Laufanua o Misuri

Springhill, Itumalo o Daviess, Misuri, saunia e Garth Robinson Oborn

7–13 Iuni

Mataupu Faavae ma Feagaiga 63

“O le Mea e Sau Mai Luga ua Paia”

Tusi Faamaumau ou lagona uunaia a o e suesue i le Mataupu Faavae ma Feagaiga 63. Atonu e foliga itiiti se uunaiga, e pei o se fatu, e mafai ona tupu i se mea e taua ma fuatele mai ao e sailia ma manatunatu pea.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia fesoasoani e taulai atu lau talanoaga i fuaitau e maua e tagata o le vasega e sili le taua, e mafai ona e tusia i ni fasi pepa nisi o fuaiupu mai le vaega 63 o le a latou mananao e talanoaina. Ona mafai lea ona e aoina mai faatasi pepa ma amata talanoaina fuaiupu na fautuaina mai e le tele o tagata o le vasega. Fai atu ia i latou e faasoa mai pe aisea na latou filifilia ai nei fuaiupu.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 63:7–12

O faailoga e oo mai i le faatuatua ma le finagalo o le Atua.

• Ina ia amata se talanoaga i mataupu faavae o aoaoina i le Mataupu Faavae ma Feagaiga 63:7-12, atonu e fesoasoani le iloilo o ni nai faataitaiga i tusitusiga paia o tagata na molimauina ni faailoga ma ni vavega. Atonu e mafai ona mafaufau tagata o le vasega i ni faataitaiga o tagata na faamalosia o latou faatuatua e ala i se faailoga (tagai, mo se faataitaiga, Luka 1:5–20, 59–64) po o tagata na faavaivai e tusa lava pe ua uma ona molimauina se faailoga (tagai, mo se faataitaiga, 1 Nifae 3:27–31; Alema 30:43–56). Ona mafai lea e tagata o le vasega ona faaaoga mea na latou aoaoina i le Mataupu Faavae ma Feagaiga 63:7-12 e faamatala ai nei uiga eseese i faailoga. Pe mafai ona e iloiloina isi fuaitau o tusitusiga paia e uiga i faailoga, e pei o na ua lisiina i lalo “Faailoga” i le Taiala i Tusitusiga Paia (scriptures.ChurchofJesusChrist.org). E mafai faapefea ona tatou mautinoa o loo tatou sailia pe faalagolago i faailoga o se faavae mo lo tatou faatuatua?

Mataupu Faavae ma Feagaiga 63:13–16

O le ola mama o lona uiga o le tausia o tatou mafaufauga ma amioga i le mamā.

• E ui lava o le tele o le Mataupu Faavae ma Feagaiga 63:13-16 e faatatau tonu lava i le mulilua, o mataupu faavae ua aoaoina e mafai ona fetaui i soo se solia lava o le tulafono o le ola mama. Mafaufau e valaaulia tagata o le vasega e faailoa mai taunuuga o faamatalaina i Mataupu Faavae ma Feagaiga 63:13-16. E mafai foi ona latou faia le “faaeteete”(fuaiupu 15) po o faailoga lapatai e lapatai mai ai nei taunuuga. E mafai foi ona latou talanoaina o latou manatu i le uiga o nei taunuuga. Mo se faataitaiga, aisea e taitai atu ai le solia o le tulafono o le ola mama i le faamasinoina e oo mai i se tasi “o se mailei” (fuaiupu 15)? Aisea ua fautuaina ai i tatou e le Alii ia “salamo vave” (fuaiupu 15) i le agasala o feusuaiga? (Tagai i le saunoaga a Sister Linda S. Reeves i le “Punaoa Faaopoopo”).

• O le faitauina o le Mataupu Faavae ma Feagaiga 63:16. E mafai ona taitai atu i se talanoaga e uiga i le faatosinaga e oo mai i ponokalafi i lo tatou sosaiete. E faapefea ona fesootai lapataiga i le fuaiupu 16 i lenei faafitauli? (E ui lava o lenei faaaliga e faatatau faapitoa i alii ua tuinanau i tamaitai, o nei lapataiga e faatatau i tagata uma lava.) O a mea e mafai ona tatou faia e puipui ai i tatou lava ma e e pele ia i tatou mai ponokalafi? Atonu e naunau tagata o le vasega e tuuina atu i le tasi ma le isi ni fautuaga. E mafai e le upega tafailagi AddressingPornography.ChurchofJesusChrist.org ona tuuina atu le faamoemoe ma le fesoasoani i soo se tasi atonu o loo tauivi ma ponokalafi.

  tamaloa ma le fafine i talaane o le malumalu

  E faamanuiaina i tatou pe a tatou tausia le tulafono o le ola mama.

Mataupu Faavae ma Feagaiga 63:58–64

E tatau ona tatou faia mea paia ma le faaaloalo.

• E mafai e oe ma lau vasega ona talanoaina le Mataupu Faavae ma Feagaiga 63:58–64 o se lapataiga e faasaga i le tau fua o le suafa o le Alii, ma nisi o punaoa i le tusiga i le Gospel Topics e faaautu “Profanity” (topics.ChurchofJesusChrist.org) e mafai ona faaleleia ai se talanoaga. E mafai foi ona e fesoasoani i tagata o le vasega e faaaoga nei fuaiupu faalauaitele. Mo se faataitaiga, e mafai ona e talanoaina po o le a le mea e faaopoopo e le fuaitau “aunoa ma le pule” (fuaiupu 62) i lo tatou malamalama i le savali. E mafai foi e tagata o le vasega ona lisi isi mea paia e oo mai “mai luga,” pe mai le Atua. O le a le uiga o le tautala i nei mea “ma le faaeteete”? (fuaiupu 64).

aikona o punaoa faaopoopo

Punaoa Faaopoopo

O le ola mama tatou te agavaa ai mo le mauaina o le mafutaga a le Agaga Paia.

Na aoao mai Sister Linda S. Reeves, o le sui talu ai o le Au Peresitene Aoao a le Aualofa:

“Ou te le iloa se mea o le a agavaa ai i tatou mo le mafutaga faifai pea o le Agaga Paia e pei o le amioatua. …

“A tatou aofia ai i le matamata, faitau, pe oo i soo se mea e le tusa ai ma tulaga faatonuina a lo tatou Tama Faalelagi, e faavaivaia ai i tatou. Pe tatou te laiti pe ua matutua, afai o mea o loo tatou tilotilo i ai, faitau, faalogologo i ai, pe filifili e fai e le tusa ai ma tulaga faatonuina o le Alii i le Mo Le Malosi O le Autalavou, tape, saei, ona togi lea i fafo, ma ato le faitotoa. …

“… Ou te talitonu afai e mafai ona tatou manatuaina i aso taitasi ma iloa le loloto o le alofa o lo tatou Tama Faalelagi ma lo tatou Faaola mo i tatou, o le a tatou naunau e faia soo se mea ina ia tatou toe foi atu ai i lo La’ua afioaga, ma siomia i lo La alolofa e faavavau” (“O le Mana o Folafolaga e Tausia,” Ensign po o le Liahona, Nov. 2015, 10–11).

Faaleleia o Lo Tatou Aoao Atu

Faaaoga musika paia. O savali i viiga ma pese mai le Tusipese a Tamaiti e mafai ona faamalosia ai le aoaoga faavae o loo e suesueina i tusitusiga paia. Mo se faataitaiga, o le usuina o se pese e uiga i le viia o le suafa o le Atua, e mafai ona faamalosia le savali i le “Mamalu o le Atua” (Viiga, nu. 40), e mafai ona faamalosia le savali i le Mataupu Faavae ma Feagaiga 63:58–64.