Aokati 16–22

Reirei ao Berita aika Tabu 89–92

“Te Tua ae Iriana Te Berita”

Kamatebwaia ma te tataro Reirei ao Berita aika Tabu 89–92, ao korei iango aika tabu ake ko karekei. Taraia raoi bwa e kanga “te Tamnei ni [kaota] te koaua” nakoim ngkai ko kamatebwaia (Reirei ao Berita aika Tabu 91:4).

Korei Am Namakin

N aia Kuura n Reirei Burabeti, te Burabeti Iotebwa Timiti e reireiniia unimwaanen Iteraera taekan katean abanuean te Atua i aon te aba. A marooroakin koaua aika tabu, a bootaki n tataro, n aki mamatam, ao a katauraoi n tataekina te euangkerio. Ma iai aron te bwai ae kakaraoaki n aia tabo are tao e na kamiimi nakoira n taai aikai, ao e aki naba eti iroun Emma Timiti. N tain te bootaki, a moko man kangkanta te bakee mwaane, are e aki tarabuaka n te tai arei, ma e karika te memea ae rooro nakon te burooa te kai n katuka boina ae korakora. Emma e tibwaua ana tabeiaianga nakon Iotebwa, ao Iotebwa e titirakina te Uea. Kaekan aei bon te kaotioti are e raka riki taekana nakon te moko ao memean te bakee. E anganiia Aika Itiaki, “te tua ae iriana te berita”—kakabwaia n marurungin te rabwata, “wanawana,” ao “kaubwain te rabakau ae korakora” (Reirei ao Berita aika Tabu 89:3, 19).

Taraa naba Saints, 1:166–68.

Iango ibukin te Kamatebwai i bon Iroum ni Koroboki aika a Tabu

Reirei ao Berita aika Tabu 89

Tuan te Mauri bon “te tua ae iriana te berita.”

Ngke unimwaane ake n Aia Kuura n Reirei Burabeti a moan ongo ngke Iotebwa Timiti e wareka Tuan te Mauri, ngkekei naba a waekoa ni “karenakoi aia moko te bwaiti ao nikiran aia bakee nako nanon te ai” (Aika Itiaki, 1:168). N te tai anne, Tuan te Mauri e taraaki bwa kanga te kauring ao tiaki te tua, ma a kan kaota nanoia ni kan ongeaba. Tao ko a tia n “karenako” man maium bwaai ake a katabuakaki n Tuan te Mauri, ma tera riki ae ko kona n reiakinna man te kaotioti aio? Tarai iango aikai:

• Kakaei kibun taeka ake tao ko aki noori—ke ni kabatiaa am iango iaona—mai mwaina. Tera ae ko reiakinna man mwakoro n taeka akanne?

• Reirei ao Berita aika Tabu 89 e kaoti tabeua berita (taraa kibu 18–21). Ngkoe iroum tera nanon berita aikai?

• E kanga te kaotioti aio n reireiniko taekan te Uea?

• Tera katooto aika ko a tia n noora iai “te buakaka ao babaire … i nanoia naake a iangoa karaoan ae buakaka ni karaba”? (kibu 4).

• Iangoa te kaotioti aei bwa “te tua ae iriana te berita” (verse 3)—koaua aika teimatoa ake a kaira karaoan te rinerine—tiaki ti baika a na karaoaki ke n aki karaoaki. Tera tuua ake ko kunei ae a kona n kaira am rinerine?

Burabeti n taai aikai a tia naba n kauring ibukin bwaai ma anua aika kaikoaki n reita are e taekinaki n Tuan te Mauri (taraa “Marurungin te Rabwata ao te Iango,” Ibukin Kakorakorakiia te Roronrikirake, 25–27). Tera ae ko kairaki bwa ko na karaoia n katamaroa tararuan am iango ma rabwatam?

Taraa naba Taniera 1; 1 I-Korinto 6:19–20; Atuun te Euangkerio, “Word of Wisdom,” topics.ChurchofJesusChrist.org; “The Word of Wisdom,” Revelations in Context, 183–91; addictionrecovery.ChurchofJesusChrist.org.

Tuan te Mauri e reireiniira bwa ti na tararuai rabwatara.

Reirei ao Berita aika Tabu 90:1–17

Te Moan Beretitentii e taui “kiingin te abanuea.”

Ni mwakoro 90, te Uea e anga taian kaetieti iaon “te mwakuri ao te beretitentii” (te kibu 12) Iotebwa Timiti, Sidney Rigdon, ao Frederick G. Williams—membwa te bwai ae ti aranna ngkai bwa te Moan Beretitentii. Tera ae ko reiakinna n te Moan Beretitentii man kiibu 1–17? Manga tarai rongorongo ake ngkai mairouiia membwa n te Moan Beretitentii. A kanga aia taeka ni “kaotii bwain te abanuea aika raba” nakoim? (te kibu 14). A kanga n “bairei raoi ana waaki nako te ekaretia aei ao te abanuea”? (te kibu 16).

Taraa naba Henry B. Eyring, “Te Korakora n te Kamatoa ae Onimaki,” Ensign ke Riaona, Meei 2019, 58–60.

Reirei ao Berita aika Tabu 90:24

“Bwaai ni kabane a na kaai ni mwakuri ibukin ae raoiroi [ibukiu].”

Iangoa te bwai are ko a tia n rinanona are e kamatoa ana berita te Uea n Reirei ao Berita aika Tabu 90:24. Iangoa korean baike ko rinanona ao tibwauakina ma kaain am utu ke temanna ae ko tangiria—tao temanna ae kainnanoa te karaunano ke te kaunganano. Ngkana iai kakabwaia ake ko bon tataningai naba ngkai, iangoia bwa tera ae ko kona ni karaoia n teimatoa ni kakaonimaki ngkai ko tataninga n nooria bwa a na kanga “bwaai ni kabane ni kaai ni mwakuri ibukin ae raoiroi ibukim.”

Reirei ao Berita aika Tabu 90:28–31

Antai ngkoa Vienna Jaques?

Vienna Jaques e bungiaki n Tuun 10, 1787, i Massachusetts. Te aine ae onimaki are bati ana mwane, E moan kaitibo Vienna ma mitinare n 1831. Imwin karekean te kakoaua ae tabu bwa e koaua aia rongorongo, e mwananga bwa e na kaitibo ma te Burabeti i Kirtland, Ohio, ike e bwabetoaki iai.

E ongeaba Vienna n ana taeka te Uea nakoina n Reirei ao Berita aika Tabu 90:28–31. Ana anganano aika tabu nakon te Uea, n ikotaki ma te mwane are e anga mai mwaina i Kirtland, e kaoti n te tai ni kaangaanga n te Ekaretia, ngke taan kairiiri a kataia ni kabooa te aba are e na kateaki iai te Kirtland Tembora. Vienna e bon “kakaonimaki, man aki … taningaroti” inanon maiuna ao n tokina e a kona n “maeka ma te rau” (verse 31) i Salt Lake Valley, ike e a motirawa iai n ana ririki ae 96.

Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki

Reirei ao Berita aika Tabu 89.Kaain am utu a kona ni kukurei man korean ao kakaean tamnein amwarake ao bwai ake tabeua ake a taekinaki n Reirei ao Berita aika Tabu 89. Ngkanne kam kona n karaoa ami takakaro—kaain te utu a kona n ikaruoruo n rinei tamnei n aki akaaka, ni karini baike ti riai n aki kabonganai n nnen te maange ao baike ti riai n kabonganai iaon te raurau. A kangaa berita ake n kiibu 18–21 n tia ni kakoroaki bukiia inanon maiura?

Warekan “Marurungin te Rabwata ma te Iango” n Ibukin Kakorakorakiia Kairake (25–27) e kona n kauekea te marooro ni kawai tabeua n taben nanoa marurungira ao kakabwaia ake e anga te berita iaona te Atua.

Reirei ao Berita aika Tabu 90:5.Marooroakinna bwa ko na kanga “ni butimwaea ana kaotioti [kaotioti ke ana burabeti] te Atua.” Ti na kanga ni kaotia bwa tiaki bwaai “aika akea manenaia” nakoira?

Reirei ao Berita aika Tabu 91.Kam kona n marooroakinna bwa e kanga ana reirei te Uea iaon te Abokiribwa (taraa kiibu 1–2) n irekereke ma rongorongo ake a kaitara ma ngaai am utu ngkai (taraa naba Kairi nakon Koroboki aika Tabu, “Abokiribwa,” scriptures.ChurchofJesusChrist.org). Kam kona n tibwauai oin karakinami ike “kaotaakimi iroun te tamnei” (te verse 5) e buokii ngkami n ataa te koaua ma te kaairua.

Reirei ao Berita aika Tabu 92:2.Tera ae nanonaki n te “membwa ae kakammwakuri” n te Ekaretia?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te kuna ae tamaroa: “The Lord Gave Me a Temple,” Aia Boki n Anene Ataei, 153.

Kanakoraoan Ara Anga Reirei

Kabonganai aanga n aekaia nako. Kakaei kawai aika a mwaiti n reitiia am utu ni kamatebwaian koroboki aika tabu n te utu. Te katooto, a kona kaain te utu n anenei kunan te aro ke kunaia ataei ake a irekereke ma te kibu, korei tamnein baike a wareki, ke ni kakimototoa te kibu n oin aia taeka.

“Ao ni kabane aomata aika itiaki … ake a a uringnga, n nakonako n te ongeaba nakon tuua, a na karekea te marurung n rabwataia ao korakora nakon riia” (Reirei ao Berita aika Tabu 89:18).