mamoe o loo mulimuli ia Iesu

Alu i le Aiga, saunia e Yongsung Kim

12-18 Iulai

Mataupu Faavae ma Feagaiga 77-80

“O le a Ou Taitaia Outou i le Ala”

Ia manatua o gaoioiga i lenei otootoga ua na o ni fautuaga. A o e suesueina ma le agaga tatalo le Mataupu Faavae ma Feagaiga 77-80, o le a taitaia oe e le Agaga Paia ia iloa le ala sili e aoao ai tagata o lau vasega.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O nisi tagata o lau vasega o le a sili atu le fiafia e faasoa mai o latou manatu pe a e tau vave atu ia i latou. Mafaufau e faafesootai i latou i ni nai aso ae lei faia le vasega ina ia latou o mai saunia e faasoa mai se mea na uunaia ai i latou mai le Mataupu Faavae ma Feagaiga 77-80.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 77

E faaalia e le Atua Ana mealilo ia i latou e saili ia iloaina.

• E mafai e tagata o le vasega ona faasoa mai manatu na latou maua e uiga i faatusa i le tusi o Faaaliga i le taimi o a latou suesuega o le vaega 77 i lenei vaiaso. O le talanoaina o tali na maua e Iosefa Samita e mafai ona taitai atu i se talanoaga pe faapefea e tagata o le vasega ona malamalama pe a latou suesue i tusitusiga paia. O le a se mea ua tatou aoao mai i ituaiga o fesili na fai atu e Iosefa? Atonu e naunau tagata o le vasega e faasoa mai ni aafiaga ina ua taitaiina e a latou fesili o le talalelei i latou i se malamalama sili atu.

Mataupu Faavae ma Feagaiga 78:17–19

O le a taitaia i tatou e le Alii i le ala.

• Ina ia amata se talanoaga o le Mataupu Faavae ma Feagaiga 78:17-19, e mafai ona e faaali atu ni ata o ni nai tagata o lau vasega ao laiti (fai ia i latou ae lei faia le vasega e aumai nei ata i le vasega). Tuu atu i le vasega e mate mai po o ai o loo i ata taitasi. E mafai e tagata o le vasega na aumaia ata ona talanoa i lo latou suiga mai le taimi na pue ai ata. Ona mafai lea ona faitau e le vasega le Mataupu Faavae ma Feagaiga 78:17-19 ma mafaufau loloto i fesili pei o nei: E faapefea ona pei i tatou o ni tamaiti i le Alii? O a ni ala e finagalo o Ia ia avea ai i tatou e pei o ni tamaiti (tagai Mosaea 3:19), ma o a ala e finagalo o Ia ia tatou tuputupu ae ai? O a fautuaga ua Ia tuuina mai ia i tatou i nei fuaiupu e fesoasoani ia i tatou ia tuputupu ae ai?

  Ina ia faateleina le malamalama o tagata o lau vasega i le ala e mafai ai e le Alii ona “taitaia [tatou] i le ala” (fuaiupu 18), mafaufau e faasoa atu le fuaitau i le Punaoa Faaopoopo.

Mataupu Faavae ma Feagaiga 79–80

O le valaau e auauna atu i le Atua e sili atu le taua nai lo le nofoaga tatou te auauna atu ai.

• Atonu e i ai ni tagata i lau vasega na lagona le le fiafia muamua i se valaauga na latou maua i le uarota po o le paranesi i le nofoaga e tofia i latou e auauna atu ai o se faifeautalai. Atonu e mafai e nisi o i latou ona faasoa mai o latou aafiaga. E mafai faapefea ona fesoasoani le fautuaga a le Alii o loo i le Mataupu Faavae ma Feagaiga 80:3 ia i tatou i nei tulaga? O le a se uiga o le fuaitau “e le afaina”? Po o le fuaitau “e le mafai ona oulua sese ai”? O le a le mea e sili ona taua i le Alii pe a oo i o tatou valaauga? O manatu o Elder David A. Bednar i le vaega 80 i lana saunoaga “Valaauina i le Galuega” e mafai foi ona aoga (Ensign po o le Liahona, Me 2017, 68).

• O faaaliga i le Vaega 79 ma le 80 na uluai faatatau i tagata na valaaulia e talai atu le talalelei, ae o loo i ai mataupu faavae e mafai ona aoga ia i tatou uma lava i la tatou auaunaga i le Alii. Ina ia fesoasoani i tagata o le vasega ia maua nei mataupu faavae, e mafai ona e fai ia i latou e vaai faalemafaufau faapea e i ai sa latou uo na liliu mai talu ai nei i le Ekalesia ma faatoa ia mauaina lona valaauga muamua. Valaaulia tagata o le vasega e tusi se tusi o le lagolago ma le fautuaga i le latou uo, ma uunaia i latou e sii mai Vaega 79 ma le 80 ao latou faia. Ona mafai lea ona faasoa mai e ni nai tagata o le vasega mea na latou tusia.

  tamaitai o loo talanoa

  E fiafia le Alii pe a tatou auauna atu ia te Ia ma isi.

aikona o punaoa faaopoopo

Punaoa Faaopoopo

O le a taitaiina e le Alii i tatou e ala i le Agaga Paia.

Sa tuuina mai e Peresitene Henry B. Eyring se aafiaga ao ia tatalo mo le taitaiga i se filifiliga taua ma aoao ai ina ia taitaia e le Alii:

“Na ou tatalo, ae mo ni itula na foliga mai e leai se tali. Ina ua lata mai le ao, na oo mai se lagona ia te au. Nai lo se isi lava taimi talu ona ou laitiiti, na ou lagona ai ua pei o se tamaitiiti. Na foliga mai ua faasolo ina filemu lou loto ma lou mafaufau. Na i ai se filemu i lena paganoa i totonu.

“Ae i lou tei tele, na ou iloaina ai o loo ou tatalo, ‘Tama Faalelagi, e le afaina le mea ou te manao ai. Ou te le o toe popole po o le a le mea ou te manao ai. Pau le mea ou te manao ai o le faia o Lou finagalo. Pau lea o le mea ou te manao ai. Faamolemole tau mai ia te au le mea e fai.’

“I lena taimi sa ou lagonaina ai se filemu i totonu ou te lei lagonaina lava i se isi taimi muamua. Ma na oo mai le savali, ma na ou mautinoa le tagata na sau ai. Na manino le mea e tatau ona ou faia. Ou te lei mauaina se folafolaga o le taunuuga. Sa na o le faamautinoaga faapea o au o se tamaitiiti ua tauina atu i ai le ala na taitai atu i soo se mea e finagalo ai o Ia mo au” (“E Pei o se Tamaitiiti,” Ensign po o le Liahona, Me 2006, 16).

Faaleleia o Lo Tatou Aoao Atu

Amata i tusitusiga paia. A o lei liliu atu i punaoa faaopoopo, ia suesue ma le filiga i tusitusiga paia ma manatunatu loloto i tusitusiga paia. O le a valaaulia ai le Agaga e fesoasoani ia te oe ia faaaoga mea na e suesueina a o e aoao atu (tagai Aoao Atu i le Ala a le Faaola,12).