revelation manuscript book in display case

21–27 Iuni

Mataupu Faavae ma Feagaiga 67–70

“Aoga … o Oa o le Lalolagi Atoa”

O le saunia e aoao atu e sili atu nai lo le mafaufau i le tala o le a e fai atu ma le mea e te faia o le faiaoga. E tatau foi ona aofia ai le mafaufau i mea e fai e tagata aoao e aoao ai le tasi ma le isi. E mafai faapefea ona e valaaulia tagata o le vasega e faasoa mai aafiaga po o manatu na latou maua ao faitau i nei mau?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E mafai ona e tusi i luga o le laupapa Na aoao mai au e le Alii i lenei vaiaso … ma valaaulia tagata o le vasega e faauma le fuaiupu i se mea na latou aoaoina.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 67:1–9

O faaaliga na tuuina atu ia Iosefa Samita e moni ma e mai le Atua.

• O le malamalama i le talafaasolopito o le Mataupu Faavae ma Feagaiga 67 e mafai ona fesoasoani i se talanoaga i lenei vaega. Atonu e mafai e se tagata o le vasega ona aotele tulaga na taitai atu i lenei faaaliga (tagai Mataupu Faavae 67, autu o le vaega; Au Paia, 1:140–43). Ana faapea tatou te i ai i le fonotaga na talanoaina ai le lolomiina o faaaliga, o a mafuaaga semanu tatou te tuuina atu e lagolago ai le manatu? O le a se mea e mafai ona tatou fai atu i tagata na popole e uiga i le le atoatoa o le gagana a Iosefa Samita? O le a le mea ua aoaoina i tatou e le vaega 67 e uiga i perofeta ma faaaliga? E mafai foi e tagata o le vasega ona faasoa mai le ala na latou iloa ai mo i latou lava o nei faaaliga e moni.

Mataupu Faavae ma Feagaiga 68:1–6

O nei upu musuia a auauna a le Alii o afioga a le Alii.

• Ina ia fesoasoani i tagata o le vasega e talanoaina le Mataupu Faavae ma Feagaiga 68:1-6, e mafai ona e valaaulia i latou e faitau nei fuaiupu i ni vaega laiti ma faasoa i le tasi ma le isi upumoni latou te aoaoina e uiga i aoaoga a auauna a le Alii. Valaaulia vaega e faasoa i le tasi ma le isi le ala latou te iloa ai o mataupu faavae i le fuaiupu 4 e moni. E mafai e tagata o le vasega ona faasoa mai ni aafiaga i se taimi na latou tautala pe aoao atu ai a o “uunaia [i latou] e le Agaga Paia”(fuaiupu 3) ma le ala na faatasi ai le Alii ma i latou ma tu atu mo i latou (tagai fuaiupu 6).

• Afai e te fia talanoaina le ala e aoga ai nei fuaiupu i aoaoga a auauna a le Alii i konafesi aoao, o le saunoaga a Elder Jeffrey R. Holland i le “Punaoa Faaopoopo” e mafai ona fesoasoani. E mafai foi e tagata o le vasega ona faasoa mai ni savali o le konafesi talu ai nei na faamalosia lo latou faatuatua i le aoaoga faavae i nei fuaiupu.

Mataupu Faavae ma Feagaiga 68:25–31

Ua i ai i matua le tiutetauave ina ia aoao a latou fanau.

• Pe o i ai ni matua i lau vasega—po o ni matua i le lumanai? Atonu o le a aoga ia i latou le talanoa i le fautuaga a le Alii i matua i le vaega 68. Mo se faataitaiga, atonu o nisi matua i le vasega e mafai ona filifili se mataupu faavae mai fuaiupu 25-28 ma talanoa i le ala latou te taumafai ai e aoao atu nei mea i a latou fanau (fuaiupu 29-31 o loo i ai foi ni mataupu faavae taua). Pe mafai foi ona talanoa tagata o le vasega i le ala na aoaoina ai i latou e o latou matua i mataupu faavae o le talalelei.

  Aisea ua avea ai le aiga ma nofoaga sili ona lelei e aoao ai le talalelei? O le a se tatou tala i matua e lagona le le atoatoa pe lofituina i le tiute e aoao a latou fanau?

  o le aiga o loo suesue

  Ua tuuina atu e le Alii i matua le matafaioi o le aoaoina o a latou fanau.

Mataupu Faavae ma Feagaiga 70:1–4

Tatou te tali atu mo faaaliga ua tuuina mai e le Alii ia i tatou.

• Na tuuina mai e le Alii i ni uso faapitoa e avea ma ni tausimea i faaaliga ia ave i Misuri ma vaaia lo latou lolomiina. O le a se uiga e mafai ona tatou vaaia ai i tatou lava o ni tausimea i faaaliga? O a isi aoaoga mai lenei vaega e uiga i tausimea e mafai ona aoga ia i tatou?

aikona o punaoa faaopoopo

Punaoa Faaopoopo

E fetalai mai le Atua ia i tatou i le aso.

Na faasoa mai e Elder Jeffrey R. Holland le mataupu faavae ua aoaoina i le Mataupu Faavae ma Feagaiga 68:4. “Ou te talosagaina outou ia manatunatu i aso o i luma e le gata i savali ua faatoa outou faalogo i ai ae faapea foi le ofoofogia tulagaese o le konafesi aoao lava ia—o le mea ua tatou talitonu i ai o ni Au Paia o Aso e Gata Ai i na konafesi ma mea tatou te valaaulia le lalolagi e faalogologo ma matau i na konafesi. Tatou te molimau atu i atunuu uma, ituaiga, gagana, ma nuu e faapea e le gata o loo soifua le Atua ae saunoa foi o Ia, e mo o tatou taimi ma o tatou aso o fautuaga ua outou faafofoga i ai, ua i lalo o le taitaiga a le Agaga Paia, ‘o le finagalo o le Alii, … upu a le Alii … siufofoga o le Alii, atoa ma le mana o le Atua i le faaolataga.’[Mataupu Faavae ma Feagaiga 68:4]” (“O Le Tagavai i Nuuese,”,” Ensign po o le Liahona, Me 2011, 111).

Faaleleia o Lo Tatou Aoao Atu

Fesoasoani i tagata aoao e sii ae le tasi ma le isi. “O tagata taitoatasi o i lau vasega o se puna faaoaina o molimau, manatu ma aafiaga i le ola ai i le talalelei. Valaaulia i latou e faasoa atu, ma sii ae le tasi ma le isi” (Aoao Atu i le Ala a le Faaola,5).