tagata o loo potopoto i talaane o le vai

Fonotaga i le Tolauapiga, saunia e Worthington Whittredge

3–9 Me

Mataupu Faavae ma Feagaiga 46-48

“Ia Outou Saili ma le Faamaoni Meaalofa Silisili Ona Lelei.”

A o e faitauina le Mataupu Faavae ma Feagaiga 46-48, atonu e molimau mai le Agaga Paia ia te oe i upumoni i nei vaega. O le faamaumauina ma le iloiloina o uunaiga e mafai ona fesoasoani ia te oe e maua ai ala e fesoasoani i tagata o le vasega ia iloa nei lava upumoni.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E mafai ona aoga mo tagata o le vasega ona faasoa, mai i lea taimi i lea taimi, pe o faapefea mai a latou suesuega o tusitusiga paia patino ma faaleaiga. Mo se faataitaiga, a faasoa mai e tagata o le vasega se manatu i se mea na iloa e i latou po o se tagata o le aiga i lenei vaiaso, e mafai ona e fesili atu ia i latou i mea na latou faia i le taimi o a latou suesuega na uunaia ai na manatu.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 46:1–7

E tatau ona tatou taliaina tagata uma i le Ekalesia a Iesu Keriso.

• Mo le toatele, o le ala po o mea latou te lagonaina i sauniga o le Ekalesia e mafai ona matuai uunaia ai lo latou toaga i le Ekalesia. O faatonuga a le Alii i le Mataupu Faavae ma Feagaiga 46:1-7 e mafai ona fesoasoani i tagata o lau uarota ia maua ni aafiaga o le tapuai e sili atu le taliaina, ma aoga mo le tasi ma le isi ma mo tagata asiasi. E mafai e tagata o le vasega ona suesue i nei fuaiupu, ma vaai mo mataupu faavae e fesootai i sauniga o le Ekalesia ma lisi i le laupapa mea latou te maua. Mo mea taitasi i le lisi, e mafai e le vasega ona talanoaina pe faapei lena mataupu faavae i le faatinoina.

• E faapefea e fetalaiga a le Alii i le Mataupu Faavae ma Feagaiga 46 ona fesoasoani i tagata o le vasega e vaai i sauniga o le Ekalesia o se avanoa e lagona ai le Agaga Paia? E mafai ona e valaaulia tagata o le vasega e suesue le Mataupu Faavae ma Feagaiga 46:2 ma talanoaina se taimi na latou vaaia ai taitai ma faiaoga o taitaia sauniga e ala i le Agaga Paia. O le a le matafaioi a i latou o auai i sauniga? Mafaufau e valaaulia tagata o le vasega e faasoa mai ni taimi na latou lagona ai o se sauniga na taitaia ma faatonuina e ala i le Agaga Paia.

• Atonu e mafai ona e valaaulia ni nai tagata o le vasega e faasoa mai o latou aafiaga i le taimi na latou auai ai i se sauniga o Le Ekalesia a Iesu Keriso o le Au Paia o Aso e Gata Ai mo le taimi muamua lava. O a mea na fesoasoani ia i latou e lagona ai le taliaina? O le a se fautuaga e mafai ona latou avatu i isi tagata ina ia sili atu ai le taliaina o a tatou sauniga o le Ekalesia? E mafai faapefea ona tatou faaaoga le fautuaga a le Alii o loo maua i le Mataupu Faavae ma Feagaiga 46:1-7? Tuu atu i tagata o le vasega e faatino pe o le a le mea o le a latou fai atu pe a latou vaaia se tagata fou o savali mai i le falelotu mo le taimi muamua.

• E mafai foi ona fesoasoani se viiga faapenei “’Tis Sweet to Sing the Matchless Love” (Hymns, no. 176 po o le 177) e mafai foi ona fesoasoani i tagata o le vasega e mafaufau ai ma talanoaina le ala e fai ai a tatou sauniga o le Ekalesia ia sili atu le taliaina ma mamana. E mafai e tagata o le vasega ona usu le viiga faatasi ma faasoa mai ni manatu mai upu i le ala e fesoasoani ai i isi ia lagona le alofa o le Atua i le ekalesia.

  tagata i le lotu

  Na aoao mai le Alii e taliaina tagata uma i Lana Ekalesia.

Mataupu Faavae ma Feagaiga 46:7-33

E tuuina mai e le Tama Faalelagi meaalofa faaleagaga mo le manuia o Ana fanau.

• Na matuai talitonu lava le Au Paia anamua i faaaliga a le Agaga Paia. E mafai faapefea ona e fesoasoani i tagata o lau vasega e fausia lo latou faatuatua i nei meaalofa e mafai ona faaalia i o tatou olaga i le aso? E mafai ona e amata i le valaaulia o tagata o le vasega e faitau le Mataupu Faavae ma Feagaiga 46:7-33 i ni paga po o ni vaega toalaiti. Fai ia i latou e vaai mo ni meaalofa faaleagaga ia le itiiti ifo ma le lima ma talanoaina ni ala na latou vaai ai i na meaalofa i o latou olaga po o le olaga o se tasi latou te iloaina—e aofia ai tagata i le vasega. O a ni mea na latou maua e mafai ona latou faasoa mai i le vasega e fausia ai lo latou faatuatua i nei meaalofa?

• Na folafola mai e le Alii o na meaalofa a le Agaga e aoga ia i latou e faatuatua ae “le mo se faailoga” (fuaiupu 9). Atonu e mafai ona talanoaina e tagata o le vasega pe faapefea ona aoga meaalofa faaleagaga i e faatuatua. E mafai faapefea e nei meaalofa ona fesoasoani ia i latou e fia maua pe faamalosia a latou molimau i le talalelei?

• O nisi tagata e alolofa i le Atua ma e taumafai e tausi Ana poloaiga ae le lagonaina faapea na latou mauaina ni meaalofa o le Agaga. E mafai faapefea ona fesoasoani le fautuaga i le Mataupu Faavae ma Feagaiga 46:7-33?

Mataupu Faavae ma Feagaiga 47

E mafai ona taitai tatou e le Agaga Paia ao tatou faataunuuina o tatou valaauga.

• E tele tagata e mafai ona fesootai i le lagona o John Whitmer ina ua ia manao i le faamautinoaga pe o lona valaauga na mai le Atua. Atonu e mafai e tagata o le vasega ona faasoa mai ni aafiaga faapea na latou oo i ai. O a mea tatou te maua i le Mataupu Faavae ma Feagaiga 47 e mafai ona tuuina atu ia John Whitmer le faamautinoaga i lona tofiga?

Faaleleia o Lo Tatou Aoao Atu

O lau matafaioi o se faiaoga. O le aoao atu e sili atu nai lo le tuuina atu o faamatalaga ua e saunia. Mai isi mea, e aofia ai le fatuina o se siosiomaga e mafai ai e tagata o le vasega ona aoao ma iloa upumoni mo i latou lava ma faasoa atu mea na latou aoaoina i isi. Mo se faataitaiga, i le lesona atoa, fesili atu i tagata o le vasega e uiga i o latou aafiaga i le suesueina o tusitusiga paia i le fale.