“Aokati 2–8. Reirei ao Berita aika Tabu 85–87: ‘Teei n Taabo Aika Tabu,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Aokati 2–8. Reirei ao Berita aika Tabu 85–87,” Nakomai, Iriirai—Ibukiia Aomata n Tatabemaniia ao Utu: 2021
Aokati 2–8
Reirei ao Berita aika Tabu 85–87
“Teei n Taabo Aika Tabu”
Te Tamnei e kona n kairiko bwa ko na kamatebwai reirei ake ni mwakoro 85–87 ake aki kaotaki n te kamataata aio. Iriira Ana wirikiriki.
Korei Am Namakin
Bongin te Kakiritimati bon te tai ae bwainaki ibukin iangoan rongorongon n aron “raoin te aonaba” ao “a na akoaki aomata” (taraa Ruka 2:14). Ma n Ritembwa 25, 1832, Ana iango Iotebwa Timiti e onrake ma te kakamaaku ibukin te buaka. Carolina Maiaki e a tia n kaitaraa te tautaeka n Amerika ao e kakatauraoi nakon te buaka. Ao te Uea e angan Iotebwa te kaotioti bwa aio ai tibwa moana: “Te Buaka,” E taku, “e na bwaro nako aon aaba ni kabane” (Reirei ao Berita aika Tabu 87:2). E taraa n ae te taetae ni burabeti e na kakoroaki nanona n te tai ae tawe.
Ma e bon aki. Tabeua te wiki imwina, Carolina Maiaki ao te tautaeka n Amerika a karekea te boraraoi, ao e a mwanuokinaki te buaka. Ma te kaotioti aio e aki kakoroaki nanona n te tai ke te kawai are ti kantaningaia. E kaaniia 30 te ririki imwina, ngke e a maan imwin are e tiringaki Iotebwa Timiti ao Aomata aika Itiaki a tia ni mwaing nako mainiku, Carolina Maiaki e kaaitara ao e riki imwina te buaka inanoaa. Mai ikanne, te bubuaka ni kabuta te aonaba e tia n karika “te aonaba bwa [e na] tang n nanokawaki” (Reirei ao Berita aika Tabu 87:6). E ngae ngke te kaotioti aio e koro bukina n tokin te tai, kakaawakin te kaotioti aio e aki boto n kaotan te tai are e na roko iai te karawawata ae korakora ma e boto riki n reireian baika a na karaoaki ngkana e riki. Te kauring ti te arona n te ririki 1831, 1861, ao 2021: “Teei n taabo aika tabu, ao tai mwaing” (kibu 8).
Iango ibukin te Kamatebwai i bon Iroum ni Koroboki aika a Tabu
Reirei ao Berita aika Tabu 85:1–2
E bon tamaroa “kokorean te rongorongo.”
Te “rongorongo” are kabwarabwaraaki n te kibu 1 e taui mwiin araia naake a tia n “[karekei] bwaai n kaeineti ma tuan te aba” i Tion (taraa naba Reirei ao Berita aika Tabu 72:24–26). Ma, te rongorongo aio e raka riki nakon ae ti te waaki ni kairiiri—bon te rekooti naba ae kakaawaki n “aron maiuia, aia onimaki, ao aia mwakuri Aomata aika Itiaki” (te kibu 2).
Ko kokorea oin rongorongom ke n am tienoo? Tera rongororongo ae ko kona n korei n aron maium, am onimaki, ao am mwakuri ake a kona n riki bwa te kakabwaia nakoia rooro aika a na roko? E na kanga n riki te rongorongo aio bwa te kakabwaia ibukim?
Taraa naba “Journals: ‘Of Far More Worth than Gold,’” Aia Reirei Burabeti n te Ekaretia: Wilford Woodruff (2011), 125–33; “Turning Hearts” (witeo, ChurchofJesusChrist.org).
Reirei ao Berita aika Tabu 85:6
Te Tamnei e taetae ma te “bwanaa ae maraara n rau”
Iangoi taeka ake e kabonganai Iotebwa Timiti n kabwarabwara te Tamnei n Reirei ao Berita aika Tabu 85:6. N te aro raa ae bwanaan te Tamnei e “rau” ao e “maraara”? Tera bwaai tabeua ake e “ninianako” inanon maium?
Ngkai kam iangoia bwa e kanga te Tamnei n taetae nakoimi, iangoi kabwarabwara ake a roko rinanon Iotebwa Timiti: Reirei ao Berita aika Tabu 6:22–24; 8:2–3; 9:7–9; 11:12–13; 128:1. Man baike ko a tia n wareki, tera ae ko namakinna bwa ko na katamaroa bwa ko aonga riki n ataa bwanaan te Tamnei?
Taraa naba 1 Uea 19:11–12; Ereman 5:30.
Kamatebwaian koroboki aika tabu e buokiira n ongo bwanaan te Tamnei ae Raoiroi.
Naake a raoiroi a ikotaki n te kabanea n bong.
Reirei ao Berita aika Tabu 86:1–7 iai inanona ana kabwarabwara te Uea iaon te taetae n kaikonaki iaon te wiita ao titania, ma te kabwarabwara ae okoro teutana are E anga n Mataio 13:24–30, 37–43. Ngkai ko tarai baika uoua aikai, tera taian kaokoro aika ko noori? Iangoia bwa bukin tera te taetae n kaikonaki aio—ma taian kaokoro aikai—n manena manga taekinaia “n te kabanea n bong, ao riki ngkai” (Reirei ao Berita aika Tabu 86:4). Tera ae ti kona n reiakinna ma te taetae ni kaikonaki aio ao kabwaraana ni boong aika kaitira?
N aron are e koreaki n kiibu 8–11, e taetae te Uea iaon te nakoanibonga, manga kaokan bwaai, ao kamaiuaia Ana aomata. Tera reitaki aika ko noori imarenan kiibu aikai ma te taetae n kaikonaki iaon te wiita ao titania? Kam na kanga n riki bwa taan “tia kamaiuia ao aomata [te Uea]”? (te kibu 11).
Taraa naba Atuun te Euangkerio, “Kitanan te Koaua,” “Kaokan te Nakoanibonga,” topics.ChurchofJesusChrist.org.
Te rau e kuneaki n “taabo aika tabu.”
N ikotaki ma kaangaanga aika rabwata n “waanakon te rara … [ao] te rongo, ao kabuanibwai, ao mwaeiei” (Reirei ao Berita aika Tabu 87:6), te kauring n te kaotioti aio e uaana naba nakon kaangaanga n te tamnei ake ti bane ni kaaitarai ni boong aikai. A mena ia “taabo aika tabu” (kibu 8) ike ko kunea iai te rau ma te kamanoaki? Tera ae karika te tabo bwa e na tabu? N ikotaki ma taabo, tao iai taai aika tabu, mwakuri aika tabu, ke iango aika tabu ake a kona n anga te rau. Tera ae nanonaki n te aki mwaing” man taabo aikai?
Taraa naba Henry B. Eyring, “Te Mweenga are Maeka iai Tamnein te Atua,” Ensign ke Riaona, Meei 2019, 22–25; Saints, 1:163–64; “Peace and War,” Revelations in Context, 158–64.
Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki
-
Reirei ao Berita aika Tabu 85:6.Ko na kanga n reireiniia am utu ni kinaa bwanaan te Tamnei ae maraara n rau? Tao kam kona ni karaoa te takakaro ike temanna e wirikiriki kaetieti aika kakaawaki i buakon te kaberoro. Tera ae kona n tukiira man te ongo ni bwanaan te Tamnei ae Raoiroi? Tao a kona kaain te utu n tibwaua baike a karaoi n ongon bwanaan te Tamnei.
-
Reirei ao Berita aika Tabu 86.Korean ao taraakin tamnei a kona ni buoka am utu n oota n te taetae ni kaikokanaki iaon te wiita ao titania. Tao kona kan waaki ma tamnein baike a kabwarabwaraaki n Mataio 13:24–30. Imwina a kona am utu ni korei aran tamnei akanne ma kabwarabwaraaia man Reirei ao Berita aika Tabu 86:1–7. N te aro raa ae e titebo iai ngaira ma te wita? Ti na kanga n riki bwa anera ake a boboti taian wiita?
-
Reirei ao Berita aika Tabu 87:8.Ni waakinan te marooro iaon aron karikan te mweenga bwa te tabo ae tabu, ko kona ni kaoiia kaain am utu bwa a na karaoa tamnein mweengan temanna ae tangira te Tia Kamaiu. Aio e kona n karekei riki iango iaon aron manga karaon tamnein” mweengam n karikia bwa te tabo ibukin te rau i buakon kaangaanga n te maiu n tamnei n te aonaaba aei. Kuuna n aron “Love at Home,” “Home Can Be a Heaven on Earth” (Hymns, nambwa. 294, 298), or “Where Love Is” (Aia Boki n Anene Ataei, 138–39) a kona n anganiko iango.
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae tamaroa: “Where Love Is,” Aia Boki n Anene Ataei, 138–39.
Kanakoraoan Ara Anga Reirei
Kabongana am kakauiango. N te tai are ko reireiniia am utu man koroboki aika tabu, tiaki tokim titiraki ao iango ibukin mwakuri ni kauring ake a kaotaki n te kamataata aei. Kariki iango aikai n karekei riki oin am iango. Iangoia bwa tera ae na kukurei iai am utu ao tera ae na buokiia n noora te reitaki imarenan koroboki aika tabu ma maiuia.
Te Uea e taekina te taetae ni kaikonaki i aon te wiita ao ni kabwarabwara aron ikotakiia Ana Aomata ni kabanea ni boong.