faifaatoaga ma povi

Peti [o Laau Toto] Muamua, saunia e James Taylor Harwood

17–23 Me

Mataupu Faavae ma Feagaiga 51–57

“O se Tausimea Faamaoni, Fai Mea Tonu, ma Atamai”

O nisi taimi o uunaiga i mea e aoao atu e mafai ona oo mai a o e talanoaina tusitusiga paia ma se tagata o le aiga po o se uo.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Mafaufau e faasoa atu nei upu mai ia Elder Quentin L. Cook: “Ou te faamoemoe o le a tofu iloilo e i tatou taitoatasi faapea foi i aiga tausi-mea ua ia i tatou le tiutetauave ma le matafaioi e tali atu ai.” (“Stewardship—a Sacred Trust,” Ensign po o le Liahona, Nov. 2009, 94). Ona mafai lea ona e fesili i tagata o le vasega po o a mea na latou aoao mai vaega 51-57 e uiga ia latou tausi-mea.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 51:9, 15-20

E finagalo le Alii ia i tatou ia avea ma tausimea faamaoni, fai mea sao, ma atamamai.

• O le a faapefea ona e fesoasoani i tagata o le vasega e mafaufau pe faapefea ona aoga fetalaiga a le Alii i le vaega 51 ia i latou? E mafai ona e tusia i le laupapa O le a le mea ua tuuina mai e le Alii ia te au? ma valaaulia tagata o le vasega e lisi a latou tali (tagai “Punaoa Faaopoopo” mo ni manatu). Ona mafai lea ona latou suesue mo mataupu faavae i fuaiupu 9, 15-20 e aoao ai i latou i le ala e avea atili ai ma tausimea i mea i la latou lisi. Pe mafai ona e taulai atu i upu “faamaoni,” “fai mea tonu, ma “atamai” i le fuaiupu 19, ma talanoaina pe faapefea e nei upu taitasi ona mafai ona taitai atu i tatou i le faataunuuina o a tatou tausimea. Afai e manaomia, iloilo faatasi le faamatalaga o le “Tausimea” i le Taiala i Tusitusiga Paia (scriptures.ChurchofJesusChrist.org).

laufanua lanuvao

O tagata o loo ola i le tulafono o le faapaiaga na tuuina atu mea uma na latou maua i le Ekalesia.

Mataupu Faavae ma Feagaiga 52:10; 53:3; 55:1–3

O le meaalofa o le Agaga Paia e tuuina mai e ala i le faaee atu o lima.

• O le tele o fuaiupu i nei faaaliga ua taua ai le mauaina o le Agaga Paia e ala i le faaee atu o lima. Afai o se talanoaga i lenei autu o le a taua i lau vasega, e mafai ona e fesili atu i lau vasega po o a mea na latou aoao mai le Mataupu Faavae ma Feagaiga 52:10; 53:3; 55:1–3 e uiga i le meaalofa o le Agaga Paia. Mo nisi mea i lenei autu, tagai Galuega 8:14–17; 19:1–6. Atonu e mafai e tagata o le vasega ona talanoa i a latou aafiaga i le mauaina o le meaalofa o le Agaga Paia po o mea e mafai ona latou faaauau ona fai e maua ai Lona aafiaga i o latou olaga.

Mataupu Faavae ma Feagaiga 52:9–11, 22–27

E mafai ona tatou faasoa atu le talalelei i soo se mea o tatou i ai.

• Ina ua auina mai e le Alii ni nai taitai o le Ekalesia i Misuri, na ia tau atu ia i latou e faaaoga le taimi e malaga ai ma “talai atu i le ala” (fuaiupu 25-27). O le faitauina o le Mataupu Faavae ma Feagaiga 52:9–11, 22-27 e mafai ona taitai atu i se talanoaga e uiga i le ala tatou te mafai ai ona faasoa atu le talalelei “i le ala,” pe i le taimi masani o o tatou olaga. E mafai e tagata o le vasega ona talanoa i le ala e faasoa atu ai le talalelei o se vaega masani o o latou olaga.

Mataupu Faavae ma Feagaiga 52:14–19

Na tuuina mai e le Atua se mamanu mo le aloese mai le taufaasese.

• Ina ia faailoaina atu le mamanu na faaalia mai e le Alii i le Mataupu Faavae ma Feagaiga 52:14-19, e mafai ona e faasoa atu ni faataitaiga o isi mamanu atonu e masani ai tagata o le vasega, e pei o mamanu mo le fausiaina o mea po o mamanu o le amio. Atonu e i ai i tagata o le vasega ni a latou lava faataitaiga e faasoa mai. Aisea e taua ai mamanu? E faapefea ona tatou faaaoga le mamanu i fuaiupu 14–19 e aloese mai ai i taufaasese ua tatou vaaia i le lalolagi i aso nei?

Mataupu Faavae ma Feagaiga 54

E mafai ona ou liliu atu i le Alii pe a ou tiga ona o filifiliga a isi.

• O le toatele o i tatou e ono tiga mai le faanoanoa pe a le tausia e se tasi tatou te faalagolago i ai ana tautinoga. O lenei mea na tupu i le Au Paia mai Kolesavile, Niu Ioka, o e na faamoemoe e faamautu i le fanua o Limani Copley i Ohaio. Ina ia aoao mai lenei aafiaga, e mafai e tagata o le vasega ona iloilo le autu i le vaega 54 (tagai foi Au Paia, 1:125–28; “A Bishop unto the Church,” Revelations in Context, 78–79). E mafai ona latou mafaufau e i ai se latou uo i le Au Paia i Kolesavile ona sue lea o le fautuaga i le vaega 54 e mafai ona latou faasoa atu i la latou uo. Pe mafai ona latou suesue le faaaliga mo se mea e mafai ona fesoasoani i se tasi o loo puapuaga ona o filifiliga a se isi tagata. (E mafai ona e faasino atu le folafolaga i le fuaiupu 6 ia i latou e tausia a latou feagaiga.)

• E i ai i le Mataupu Faavae ma Feagaiga 54:10 ni nai fuaitau e mafai e lau vasega ona maua e aoga, e pei o le “onosai i puapuaga,” “vave saili mai ia te au,” ma “malologa i o latou agaga.” E mafai e tagata o le vasega ona filifili se fuaitau e manatunatu loloto ma suesue i ai, e faaaoga ai vaefaamatalaga po o isi punaoa e suesue ai mau fesootai. Ona mafai lea ona latou faasoa atu o latou manatu.

aikona o punaoa faaopoopo

Punaoa Faaopoopo

O a tatou tausimea.

Na faamatala e Peresitene Spencer W. Kimball: “I le Ekalesia o se tausimea o se faatuatuaga paia faaleagaga pe faaletino lea e i ai le tali atu. Ona o mea uma e a le Alii ia, o i tatou o tausimea i o tatou tino, mafaufau, aiga, ma meatotino. (Tagai Mataupu Faavae ma Feagaiga 104:11–15.) O se tausimea faamaoni o se tasi e faaaogaina le pule amiotonu, tausia ana lava, ma vaavaai atu i e matitiva ma e le tagolima’ (Welfare Services: The Gospel in Action,’,” Ensign, Nov. 1977, 78).

Faaleleia o Lo Tatou Aoao Atu

Fesoasoani i tagata aoao e lagolago le tasi ma le isi. Fatu se siosiomaga o le vasega e lagolago ma faamalosiau e le tasi tagata aoao le isi. Valaaulia i latou e faasoa mai manatu ma auala e faaleleia ai la latou suesuega patino ma faaleaiga. (Tagai Aoao Atu i le Ala a le Faaola,36.)