJesusChrist.org).
Jarub’aq sut, xb’aan li xLiz Lemon Swindle
“Choq’ we laa’in, chixjunil li k’a’aq re ru a’an re musiq’ej.”
Chan ru naq re musiq’ej chixjunileb’ li taqlahom? Rik’in xnawb’al naq re musiq’ej chixjunileb’ li taqlahom, k’a’ru nakatzol chirix k’a’ut naq wankeb’ li taqlahom? Taaruuq taatz’iib’a junjunqeb’ li taqlahom, ut taak’oxlaheb’ li musiq’ejil na’leb’ chirix li junjunq.
K’a’ raj ru taajalmanq sa’ laa yu’am wi taasik’ li musiq’ejil na’leb’ malaj ajom sa’ li nakab’aanu wulaj wulaj, us ta li k’a’ru chanchan naq maak’a’ rilom rik’in li k’a’ru re musiq’ej?
Chi’ilmanq ajwi’ Romanos 8:6; 1 Nefi 15:30–32.
Li Jesukristo naxtoj qix chiru li t’ane’k.
Sa’ xtiklajik li k’utb’esinb’il na’leb’ a’in, li Qaawa’ naxye naq a’an aj Tojol qix, li “tojb’il wi’ rix li qamaak” (raqal 1). Li k’utb’esinb’il na’leb’ naxch’olob’ ajwi’ k’a’ut naq naqaj ru jun aj Tojol qix. K’oxla chan raj ru taawoksiheb’ li raqal 36–50 re xch’olob’ankil k’a’ut naq naqaj ru lix tojb’al qix li nachal rik’in li Kolonel Jesukristo. Sa’ naab’aleb’ paay chi paab’aal, li t’ane’k ilb’il jo’ jun nimla rahilal; k’a’ru nakataw sa’eb’ li raqal a’in li naxk’ut li k’a’ru chaab’il kichal xb’aan li t’ane’k? (Chi’ilmanq ajwi’ 1 Korintios 15:22; 2 Nefi 2:6–8, 15–29; Mosiah 3:1–19; Moises 5:9–12.)
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Tzolʼlebʼ ut Sumwank 29.Taaruuq taawoksiheb’ li jalam-uuch wankeb’ sa’ xraqik li tusleb’ aatin a’in jo’ ajwi’ Tzol’leb’ ut Sumwank 29 re xtzolb’al laa junkab’al chirix li k’uub’anb’il na’leb’ re li kolb’a-ib’. Qayehaq, eb’ li komon sa’ li junkab’al taaruuq te’tzoloq chirix junjunqeb’ xraqalil li k’uub’anb’il na’leb’ rik’in rilb’al ru ut aatinak chirixeb’ li raqal li yeeb’ileb’ resil arin. Taaruuq te’xtaw xkomon chik li yaalil na’leb’ sa’ Temas del Evangelio (topics.ChurchofJesusChrist.org) malaj sa’ li K’utul Raqal reheb’ li Loq’laj Hu. Tz’iib’a li k’a’ru nakatzol. K’a’ut naq naqab’antioxi naq naqanaw li k’uub’anb’il na’leb’ re li kolb’a-ib’? Chan ru naq xnawb’al a’an wan xwankil sa’ li qayu’am wulaj wulaj?
-
Tzol’leb’ ut Sumwank 29:2, 7–8.K’a’ru naraj naxye naq li Kolonel nokoxch’utub’? K’a’ru naru taqab’aanu re xtenq’ankil chixch’utub’ankil li sik’b’ileb’ ru?
-
Tzol’leb’ ut Sumwank 29:3–5.K’a’ru naqatzol chirix li Kolonel sa’eb’ li raqal a’in li nokoxtenq’a “chixwaklesinkil qach’ool ut chi saho’k qach’ool”? (raqal 5). Li video “We Can Find Happiness” (ChurchofJesusChrist.org) taaruuq texxtenq’a chi aatinak chirix chan ru naq xnawb’al chirix li k’uub’anb’il na’leb’ re li kolb’a-ib’ naxk’am li sahil ch’oolejil sa’ lee junkab’al.
-
Tzol’leb’ ut Sumwank 29:34–35.Rilb’aleb’ ru li raqal a’in taaruuq tixk’e xhoonaleb’ laa junkab’al chi aatinak chirix li musiq’ejil xyaalalil junjunq reheb’ li taqlahom malaj profeetil aatin li yookex chixyalb’al eeq’e chixtaaqenkil. Qayehaq, k’a’ut naq li Qaawa’ naraj naq taqileb’ ru li loq’laj hu jo’ junkab’al? K’a’ruheb’ li musiq’ejil usilal qilom rik’in xpaab’ankileb’ li taqlahom?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Ex aj Israel, ab’ihomaq,” Eb’ li B’ich, 6.
Xchaab’ilob’resinkil li qak’utum
Sik’ li Jesukristo. Eb’ li loq’laj hu neke’xk’ut chiqu naq chixjunileb’ lix yo’ob’tesihom li Dios neke’xch’olob’ xyaalal li Jesukristo (chi’ilmanq Moises 6:62–63). Chi jo’kan, sik’ a’an naq yookat chirilb’aleb’ ru li loq’laj hu. K’oxla xtz’iib’ankil malaj xjuch’b’aleb’ li raqal li neke’k’utuk chirix a’an.