Auala i Initipene, Misuri

Initipene, Misuri, saunia e Al Rounds

24–30 Me

Mataupu Faavae ma Feagaiga 58-59

“Auai ma le Naunautai i se Faamoemoega Lelei”

A uma ona faitau le Mataupu Faavae ma Feagaiga 58–59, mafaufau i fesili nei: O a mea ua e lagona e faasoa atu i lau vasega? O le a se mea o e faamoemoe o le a latou iloaina? O le a faapefea ona e fesoasoani ia i latou ia iloa nei mea?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia uunaia tagata o le vasega e faasoa mai mea na latou aoaoina i la latou suesuega o tusitusiga paia, e mafai ona e tusia fesili nei i le laupapa: O a mea na tatou aoaoina? O le a faapefea ona tatou ola i mea na tatou aoaoina? E mafai e tagata o le vasega ona lisi i lalo o le fesili muamua upumoni na latou maua i le Mataupu Faavae ma Feagaiga 58- 59. Ona latou mafai lea ona faaalu ni nai minute e talanoaina ai manatu mo le ola ai i na upumoni ma tusi o latou manatu i lalo o le fesili lona lua.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 58:1–5, 26–33

E tutupu vavega e tusa ai ma le taimi a le Atua ma lo tatou filiga.

• Ua aoao mai e leMataupu Faavae ma Feagaiga 58 upumoni na e mafai ona aumaia le filemu i taimi o faigata. Atonu na iloaina e tagata o le vasega ni upumoni i le taimi o a latou suesuega i lenei vaega; valaaulia i latou e faasoa mai mea sa latou mauaina. Pe mafai ona latou suesue i fuaiupu 1-5, 26-33 i le vasega, taitoatasi pe i ni vaega, mo se mea e mafai ona fesoasoani i se tasi o loo aafia i ni faigata po o se tasi o loo faatalitali mo se faamanuiaga folafolaina. A uma ona latou faasoa mai mea na latou maua, atonu e mafai e ni tagata o le vasega ona faasoa mai ni aafiaga po o isi mau na faamaonia ai upumoni i nei fuaiupu.

• I le avea ai o se vaega o lau talanoaga i lenei mataupu faavae, e mafai ona e faaali le vitio “Hope Ya Know, We Had a Hard Time” (ChurchofJesusChrist.org) ma talanoaina se mea tatou te mafai ona fai e fesoasoani ai ia i latou o loo feagai ma ni taimi faigata. E mafai foi ona fesoasoani le upusii mai ia Sister Linda S. Reeves i le “Punaoa Faaopoopo” i lau talanoaga. E faapefea e upu a Sister Reeves ona aafia ai le ala tatou te vaai ai i o tatou faigata?

Mataupu Faavae ma Feagaiga 58:26–29

E mafai ona tatou “aumai le amiotonu tele” i lo tatou “lava loto malie.”

• O le a se mea e mafai ona tatou aoao mai i le Mataupu Faavae ma Feagaiga 58:26–29 i lenei vaiaso? Atonu e mafai ona e vaevaeina le vasega i ni vaega ma valaaulia le vasega e talanoaina i a latou vaega fuaitau na latou maua e aoga i nei fuaiupu. E faapefea e nei fuaiupu ona uunaia i tatou e “aumai le amiotonu tele”? (fuaiupu 27). Aisea e finagalo ai le Alii ia i tatou ia aua nei “tau faamalosia i mea uma”? (fuaiupu 26). O le a le mea ua faailoa mai e nei fuaiupu e uiga i le tagata e finagalo le Alii ia avea ai i tatou?

Mataupu Faavae ma Feagaiga 59:9-19

O le Sapati o le aso o le Alii.

• Ina ia fesoasoani i tagata o le vasega e suesue mea na aoao mai e le Alii i le Au Paia anamua i Misuri e uiga i le Sapati, e mafai ona e valaaulia i latou e suesue le Mataupu Faavae ma Feagaiga 59:9-19 ma fai se lisi i le laupapa i mea ua aoao mai e fuaiupu taitasi ia i tatou e uiga i le Sapati. E mafai foi e tagata o le vasega ona faasoa mai pe na faapefea ona faatupuina a latou molimau o le Sapati ao latou tausia le aso Sapati ia paia. O le Sabbath.ChurchofJesusChrist.org o loo i ai ni vitio e mafai ona fesoasoani e amata ai se talanoaga.

• I le Mataupu Faavae ma Feagaiga 59, ua aoao mai ai le Alii e uiga i le aso Sapati i le faaaogaina o upu e pei o le “olioli” “mata fiafia” ma le “faafetai” (fuaiupu 14-15). E mafai e tagata o le vasega ona vaavaai mo upu e pei o nei i fuaiupu 9-19. Ona mafai lea e tagata o le vasega ona faasoa mai mea latou te faia e avea ai le Sapati o se aso fiafia. E mafai faapefea ona tatou faaaogaina nei fuaiupu e aoao ai isi pe aisea tatou te faamamaluina ai le aso Sapati?

• O lenei talanoaga e mafai foi ona avea o se avanoa mo tagata o le vasega e faasoa ai manatu pe faapefea ona faaaoga e o latou aiga le Sapati ia avea ai o latou aiga ma totonugalemu o lo latou aoaoina o le talalelei. Valaaulia i latou e faasoa mai le ala na mafai ai e a latou taumafaiga ona fesoasoani ia i latou ia tausi “atili atoatoa … ia le pisia mai le lalolagi” (fuaiupu 9).

  falaoa ma ipu o le faamanatuga

  O le faamanatuga o se vaega taua o le faamamaluina o le Sapati.

aikona o punaoa faaopoopo

Punaoa Faaopoopo

O o tatou puapuaga e mafai ona taitai atu ai i tatou i le Faaola.

Na aoao mai Sister Linda S. Reeves o se sui talu ai o le Au Peresitene Aoao a le Aualofa:

“Ua faataga i tatou e le Alii ia tofotofoina ma suesueina, o nisi taimi i lo tatou mafaia silisili. Ua tatou vaaia olaga o e pele—ma atonu o i tatou lava—ua susunuina lava i le eleele ma mafaufau pe aisea e faataga ai e le Tama Faalelagi alofa ma agalelei ona tutupu nei mea. Ae Na te le tuua i tatou i lefulefu; e tu o Ia ma lima mafola, ma le naunau e valaaulia i tatou ia o mai ia te Ia. …

“… E naunau o Ia e fesoasoani ia i tatou, faamafanafana i tatou, ma faamama i o tatou tiga ao tatou faalagolago i le mana Togiola ma faamamalu a tatou feagaiga. O faigata ma puapuaga tatou te oo i ai atonu o mea tonu ia e taitaia i tatou ia o mai ia te Ia ma tumau i a tatou feagaiga ina ia mafai ai ona tatou toe foi atu i Lona afioaga ma maua mea uma o loo i ai i le Tama” (“Avatu Faamanuiaga o a Outou Feagaiga,” Ensign po o le Liahona, Nov. 2013, 119–20).

Faaleleia o La Tatou Aoao Atu

Ia mautinoa o e aoao atu aoaoga faavae moni. “Faaauau ona e fesili ia te oe lava, ‘E faapefea e mea o loo ou aoaoina ona fesoasoani i tagata o lau vasega e fausia le faatuatua ia Keriso, salamo, osia ma tausia feagaiga ma le Atua, ma maua le Agaga Paia?’(Aoao Atu i le Ala a le Faaola,20).