“Tuun 28–Turai 4. Reirei ao Berita aika Tabu 71–75: ‘Bon Akea te Bwai ni Buaka ae Karaoaki bwa E na Kaaitarako ae E na Tokanikai,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Tuun 28–Turai 4. Reirei ao Berita aika Tabu 71–75,” Nakomai, Iriirai—Ibukin te Reirei n Tabati: 2021
Ae Tangiraki Iroun te Tia Kawakin Tiibu, iroun Simon Dewey
Tuun 28–Turai 4
Reirei ao Berita aika Tabu 71–75
“Bon Akea te Bwai ni Buaka ae Karaoaki bwa E na Kaaitarako ae E na Tokanikai”
Ngkana ko wareka Reirei ao Berita aika Tabu 71–75, iangoia aomata aika ko reireiniia. Tera ae ko ataia irouia? Tera ae a kainnanoia?
Korei Am Namakin
Kaungaa te Tibwatibwa
Kaoiia kaain te kiraati bwa a na tibwauai tabeua koaua ake a kunei n aia tai ni kamatebwaia Reirei ao Berita aika Tabu 71–75. Tera atatai aika a tia ni karekei ma koaua aikai?
Reirei te Reirei
Ti kona n ira ana kairi te Tamnei ae Raoiroi ngkai ti kamanoi ara koaua.
-
Ti a tia n namakina te maaku ke n nako nanora ibukin kamanoakin ara koaua? Tao ko kona ni kaoiia kaain te kiraati bwa a na korei iaon te burakibooti taeka ke kibun taeka ake a kunei inanon Reirei ao Berita aika Tabu 71 are a kabwarabwa bwa e kanga te Uea n tuanga Iotebwa ao Sidney ni kaekai taian tiribure ibukin Ezra Booth ao tabeman. Ngkanne a kona kaain te kiraati ni marooro inanon kurubu aika uarereke bwa tera ae nanonaki n taian kaetieti aikai ibukin ara bong. Bukin tera ngkai e kakaawaki bwa ti na mwakuri “ni kaineti ma mwakoron te Tamnei” ae anganiira te Uea? (te kibu 1).
E na ibuobuoki naba matakuakinan te witeo “Everyday Example: When Beliefs Are Questioned” (ChurchofJesusChrist.org). A kona kaain te kiraati ni kakaei kawai ibukin koaua aika inanon mwakoro 71 ake a kaotaki n te witeo. Tao a kona naba n tibwauai katooto bwa e kanga te Tia Kamaiu ni kaekaia taan tia tiribure (n aron te katooto, taraa Mataio 22:15–22; 26:59–64; Ioane 10:37–38).
Reirei ao Berita aika Tabu 72:8–16
A mwiokoaki bitiobi ni karaoan te beku iaon tararuaakin te maiu n rabwata ao n tamnei ibukin abanuean te Uea.
-
E kanga ana kaetieti te Uea nakon Newel K. Whitney, ngke e weteaki bwa e na riki bwa te biitiobi i Kirtland, ni buokiia naake ko reireiniia ni kukurei iroun te bitiobi are a tia ni weteaki bwa e na beku ibukiia? Ko kona n tuangiia kaain te kiraati bwa a na kakaea Reirei ao Berita aika Tabu 72:8–16, n tarai tabeua taben Bitiobi Whitney ao ngkanne kabotauiia nakon taben te bitiobi ni boong aikai (taraa ana kabwarabwara Beretitenti Gordon B. Hinckley ibukin taben te bitiobi inanon “Bwaai n Ibuobuoki Riki Tabeua” ke te witeo ae irekereke mangaia, “The Office of Bishop” [ChurchofJesusChrist.org]). Tao a kona kaain te kiraati n tibwaia bwa a kanga n tia ni kakabwaiaaki man ana mwakuri n ibuobuoki te bitiobi. Tera ae ti kona ni karaoia ni kamatoaia riki ara bitiobi?
Tamneitaian bukibuki ao baeki n amwarakeBitiobi a buokiia kaain te aro ni karekei kainnanoia n te maiu n rabwata.
Ti kona n ukori taai n tibwaua te euangkerio.
-
Te Uea e tuanga Iotebwa Timiti ao Sidney Rigdon bwa a na tataekina te euangkerio “n aron angaraoina” (Reirei ao Berita aika Tabu 73:4) inanon naba aia tai ni mwakuri n raira te Baibara. A kona kaain te kiraati n tibwauai tabeua kawai ake a kunea bwa e “angaraoi”—ke e koaua—n tibwaua te euangkerio irarikin tabeia ake tabeua. A na bae ni kunei tabeua reirei aika bongana inanon ana rongorongo Unimwaane Dieter F. Uchtdorf “Mwakuri ni Mitinare: Tibwa te Bwai are i Nanom” (Ensign ke Riaona, Meei 2019, 15–18).
Reirei ao Berita aika Tabu 75:2–16
Te Atua e tangiria bwa ti na “mwakuri ma [korakorara].”
-
Ana kaetieti te Uea nakoia tabeman unimwaane bwa a na kanga n tibwaua te euangkerio e kona ni kaunga nanoia kaain te kiraati n tibwaua te euangkerio ma te nanomatoa. Ko kona ni korea iaon te burakibooti Mwakuri ma korakoram ao n tuangiia kaain te kiraati bwa a na korei ni karinani taeka ao kibun taeka ake a roko n aia iango ngkana a iangoa temanna are e mwakuri ma korakoran teuanne ke neienne n tibwauaakin te euangkerio. A kona ni marorokinna naba bwa tera nanon “tataninga” ke “n taningaroti” n tibwauaakin te euangkerio. Tera ae ti reireinaki n Reirei ao Berita aika Tabu 75:2–16 bwa e kanga te Tia Kamaiu ni boutokaia naake a beku Ibukina ma te kakaonimaki?
Bwaai n Ibuobuoki Riki Tabeua
Taben te bitiobi.
E reirei Beretitenti Gordon B. Hinckley:
“I uouotia inanou te kakaitau ae moan te korakora ibukiia ara bitiobi. I rangi ni kakaitau ibukin ana kaotioti Teuare Moan te Mwaaka are mai iaana e a karaoaki te nakoa aei ao ni kamwakuraki. …
“… Ti kantaningaiko bwa ko na tei bwa te tia tararua n ibonga ae rietaata n te uoote, te kauntira nakoia aomata, te tia kamanomano ao te tia ibuobuoki ibukiia naake a mena inanon te kaangaanga, karauan nanoia naake a nanokawaki, te tia katauraoi bwaai ibukiia naake a rootaki n te kainnano. Ti kantaningaiko bwa ko na tei bwa te tia tararua ao te tia kamanoa te reirei are e taekinaki inanon am uoote, ibukin nakoraoin te anga reire, ni kanoai angiin nakoa ake a kainnanoaki. …
“… Ko na taraia bwa a na akea temanna ae na baki ke n akea karabaana ke ana tabo ni katantan. Ko riai n ataa aia kaangaanga ni kabane ake ko tararuaiia.
“Ko riai n riki bwa te tia karaunano ao te tia kairiiri nakoia aomata. Ko riai tauraoi nakon tangiia ake a karawawataaki iai. Ko riai n tauraoi ni buokiia n rawawataia. Ko riai n ibuobuoki inanon te tangira nakon te tia bure” (“The Shepherds of the Flock,” Ensign, May 1999, 52–53).
Kanakoraoan Ara Anga Reirei
N riki bwa te tia reirei n aron Kristo. Iangoia ni kabonganai titiraki n ukenano iaon iteraniba 37 n Reirei n ana Kawai te Tia Kamaiu ni buokiko n reiakiniko bwa ko na kanga n reirei riki n ai aron te Tia Kamaiu.