Vaitafe o Misuri

Afi o le Tolauapiga i le Misuri, saunia e Bryan Mark Taylor

31 Me--6 Iuni

Mataupu Faavae ma Feagaiga 60-62

“Ua i ai Tagata Uma i Lou Lima”

Na saunoa Elder Ronald A. Rasband: “E tatau ia i tatou ona faamalosia muamua i tatou lava faaleagaga ona faamalosia ai lea o i latou o siomia i tatou. Mafaufau loloto e le aunoa i tusitusiga paia, ma manatua manatu ma lagona na e oo i ai a o e faitauina.” (“Nei Galo ia te Oe,” Ensign po o le Liahona, Nov. 2016, 114).

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E mafai ona e uunaia se talanoaga anoa e ala i le valaaulia o tagata o le vasega e tali i se fesili faapitoa po o se manatu lea e fesootai i mau na latou faitauina i le fale. Mo se faataitaiga, e mafai ona e valaaulia i latou e faasoa mai se mea na latou aoaoina i lenei vaiaso e uiga i le Tama Faalelagi po o Iesu Keriso.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 60:2–3, 7, 13–14; 62:3, 9

E fiafia le Alii pe a tatou tatala o tatou gutu ae faasoa atu le talalelei.

• I le avea ai ma tagata o le Ekalesia, ua tatou iloa o le talalelei toefuataiina o se oa taua lea e faamanuiaina olaga o fanau a le Atua. Aisea la tatou te faatuatuai ai i nisi taimi ona faasoa atu la tatou molimau i isi? Mafaufau e valaaulia tagata o le vasega e lisi i le laupapa nisi o mafuaaga e le mafai ai ona tatala o tatou gutu ae faasoa atu le talalelei. Ona mafai lea e tagata o le vasega ona faitau le Mataupu Faavae ma Feagaiga 60:2–3, 7,13–14; 62:3, 9, ma vaavaai mo upu po o fuaitau na e uunaia i latou e faasoa atu le talalelei. E mafai ona latou lisi mea na latou maua i le laupapa. Atonu e mafai e tagata o le vasega ona faasoa mai se aafiaga i se taimi sa latou faatoilalo ai lo latou fefe ma faasoa atu le talalelei i se tasi.

• I le Mataupu Faavae ma Feagaiga 60-62, atoa lava, o loo i ai aoaoga, na ta’ua ma faaaogaina, e faatatau i le faasoaina atu o le talalelei. Ina ia fesoasoani i tagata o le vasega ia iloa nei aoaoga, e mafai ona e fai i tagata taitasi e iloilo se tasi o nei vaega ma faasoa mai soo se mea latou te maua o loo aoaoina i latou e uiga i le faasoaina atu o le talalelei. Atonu e uunaia ai le talanoaga i le faitau e uiga i le faataitaiga a nisi faifeautalai i tusitusiga paia (tagai, mo se faataitaiga, Galuega 8:27–40; Alema 19:16–17,) ma talanoaina mea ua tatou aoaoina mai ai. O a ni faataitaiga e mafai ona tatou faasoaina mai i o tatou lava olaga? E mafai e soo se tagata o le vasega ona faasoa mai le ala na faailoa atu ai le talalelei ma o latou lagona e uiga i tagata na aoaoina i latou? Atonu e ono aoga mo lau vasega le faatinoina o ni ala e mafai ai ona tatou “tatala [o tatou] gutu” ma faasoa atu le talalelei.

  faifeautalai i luga o se pasi

  E finagalo le Atua ia tatou faasoa atu le talalelei i isi.

Mataupu Faavae ma Feagaiga 60:2–4; 61:1–2, 20, 36–38; 62:1, 6

E aoaoina i tatou e tusitusiga paia e uiga ia Iesu Keriso.

• Valaaulia tagata o le vasega e tusi i le laupapa soo se mea na latou aoaoina e uiga i le Faaola i lenei vaiaso mai le suesueina o vaega 60–62, faatasi ai ma fuaiupu e fesootai. Pe mafai foi ona latou suesue i Mataupu Faavae ma Feagaiga 60:2–4; 61:1–2, 20, 36–38; 62:1, 6 e sue ai ni mea ua aoaoina e uiga i le Faaola. O a tala mai tusitusiga paia pe mai o tatou lava olaga e faaalia ai matafaioi ma uiga mama o le Faaola ua tatou aoaoina? (mo se faataitaiga, Ioane 8:1–11; Eteru 2:14–15). Atonu e mafai ona e valaaulia tagata o le vasega e faasoa mai a latou molimau ia Iesu Keriso pe manatunatu i latou lava i Lona taua ia i latou.

Mataupu Faavae ma Feagaiga 60:5; 61:22; 62:5–8

E finagalo le Alii ia tatou faia ni filifiliga e “pei ona lelei ia i [tatou].”

• Mafaufau e valaaulia tagata o le vasega e faitau le Mataupu Faavae ma Feagaiga 60:5; 61:22; 62:5–8 i ni paga po o ni vaega toalaiti ma faasoa mai o latou lagona po o le a le savali a le Alii mo i tatou. O anafea na latou lagonaina ai e tatau ona latou faaaogaina la latou lava faamasinoga i le faia o filifiliga? Mafaufau e faasoa atu le upusii mai ia Peresitene Daliin H. Oaks i le “Punaoa Faaopoopo” o se vaega o le talanoaga. E mafai faapefea ona fesoasoani matua ia latou fanau ia aoao lenei mataupu faavae taua?

aikona o punaoa faaopoopo

Punaoa Faaopoopo

Galulue i luga o la tatou faautaga e sili ona lelei.

Na aoao mai Peresitene Dallin H. Oaks:

“O se manao ia taitaia e le Alii o se malosiaga, ae e manaomia ona o faatasi ma se malamalama e tuu mai e lo tatou Tama Faalelagi le tele o faaiuga mo a tatou lava filifiliga patino. O le faia o faaiuga patino o se tasi o punavai o le tuputupu ae e tatau ona tatou iloaina i le olaga nei. O tagata e taumafai e tuu atu le faiga o faaiuga uma i le Alii ma ole atu mo faaaliga i filifiliga uma, o le a le pine ae iloaina tulaga latou te tatalo atu ai mo se taitaiga ae le mauaina. Mo se faataitaiga, e foliga mai e tupu i na mau tulaga e le taua ai filifiliga pe e taliaina foi filifiliga uma e lua.

“E tatau ona tatou suesueina mea i o tatou mafaufau, e faaaoga ai mana e fefulisa’i ai ia na tuuina e le Foafoa i totonu o i tatou. Ona tatau lea ona tatou tatalo mo se taitaiga ma galulue ai pe a tatou mauaina. Afai tatou te le maua le taitaiga, e tatau ona tatou galulue i luga o lo tatou faautaga sili ona lelei” (Our Strengths Can Become Our Downfall,” Ensign, Oke. 1994, 13–14).

Faaleleia o Lo Tatou Aoao Atu

Iloa i latou o loo tauivi. O tauiviga a i latou o loo e aoaoina atonu e faigata ona iloa. Ae faatasi ai ma le fesoasoani a le Au Paia ma ou taitai, e mafai ona e iloa le ala sili e aapa atu ai i nei tagata. (Tagai Aoao Atu i le Ala a le Faaola,8–9.)