revelation manuscript book in display case

Tuun 21–27

Reirei ao Berita aika Tabu 67–70

“Kakawaki … Kaubwain te Aonaaba ae Bwanin”

Te katauraoi n anga reirei nanona e mwaiti riki nakon iangoan te bwai ae ko na taekinna ao ni karaoia n aron te tia reirei. E raonaki naba ma iangoakina bwa tera ae a kona ni karaoia taan kamatebwai ni bon reireiniia imarenaia. Ko na kanga ni kaoiia kaain te kiraati bwa a na tibwauai bwaai ake a rinanona ke aia nonoori ake a karekei ngke a wareki booki aika tabu aikai?

Korei Am Namakin

te aikaon ibukin te tibwatibwa

Kaungaa te Tibwatibwa

Ko kona ni korea iaon te burakibooti Te wiiki aei e reireinai te Uea … ao kaoiia kaain te kiraati bwa a na kabanea te tiententi ma te bwai are a reiakinna.

te aikaon ibukin te anga reirei

Reirei te Reirei

Reirei ao Berita aika Tabu 67:1–9

Kaotioti ake a roko rinanon Iotebwa Timiti a bon koaua ao a roko mairoun te Atua.

• Ni kamataatakim ibukin rongorongon Reirei ao Berita aika Tabu 67 e na kona n ibuobuoki ni maroroakinan te mwakoro aei. Tao e na kona temanna kaain te kiraati ni kakimototoa taekan bwaai ake a kairiiri nakon te kaotioti aei (taraa Reirei ao Berita aika Tabu 67, atuun te mwakoro; Saints, 1:140–43). Ngke arona bwa ti roko n te boowi ike a maroroakinaki iai taian kaotioti ake a boretiaki, a na tera bukina ae ti na anga ibukin tangiran te iango aei? Tera ae ti na taekinna nakoia aomata ake a tabeaianga ibukin kabwakan ana taetae Iotebwa Timiti? Tera ae ti reireinaki ni mwakoro 67 ibukiia burabeti ao te kaotioti? A kona kaain te kiraati n tibwauaia bwa a kanga n ataia i bon irouia bwa a bon koaua kaotioti aikai.

Reirei ao Berita aika Tabu 68:1–6

Taeka aika kaunganano mairouia ana toro te Uea bon ana taeka te Uea.

• Ibukin buokaia kaain te kiraati ni maroroakina Reirei ao Berita aika Tabu 68:1–6, ko kona ni kaoiia bwa a na wareki kiibu aikai inanon kurubu aika uarereke ao n tibwauai imarenaia koaua ake a reiakin man aia reirei ana toro te Uea. Kaoiia kaain te kurubu bwa a na tibwatibwa imarenaia bwa a kanga n atai reirei ake a taekinaki n te kibu 4 bwa a koaua. A kona kaain te kiraati n tibwauai bwaai ake a rinanona ngke a taekina ke n taetae n aron “ngke a kairaki iroun te Tamnei ae Raoiroi” (te kibu 3) ao e kanga te Uea n raoniia ao n tei irarikiia (taraa te kibu 6).

• Ngkana ko kan marooroakinna bwa a kanga kiibu aikai ni kaineti nakon aia reirei ana toro te Uea n te maungatabu ni kabuta, n ana taeka Unimwaane Jeffrey R. Holland inanon “Bwaai n Ibuobuoki Riki Tabeua” a rangi ni ibuobuoki. A kona naba kaain te kiraati n tibwauai rongorongo aika tibwa nako n te maungatabu are a kakorakora aia onimaki n te reirei are e kuneak inanon kiibu aikai.

Reirei ao Berita aika Tabu 68:25–31

Kaaro iai katabeaia n reireiniia natiia ma te tangira.

• Iai kaaro inanon am kiraati—ke kaaro ibukin taai aika a na roko? A na reke rakaia man maroroakinan ana reirei te Uea nakoia kaaro inanon te mwakoro 68. N aron te katooto, tao tabeman kaaro inanon te kiraati a kona n rinea te reirei man kiibu aikai 25–28 ao ni marooroakinna bwa a na kanga ni kataia n reireiniia natiia taekan bwaai aikai (kiibu 29–31 ao ni karekei naba tabeua reirei aika kakaawaki). Ke a kona tabeman kaain te kiraati ni marooroakinna bwa a kanga n reiakinaki irouia aia karo reirein te euangkerio.

  Bukin tera ngkai te mweenga te tabo ae tamaroa ibukiia ataei n reiakina te euangkerio? Tera ara taeka nakoia kaaro ake a namakinna bwa aki tau ke ni korakai man tabeia n reireiniia natiia?

  te utu ae kamatebwai

  Te Atua e anganiia kaaro tabeia ibukin reireinakiia natiia.

Reirei ao Berita aika Tabu 70:1–4

Ti bukintaeka ibukin kaotioti ake ti anganaki iroun te Uea.

• Te Uea e anganiia taari te mwiokoaki ni karaoan te beku iaon taian kaotioti bwa a na uoti nako Missouri ao n tararuaia bwa a boretiaki. N te namakin raa ae ti kona n nooria bwa ti anganaki te mwiokoaki ni karaoan te beku iaon taian kaotioti? Tera tabeua reirei man te mwakoro aei ibukin te anganaki te mwioko ni karaoan te beku e kaeineti nakoira?

te aikaon ibukin bwaai n ibuobuoki riki tabeua

Bwaai n Ibuobuoki Riki Tabeua

Te Atua e taetae nakoira n te bong aei.

Unimwaane Jeffrey R. Holland e tibwauaia bwa e kanga te reirei ae taekinaki n Reirei ao Berita aika Tabu 68:4 ni kaeineti nakon te maungatabu ni kabuta: “I tuangi ngkami bwa kam na tarai boong aikana imwaaimi tiaki tii iaon rongorongo ake kam ongoraeakin ma iaon naba kamiimin te maungatabu ni kabuta—ngkai ngaira Aika Itiaki ti kakoaua te maungatabu ao ti kaoiia kaain te aonaaba bwa a na ongora ao ni kamwataua raoi n tarai. Ti kakoaua nakoia aaba, reeti, neewe, ao aomata bwa e aki tii maiu te Atua ma E taetae naba, bwa ibukin ara tai ao inanon ara bong te reirei are kam a tia n ongoraeakinna e, mena iaan ana kairi te Tamnei ae Raoiroi, ‘ana kaantaninga te Uea, … ana taeka te Uea, … bwanaan te Uea, ao mwaakan te Atua nakon te kamaiuaki’ [Reirei ao Berita aika Tabu 68:4]” (“An Ensign to the Nations,” Ensign ke Riaona, Meei 2011, 111).

Kanakoraoan Ara Anga reirei

Buokiia taan kamatebwai bwa a na boutokaiia imarenaia. “Aomata nako inanon am kiraati bon bwaai ni kakoaua aika bongana, n aia atatai, ao iai aia taneiai ni maiuakinan te euangkerio. Kaoiia bwa a na tibwatibwa ao ni boutokaiia imarenaia” (Reirei n ana Kawai te Tia Kamaiu, 5).