“Meei 17–23. Reirei ao Berita aika Tabu 51–57: ‘Te Tia Tararua ae Kakaonimaki, ae Raoiroi, ao e Wanawana,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Meei 17–23. Reirei ao Berita aika Tabu 51–57,” Nakomai, Iriirai—Ibukin te Reirei n Tabati
Te Moan Tabo ibukin te Ununiki, iroun James Taylor Harwood
Meei 17–23
Reirei ao Berita aika Tabu 51–57
“Te Tia Tararua ae Kakaonimaki, ae Raoiroi, ao e Wanawana”
N tabetai ana kairi te tamnei n te bwai ae ko na anga reirei iai e kona n roko ngkai ko marooroakin koroboki aika tabu ma kaain am utu ke raoraom.
Korei Am Namakin
Kaungaa te Tibwatibwa
Iangoia tibwauai taeka aikai mai iroun Unimwaane Quentin L. Cook: “Au kaantaninga bwa ngaira n tatabemaniira ti na karaua n rinanoa arora n kaka temanna ao n te utu mwiokoara ni karaoan te beku are ti a tia ni katabeaki ao ni bukintaeka iai” (“Stewardship—a Sacred Trust,” Ensign ke Riaona, Nob. 2009, 94). Ngkanne ko kona n tuangiia kaain te kiraati tera ae a reiakinna man mwakoro 51–57 ibukin mwiokoaia ni karaoan aia beku.
Reirei te Reirei
Reirei ao Berita aika Tabu 51:9, 15–20
Te Uea e tangiria bwa ti na riki bwa te tia tararua ae kakaonimaki, ae raoiroi, ao e wanawana”.
-
Ko na kanga ni buokiia kaain am kiraati n iangoia bwa e kanga ana taeka te Uea inanon te mwakoro 51 ni kaineti nakoia? Ko kona ni koreia iaon te burakibooti Tera ae onimakinai iai te Uea? ao kaoiia kaain te kiraati bwa a na korei ni karinani aia reke (taraa “Bwaai n Ibuobuoki Riki Tabeua” ibukin am iango). Ngkanne a kona ni kakaei reirei aika inanon kiibu 9, 15–20 are a reireinaki bwa a na kanga n riki bwa taan tararua aika a nakoraoi riki iaon bwaai ake a korei. Ke ko kona ni kabanea nanom iaon taeka aika “kakaonimaki,” “raoiroi,” ao “wanawana” inanon te kibu 19, ni marooroakinna bwa a kanga taeka aikai ni kakoroi nanon mwiokoara ni karaoan ara beku. Ngkana e kainnanoaki, uaia n rinanoa nanon te taeka ae “Mwioko ni Karaoan te Beku” inanon Kairi nakon Booki aika Tabu (scriptures.ChurchofJesusChrist.org).
Kaain te aro ake a maiuakina tuan katabun bwaai a anga aia bwai ni kabane nakon te Ekaretia.
Reirei ao Berita aika Tabu 52:10; 53:3; 55:1–3
Ana bwai n tituaraoi te Tamnei ae Raoiroi e karekeaki rinanon te katokabai.
-
Kiibu aika mwaiti inanon kaotioti aikai a taekina karekean te Tamnei ae Raoiroi man te katokabai. Ngkana e uaana maroroakinan atuun te reirei aei nakoia kaain am kiraati, ko kona n titirakiniia kaain am kiraati bwa tera ae a reiakinna man Reirei ao Berita aika Tabu 52:10; 53:3; 55:1–3 ibukin ana bwai n tituaraoi te Tamnei ae Raoiroi. Ibukin ae mwaiti riki iaon atuun te reirei aei, taraa Makuri 8:14–17; 19:1–6. Tao a kona kaain am kiraati ni maroroakina te bwai are a tia n rinanona ngke a karekea ana bwai n tituaraoi te Tamnei ae Raoiroi ke tera ae a kona ni karaoia bwa a na reitinako ni karekea Ana anainano inanon maiuia.
Reirei Ao Berita aika Tabu 52:9–11, 22–27
Ti kona n tibwaua te euangkerio n taabo ake ti mena iai.
-
Ngke te Uea e kamwanangaia mataniwin te Ekaretia aika mwaiti nako Missouri, e tuangiia bwa a na kabongana raoi aia tai ni mwanangaia ao “n tataekin i aon kawaia” (kiibu 25–27). Warekan Reirei ao Berita aika Tabu 52:9–11, 22–27 e kona ni kaira aron te marooro bwa ti na kanga n tibwaua te euangkerio “i aon kawaira,” ke inanon waakin maiura ae ti taneiai inanona. A kona kaain te kiraati ni marooroakinna bwa a na kanga ni karaoa tibwauaakin te euangkerio bwa mwakoron maiuia ae a na taneiai iai.
Reirei ao Berita aika Tabu 52:14–19
Te Atua e anga te banna ibukin katokan te mwamwanaaki.
-
Ni kabwarabwara te banna are e kaotia te Uea inanon Reirei ao Berita aika Tabu 52:14–19, ko kona n tibwauai ara katooto n ara banna ake a kinai kaain te kiraati, n aron te banna ibuki katean bwaai ke banna n te anua. Kaain te kiraati a na bae n iai oin aia banna ni katooto ae a na tibwauai. Bukin tera ngkai a rangi ni kakawaki taian banna? Ti na kanga ni maiuakin banna aika inanon kiibu 14–19 n totokoa te mwamwanaaki are ti kunea ni boong aikai?
I kona n rairaki nakon te Uea ngkana I rootaki man aia rinerine tabeman.
-
A mwaiti mai buakora ae a rootaki n te rawawata ngkana temanna ae ti onimakinna e aki kawakina ana motinnano teuanne ke neienne. Aio ae e riki nakoia Aika Itiaki mai Colesville, New York, ake a kantaingaia bwa a na maeka n aban Leman Copley i Ohio. N reiakinaki man te taneiai aei, a kona kaain te kiraati n rinanoa atuun te rongorongo nakon mwakoro 54 (taraa naba Saints, 1:125–28; “A Bishop unto the Church,” Kaotioti inanon te Rongorongo, 78–79). A na iangoia ae ngkoa iai raoraoia ibuakoia Aika Itiaki i Colesville ao ngkanne a na kakaea te reirei inanon te mwakoro 54 are a na kona ni waaki iai ma raoraoia. Ke a kona ni kakaea te kaotioti ibukin te bwai are e na konaa ni buoka temanna are e rootaki man ana rinerine are temanna te aomata. (Ko kona ni kotea te berita inanon te kibu 6 nakoia naake a kawakin aia berita.)
-
Reirei ao Berita aika Tabu 54:10 iai inanona kibu n taeka ake a kunei kaain te kiraati bwa a rangi ni bongana, n aron “taonakinnano n taian rawawata,” “moantaai ni ukoukorai,” ao “a karekea raun tamneia.” A kona kaain te kiraati n rinea te kibu n taeka n iango ao ni kamatebwai, ni kabonganai bwaai aika a na taraaki mai inano ke tabeua bwaai n ibuobuoki ni kakaei koroboki aika tabu aika irekereke. Ngkanne a kona n tibwuaa aia iango.
Bwaai n Ibuobuoki Riki Tabeua
Mwiokoara ni karaoan ara beku.
E kabwarabwara Beretitenti Spencer W. Kimball: “Inanon te Ekaretia te mwioko ni karaoan te beku bon te onimakinaki ae tabu n te maiu n tamnei ke n te maiu n rabwata bwa ko na bukintaeka iai. Ibukina ngkai bwaai ni kabane bon ana bwai te Atua, ti tararuai rabwatara, ara iango, ara utu, ao ara bwai. (Taraa Reirei ao Berita aika Tabu 104:11–15.) Te tia tararua ae kakaonimaki bon temanna are e mwakuriia te tamaroa n tautaeka, n tabeakina arona, ao ni buokiia kainnano ao rarikin” (“Welfare Services: The Gospel in Action,” Ensign, Nob. 1977, 78).
Kanakoraoan Ara Anga Reirei
Buokiia taan kamatebwai bwa a na boutokaiia imarenaia. Karoa te tabo ibukin te kiraati ike taan kamatebwai a boutokaiia ao a kaungaiia i bon imarenaia. Kaoiia bwa a na tibwauai aia iango ao aia aanga ake a katamaroa aia kamatebwai i bon irouia ao n utu. (Taraa Reirei n ana Kawai te Tia Kamaiu, 36.)