vai i le laoso

10–16 Me

Mataupu Faavae ma Feagaiga 49–50

“O le Mea e Mai i le Atua o le Malamalama Lea”

Ina ia “talai le afioga o le upumoni e ala i le Faamafanafana ” (Mataupu Faavae ma Feagaiga 50:17), saili uunaiga mamana ao e mafaufau loloto i le Mataupu Faavae ma Feagaiga 49–50. Ona faalogo lelei lea i le faatonuga a le Atua ao e aoao atu.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E faaopoopo i le faasoaina o manatu na latou maua ao suesue i tusitusiga paia, atonu e aoga i tagata o le vasega ona talanoaina le ala na oo mai ai na manatu. E mafai ona e valaaulia tagata o le vasega e faasoa i le tasi ma le isi manatu i se fuaiupu i le Mataupu Faavae ma Feagaiga 49–50 ma talanoaina le mea na taitaia i latou i na manatu.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 49; 50:1–36

E mafai e upumoni o le talalelei ona fesoasoani ia te au e iloa aoaoga sese.

• Na tuuina mai le vaega 49 e faamaonia ai le aoaoga faavae moni lea na faasaoina mea na aoaoina e isi (tagai i otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga mo nisi faamatalaga o le talafaasolopito). Ina ia fesoasoani i tagata o le vasega e suesue lenei vaega, e mafai ona e vaevae le vasega i ni vaega ma tofi vaega taitasi i se tasi o autu faaleaoaoga faavae ua aoaoina (e pei ona lisiina i le autu o le vaega mo le vaega 49). E mafai e vaega ona talanoaina fesili nei: O a upumoni na aoao mai e le Alii e uiga i lenei autu i le vaega 49? O a ni mea e talitonu i ai tagata i lenei autu i le aso? O a isi upumoni ua aoaoina e le Alii e uiga i lena autu e ala mai i o tatou perofeta o aso e gata ai? Tuu atu i tagata o le vasega se avanoa e faasoa ai o latou agaga faafetai mo upumoni ua faaalia i o tatou aso.

• E pei o faifeau i Katelani e “lei malamalama i faaaliga o agaga eseese” (Mataupu Faavae ma Feagaiga 50, autu o le vaega), o nisi taimi tatou te mafafaufau ai pe o mea ua tatou vaai i ai e mai le Agaga pe mai se isi uunaiga. O a mea ua tatou aoao mai le Mataupu Faavae ma Feagaiga 50:1-36 e fesoasoani ia i tatou ia iloa le uunaiga a le Agaga? E mafai ona e tuu atu i tagata taitoatasi o le vasega e filifili se seti o fuaiupu e suesue ona fesili atu lea i tagata o le vasega e faasoa mai mea na latou maua.

Mataupu Faavae ma Feagaiga 49:15–17

O le faaipoipoga i le va o le alii ma le tamaitai e taua i le fuafuaga a le Atua.

• Ona o le faaipoipoga e taua i le fuafuaga a le Tama Faalelagi, ua naunau Satani e fatuina se vevesi e faasaga i ai. E mafai ona aoga i lau vasega le faia o se lisi i le laupapa o upumoni ua faaalia mai e le Alii e uiga i le faaipoipoga. Mo se faataitaiga, o a upumoni e uiga i le faaipoipoga ua tatou aoao mai le Mataupu Faavae ma Feagaiga 49:15-17? O isi mau aoga e aofia ai Kenese 2:20–24; 1 Korinito 11:11; po o isi e maua i “Faaipoipoga, Faaipoipo” i le Taiala i Tusitusiga Paia (scriptures.ChurchofJesusChrist.org). E mafai foi e tagata o le vasega ona maua upumoni i le “O le Aiga: O se Folafolaga i le Lalolagi.” E faalagolago i mea ua tatou aoao mai nei punaoa, aisea e taua ai le faaipoipoga i le va o le tane ma le ava i le fuafuaga a le Atua? (tagai “Punaoa Faaopoopo”).

  ulugalii i fafo o le malumalu

  O le faaipoipoga i le va o se alii ma se tamaitai ua faauuina e le Atua.

Mataupu Faavae ma Feagaiga 50:13–22

E siitia faatasi faiaoga ma tagata aoao e le Agaga.

• O le faatonuga a le Alii e uiga i le talaiga ma le mauaina o le upumoni e ono saunia se avanoa lelei e talanoaina le matafaioi e fefaasoaai ai oe o se faiaoga ma tagata o le vasega i le faaaogaina o le aoaoga o le talalelei. Mafaufau e fai i le vasega e iloilo le Mataupu Faavae ma Feagaiga 50:13-22 i ni paga ma talanoaina matafaioi a le Agaga, faiaoga, ma tagata aoao. E mafai e ni nai paga ona faasoa mai i le vasega mea na latou aoaoina. O a “isi ala” tatou te taumafai i nisi taimi e aoao atu ai pe aoao mai ai le talalelei? (fuaiupu 17). E faapefea ona tatou faaleleia atili i le mauaina o le Agaga? O a ni mea e musuia tatou e fai i o tatou aiga ma i le lotu ia sili atu ai le aoaoina atu ma le aoaoina mai o le talalelei?

aikona o punaoa faaopoopo

Punaoa Faaopoopo

O le faaipoipoga e taua i le fuafuaga a le Tama Faalelagi.

Na faamatala mai e Elder David A. Bednar le ala e taua ai i le Atua le fuafuaga o le faaolataga:

“O le mamanu paia, ua fuafuaina alii ma tamaitai ina ia aga’i atu faatasi i luma i le faaatoatoaga ma se atoaga o le mamalu. Ona o o la’ua natura ma mana tulaga ese, o lea e tofu aumaia ai e tane ma fafine i se sootaga o le faaipoipoga ia vaaiga ma aafiaga iloga. E eseese sao o le tane ma le fafine, ae e tutusa lava [o laua sao] ina ia tasi ma se faatasiga e leai se isi lava auala e mafai ai. O le tane e faaatoa ma atoatoa ai le fafine, ae o le fafine e faaatoa ma atoatoa ai le alii, a o laua aoao mai, ma faamalosia faatasi, ma faamanuia e le tasi le isi. …

“O se aiga e i ai se tane ma se ava alolofa ma faamaoni, o le nofoaga aupito sili lea ona lelei e mafai ona tausia ai fanau i le alofa ma le amiotonu, ma mafai ona taulimaina ai manaoga faaleagaga ma faaletino o le fanau. E pei lava o uiga tulaga ese e saofaga ai alii ma tamaitai i le faaatoatoaina o se mafutaga faalefaaipoipoga, e faapena foi ona taua na uiga i le tausiaina, faafaileleina ma le aoaoina o fanau” (E Taua le Faaipoipoga i Lana Fuafuaga Faavavau,”,” Liahona, Iuni 2006, 83–84).

Faaleleia o Lo Tatou Aoao Atu

Taitaia ni talanoaga musuia. E i ai i tagata uma se mea e saofaga atu, ae o nisi taimi e le maua uma e tagata le avanoa. I le mulimuli ai i le uunaiga a le Agaga, vaai ni auala e faateleina ai le numera o tagata o le vasega e mafai ona faasoa mai o latou manatu ma lagona.