“Turai 12–18. Reirei ao Berita aika Tabu 77–80: ‘N na kaiririko I nanon Kawaim,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Turai 12–18. Reirei ao Berita aika Tabu 77–80,” Nakomai, Iriirai—Ibukin te Reirei n Tabati: 2021
Nakon te Mweenga, iroun Yongsung Kim
Turai 12–18
Reirei ao Berita aika Tabu 77–80
“N na Kaiririko I nanon Kawaim”
Uringnga bwa waaki ni kakukurei inanon te kabwarabwara aio bon ti iango ni kairi. Ngkai ko tataromwaaka ni kamatebwaia Reirei ao Berita aika Tabu 77–80, e na kairiko te Tamnei bwa ko na ataia bwa ko na kanga n reireiniia raoi kaain am kiraati.
Korei Am Namakin
Kaungaa te Tibwatibwa
Tabeman kaain am kiraati a na bae ni kan tibwauai aia nonoori ngkana ko moantaai n tuangiia. Iangoia n reitaki ma tabeman tabeua te bong imwaain te kiraati ni butiia ngkana a kona n roko ao a tauraoi n tibwaua te bwai are a tia n rootaki iai man Reirei ao Berita aika Tabu 77–80.
Reirei te Reirei
Te Atua e kaoti Ana bwai aika raba nakoia naake a ukeuke ni kan atai.
-
A kona kaain te kiraati n tibwauai aia nonoori ake a kunei ibukin kanikinaa n te boki ae te Kaotioti n aia tai ni kamatebwaia mwakoro 77 n te wiiki aei. Ni marooroakin taekan taian kaeka ake e karekei Iotebwa Timiti e kona ni kaira te marooro bwa a kanga kaain te kiraati n ukora te atatai ngkana a kamatebwai booki aika tabu. Tera ae ti reiakinna man aekaki n titiraki ake e anga Iotebwa? A na bae n tauraoi kaain te kiraati n tibwauai bwaai ake a rinanona ngke aia titiraki ibukin te euangkerio a karekea te atatai riki ae korakora.
Reirei ao Berita aika Tabu 78:17-19
Te Uea e na kaiririira i nanon kawaira.
-
Ni moana maroroakinan Reirei ao Berita aika Tabu 78:17–19, ko kona ni kaoti tamneia tabeman kaain am kiraati ngke ataei (moantaai tuangiia bwa a na uoti tamnei aikai nakon te kiraati). Anganiia kaain te kiraati bwa antai akana n te tamnei. Kaain te kiraati ake a uoti tamnei a kona ni marooroakinna bwa a kanga ni bitaki man te tai are a raweaki iai tamnei akanne. Ngkanne a kona kaain te kiraati ni wareka Reirei ao Berita aika Tabu 78:17–19 ao iangoi titiraki n aron aikai: E kanga n titebo arora ma ataei iroun te Atua? Ni kawai ra ae E tangiriira bwa ti na riki n ai aroia ataei (taraa Motiaea 3:19), ao ni kawai ra ae E tangiriira iai bwa ti na rikirake? Tera te reirei ae E anganiira inanon kiibu aikai ni buoka rikirakera?
Ni karababa aia atatai kaain am kiraati bwa e kanga te Uea “ni [kairirira] i nanon kawaira” (te kibu 18), iangoia n tibwaua te rongorongo inanon Bwaai n Ibuobuoki Riki Tabeua.
Reirei ao Berita aika Tabu 79–80
Te wewete ni beku ibukin te Atua e kakaawaki riki nakon te tabo are ti beku iai.
-
E na bae n iai kaain am kiraati ae namakina te rawawata n te moantai ni weteana are e karekea man te uoote ke n te mwaanga ke n te tabo are e mwiokoaki iai bwa e na karaoa ana mwakuri ni mitinare. Tabeman ibuakoia a na bae n tauraoi n tibwauai bwaai ake a tia n taneiai inanona. E kanga ana reirei te Uea n Reirei ao Berita aika Tabu 80:3 ni buokiira inanon kaangaanga aikai? Te kibu n taeka ae “e aki akaaka” tera nanona? Ke te kibu n taeka “kam aki kona ni kairua”? Tera ae rangi ni kakaawaki riki iroun te Uea ngkana e roko bwa taekan nakoara? Ana nonoori Unimwaane David A. Bednar iaon te mwakoro 80 inanon ana marooro “Called to the Work” e kona naba n ibuobuoki (Ensign ke Riaona, Meei 2017, 68).
-
Taian kaotioti inanon te mwakoro 79 ao 80 a bon boboto riki nakoia aomata ake a weteaki bwa a na tataekina te euangkerio, ma iai inanona tua ake a kona ni kaeineti nakoira ni kabane inanon ara mwakuri n ibuobuoki ibukin te Uea. Ni buokiia kaain te kiraati ni kunei tua aikai, ko kona n tuangiia bwa a na baka n ae aiangkoa iai raoraoia ae e a tibwa kaaina te Ekaretia ao e a tibwa karekea nakoana teuanne ke neienne. Kaoiia kaain te kiraati ni korea aia reta ni boutoka ao n reirei, ao ni kaungaiia bwa a na taetae man mwakoro 79 ao 80 ngkai a karaoia. Ngkanne tabeman kaain te kiraati a kona n tibwauai bwaai ake a korei.
Tamneite aine ae taetaeE kukurei te Uea ngkana ti beku Ibukina ao tabeman.
Bwaai n Ibuobuoki Riki Tabeua
Te Uea e na kairiira rinanon te Tamnei ae Raoiroi.
Beretitenti Henry B. Eyring e tibwaua te bwai are e rinanona ngke e tataro ibukin kairana iaon te babaire ae rangi ni kaangaanga ao n reireiaki bwa e riai ni kairaki iroun te Uea:
“I tataro, ma ibukin aoa aika mwaiti taraan ae bon akea te kaeka. Imwaain te karangaina, e roko te namakin irou. Inanon te tai ae mwaiti ngke I uarereke, I namakina ae aron anne. Nanou ma au iango a taraa n ae a rangi n nikoraoi. Iai te rau inanon te tai n aki kakarongoa anne.
“Ma inanon mimiiu, I kunea bwa I tataro, ‘Tamau are i Karawa, e aki kakaawaki bwa tera ae I tangiria. I aki tabe bwa tera ae I tangiria. I bon tii tangira bwa e na karaoaki Nanom. Bon tii anne ae I tangiria. Taiaoka tuangai te bwai ae N na karaoia.’
“N te tai anne I namakina te rau mai inanou n aron ae I a tibwa namakinna. Ao e roko te rongorongo, ao I kakoaua bwa mairoun antai. E mataata raoi bwa tera ae N na karaoia. Akea te berita ae I karekea imwiina. Bon tii te kakoaua bwa bon ngai te nati ae I a tia n tuangaki tera kawaiu ae kairai nako iai ae E tangiria ibukiu” (“As a Child,” Ensign ke Riaona, Meei 2006, 16).
Kanakoraoan Ara Anga Reirei
Waaki ma booki aika tabu. Imwaain ae ko tarai bwaai n ibuobuoki aika a raka, nanomatoa kamatebwai ao iangoi raoi booki aika tabu. Aei e na kaoa te Tamnei ni buokiko ni katika nanom nakon bwaai ake ko a tia ni kamatebwai ngkai ko anga reirei (taraa Reirei n ana Kawai te Tia Kamaiu, 12).