“Turai 26–Aokati 1. Reirei ao Berita aika Tabu 84: ‘Te Mwaaka n te Aro n Atua,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Turai 26–Aokati 1. Reirei ao Berita aika Tabu 84,” Nakomai, Iriirai—Ibukin te Reirei n Tabati: 2021
Kaokan Bwaai, iroun Liz Lemon Swindle
Turai 26–Aokati 1
Reirei ao Berita aika Tabu 84
“Te Mwaaka n te Aro n Atua”
Tera ae ko na karaoia ni kaoiia kaain te kiraati bwa a na tibwauai bwaai ake a reiakin ngkai a kamatebwaia Reirei ao Berita aika Tabu 84?
Korei Am Namakin
Kaungaa te Tibwatibwa
Kaoa kaain te kiraati bwa a na tibwatibwa nakon are temanna kaain te kiraati te koaua are a kunea ni mwakoro 84 are e kaungai nanoia ke ni buokiia bwa a na mataata n ana nakoanibonga te Atua. Ngkanne kaoiia tabeman bwa a na tibwauaia ma kaain te kiraati.
Reirei te Reirei
Reirei Ao Berita Aika Tabu 84:1–5, 17–28, 31–42
Ti bane ni karekea ana nakoanibonga te Atua ma ana kakabwaia.
-
Te Uea e moana te “kaotioti iaon te nakoanibonga” (Reirei ao Berita aika Tabu 84, atuun te mwakoro) n reirei bwa e na kateaki te tembora iaon Tion (tarai kiibu 1–5). Ko na kanga ni buokiia kaain te kiraati bwa a na mataata n te reitaki imarenan te kaantaninga ibukin tembora aika tabu ao te nakoanibonga? Ko na moanna man korean te titiraki iaon te burakibooti n aron Tera oin te kaantaninga ibukin te nakoanibonga? ao ngkanne kaoiia kaain te kiraati bwa a na kakaei reeke inanon Reirei ao Berita aika Tabu 84:17–28, 31–42. A kanga tembora ao otenanti n te tembora n ibuobuoki ni kakoroi nanon kaantaninga aikai?
-
Ni buokiia kaain te kiraati bwa a na mataata ni mwaakan te nakoanibonga are a kona ni karekea inanon maiuia, ko kona ni kaoiia bwa a na wareka Reirei ao Berita aika Tabu 84:17–28 ao iangoia bwa e na kaokorora aron maiuia ngke arona bwa akea ana nakoanibonga te Atua. Kaungaia bwa a na tibwaia bwa bukin tera ngkai a rangi ni kakaitau ibukin te nakoanibonga, n raonaki ma bwaai ake a tia n rinanona ma mwaakan te nakoanibonga—inanon aia utu, n nakoaia, ke ni maiuia ae onoti. Ti na kanga ni karekea mwaakan te nakoanibonga?
-
Te tuea ao te berita ae tabu n te nakoanibonga (taraa Reirei ao Berita aika Tabu 84:31–42) iai te bubuti inanona ae onoti ibukiia naake a katabuaki nakon te nakoa n te nakoanibonga. Ma angiin kakabwaia ake a karaoaki n te bertia inanon kiibu aikai a tauraoi nakoia aomata ni kabane. Ni buokiia kaain te kiraati n taraia bwa a kanga berita aikai ni kaineti nakoia, ko kona ni kaoiia bwa a na wareki kiibu 33–42 ao ni marooroakin kawai ake ti kona ni “karekea” iai te nakoanibonga (te kibu 35), ana toro te Uea, ao te Uea. A kona naba ni wareka te rongorongo inanon “Bwaai n Ibuobuoki Riki Tabeua” ni kakaea bwa tera ae ti riai ni karaoia bwa ti aonga ni karekei kakabwaia man te nakoanibonga. Ko na bae ni buokiia kaain am kiirati n iangoia bwa tera ae na karinaki ibuakon “ni kabane [are] ana bwai Tamau” (te kibu 38), n aron anuana ao aekan maiuna are E kakukureia nanona. Tera ae ti rootaki iai ibukin kiibu ma taeka aikai?
Tamneite aine ae kana te toaA kakabwaiaaki natin te Atua ni kabane man te otenanti n te Nakoanibonga.
Reirei ao Berita aika Tabu 84:61–88
Te Uea e na kamatoaia naake a mwakuri Ibukina.
-
Ngkai kiibu aikai a bon kaeineti nakoia naake a na “tataekina te euangkerio n te abanuea” (te kibu 80), angiin reirei ake a mena inanona a kona ni kaeineti nakon temanna are e mwakuri ibukin te Atua. Ko kona n anganiia kaain te kiraati n tatabemaniia te mwakoro man Reirei ao Berita aika Tabu 84:61–88 bwa a na wareka ao n tuangiia bwa a na tibwatibwa imarenaia ni bwaai ake a reiakin are a kona ni kaeineti nakon temanna are e mwakuri ibukin te Uea. A kona kaain te kiraati n rinea te kibu ae mamaten nanoia ke taian kibu ake a na kamatenanoi ke ni kaoti are a na nooria iai ni katoa bong. Tera berita ake a rangi ni kakukureiaki iai? Tera ae ti na tibwauaia man kiibu aikai ni kaungai nanoia mitinare ake a bon tibwa bane aia tai ke naake a katauraoi ibukin te nako ni mitinare?
Bwaai n Ibuobuoki Riki Tabeua
Ni kabane a kona ni karekei ana bwai Tamara are i Karawa.
E taku Beretitenti M. Russell Ballard: “Ni kabane ake a tia ni karaoi berita aika tabu ma te Uea ao a karinei berita akanne a kona ni karekei kaotioti mai karawa, ni kakabwaiaki man aia ibuobuoki anera, ni mwakuri ao n tibwauai aia bwai ma te Atua, ni karekea bwaninin te euangkerio, ao n tokina, a riki bwa taan bwaibwai irarikin Iesu Kristo n ana bwai Tamara are i Karawa” (“Men and Women and Priesthood Power,” Ensign, Tebetembwa. 2014, 32).
Te moan beretitentii n te Bootaki n Aine a koroboki n 1878: “Ti namakina te kakaitau ae koaua bwa rinanon kakabwaia mai iroun Tamara are i Karawa, ngaira, Ana tabonibai ti weteaki bwa taan mwakuri ma tarira ni katean abanuean te Atua iaon te aba, n ibuobuoki ni katei taian tembora, ike ti kona ni karekei kakabwaia ibukin te tai aei ao n aki toki. Ni kabane otenanti ake a reke inanon ana Auti te Uea, te aine e tei irarikin te mwaane, ibukiia ake a maiu ao ake a tia ni mate, ni kaotaki bwa e aki kona n ae iai te mwaane ao a na akea te aine ke e na iai te aine ao a na akea te mwaane inanon te Uea” (Mary Isabella Horne, Elmina S. Taylor, and Serepta M. Heywood, “To the Presidents and Members of the Relief Society of Salt Lake Stake of Zion, Greeting!” Woman’s Exponent, Tianuare 15, 1878, 123).
Kanakoraoan ara Anga reirei
Kabotoa am anga reirei iaon te taeka n reirei. Kakoaua raoi bwa kaain am kiraati a boboto aia marooro iaon booki aika tabu. Ko kona ni karaoa aei ni butiia kaain te kiraati bwa a na wareki booki aika tabu ao ngkanne a na tibwauai koaua ake a kunei, n aron naba aia tataneiai ma maiuakinan koaua akanne. (Taraa Reirei n ana Kawai te Tia Kamaiu, 20–21.)