“Meei 24–30. Reirei ao Berita aika Tabu 58–59: ‘Ingainga ni Kan Karaoa te Waaki ae e Raoiroi,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Meei 24–30. Reirei ao Berita aika Tabu 58–59,” Nakomai, Iriirai—Ibukin te Reirei n Tabati
Independence, Missouri, iroun Al Rounds
Meei 24–30
Reirei ao Berita aika Tabu 58–59
“Ingainga ni Kan Karaoa te Waaki ae e Raoiroi”
Imwiin warekan Reirei ao Berita aika Tabu 58–59, iangoi titiraki akana imwiina: Tera ae ko namakinna ae kaungaaki iai nanom bwa kam na tibwatibwa ma kaain am kiraati? N am kaantaninga tera ae a na kunea? Ko na kanga ni buokiia bwa a na kunei bwaai aikai?
Korei Am Namakin
Kaungaa te Tibwatibwa
Ibukin kaungaakin nanoia kaain te kiraati bwa a na tibwaua te bwai are a reiakinna n aia kamatebwai ni booki aika tabu, ko kona ni korei titiraki akana imwiina iaon te burakibooti: Tera ae ti reiakinna? Ti na kanga ni maiuakina te bwai are ti reiakinna? A kona kaain te kiraati ni korei ni karinani ian te moan titiraki koaua ake a kunei inanon Reirei ao Berita aika Tabu 58–59. Ngkanne a kona ni kabanea tabeua te miniti ni marooroakin iango man maiuakinan koaua akanne ao ni korei aia iango iaan te kauoua n titiraki.
Reirei te Reirei
Reirei Ao Berita aika Tabu 58:1–5, 26–33
A roko kakabwaia ni kaineti ma ana tai te Atua ao ara nanomatoa.
-
Reirei ao Berita aika Tabu 58 a taekini koaua are a kona ni uota te rau inanon taai ni kaangaanga. Kaain te kiraati a bae n tia ni kunei tabeua mai buakon koaua aikai n aia tai ni kamatebwai n te mwakoro aei; kaoiia bwa a na tibwauai bwaai ake a kunei. Ke a kona ni kakaei kiibu 1–5, 26–33 inanon te kiraati, ni kaka temanna ke inanon te kurubu, ibukin te bwai are e na rangi n ibuobuoki nakon temanna are e kaitara ma te kaangaanga ke are e kakantaningaa te kakabwaia are e taekinaki n te berita. Imwiin tibwauakin bwaai ake a kunei, tao a kona tabeman kaain te kiraati ni tibwauai bwaai ake a rinanona ke tabeua booki aika tabu ake a kamatoaaki iai koaua ake inanon kiibu aikai.
-
Ngkai mwakoron am kabwarabwara man te reirei aei, ko kona ni kaota te witeo “Hope Ya Know, We Had a Hard Time” (ChurchofJesusChrist.org) ao ni marooroakinna bwa tera ae ti na kona ni karaoia ni buokiia naake a rinanon taai ni kaangaanga. Ana taeka Titita Linda S. Reeves inanon “Bwaai n Ibuobuoki Riki Tabeua” e na rangi n ibuobuoki naba n am marooro. E kanga ana taeka Titita Reeves n roota te anga are ti taraa iai ara kaangaanga?
Reirei ao Berita aika Tabu 58:26–29
Ti kona ni “kakoroa bukin te raoiroi ae e mwaiti” man “oin nanora.”
-
Tera ae a reiakinna kaain te kiraati man kamatebwaian Reirei ao Berita aika Tabu 58:26–29 n te wiiki aei? Tao ko na kurubuniia kaain te kiraati ao ni kaoiia bwa a na marooroakin inanon aia kurubu kibun taeka ake a kunei bwa a rangi ni boongana inanon kiibu aikai. A kanga kiibu aikai ni kaungaira “ni kakoroa bukin te raoiroi ae e mwaiti”? (te kibu 27). Bukin tera e tangiria te Uea bwa ti na aki “kairoroaki ni bwaai ni kabane”? (te kibu 26). Tera iangoan kiibu aikai n ae tangiria te Uea bwa ti na riki iai?
Reirei ao Berita aika Tabu 59:9–19
Te Tabati bon ana bong te Uea.
-
Ibukin buokaia kaain te kiraati ni kakaea bwa tera are e taekinna te Uea nakoia Aika Itiaki n taai ake ngkoa i Missouri n taekan te Tabati, ko kona ni kaoiia bwa a na kakaea Reirei ao Berita aika Tabu 59:9–19 ao korei ni karinani iaon te burakibooti bwa tera ae taekinaki ni kibu n tatabeua ibukin te Tabati. A kona naba kaain te kiraati n tibwaia bwa e kanga n rikirake aia koaua ibukin te bong ae te Tabati ngkai a teimatoa n tabua te bong ae te Tabati. Sabbath.ChurchofJesusChrist.org iai tabeua witeo iai are a kona ni buoka waakinan te marooro.
-
N Reirei ao Berita aika Tabu 59, te Uea e reireia taekan te bong ae Tabati ni kabonganai taian taeka n aron “kimwareirei,” “kukurei,” ao “te nano ae kukurei” (kiibu 14–15). A kona kaain te kiraati ni kakaei taeka n aron aikai inanon kiibu 9–19. Ngkanne a kona kaain te kiraati n tibwaua te bwai are a karaoia ni karika te Tabati bwa e na kakukurei. Ti na kanga ni kabonganai kiibu aikai n reireiniia tabeman bwa bukin tera ngkai ti karinea te bong ae te Tabati?
-
Te marooro aei e reke bwa te raka n tai ibukiia kaain te kiraati n tibwauai aia iango bwa a kanga ngaiia ma aia utu ni kabongana te Tabati ni karaoa mweengaia bwa te tabo ni kamatebwaia te euangkerio. Kaoiia bwa a na tibwaia bwa e kanga aron aia konabwai ni buokiia n teimatoa n “kawakiniia … man baarekan te aonaaba” (te kibu 9).
Tamneimwangkon te toa ao te karikiTe toa bon te mwakoro ae kakaawaki ni karinean te Tabati.
Bwaai n Ibuobuoki Riki Tabeua
Ara kaangaanga a kona ni kairiira nakon te Tia Kamaiu.
Linda S. Reeves, te Beretitentii ni Kabuta n te Bootaki n Aine, e reirei:
“E kariaia te Uea bwa ti na tuoaki man kataaki, n tabetai nakon korakoran ara konabwai. Ti a tia n noori maiua ake ti tangiriia—ao tao bon maiura—ae kanga ai aron ae e kabuokaki nako aontano ao ni miimi bwa bukin tera ngkai Tamara are i Karawa ae tatangira e kariaia bwa a na riki aekakain bwaai aikai. Ma e aki katikuira ni kamannangiira; E tei ma baina aika tangaina nako, n ingainga ni kan kaoiira bwa ti na Nakoina. …
“… E ingainga ni kan buokiira, ni karaui nanora, ao ni kabebetei marakira ngkai ti katan iaon mwaakan ana Mwakuri ni Kamaiu ao ni karinei ara berita aika tabu. Kakatai ma kaangaanga ake ti kaitara ma ngaai bon moan bwaai raoi ake a kairiira Nakoina ao n nim ma ara berita bwa ti aonga n oki nakon mweengana ao ni karekei bwaai ni kabane ake iroun te Tama” (“Claim the Blessings of Your Covenants,” Ensign ke Riaona, Nob. 2013, 119–20).
Kanakoraoan Ara Anga Reirei
Ataia raoi bwa ko anga te reirei ae koaua. “Teimatoa n titirakiniko, ‘E na kanga te bwai ae I anga reirei iaona n ibuobuoki nakoia kaain au kiraati ni karikirakea te onimaki iroun Kristo, te rairannano, karaoan ao kawakinan berita aika tabu ma te Atua, ao ni karekea te Tamnei ae Raoiroi?’” (Reirei n ana Kawai te Tia Kamaiu, 20).