te nei n otintaai

Meei 10–16

Reirei ao Berita aika Tabu 49–50

“Bwa Ane Mai iroun te Atua E Bon Oota”

N te aro bwa ko na “tataekina taekan te koaua mai iroun te Tia Karaunano,” (Reirei ao Berita aika Tabu 50:17), ukora ana kairi te tamnei ngkai ko iangoa raoi Reirei ao Berita aika Tabu 49–50. Ngkanne tatauraoi nakon ana kaetieti te Atua ngkai ko anga reirei.

Korei Am Namakin

te aikaon ibukin te tibwatibwa

Kaungaa te Tibwatibwa

N raonaki ma tibwauaakin nonoori ake a karekei inanon aia tai ni kamatebwai koroboki aika tabu, a na reke kabwaiaia kaain te kiraati man maroroakinana bwa a kanga n roko nonoori akanne. Ko kona ni kaoiia kaain te kiraati bwa a na tibwauai imarenaia nonoori n taekan te kibu n Reirei ao Berita aika Tabu 49–50 ao ni marooroakinna tera ae kairiiri nakon nonoori akanne.

te aikaon ibukin te anga reirei

Reirei te Reirei

Reirei ao Berita aika Tabu 49; 50:1–36

Koaua n te euangkerio e kona ni buokai ni kinai anga reirei aika a kewe.

• Mwakoro 49 e kanakoaki ibukin kamatoaakin kaetan te reirei ae koaua ake a anga reirei iaona tabeman (taraa n te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu ibukin kakaongoraan tabeua baekuraaun). Ibukin buokaia kaain te kiraati n neweaba te mwakoro aei, ko kona ni bwenauaia kaain te kiraati ni kurubuniia ao ni katabeia kurubu n tatabeua teuana atuun te reirei are e a tia n rinanoaki (n aron ae karinanaki n atuun te mwakoro ibukin te mwakoro 49). A kona kaain te kurubu ni marooroakin titiraki akana imwiina: Baikara koaua are e reirei te Uea ibukin atuun te rongorongo aei n te mwakoro 49? Tera ae a kakoaua aomata ibukin atuun te rongorongo ae n te bong aei? Tera koaua ake imwiina ake e a tia n reiakinna te Uea rinanoia ara burabeti ni boong aikai? Anganiia kaain te kiraati aia tai n tibwa aia kakaitau ibukin koaua ake a kaotaki inanon ara bong.

• N aroia unimwaane i Kirtland ake “a aki oota ni kaotin tamnei aika a kakaokoro” (Reirei ao Berita aika Tabu 50, atuun te mwakoro), n taai tabetai ti miimi ngkana tao iai te bwai ae ti namakinna ke n nooria bon mai iroun te Tamnei ke man te anainano teuana. Tera ae ti kona n reiakinna man Reirei ao Berita aika Tabu 50:1–36 ni buokiira ni kinaa ana anainano te Tamnei? Ko kona ni tuangiia kaain te kiraati bwa a na rinei tabeua taian kibu ake a na kamatebwai ao ngkanne tuangiia kaain te kiraati bwa a na tibwa te bwai are a kunea.

Reirei ao Berita aika Tabu 49:15–17

Te mare imarenan te mwaane ao te aine e kakaawaki ibukin Ana babaire te Atua.

• Ibukina ngkai e kakaawaki te mare nakon ana babaire Tamara are i Karawa, e ingainga nanon Tatan ni karekea te kamangaongao iai. A na reke kabwaiaia kaain te kiraati man karinanakin taian koaua iaon te burakibooti are e a tia ni kaokia te Uea ibukin taekan te mare. N aron te katooto, baikara koaua ibukin te mare ae ti reiakin man Reirei ao Berita aia Tabu 49:15–17? Tabeua booki aika tabu aika a ibuobuoki n raonaki ma Karikani Bai 2:20–24; 1 I Korinto 11:11; ke ake tabeua riki a kuneaki inanon “Marriage, Marry” inanon Kairi nakon Booki aika Tabu (scriptures.ChurchofJesusChrist.org). A kona naba kaain te kiraati ni kakaei koaua inanon “Te Utu: Te Katanoata nakon te Aonaaba.” Ni kabotoi iaon bwaai ake ti reiakin man bwaai n ibuobuoki, bukin tera ngkai te mare imarenan te mwaane ao te aine e kakaawaki nakon ana babaire te Atua? (taraa “Bwaai n Ibuobuoki Riki Tabeua”).

  te taanga itinanikun te tembora

  Te mare imarenan te mwaane ao te aine e katabuaki mairoun te Atua.

Reirei ao Berita aika Tabu 50:13–22

Taan reirei ao taan kamatebwai a uaia ni kamataataki iroun te Tamnei.

• Ana kaetieti te Uea ibukin tataekinan ma karekean te koaua e karekea te tai ae tamaroa ni marooroakin taabe aika a tibwauaaki ngkai ngkoe te tia reirei ao kaain te kiraati kam karekea n tobwaakin reiakinan te euangkerio. Iangoia n tuangiia kaain te kiraati bwa a na rinanoa Reirei ao Berita aika Tabu 50:13–22 n ikatoatoa ao ni maroroakina taben te Tamnei, taan reirei, ao taan kamatebwai. Tabeman ma toaia a kona n tibwaia ma kaain kiraati te bwai are a reiakinna. Tera tabeua [taian] kawai ake ti kataia n anga reirei iai ke n reiakina iai te euangkerio? (te kibu 17). Ti na kanga n raoiroi riki ibukin karekean te Tamnei? Tera ae ti kaungaaki iai bwa tina karaoia inanon mweengara ao n te taromauri n raoiroi riki n anga reirei ao n reiakina te euangkerio?

te aikaon ibukin bwaai n ibuobuoki riki tabeua

Bwaai n Ibuobuoki Riki Tabeua

Te Mare e Bon Kakawaki nakon ana Babaire Tamara are i Karawa.

E kabwarabwara Unimwaane David A. Bednar bwa bukin tera e kakaawaki te mare nakon ana babaire ni kamaiu Tamara are i Karawa:

“Man te babaire mai karawa, mwaane ao aine a baireaki bwa a na uaia n rikirake nakon te kororaoi ao bwaninin te mimitong. Ibukin rikiia ao aia konabwai aika rine, mwaane ao aine n tatabemaniia e rangi n onoti aia reitaki n te mare bwa man aia nonoori ao bwaai aika a rinanona. Te mwaane ao te aine a kakaokoro ae anga ma a booraoi nakon te nano ae tii teuana ao te katiteuanaaki ae kona ni karekeaki n akea riki te anga irarikin aei. Te mwaane e kabwanina ao e kakororaoa te aine ao te aine e kabwanina ao e kakororaoa te mwaane ngkai a reiakinaki bon mairouia ao ni kakorakoraaki ao ni kakabwaiaaki imarenaia. …

“Te mweenga ngkana iai te bumwaane ae tangira ma ni kakaonimaki ao te buaine bon te tabo ae moan te kakannato are a kona iai ataei ni kaikawaaki inanon te tangira ao te raoiroi ao n tararuaaki iai kainnanoia n te maiu n tamnei ao n te rabwata. N aron kateia ae e onoti mwaane ao aine ae a anga ibukin kabwaninan te reitaki n te mare, bon katei naba akanne aika a kakaawaki nakon kaikawakiia, ribanakiia, ao reireiaia ataei” (“Marriage Is Essential to His Eternal Plan,” Ensign, Tuun 2006, 83–84).

Kanakoraoan Ara Anga reirei

Kaira te marooro ae kaunganano. Ni kabane aomata iai bwaai ae a kona n anga nakon te kiraati, ma n tabetai e aki reke aia tai. N iriira ana anainano te Tamnei, kakaei kawai ni karikirakea mwaitiia kaain te kiraati ake a kona n tibwauai aia iango ao aia namakin.