o se fanua i le laoso

Itumalo o Tavesi, Misuri

14–20 Iuni

Mataupu Faavae ma Feagaiga 64-66

“E Manaomia e le Alii le Loto ma le Mafaufau Malie”

I lau suesuega i lenei vaiaso, mafaufau ma le agaga tatalo po o a mataupu faavae mai le Mataupu Faavae ma Feagaiga 64--66 o le a faateleina le faatuatua ma le malamalama o tagata o lau vasega.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia uunaia tagata o le vasega e faasoa mai se mea sa latou iloa e taua i la latou suesueina o tusitusiga paia i lenei vaiaso, e mafai ona e fai atu ia i latou e mafaufau loloto i luitau o tatou feagai i le aso. Ona valaaulia lea o i latou e faasoa mai se fuaiupu mai le Mataupu Faavae ma Feagaiga 64-66 latou te lagona e mafai ona fesoasoani i se tasi o na luitau.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 64:1--11

E manaomia ona tatou faamagalo i tagata uma.

• Atonu e aoga i tagata o le vasega le talanoa pe aisea e mafai ai ona faigata le faamagalo o isi—ma pe faapefea ona latou foia na faigata. E mafai ona latou suesueina le Mataupu Faavae ma Feagaiga 64: 1-11 mo mataupu faavae ma upumoni e musuia i latou ia sili atu ona faamagalo atu. O le a se mea ua tatou aoao e uiga i le Faaola mai nei fuaiupu? Ina ia fesoasoani e faaalia faamanuiaga o le faamagalo atu, e mafai ona e faasoa atu le tala ia Morrell Bowen mai le savali a Elder Jeffrey R. Holland “O le Galuega o le Faaleleiga” (Ensign po o le Liahona, Nov. 2018, 77–79) po o le vitio “Forgiveness: My Burden Was Made Light” (ChurchofJesusChrist.org). Atonu e i ai ni tagata o le vasega e ono naunau e faasoa mai se tala patino o le faamagalo atu po o le mauaina o le faamagaloga. Na faapefea ona faamanuiaina tagata i nei faataitaiga e ala i le mana o le faamagaloga?

Mataupu Faavae ma Feagaiga 64:31–34

E manaomia e le Alii lo tatou “loto ma se mafaufau malie.”

• E le finagalo le Alii ia tatou “faavaivai”; ae ui i lea, o se mea masani mo tagata o loo latou taumafai le mea sili—e aofia ai, atonu, o nisi o lau vasega—ua amata ona “faavaivai i le faia o mea lelei.” Aisea e tupu ai lea faavaivai? O le a se fautuaga tatou te maua i le Mataupu Faavae ma Feagaiga 64:31–34 atonu e fesoasoani ia i tatou a o tatou tauivi ma na lagona?

• Ina ia faa’oaina la outou talanoaga, e mafai ona e faaali atu ni ata o se mea lapoa ma taua na fausia i se taimi umi lava mai ni “mea laiti”—e pei o se fale maamora po o piliki. O a nisi o faataitaiga o le “galuega tele” ua tuuina mai e le Alii ia i tatou? O a ni mea laiti e mafai ona tatou faia nei e faataatia ai le faavae o lena galuega?

• Ina ia fesoasoani i tagata o le vasega ia mafaufau loloto atili e uiga i le Mataupu Faavae ma Feagaiga 64:34., e mafai ona e tusia le Loto ma le Mafaufau Malie i le laupapa. E mafai e tagata o le vasega ona lisi i lalo o nei ulutala o latou lagona i le uiga i le tuuina atu o o tatou loto ma se mafaufau malie i le Alii. Mo se faamatalaga o nei faaupuga, tagai i upu a Elder Donald L. Hallstrom i le “Punaoa Faaopoopo.” O mau e pei o nei e mafai ona saunia nisi vaaiga: Mosaea 7:33; Eteru 4:15; Mataupu Faavae ma Feagaiga 43:34; Mose 7:18; Iosefa Samita—Talafaasolopito 1:19.

Mataupu Faavae ma Feagaiga 65

Ua saunia e le malo o le Atua i le fogaeleele le lalolagi mo le toe foi mai o le Faaola.

• Ua tuuina mai e le Mataupu Faavae ma Feagaiga 65 se faamatalaga musuia o le misiona a le Ekalesia a le Alii i aso e gata ai. Ina ia fesoasoani i tagata o le vasega ia vaai ia latou vaega i lenei misiona, e mafai ona e valaaulia i latou e suesue le vaega 65 ma vaavaai mo tali i fesili e pei o nei: O le a le mea e finagalo le Alii i Lona malo ia faataunuuina i le lalolagi? O le a se mea e finagalo o Ia ia ou faia e fesoasoani ai? E mafai foi ona e matamata i le vitio “Prepare Today for the Second Coming” (ChurchofJesusChrist.org) pe vaai le saunoaga a Peresitene Dallin H. Oaks i le “Punaoa Faaopoopo.” E mafai e tagata o le vasega ona faasoa mai pe faapefea ona latou tali i fesili a Peresitene Oaks.

aikona o punaoa faaopoopo

Punaoa Faaopoopo

“O Le Loto ma se Mafaufau Malie”

Sa faamalamalama mai e Elder Donald L. Hallstrom le uiga o le fuaitau “le loto ma se mafaufau malie’:

“O le loto o se faatusa o le alofa ma le tuuto. Tatou te faia osigataulaga ma tauave avega mo i latou tatou te alolofa i ai e le mafai lava ona tatou onosaia mo soo se isi lava mafuaaga. Afai e leai se alofa, e le aoga lo tatou tuuto. …

“O le i ai ‘o se mafaufau malie’ o lona uiga o le tuuina atu o la tatou taumafaiga sili ma mafaufauga aupito lelei ma le sailia o le poto o le Atua. E ta’u mai ai o la tatou suesuega aupito tuuto i le olaga e tatau ona [taulai] i mea e faavavau le natura. O lona uiga e tatau ona i ai se sootaga e matuai mausali lava i le va o le faalogo i le afioga a le Atua ma le usitai i ai” (“O le Tagavai i Nuuese,” Liahona, Me 2011, 31–32).

Sauniuniga mo le Afio Mai Faalua.

“E faapefea pe afai o taeao le aso e afio mai ai [Iesu Keriso]? Afai tatou te iloa o taeao le aso tatou te fetaia’i ai ma le Alii—e ala i lo tatou oti faafuasei, po o Lona toetu faafuase’i mai foi—o le a sa tatou mea e fai i le aso? O a ni mea o le a tatou ta’uta’u atu? O a ni faatinoga o le a tatou tuua? O a ni o tatou toatuga o le a faaleleia? O a ni faamagaloga tatou te tuuina atu? O a ni molimau o le a tatou faia?” (Dallin H. Oaks, “Sauniuniga mo le Afio Mai Faalua,” Ensign po o le Liahona, Me 2004, 7–10).

Faaleleia o Lo Tatou Aoao Atu

Saili le malosi mai le Faaola. “I au taumafaiga e ola ma aoao atili e pei o le Faaola, o le a i ai lava le taimi e te toilalo ai. Aua le faalotovaivaia oe, ae, tuu atu ou sese ma vaivaiga e liliu atu ai oe i le Tama Faalelagi ma le Faaola”(Aoao Atu i le Ala a le Faaola,14).