“Turai 19–25. Reirei ao Berita Aika Tabu 81–83: ‘Are “E Maiti Ae E Anganaki E Mwaiti Ae na Kainanoaki Mai Irouna,’” Nakomai, Iriirai—Ibukin te Reirei n Tabati: Reirei ao Berita Aika Tabu 2021 (2020)
“Turai 19–25. Reirei ao Berita aika Tabu 81–83,” Nakomai, Iriirai—Ibukin te Reirei n Tabati: 2021
Kristo ma te Rorobuaka ae Kaubwai, iroun Heinrich Hoffman
Turai 19–25
Reirei ao Berita aika Tabu 81–83
Are “E Mwaiti Ae E Anganaki E Mwaiti Ae na Kainanoaki Mai Irouna”
Uringnga bwa a mwaiti aia taneiai kaain am kiraati n te maiu n tamnei ngkai a kamatebwai booki aika tabu ni mweengaia. Tataromwaaka n iangoia bwa ko na kanga ni kaungaiia bwa a na tibwauai aia taneiai ni boutokaia tabeman.
Korei Am Namakin
Kaungaa te Tibwatibwa
Kaoiia kaain te kiraati bwa a na rinea te kibu n taeka man mwakoro akana inano are e na katamaroa atuun te rongorongo ibukin mwakoro: Reirei ao Berita aika Tabu 81, 82, ao 83. Bukin tera ngkai a rinei atuun rongorongo aikai?
Reirei te Reirei
Reirei ao Berita aika Tabu 81:5; 82:18–19
Ti riai n ukoukori “bwaai aika tamaroa [irouia] kaain rarikira.”
-
Te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu e kaoti iango aika a na iangoaki raoi ibukin Reirei ao Berita aika Tabu 81:5. Aikai a na kona naba ni karaoi titiraki ibukin marooro aika tamaroa ibukiia kaain am kiiraati. Iangoia naba n tibwaua te bwai ae ko rinanona i bon iroum ngke ko namakina “te aki konamaki” inanon tabeua kawai ao ana mwakuri n ibuobuoki temanna e tabekiko rake ke ni kakorakorako. A bae n iai oin aia taneiai aika ti te arona kaain te kiraati ae a na tibwauaia. Ko kona naba ni mataku n te witeo “Ana Mwakuri te Atua” (ChurchofJesusChrist.org) ni kaungaia kaain te kiraati bwa a na tibwatibwa i marenaia. Ko kona n tibwaua ana rongorongo Beretitenti M. Russell Ballard’ inanon “Bwaai n Ibuobuoki Riki Tabeua.”
-
Iangoia tuangiia kaain te kiraati bwa a na kamatebwaia Reirei ao Berita aika Tabu 82:18–19, ni kakaei tua ake a kona ni buokaki iai ni kaotaaki n oin te kaantaninga ma kakabwaia ibukin buokakiia tabeman. Ngkanne tuangiia bwa a na tibwauai bwaai ake a reiakin. Ko kona naba ni kaota te witeo “Teachings of Thomas S. Monson: Rescuing Those in Need” (ChurchofJesusChrist.org). A kanga kaain ana uoote Bitiobi Monson ni kaoaki ni kiibu 18–19 tera ae a reiakina iai?
Reirei ao Berita aika Tabu 82:8–10
“Ngai, te Uea, I bae ngkana kam karaoa ae I taku.”
-
Ni buokiia kaain te kiraati bwa a na ataa te reitaki imarenan ara tauraoi n ongotaeka ao ana kakabwaia te Atua ae a taekinaki n te berita, ko kona ni wareka Reirei ao Berita aika Tabu 1:37–38; 82:10; 130:20–21 ni kabane ke inanon kurubu aika uarereke. Tera ae e reireiniira kiibu aikai ibukin te Uea? A kona kaain te kiraati ni korei ni karinani taeka are a kabwarabwara kateina, ae a boboto iaon kiibu aikai.
-
Imwiin warekan te kibu 10, a kona kaain te kiraati ni marorokinna bwa tera are e berita iai te Uea nakoira ao e kanga te Uea ni kawakina Ana berita. Karakinan Titita Virginia H. Pearce e kuneaki inanon “Bwaai n Ibuouoki Riki Tabeua” e kona ni buokiia kaain te kiraati n nooria bwa te Uea e kakabwaiaira ni kaineti ma oin wanawanana, ti aki n taainako n te kawai are ti kantaningaia.
-
Tera ae ti reiakinna man Reirei ao Berita aika Tabu 82:8–10 bwa bukin tera ngkai Tamara are i Karawa e anganiira taian tua? A kona kaain te kiraati ni kakaei nonoori inanon kiibu aikai ni kabongana ni buoka raoraoia ke te ataei are e taku bwa a rangi matoatoa tuua (taraa naba te witeo “Blessed and Happy Are Those Who Keep the Commandments of God,” ChurchofJesusChrist.org). Ke a kona n tibwaua aia taneiai are a reiakinaki mai iai n tarai tuua bwa kakabwaia.
Bwaai n Ibuobuoki Riki Tabeua
Te Aro ni Kiritian ae Itiaki.
E taku Beretitenti M. Russell Ballard:
“N arora n riki bwa ana reirei, a mwaiti ara bubuti, tabeaiangara, ao mwiokoara. E ngae n anne, tabeua waaki ni kakukurei a riai n taainako n riki bwa aan kaainakin te Ekaretia. “Mangaia are,” e tua te Uea “bwaina te kakaonimaki; teei n te nakoa are I a tia n anganiko; buokiia ake a mamaara, tabeki rake baai ake a tine, ao ni kakorakorai bubuaniwae aika aki konamaki’ [Reirei ao Berita aika Tabu 81:5; e kairaki korobokiana ae rara].
“Aei ana mwakuri te Ekaretia! Aei bon te aro ni kiritian ae itiaki! Aei te euangkerio ni koaua n te namakin ngkai ti buokiia, n tabekiia rake, ao ni kakorakoraiia naake a kainnano n te tamnei ao n te rabwata! Karaoana e kainnanoira bwa ti na kawariia ao ni buokiia [taraa Iakobo 1:27], bwa aia koaua n aia onimaki iroun Tamara are i Karawa ao Iesu Kristo ao Ana Mwakuri ni Kamaiu e riki bwa kamatoaakin nanoia” (“Precious Gifts from God,” Ensign ke Riaona, Meei 2018, 11).
Te Uea e kakabwaiaira n oin Ana kawai aika moan te kamiimi.
Titita Virginia H. Pearce, kaain ngkoa te Beretitenti n te Bootaki n Aine, e karakina te aine ae raraoma irouia natina aika a tionako man baika a tia n reiakinaki iai. E katea ana kouru ae uaiakinna ni karikirakea nanakona nakon te tembora ao ni kakoaua raoi bwa te Uea e karinea te anganano ae bongana aei ibukin bitakin nanoia natina. E taetae te aine:
“Imwiin tebwiina te ririki ni karekea nanakou nakon te tembora ao te tataro ae teimatoa, I kabwarabure n taekinna bwa aia rinerine natiu a bon aki bitaki. …
“Ma I bitaki ngai. Bon te aine ngai ae I kaokoro. … I a kabwara nanou man tianakin au tai ao ni kona ngkai ni kaantaninga Iehova. … A bitaki aron bwaai ake I kantaningai. N oneamwiin are I kantaningaia natiu bwa a na bitaki, I kaantaninga mwaitin nanoanga aikai ao n onrake n te kakaitui ibukiia. … Te Uea e mwakuri inanon kawai aika moan te kamiimi, ao I kaonaki n te rau are e uota te atatai ni kabane” (inanon “Prayer: A Small and Simple Thing,” N te Tabo n Taetae [2017], 288–89).
Kanakoraoan Ara Anga Reirei
Kaoa te roronrikirake n riki bwa mwakoron am reirei. Angan te roronrikirake aia tai n reirei i bon imarenaia. Ongaraekinan ana koaua temanna ma temanna ke te bwai are a rinanona e na rangi ni uaana. N aron ae kainnanoaki, buokiia te roronrikirake ni katauraoia n reirei, ao kaotia nakoia bwa tera ae nanonaki n reirei n ana kawaki te Tia Kamaiu (taraa Reirei n ana Kawai te Tia Kamaiu, 27–28).