“Tuun 14–20. Reirei ao Berita aika Tabu 64–66: ‘Te Uea e Kainanoa te Nano ao te Iango ae Tatauraoi,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Tuun 14–20. Reirei ao Berita aika Tabu 64–66,” Nakomai, Iriirai—Ibukin te Reirei n Tabati: 2021
Daviess County, Missouri
Tuun 14–20
Reirei ao Berita aika Tabu 64–66
“Te Uea e Kainanoa te Nano ao te Iango ae Tatauraoi”
N am tai ni kamatebwai n te wiiki aei, iango ma te tataromwaaka bwa tera reirei man Reirei ao Berita aika Tabu 64–66 e na karikirakea aia onimaki ao rabakauia kaain am kiraati.
Korei Am Namakin
Kaungaa te Tibwatibwa
Ni kaungaia kaain am kiraati n tibwaua te bwai are a kunea ae rangin ni bongana n aia kamatebwai ni booki aika tabu n te wiiki aei, ko kona n tuangaiia bwa a na iangoi raoi kaangaanga ake ti kaitara ma ngaai ni boong aikai. Ngkanne kaoiia bwa a na tibwaua te kibu man Reirei ao Berita aika Tabu 64–66 are a namakinna bwa e kona n ibuobuoki mai buakon teuana kakaewenako akanne.
Reirei te Reirei
Reirei ao Berita aika Tabu 64:1–11
Ti kantaningaaki bwa ti na kabwarai aia bure aomata nako.
-
E na reke kabwaiaia kaain am kiraati man maroroakinana bwa bukin tera kabwaraakin aia bure tabeman e na kona ni kaangaanga—ao a kanga n tokanikai iaon kaangaanga akanne. A kona ni kakaea Reirei ao Berita aika Tabu 64:1–11 ibukin reirei ao koaua ake a na kaungaia ni kakabwarabure riki. Tera ae ti reiakinna n rongorongon te Tia Kamaiu man kiibu aikai? Ni buoka kabwarabwaraan kakabwaia ibukin te kabwarabure, ko kona n tibwaua karakinan Morrell Bowen man ana rongorongo Unmwaane Jeffrey R. Holland “The Ministry of Reconciliation” (Ensign ke Riaona, Nob. 2018, 77–79) ke te witeo “Forgiveness: My Burden Was Made Light” (ChurchofJesusChrist.org). Ke e na anganano kaain te kiraati n tibwaua rongorongona ae onoti ni kabwaabwaka ana kabwarabure ke ni butimwaea kabwaraan ana bure. A kanga aomata inanon katooto aikai ni kakabwaiaki man mwaakan te kabwarabure?
Reirei ao Berita aika Tabu 64:31–34
Te Uea e kainnanoa “te nanoa ao te iango ae tatauraoi.”
-
E aki tangiria te Uea bwa ti na “kua”; e ngae n anne, bon te bwai ae riiriki ibukiia aomata ake a kataa aia kabane n tamaroa—n raonaki, ma tao, tabeman n am kiraati—n “aki kua ni karaoan ae raoiroi.” Bukin tera ngkai e riki te kua n aekakin aei? Tera te reirei ae ti kunea n Reirei ao Berita aika Tabu 64:31–34 are e kona ni buokiira ngkana ti karawawataaki ma aeka n namakin aikai?
-
Ibukin kanakoraoan am marooro, ko na bae ni kaota tamnein te bwai ae bubura ao ni kakukurei are e kateaki n te tai ae rangi ni maan man “bwaai aika uarereke”—n aron ae karaoaki man te kiraati ke te kateitei ae karaoaki man te buriki. Tera tabeua katooto ibukin te “mwakuri ae korakora” are e a tia n anganiira te Uea? Tera bwaai aika uarereke ae ti kona ni karaoi ni kawenea aan te mwakuri anne?
-
Ibukin buokaia kaain te kiraati ni kananoa riki aia iango ibukin Reirei ao Berita aika Tabu 64:34, ko kona ni korea Te Nano ao Te Iango ae Tatauraoi iaon te burakibooti. A kona kaain te kirati ni karinani iaan atuu aikai bwaai ake a namakini n anga nanora ao ara iango ae tatauraoi nakon te Uea. Ibukin kabwarabwaraakin taeka aikai, taraa ana taeka Unimwaane Donald L. Hallstrom inanon “Bwaai n Ibuobuoki Riki Tabeua.” Koroboki aika tabu n aron akana imwiina a kona naba ni katauraoi tabeua nonoori: Motiaea 7:33; Ita 4:15; Reirei ao Berita aika Talbu 43:34; Mote 7:18; Iotebwa Timiti—Rongorongo 1:19.
Abanuean te Atua iaon te aba e katauraoa te aonaaba ibukin okin te Tia Kamaiu.
-
Reirei ao Berita aika Tabu 65 e anga te kabwarabwara ae kaunganano ibukin ana mition ana Ekaretia te Uea ni boong aika kaitira. Ni buokiia kaain te kiraati bwa a na noori tabeia n te mition aei, ko kona ni kaoiia bwa ana kakaea mwakoro 65 ni kakaei kaekaan taian titiraki n aron aikai: Tera ae tangira te Uea n abanuena bwa e na koro bukina iaon te aba? Tera ae E tangiria bwa N na ibuobuoki ni karaoia? Ko kona naba ni mataku n te witeo “Prepare Today for the Second Coming” (ChurchofJesusChrist.org) ke taraa ana rongorongo Beretitenti Dallin H. Oaks inanon Bwaai n Ibuobuoki Riki Tabeua.” A kona kaain te kiraati ni tibwatibwa bwa a na kanga ni kaeka ana titiraki Beretitenti Oaks.
Bwaai n Ibuobuoki Riki Tabeua
“Te nano ao te iango ae tatauraoi.”
Unimwaane Donald L. Hallstrom e taku bwa nanon te kibun taeka ae te “nano ao te iango ae tatauraoi”:
“Te nano bon kanikinaean te tangira ao te motinnano. Ti karaoi anganano ao ni kabebetei rawawataia naake ti tangiriia ae ti na aki kona ni keiakinna n iai riki bukina tabeua. Ngkana akea te tangira, e na karako ara motinnano. …
“Ni karekean te ‘iango ae tatauraoi’ e kaotia bwa ti na anga ara konabwai ae te kabanea n tamaroa ao te iango ae itiaki ao ni ukoukora wanawanan te Atua. E taekinaki bwa ara kamatebwai inanon maiura ana bon tii ibukin baike akea tokina. Nanona bwa e na iai te reitaki ae aki kona ni kamaenakoaki imarenan ongoraekinan ana taeka te Atua ao n te ongeaba nako iai” (“Te Nano ao te Iango ae Tatauraoi,” Ensign, Tuun 2011, 31–32).
Te Katauraoi ibukin te Kauoaki.
“Tera ngkana tao arona bwa a na bong ni kaoti [Iesu Kristo] n ingabong? Ngkana arona bwa ti ataia ae ti na kaitibo ma te Uea n ingabong—rinanon matera ae moantaai ke rinanon Okina ae akea kantaningaakina—tera ae ti na karaoia n te bong aei? Tera kaotibure aika ti na karaoi? Tera mwakuri aika ti na katoki karaoakiia? Tera rongorongo aika ti na tiku iaona? Tera te kabwarabure ae ti na kabwaabwakia? Tera koaua ake ti na kaoti?” (Dallin H. Oaks, “Katauraoi ibukin te Kauaoki,” Ensign ke Riaona, Meei 2004, 9).
Kanakoraoan Ara Anga Reirei
Karekea korakoram mai iroun te Tia Kamaiu. “Inanon am konabwa ni maiu ao n reirei n aron te Tia Kamaiu, ko na aki bwaka ni kakoroan nanon am kouru inanon te tai. Tai kabwaraa nanom, ma, anga am kairua ma mamaaram nakon te Uea ao te Tia Kamaiu” (Reirei n ana Kawai te Tia Kamaiu, 14).