“Aokati 16–22. Reirei ao Berita aika Tabu 89–92: ‘Te Tua ae Iriana te Berita,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Aokati 16–22. Reirei ao Berita aika Tabu 89–92,” Nakomai, Iriirai—Ibukin te Reirei n Tabati
Aokati August 16–22
Reirei ao Berita aika Tabu 89–92
“Te Tua ae Iriana te Berita”
Ngkai ko katauraoi n anga reirei, iangoi reirei akana a teretere nakoim ngkai ko kamatebwaia mwakoro 89–92 n te wiiki aei.
Korei Am Namakin
Kaungaa te Tibwatibwa
Aikai titiraki aika ko kona ni kabonganai ni kaungaia iai kaain am kiraati bwa a na tibwaua teuana te bwai man aia kamatebwai ni booki aika tabu: Tera ae ko warekia n te wiiki aei are e kakorakora am onimaki iroun Iesu Kristo? ni wetean Iotebwa Timiti n nakoana ni burabeti? Tera ae ko warekia are e buoka kamataatakim n ana babaire Tamara are i Karawa ibukiia Natina?
Reirei te Reirei
Tuan te Mauri bon te “tua ae iriana te berita.”
-
Angiina aomata a bae n taraa Tuan te Mauri bwa rinanin baika a na “karaoaki” ao aika a na “aki karaoaki.” Ni buokiia kaain te kiraati bwa a na iangoi tuua ake iakuun te kaetieti aei, kaoiia bwa a na kakaea Reirei ao Berita aika Tabu 89 ma titiraki n aron akana imwiina n am iango: Bukin tera ngkai te Uea e anganiira Tuan te Mauri? Tera ae reireiniira te kaotioti aei ibukin ana babaire Tamara are i Karawa ibukira? Te rongorongo inanon “Bwaai n Ibuobuoki Riki Tabeua” e na reke te buoka iai. Ngkana ko namakinna bwa e na reke kabwaiaia iai kaain te kiraati, ko kona ni kaoiia bwa a na korei ni karinani iaon te burakibooti mwakuri aika a kamarurung ao mwakuri aika a kamamate are e kamatatai te Uea inanon Reirei ao Berita aika Tabu 89:5–17. Ngkanne a kona n rinanoa “Marurungin te Rabwata ao te Iango” inanon Ibukin Kakorakoraia te Roronrikirake (25–27) ao iaan bwaai ake a tia ni korei ao manga karini riki tabeua bwaai ake a kunei. A kangaa berita ake n kiibu 18–21 n tia ni kakoroaki bukiia inanon maiura?
-
Aei teuana te anga ae a na buokaki iai kaain te kiraati ni marooroakin tua inanon Tuan te Mauri. Ko kona ni bwenaua te kiraati inanon teniua te kurubu ao tuangiia kaain te kurubu bwa a na wareka te mwakoro 89, ni kakaea kaekaan teuana te titiraki ane imwiina: Tera te tua ae ti kona ni kaunga iai temanna are e korakai n ongotaeka n Tuan te Mauri? Tera te tua are e kona ni buokiira bwa ti na aki motikitaekaia naake a korakai n ongotaeka iai? Tera tua ake a kona n anganiira te karaunano ngkana iai ara kaangaanga ni marurungin rabwata n aki tabe ma maiuakinan Tuan te Mauri? Ngkai mwakoron te waaki ni kakukurei, ko kona n tibwaua te bwai are e rinanona Beretitenti Dieter F. Uchtdorf’ ngke e riki bwa te bwairati ae te tia buaka (taraa “Continue in Patience,” Ensign ke Riaona, Meei 2010, 58). Kaungaia kaain te kiraati bwa a na iangoa te bwai are a namakinna bwa a kan karaoia n tain te marooro, ao anganiia aia tai bwa a na korei aia namakin.
Tamneite ataeinimwaane ae biri iaon te bikeTe Atua e kaoka Tuan te Mauri ibukin buokaia Natina.
Reirei ao Berita aika Tabu 90:1–17
Te Moan Beretitentii iai irouia “kiingin te abanuea.”
-
Te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu e kaotaki bwa kaain te aro a ukeuke ni kakaea Reirei ao Berita aika Tabu 90:1–17 n reiakina rongorongoia te Moan Beretitenti. Ko kona n tuangiia kaain te kiraati bwa a na tibwauai bwaai ake a reiakin inanon mweengaia man te waaki ni kakukurei aei, ke ko kona ni kakaei kiibu aikai ma kaain te kiraati. A kona naba kaain te kiraati ni kakaei kibun taeka inanon “Come, Listen to a Prophet’s Voice” (Anene n Taromauri, nambwa. 21) ke tabeua anene ae taekaia burabeti are e irekereke ma reirei aika inanon kiibu aikai. E kanga aia mwakuri te Moan Beretitentii ni buokiko n ataa Tamara are i Karawa ao Iesu Kristo?
“Te Tamnei ae kaota te koaua.”
-
N te aonaaba ni boong aikai, ti kaitaraaki ma rongorongo ake inanona “a mwaiti bwaai… aika a koaua” ao “a mwaiti bwaai … aika a aki koaua” (kiibu 1–2). Kaoiia kaain te kiraati bwa a na taraa te mwakoro 91 ibukin te reirei ibukin te Abokiribwa are e na kona ni buokiia ni kinaa te koaua n taian rongorongo ake a kaitibo ma ngaai. Tera katooto ake a na tibwauaia bwa a kanga ni buokaki iroun te Tamnei ni kinaa te koaua?
Bwaai n Ibuobuoki Riki Tabeua
Tuan te Mauri.
E taku Beretitenti Boyd K. Packer:
“Tuan te Mauri e ‘anga te tua ae iriana te berita’ [Reirei ao Berita aika Tabu 89:3]. Te taeka te tua inanon te kaotioti bon te bwai ae rangi ni kakaawaki. Te tua bon te koaua ae reitinako, te tua, te moti ae ko kona n anaia bwa kairam ni karaoan am babaire. N ae tabangaki tuua aki kabwarabwaraaki ni kabwaninaki rongorongoia. Anne e na kainaomatako ni kakaea kawaim n irianaki ma te koaua ae reitinako, te tua, ke aan maium.
“Kaain te aro a koroboki n titiraki ngkana te bwai aei ke anne e kaitaraa Tuan te Mauri. E rangi n ataaki bwa te ii, kobee, kamanging, ao te baakee a bon kaitaraa. E aki kabwarabwaraaki n rongorongona ae bwanin. Ma, ti reirei te tua ni kabane ma kakabwaia ake a taekinaki n berita. A mwaiti katei aika a riki, tangiran bwaai aika a kareke iroun temanna are e mooi ke are e kangkanta ke ni karina te ang inanona ke n itinna are e na kaikoaka te rabwata ao te tamnei ake aki taekinaki inanon te kaotioti. …
“Karinea te tua ibukin Tuan te Mauri ao ko na karekei kakabwaia ake a taekinaki n te berita” (“Tuan te Mauri: Te Tua ae Iriana te Berita,” Ensign, Meei 1996, 17–18).
Kanakoraoan Ara Anga Reirei
Kaota Am Koaua n taainako. “Am kakoaua ae bebete, mai nanom raoi ibukin koaua n te maiu n tamnei e na iai mwiina ae korakora iaoia naake ko reireiniia. E aki kainnanoa te wii kateke ke e na abwaabwaki. E na bon bae, n aron te katooto, te kakoaua ae bebete ibukin kakabwaia ake ko a tia ni karekei man maiuakina Tuan te Mauri. (Taraa Reirei n ana Kawai te Tia Kamaiu, 35.)