Iesu ma mamoe

Pele i le Loto o le Leoleo Mamoe, saunia e Simon Dewey

28 Iuni–4 Iulai.

Mataupu Faavae ma Feagaiga 71–75

“E Leai se Auupega ua Faia e Faasaga ia te Oulua e Manumalo”

A o e faitauina le Mataupu Faavae ma Feagaiga 71–75, mafaufau i tagata o loo e aoaoina. O a ni mea ua e iloa e uiga ia i latou? O le a se mea o latou manaomia?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Valaaulia tagata o le vasega e faasoa mai nisi o upumoni sa latou maua i le taimi o la latou suesuega o le Mataupu Faavae ma Feagaiga 71-75. O a ni o latou aafiaga na oo i ai i nei upumoni?

aikona o le aoao atu

Aoao Atu le Aoaoga Faavae

Mataupu Faavae ma Feagaiga 71

E mafai ona tatou mulimuli i le Agaga Paia a o tatou puipuia o tatou talitonuga.

• Pe na i ai se taimi na e lagona ai le fefe po o le popole i le puipuia o o tatou talitonuga? Atonu e mafai ona e valaaulia tagata o le vasega e tusi i le laupapa upu po o fuaitau latou te maua i le Mataupu Faavae ma Feagaiga 71 ia e faamatalaina ai le ala na tau atu e le Alii ia Iosefa ma Sini e tali atu ai i faitioga a Ezra Booth ma isi. Ona mafai lea ona talanoa tagata o le vasega i ni vaega toalaiti i le uiga o nei faatonuga ia i tatou i aso nei. Aisea e taua ai lo tatou faatino “e tusa ai ma lena vaega o le Agaga” ua tuuina mai e le Alii ia i tatou? (fuaiupu 1).

  E mafai foi ona fesoasoani le matamata i le vitio “Everyday Example: When Beliefs Are Questioned” (ChurchofJesusChrist.org). E mafai e tagata o le vasega ona vaai mo ala ua faaalia ai i le vitio upumoni i le vaega 71 . Atonu e mafai ona latou faasoa mai ni faataitaiga o le ala na tali atu ai le Faaola i Ana tagata faitio (mo se faataitaiga, tagai Mataio 22:15–22; 26:59–64; Ioane 10:37–38).

Mataupu Faavae ma Feagaiga 72:8–16

O epikopo o tausimea i vaega faaleagaga ma faaletino i le malo o le Alii.

• E mafai faapefea e faatonuga a le Alii ia Newel K. Whitney, ina ua valaaulia o ia e avea ma epikopo i Katelani, ona fesoasoani ia i latou o loo e aoaoina ia taliaina epikopo ua valaaulia e auauna ia i latou? E mafai ona e fai atu i tagata o le vasega e suesue le Mataupu Faavae ma Feagaiga 72:8–16, ma vaai mo ni tiutetauave a Bishop Whitney ona faatusatusa lea i tiutetauave o epikopo o aso nei (tagai i le faamatalaga a Peresitene Gordon B. Hinckley o tiutetauave a epikopo i le “Punaoa Faaopoopo” po o vitio fesootai, “The Office of Bishop” [ChurchofJesusChrist.org]). Atonu e mafai e tagata o le vasega ona faasoa mai pe na faapefea ona faamanuiaina i latou e le auaunaga a le epikopo. O a mea e mafai ona tatou faia e lagolagoina atoatoa atili ai lo tatou epikopo?

  paelo ma taga o meaai

  E fesoasoani epikopo i tagata e tali o latou manaoga faaletino.

Mataupu Faavae ma Feagaiga 73

E mafai ona tatou sailia avanoa e faasoa atu ai le talalelei.

• Na tau atu e le Alii ia Iosefa Samita ma Sini Rikitone e talai atu le talalelei i “le tulaga e oo i ai le mafai” (Mataupu Faavae ma Feagaiga 73:4) a o galulue ai foi i le faaliliuga o le Tusi Paia. Atonu e mafai e tagata o le vasega ona faasoa mai ni ala na latou iloaina e “mafai”—pe moni— le faasoa atu o le talalelei faatasi ai ma isi a latou tiutetauave. Atonu latou te mauaina ni fautuaga aoga i le savali a Elder Dieter F. Uchtdorf, “Galuega Faafaifeautalai: Faasoaina atu o Mea o Loo i Totonu o Lou Loto,” (Ensign po o le Liahona, Me 2019, 15–18).

Mataupu Faavae ma Feagaiga 75:2–16

E finagalo le Atua ia i tatou ia “galulue ma lo [tatou] malosi.”

• O faatonuga a le Alii i nai isi faifeautalai i le ala e faasoa atu ai le talalelei e mafai ona uunaia ai tagata o le vasega e faasoa atu le talalelei ia sili atu le filiga. E mafai ona e tusia i le laupapa Galue ma lou malosi ma fai i tagata o le vasega e lisi upu po o fuaitau e oo mai i le mafaufau pe a latou mafaufau i se tasi o loo galue ma lona malosi atoa i le faasoaina atu o le talalelei. E mafai foi ona latou talanoaina le uiga o le “faatuai” po o “faapaie” i le faasoaina atu o le talalelei. O le a le mea ua aoao mai e le Mataupu Faavae ma Feagaiga 75:2-16, ia i tatou e uiga i le ala e lagolagoina ai e le Faaola i latou e auauna atu ia te Ia ma le faatuatua?

aikona o punaoa faaopoopo

Punaoa Faaopoopo

Tiutetauave o se epikopo.

Na aoao mai Peresitene Gordon B. Hinckley:

“Ou te tauaveina i lou loto se agaga loloto o le faafetai mo o tatou epikopo. Ou te matuai faafetai lava mo le faaaliga a le Silisiliese lea na fatuina ai ma galueina ai lenei tofi. …

“… Matou te faamoemoe o le a outou tutu o se faitaulaga sili pulefaamalumalu i le uarota, o se faufautua i tagata, o se tasi e puipuia ma fesoasoani ia i latou o puapuaga, o se faamafanafana ia i latou ua faanoanoa, o se fesoasoani ia i latou e le tagolima. Matou te faamoemoe ia te oe e tu atu o se leoleo ma le puipui o le aoaoga faavae e aoaoina i lau uarota, o le lelei o le aoaoina atu, o le faatumuina o le tele o tofi e manaomia. …

“… Ia e vaai e leai se tasi e fia ai pe le lavalava pe leai se mea e nofo ai. E tatau ona e iloa tulaga o i latou uma e te pule faamalumalu ai.

“Ia avea oe ma faamafanafana ma se taiala i ou tagata. E tatau ona matala lou faitotoa i soo se tasi e tagi mai i le faanoanoa. Ia malosi lou tua e tauaveina a latou avega. E tatau ona e aapa atu i le alofa i e faia mea sese” (“The Shepherds of the Flock,” Ensign, May 1999, 52–53).

Faaleleia o Lo Tatou Aoao Atu

Ia avea ma se faiaoga e sili atu le amio faaKeriso. Mafaufau e faaaoga ia fesili e iloilo ai e le tagata lava ia o loo i le itulau 37 o le Aoao Atu i le Ala a le Faaola e fesoasoani ia te oe e aoao ai le ala e mafai ai ona e aoao atili atu ai e pei o le Faaola.