“Eberi 26–Meei 2. Reirei ao Berita aika Tabu 45: ‘Berita . … A na Bon Koro bukiia,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Eberi 26–Meei 2. Reirei ao Berita aika Tabu 45,” Nakomai, Iriirai—Ibukin te Reirei n Tabati: 2021
Eberi 26–Meei 2
Reirei ao Berita aika Tabu 45
“Berita . … A na Bon Koro bukiia”
Ngkai ko kamatebwaia Reirei ao Berita aika Tabu 45, iangoia bwa tera kiibu, aia taeka mataniwi man te Ekaretia, taneiai, titiraki, ao tabeua bwaai n ibuobuoki aika ko na kabonganai n anga reirei ibukin te tua. Ngkai ko anga reirei, kaoiia kaain te kiraati bwa a na korei mwiin wirikiriki ake a karekei ao ni karaoa aia baire bwa a na maiuakin.
Korei Am Namakin
Kaungaa te Tibwatibwa
A kona kaain te kiraati ni korea iaon te mwakoro ni beeba te kibu man Reirei ao Berita aika Tabu 45 are e kaungai nanoia. Ngkanne ko kona ni boboti beeba, rinei tabeua ake a karina ni kaoti, ao kaoiia kaian te kiraati ake a korei bwa a na wareki aia kibu nakoia kaain te kiraati ao ni tibwauaia bwa bukin tera ngkai a rinei. Kaungaia tabeman bwa a na tibwauai naba aia nonoori.
Reirei te Reirei
Reirei ao Berita aika Tabu 45:1–5
Kristo bon te tia Tei Ibukira nakon te Tama.
-
E kona temanna man am kiraati ni kabwarabwara bwa tera taben te aomata ae tia tei ibukirai? E na rangi ni ibuobuoki ngkana e kakaeaki nanon te taeka ae te tia tei ibukira inanon te rikitinare. Ma te kamataata aei, a kona kaain te kiraati ni wareka Reirei ao Berita aika Tabu 45:3–5 n ikatoatoa. A kona n tibwatibwa imarenaia taeka ke kibun taeka nako man kiibu aikai are a buokaki ni kaotaaki ibukin taben Iesu Kristo ngkai te tia tei ibukira nakon te Tama. (Taraa naba 2 Nibwaai 2:8–9; Motiaea 15:7–9; Moronaai 7:27–28; Reirei ao Berita aika Tabu 29:5; 62:1.) Iangoia n tuangiia kaain te kiraati bwa a na tibwauai aia namakin ibukin te Tia Kamaiu ngkai e riki bwa te Tia Tei ibukiia.
Reirei ao Berita aika Tabu 45:11–75
Ti aki riai ni maaka te Kauaoki.
-
Ko na kanga ni buokiia kaain te kiraati bwa a na noorii kauring aika a matoa ao kakabwaia aika a kantaningaaki n te mwakoro 45? N aron te katooto, ko kona ni korea iaon te burakibooti atuun taian taeka Taetae ni burabeti ao Kakabwaia aika taekinaki n te Berita, ao a kona kaain te kiraati ni korei iaan atuun taeka aikai reirei ake a kunei n Reirei ao Berita aika Tabu 45:11–75. Bukin tera ngkai e tangiria te Uea bwa ti na moantaai n atai bwaai aikai? Tera ae ti kona ni karaoia bwa ti aonga ni karekei kakabwaia ake a tia n taekinaki n te berita?
-
A kona kaain te kiraati n tibwauai taeka n reirei i bon imarenaia bwa a na kanga ni karekea te unganano ao te kantaninga ngkai ti kaitara ma kaangaanga ake a kaman taekinaki ibukin ara bong (n aron ake a kabwarabwaraaki n Reirei ao Berita aika Tabu 45:11–75). Ibukin buokaia kaain te kiraati ni kakantaningaakin te Kauoaki ma te onimaki n oneamwiin te maaku, kaota te witeo “Men’s Hearts Shall Fail Them” (ChurchofJesusChrist.org). Tera n aia namakin aomata ake a kabwaka iai inanon ara bong? (taraa te kibu 26). Tera te reirei are e anga Beretitenti Nelson n te witeo aei bwa e na buokiira ni kaitarai bwaai aika a kakamaaku ma te rau?
Reirei ao Berita aika Tabu 45:31–32
“Teei n taabo aika tabu,” ao n aki kamwaingaki.
-
A na kona n anga nanoia kaain te kiraati n tibwauai aia nonoori bwa a na kanga ni kataia n “tei n taabo aika tabu,” n aron ae reirei iaon te Uea n Reirei ao Berita aika Tabu 45:31–32. Ti na kanga ni karaoi taabo aika tabu inanon maiura? Te taeka inanon “Bwaai n Ibuobuoki Riki Tabeua” ao te witeo “Stand Ye in Holy Places—Bloom Where You’re Planted” (ChurchofJesusChrist.org) e kona ni karin nonoori nakon te marooro aei.
Tamneikibono aika tengaunTe Taetae ni Kaikonaki ibukiiia Kibono aika Tengaun, iroun Dan Burr
Bwaai n Ibuobuoki Riki Tabeua
“Teei n Taabo aika Tabu.”
Titita Ann M. Dibb, kaain te Beretitentii ni Kabuta n te Bootaki n Ataeinnaine mai imwaaina e taku bwa te kaetieti n tei n taabo aika tabu ao n aki kamwaingaki “e kabwarabwara bwa ti na kanga ni karekea te kamanoaki, te korakora, ao te rau inanon taai ni kaangaanga.” Imwiin ataakin ae taabo aika tabu aikai n raonaki ma ara tembora, umwantabu, ao mweengara, e taku bwa “ngaira ni kabane ti kona ni kunei taabo aika mwaiti riki.” E reitia:
Ti na bae n iangoa moa te taeka te tabo bwa te enwaromenta ae iai rabwatana ke mwakoron te aba. E ngae ngke, te tabo e kona n riki bwa ‘te bwai ae okoro, te tabo, ke te anua n iango’ [Merriam-Webster.com Dictionary, “place,” merriam-webster.com]. E nanonaki n aei bwa taabo aika tabu a kona n raonaki ma taai inanon taina—taai are ngke te Tamnei ae Raoiroi e kaota te koaua nakoira, taai are ngke ti namakina ana tangira te Tama, kee taai are ngke ti karekea kaekaan ara tataro. N riaon te kabwarabwara anne, I kakoaua bwa inanon nako taai ko karekea te ninikoria n tei ibukin te bwai ae koaua, ai moarara riki inanon taabo ike bon akea temanna ae na tauraoi ni kan karaoia, ko karika te tabo ae tabu” (“Your Holy Places,” Ensign ke Riaona, Meei 2013, 115).
Kanakoraoan Ara Anga Reirei
Ko na riki bwa te kakoaua ae maiu. Ngkai ko maiuakina te reirei ae ko reireia, ko na konaa ni kaota, korakoran, am kakoaua i bon iroum bwa e bon koaua. Te Tamnei ae Raoiroi e na kamatoaa am koaua nako nanoia kaain am kiraati. Iangoi reirei ake ko na anga reirei iaona n te wiiki aei ao ni wiiki aika a na roko. Ko na kanga ni maiuakini riki? (Taraa Reirei n ana Kawai te Tia Kamaiu, 13–14.)