fetu i le atulaulau

Sulufaiga, saunia e Shaelynn Abel

5--11 Iulai

Mataupu Faavae ma Feagaiga 76

“O Le a Tele Lava lo Latou Taui ma o le a Faavavau lo Latou Mamalu.”

E pei o le tele o faaaliga i tusitusiga paia, o le faaaliga i le vaega 76 na oo mai a o “mafaufau loloto” Iosefa Samita ma Sini Rikitone i tusitusiga paia (fuaiupu 19). E mafai foi ona e maua faaaliga—e aofia ai le taitaiga e uiga i le ala e aoao atu ai—a o e manatunatu loloto i le Mataupu Faavae ma Feagaiga 76.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia fesoasoani i tagata o le vasega e talanoaina mea na latou aoao mai le Mataupu Faavae ma Feagaiga 76, e mafai ona e valaaulia i latou e mafaufau i se uo o se isi lotu e fesili atu ia i latou po o le a lo tatou talitonuga i le olaga pe a mavae le oti. O a fuaiupu mai le vaega 76 o le a latou faasoa atu i la latou uo? E mafai foi e tagata o le vasega ona faasoa mai se mea mai le “Voices of the Restoration: Testimonies of ‘the Vision’” na uunaia i latou.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 76

E oo mai le faaolataga e ala mai ia Iesu Keriso, le Alo o le Atua.

• O le tele o tagata, pe a latou mafaufau i le vaega 76, e mafaufau i le fuafuaga o le faaolataga ma malo e tolu o le mamalu. E mafai faapefea ona e fesoasoani i tagata o le vasega e vaai i le tagata autu i lenei faaaliga o le Faaola o Iesu Keriso? E mafai ona e fesili i tagata o le vasega e faasoa mai se fuaiupu na latou maua i le vaega 76 na faamalosia lo latou faatuatua ia Iesu Keriso. Afai latou te manaomia le fesoasoani, e mafai ona e faasino ia i latou fuaiupu e pei o nei 1–5, 20–24, 39–43, 69, 107–8.

• Ina ia fesoasoani i tagata o le vasega e suesue i eseesega i le va o i latou e mautofi i malo e tolu o le mamalu, tusi i le laupapa Selesitila, fuaiupu 50–70, 92–96; Teresitila, fuaiupu 71–79, 97; ma le Telesitila, fuaiupu 81–90, 98–106, 109–12. E mafai e tagata o le vasega ona filifili se tasi o seti e tolu o fuaiupu ma sue fuaitau e faamatalaina le sootaga i le va o Iesu Keriso ma tagata e mautofi i malo e fesootai. O a mea e mafai e nei fuaitau ona aoaoina ai i tatou e uiga i le avea ma soo o Iesu Keriso? E mafai faapefea ona tatou faamalosia lo tatou sootaga ma Ia ma lo tatou Tama? E faapefea ona La aapa mai ia i tatou? O le a le uiga o le “totoa i le molimau ia Iesu?” (fuaiupu 79).

  potu i se fale o le seneturi lona sefuluiva

  Na vaai Iosefa Samita i le faaaliga o tikeri o le mamalu i se potu faapenei.

Mataupu Faavae ma Feagaiga 76:5–10, 113–18

O mealilo a le Atua e faatoa “malamalama i ai e ala i le mana o le Agaga Paia.”

• Atonu e malie mo tagata o lau vasega le iloaina e le o tagata uma o le Ekalesia na taliaina gofie le faaaliga i le vaega 76. Mo se faataitaiga, na saunoa Polika Iaga: “Na faapena foi a’u agaifanua, o lea ina ua oo mai le Faaaliga i le taimi muamua ia te au, sa matua faafeagai lava ma feteenai ma mea na aotauina ai au muamua. Sa ou faapea atu, Faatalitali teisi. Ou te lei teenaina; ae sa le mafai ona ou malamalama i ai.” Fai mai a ia sa manaomia ona “mafaufau ma tatalo, e faitau ma mafaufau, seia oo ina ou iloaina ma malamalama atoatoa i ai mo au lava”(i le “The Vision,” Revelations in Context, 150). O le a se mea e mafai ona tatou aoao mai i lona aafiaga, e mafai ona fesoasoani ia i tatou pe afai e faaali mai e le Atua ni mea e ese mai mea o loo tatou malamalama i ai nei? O le a se mea ua aoaoina i tatou e le Mataupu Faavae ma Feagaiga 76:5–10, 113–18 e uiga i le ala tatou te maua ai “mea lilo o le finagalo o le [Atua]”? (fuaiupu 10).

Mataupu Faavae ma Feagaiga 76:50–70, 92–95

E finagalo le Atua i Ana fanau uma ina ia olioli i le mamalu selesitila faatasi ma Ia.

• Mo nisi, e mafai ona faalotovaivai pe lofituina le mafaufau i mea uma e manaomia mai ia i tatou e agavaa ai mo le malo selesitila. Mafaufau pe faapefea ona e fesoasoani i tagata o le vasega ia maua le faamoemoe “e ala ia Iesu le puluvaga” (fuaiupu 69). Mo se faataitaiga, e mafai ona e valaaulia i latou e faitau le fuaiupu 50–70 ma le 92–95. Valaaulia i latou e faasoa mai le ala atonu latou te tali atu ai i se tasi e faapea mai, “E faigata le ola ai i le talalelei i le lalolagi o aso nei; ou te le iloa pe aoga” pe “e le lava lou lelei mo le malo selesitila.” O le a sa tatou tala e uunaia pe musuia ai lenei tagata?

Faaleleia o Lo Tatou Aoao Atu

Ia Taulai atu i le Faaola ma Lana Aoaoga Faavae. ‘’Faaauau ona e fesili ia te oe lava, ‘E faapefea e mea o loo ou aoaoina ona fesoasoani i tagata o lau vasega e fausia le faatuatua ia Keriso, salamo, osia ma tausia feagaiga ma le Atua, ma maua le Agaga Paia?’” (Aoao Atu i le Ala a le Faaola,20).