Keriso ma le taitai talavou mauoa

Keriso ma le Taitai Talavou Mauoa,, saunia e Heinrich Hofmann

19--25 Iulai

Mataupu Faavae ma Feagaiga 81-83

O le “Ua Tuu Atu i ai Mea e Tele, e Tele Mea ua Manaomia Mai ai.”

Manatua o tagata o lau vasega e maua aafiaga mamana ao latou suesue i tusitusiga paia i le aiga. Mafaufau ma le agaga tatalo pe faapefea ona uunaia i latou e faasoa mai o latou aafiaga e siitia ai le tasi ma le isi.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Valaaulia tagata o le vasega e filifili se fuaitau mai vaega taitasi o le a maua ai se autu lelei mo le vaega: Mataupu Faavae ma Feagaiga 81, 82, ma le 83. Aisea na latou filifili ai nei autu?

aikona o le aoao atu

Aoao Atu le Aoaoga Faavae

Mataupu Faavae ma Feagaiga 81:5; 82:18–19

E tatau i tagata taitoatasi ona saili “le lelei o lē [tatou] te tuaoi.”

• O le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga o loo fautuaina ai fesili e mafaufau loloto i ai e uiga i le Mataupu Faavae ma Feagaiga 81:5. O nei vaega e maua ai foi ni fesili lelei mo talanoaga mo lau vasega. Ia mafaufau foi e faasoa atu se aafiaga patino ina ua e lagonaina le “vaivai” i se ala ma na siitia oe e se auaunaga a se tasi pe na famalosia ai foi oe. Atonu e i ai foi ni aafiaga faapena a tagata o le vasega e faasoa mai. E mafai foi ona outou matamata i le vitio “Works of God” (ChurchofJesusChrist.org) e uunaia ai tagata o le vasega e auauna le tasi i le isi. E mafai foi ona e faasoa atu le saunoaga a Peresitene M. Russell Ballard i le “Punaoa Faaopoopo.”

• Mafaufau e fai i tagata o le vasega e suesue le Mataupu Faavae ma Feagaiga 82:18-19, ma vaavaai mo mataupu faavae e fesoasoani ia i latou ia malamalama i faamoemoega ma faamanuiaga o le auauna i isi. Ona fai lea ia i latou e faasoa mai mea ua latou aoaoina. E mafai foi ona e faaalia le vitio “Teachings of Thomas S. Monson: Rescuing Those in Need” (ChurchofJesusChrist.org). Na faapefea ona faataitai e tagata o le uarota a Bishop Monson mea ua aoaoina i fuaiupu 18-19?

Mataupu Faavae ma Feagaiga 82:8--10

“O Aʼu, o le Alii, e noatia aʼu pe a outou faia mea Ou te fai atu ai.”

• Ina ia fesoasoani i tagata o le vasega ia malamalama i le sootaga i le va o lo tatou usiusitai patino ma faamanuiaga folafolaina a le Atua, e mafai ona e faitau i le Mataupu Faavae ma Feagaiga 1:37–38; 82:10; 130:20–21 faatasi pe i ni vaega toalaiti. O le a se mea o aoao mai e nei mau ia i tatou e uiga i le Alii? Atonu e mafai e tagata o le vasega ona lisi upu e faamatala ai Lona uiga, e faalagolago i nei fuaiupu.

• A uma ona faitau le fuaiupu 10, e mafai e tagata o le vasega ona talanoa e uiga i mea ua folafola mai e le Alii ia i tatou ma le ala e tausia ai e le Alii Ana folafolaga. O le tala na saunia e Sister Virginia H. Pearce i le “Punaoa Faaopoopo” e mafai ona fesoasoani i tagata o le vasega e iloa ai e faamanuiaina i tatou e le Alii e tusa ai ma Lona poto, e le faapea o taimi uma i le ala tatou te mananao ai pe faamoemoeina.

• O le a se mea ua tatou aoao mai le Mataupu Faavae ma Feagaiga 82:8-10 pe aisea ua tuuina mai ai e le Tama Faalelagi ia i tatou poloaiga? Atonu e mafai ona maua e tagata o le vasega ni manatu i nei fuaiupu e faaaoga e fesoasoani ai i se uo po o se tamaitiiti e manatu o poloaiga ua taofiofia o ia (tagai foi i le vitio “Blessed and Happy Are Those Who Keep the Commandments of God,” ChurchofJesusChrist.org). Atonu e mafai e i latou ona faasoa mai ni aafiaga na aoaoina i latou e vaai i poloaiga o ni faamanuiaga.

aikona o punaoa faaopoopo

Punaoa Faaopoopo

Talitonuga Faalelotu Mama.

Na aoao mai Peresitene M. Russell Ballard:

“I lo tatou avea ai ma soo, e tele o tatou manaoga, popolega, ma tofiga. Peitai, o nisi gaoioiga e tatau lava ona i ai i le fatu o lo tatou avea ai ma tagata o le Ekalesia. “O le mea lea,” ua poloai mai ai le Alii, “ia e faamaoni; tu i le tofi ua Ou tofia i ai oe; fesoasoani i e vaivai, sii i luga lima ua tautau i lalo, ma faamalosi tulivae ua vaivai” [Mataupu Faavae ma Feagaiga 81:5; faaopoopo faatusilima].

“O le Ekalesia lenei o faatinoga! O le amioatua lenei! O le talalelei lenei i lona lagona moni lava pe a tatou fesoasoani, sii, ma faamalosi i latou o mafatia faaleagaga ma faaletino! O le faia o lea mea e manaomia ai lo tatou asiasi atu ia i latou ma fesoasoani ia i latou [tagai Iakopo 1:27], ina ia mauaa a latou molimau o le faatuatua i le Tama Faalelagi ma Iesu Keriso ma Lana Togiola i o latou loto. ” (“Meaalofa Faapelepele mai le Atua,” Ensign po o le Liahona, Me 2018, 11).

E faamanuiaina i tatou e le Alii i Ana lava ala ofoofogia.

Na taua e Sister Virginia H. Pearce, se sui talu ai o le Au Peresitene Aoao o Tamaitai Talavou, e uiga i se tamaitai na popole e uiga i lana fanau le usiusitai. Na ia faatuina se sini ma le loto i ai ia faateleina le auai i le malumalu ma na lagonaina le mautinoa o le a faamamaluina e le Alii lenei osigataulaga taua e ala i le suia o loto o lana fanau. Na lipoti mai e le tamaitai:

“I le mavae ai o le sefulu tausaga o le faateleina o le auai i le malumalu ma le tatalo e le aunoa, ou te faamalie atu e lei suia ai filifiliga a lau fanau. …

“Peitai o au na suia. O a’u o se tamaitai ua ese. … Ua ou puleaina lou taimi ma ua mafai ona faatalitali i le Alii. … Ua suia ou faamoemoega. Nai lo le faamoemoe e suia lau fanau, ou te faamoemoeina nei alofa mutimutivale faifai pea ma ua tumu lou loto i le faafetai mo i latou. … E galue le Alii i ala ofoofogia, ma ua faatumuina moni lava au i le filemu lena e leoleoina ai le mafaufau uma“ (i lePrayer: A Small and Simple Thing,” At the Pulpit [2017], 288–89).

Faaleleia o Lo Tatou Aoao Atu

Ia valaaulia le autalavou e avea ma se vaega o lau lesona. Tuu atu i le autalavou ni avanoa e aoao ai le tasi ma le isi. O le faalogo i molimau po o aafiaga a le tasi ma le isi e mafai ona aoga tele. E pei ona manaomia, fesoasoani i le autalavou ia saunia e aoao atu, ma faaali ia i latou le uiga o le aoao atu i le ala a le Faaola (tagai Aoao Atu i le Ala a le Faaola, 27-28).