“Meei 31–Tuun 6. Reirei ao Berita aika Tabu 60–62: ‘Rabwata ni Kabane a Mena I nanon Baiu,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Meei 31–Tuun 6. Reirei ao Berita aika Tabu 60–62,” Nakomai, Iriirai—Ibukin te Reirei n Tabati: 2021
Te Kaembwaea i Missouri, iroun Bryan Mark Taylor
Meei 31–Tuun 6
Reirei ao Berita aika Tabu 60–62
“Rabwata ni Kabane a Mena I nanon Baiu”
E taku Unimwaane Ronald A. Rasband: “Ngaira n tatabemaniira ti riai moa ni kakorakoraira n tamneira ao imwiina ti na kakorakoraia naake irarikira. Iangoi raoi koroboki aika tabu ni katoa tai, ao uringa te iango ao te namakin are ko rinanona ngkai ko warekii” (“Lest Thou Forget,” Ensign ke Riaona, Nob. 2016, 114).
Korei Am Namakin
Kaungaa te Tibwatibwa
Ko kona ni kaungaa te marooro ae rangi n uaana man kaoakiia kaain te kiraati bwa a na kaeka te titiraki ke te iango are irekereke ma koroboki aika tabu ake a wareki ni mweengaia. N aron te katooto, ko kona ni kaoiia bwa a na tibwa te bwai are a reiakinna n te wiiki aei ibukin Tamara are i Karawa ke Iesu Kristo.
Reirei te Reirei
Reirei ao Berita aika Tabu 60:2–3, 7, 13–14; 62:3, 9
E kukurei te Uea ngkana ti kauki wiira n tibwaua te euangkerio.
-
Ngkai kaain te Ekaretia, ti ataia bwa te euangkerio ae e a tia ni kaokaki bon te kaubwai ae moan te kakaawaki are e kakabwaiai maiuia natin te Atua. Ngaia are bukin tera ngkai n tabetai ti nanokokoraki n tibwauai ara koaua ma tabeman? Iangoia kaoiia kaain te kiraati bwa a na korei ni karinani iaon te burakibooti tabeua bukina bwa bukin tera ngkai ti na aki kauki wiira n tibwaua te euangkerio. A kona ngkanne kaain te kiraati ni wareka Reirei ao Berita aika Tabu 60:2–3, 7, 13–14; 62:3, 9, ni kakaei taeka ke kibu n taeka are e kaungaia bwa a na tibwaua te euangkerio. A kona ni korei ni karinani iaon te burakibooti bwaai ake a kunei. A kona tabeman kaain te kiraati n tibwaua te bwai are a rinanona ngke a tokanikai iaon maakuia ao n tibwaua te euangkerio ma tabeman.
-
Ni kabuta Reirei ao Berita aika Tabu 60–62, iai reirei, aika a uaia n taekinaki ao ni maiuakinaki, ibukin tibwauaakin te euangkerio. Ni buokiia kaain te kiraati ni kunei reirei aikai, ko kona ni butiia temanna ma temanna bwa e na rinanon teuana te mwakoro ao tibwauai bwaai nako ake a kunei ake a reireiaki iai taekan tibwauaakin te euangkerio. E na bae ni katamaroa te marooro ni wareka taekan aia banna ni katooto mitinare n taabo nako inanon koroboki aika tabu (taraa, n aron te katooto, Mwakuri 8:27–40; Aramwa 19:16–17) ao marooroakinna tera ae ti reiakinaki mai iai. Tera katooto ae ti kona n tibwauai man oin maiura? A kona kaain te kiraati n tibwaia a kanga ni kaoaki nakon te euangkerio ao e kanga aia namakin ibukiia aomata ake a reireinaki irouia? A kona ni karekea buokaia kaain te kiraati man karaoan te kaotioti ni kawai ake ti kona ni “kauki [wiira]” ao n tibwaua te euangkerio.
Tamneimitinare iaon te bwatiE tangiria te Uea bwa ti na tibwaua te euangkerio ma tabeman.
Reirei Ao Berita Aika Tabu 60:2–4; 61:1–2, 20, 36–38; 62:1, 6
Booki aika tabu a reireiniira taekan Iesu Kristo.
-
Kaoiia kaain te kiraati bwa a na korea iaon te burakibooti bwaai nako ake a reiakin ibukin te Tia Kamaiu n te wiiki aei man kamatebwaian mwakoro 60–62, n raonaki ma kiibu aika a irekereke. Ke a kona ni ukoukora Reirei ao Berita aika Tabu 60:2–4; 61:1–2, 20, 36–38; 62:1, 6 ni kakaei bwaai ake a reirei taekan te Tia Kamaiu. Tera karaki man koroboki aika tabu ke man oin maiura ae a kaota taben ao anuan te Tia Kamaiu are ti reiakinaki taekana? (n aron te katooto, Ioane 8:1–11; Ita 2:14–15). Ko kona ni kaoiia kaain te kiraati bwa a na tibwaua aia koaua iroun Iesu Kristo ke n iangoia n ae raba bwa tera ae E nanonna nakoia.
Reirei Ao Berita Aika Tabu 60:5; 61:22; 62:5–8
Te Uea e tangiria bwa ti na karaoi tabeua babaire “n aron nooran raoiroina [iroura].”
-
Iangoia kaoiia kaain te kiraati bwa a na wareka Reirei ao Berita aika Tabu 60:5; 61:22; 62:5–8 n ikatoatoa ke ni kurubu aika uarereke ao n tibwaua te bwai are a namakinna bwa ana rongorongo te Uea nakoira. Nningai ae a namakinna bwa a riai ni kabonganai oin aia moti ni karaoan te babaire? Iangoia n tibwaua ana rongorongo Beretitenti Dallin H. Oaks inanon “Bwaai n Ibuobuoki Riki Tabeua” bwa mwakoron am marooro. A na kanga kaaro ni buokiia natiia n reiakina te tua ae moan te kakaawaki aei?
Bwaai n Ibuobuoki Riki Tabeua
Ni mwakuri iaon ara moti ae te kabanea n tamaroa.
E reirei Beretitenti DallinH. Oaks:
“Te nano ae kairaki mai iroun te Uea bon te korakora, ma e riai n raonaki ma te atatai bwa Tamara are i Karawa e katikui babaire aika mwaiti ibukin ara rinerine i bon iroura. Karaoan te babaire i bon iroum bon teuana te buoka ibukin te rikirake ae ti riai n rinanona n te maiu ae mamate. Aomata ake a kataia ni bitii karaoan aia babaire bwa e na karaoi te Uea ao ni bubuti ibukin te kaotioti rinanon te rinerine anne ibukin kairakiia a na waekoa ni kunea bwa a na bon aki karekea kairakiia. N aron te katooto, e na bon kona n riki aio inanon taai ake te rinerine e aki rangi ni bongana taraakina ke tao te rinerine e butimwaeaki.
“Ti riai ni kamatebwai bwaai n ara iango, ni kabongana te mwaaka n iai bukina are e a tia ni kaaki inanora ara Tia Karikibwai. Ngkanne ti riai n tataro ibukin te kairiiri ao ni mwakuriia ngkana ti karekea. Ngkana akea te kairiiri ae ti karekea, ti riai ni mwakuri ni kabonganai ara moti aika te kabanea n tamaroa” (“Our Strengths Can Become Our Downfall,” Ensign, Okitobwa 1994, 13–14).
Kanakoraoan Ara Anga Reirei
Kinaia naake a rootaki. E na bae ni kaangaanga ataakin korakaia te koraki ae ko reireiniia. Ma n ana ibuobuoki te Tamnei ao am mataniwi, ko kona n ataa te kawai ae moan te tamaroa ni karoko irouia aomata aikai. (Taraa Reirei n ana Kawai te Tia Kamaiu, 8–9.)