te ruu ma kaintekateka ao taabo n tekateka

Aokati 9–15

Reirei ao Berita aika Tabu 88

“Katea … Ana Auti te Atua”

E taku Beretitenti Nelson “I berita bwa ngkana ko mwakuri korakora ni bita aron tarakin bwaai ni mweengam nakon te tabo n reiakinan te euangkerio, … ana kairoro te kakaitara ni maium ao ni mweengam e na kerikaaki” (“Becoming Exemplary Latter-day Saints,” Ensign ke Riaona, Nobembwa. 2018, 113).

Korei Am Namakin

E bati te tai are, te Uea e anga teutana noran “ueana ao mwaakana” ae akea tokina (Reirei ao Berita aika Tabu 88:47) rinanon kaotakin kaotioti nakoia Ana burabeti. Reirei ao Berita aika Tabu 88 bon te katooto n te kaotioti aei—te kaotioti ibukin te oota ao mimitong ma abanuea are kabebetei tabeiaiangara n te aonaaba. E ngae ngke ti aki kona n oota ni bwaai ni kabane are e reireiniira te Uea, ma ti kona n ataia bwa iai riki ae raka nakon te maiu ae akea tokina are ti kona n oota iai ngkai. Ao eang, te Uea e aki marorooakin rabakau aika raba aika abwabwaki n kakamakuiira ke ni kakeai bonganara. Ni koauana, E berita, “E na roko te bong are kam na ata naba te Atua” (te kibu 49; manin te koroboki e kaairaki). Tao ibukin te kantaninga ae tabu are te Uea e kaumakiia Ana Aomata aika Itiaki i Kirtland ni katea Aia reirei Burabeti. “Barongai ngkami,” E taku. “Katauraoi bwaai nako aika kainnanoaki; ao katea … Ana Auti te Atua” (kibu 119). Bwa bon i nanon ana auti te Atua ae tabu—ao ni mweengara—are E konaa, nakon taabo riki tabeua, e tabekarake ara nonoori riaon te aonaaba ae mamate, “e na kaaki rabunan ubuna [nakoira],” ao ni katauraoira bwa ti na “maeka n te abanuea ae te teretirio” (kiibu 68, 22).

te aikaon ibukin te kamatebwai i bon iroum

Iango ibukin te Kamatebwai i bon Iroum ni Koroboki aika a Tabu

Reirei ao Berita aika Tabu 88

Te Uea e anganiira te kantaninga ao te rau.

Tabeua te bong imwin kauring bwa te buaka e na “bwaro nako aon aaba ni kabane” (Reirei ao Berita aika Tabu 87:2), Te Uea e anga te kaotioti nakon Iotebwa Timiti ae aranaki bwa “‘baan te oriwa’ … e koutaki man Kain te Bwaretaiti, ana rongorongo n rau te Uea nakoira” (Reirei ao Berita aika Tabu 88, atuun te mwakoro). E kanga n kabotauaki te kaotioti aei ma baan te oriwa, kanikinaean te rau n te tabo? (taraa naba Karikani Bwai 8:11). Tera koaua n te mwakoro aei are e buokiko n namakina te kantaninga ao te rau iroun Kristo?

Reirei ao Berita aika Tabu 88:6–67

Te oota ma te tua a roko mairoun Iesu Kristo.

Taeka aika oota ao tua e mwaiti kaokiokaia n mwakoro 88. Taeka aikai a tia n kabonganaaki ni koroboki aika tabu ake tabeua n kabwarabwara Iesu Kristo ao Ana euangkerio (n aron te katooto, taraa Itaia 60:19; Ioane 1:1–9; 3 Nibwaai 15:9). Mwaakena ke kanikinaei kiibu are ko kunei iai taeka aikai n Reirei ao Berita aika Tabu 88:6–67, ao korea te bwai ae ko reiakinna ibukin te Tia Kamaiu, oota, ao te tua. Kiibu aikai a kona ni kaungako ni karaoi bitaki inanon maium ni kakaonimaki riki n karekea te oota ao n maiuakina ana “tua Kristo” (te kibu 21).

Taraa naba Sharon Eubank, “Kristo: Te Ota are Ota i Buakon te Ro,” Ensign ke Riaona, Meei 2019, 73–76.

te utu a wareware ni koroboki aika a tabu

Koroboki aika tabu iai inanona ana tua Kristo.

Reirei ao Berita aika Tabu 88:62–126

Katauraoi bwaai nako aika kainnanoaki.

Ni bwaai tabeua, ti maeka inanon taai are e kabwarabwara te Uea bwa “bwaai ni kabane a na mangaongao; ao n akea te nanokokoraki, e na bwara nanoia aomata” (Reirei ao Berita aika Tabu 88:91). Ngkai ko wareka kiibu 62–126, iangoia bwa e kanga ana reirei te Tia Kamaiu ni kona n buokiko ni katauraoi imwain Manga Okin te Tia Kamaiu. Aikai tabeua titiraki aika tamaroa:

Kiibu 62–76.Ngkai ko iangoi kiibu aikai, tera ae ko kaungaaki bwa ko na karaoia n “kaania” te Atua? (kibu 63). Iangoia bwa tera nanon ana tua te Uea ae “katabui ngkami” nakoim (te kibu 68).

Kiibu 77–80, 118–26.Bukin tera e “riai ibukimi bwa kam na atai” n rabakaun te euangkerio ao te aba naba? (kibu 78). Ko kanga n toua mwin te reirei ae te “ukoukoura te rabakau”? (te kibu 118). Iroum ngkoe tera ae nanonaki n ukoran te rabakau “n te kamatebwai ao n te onimaki naba”?

Kiibu 81–116.Iangoi taraakin taetae ni burabeti ibukin Manga Okin te Tia Kamaiu n kiibu aikai. Iroum ngkoe bukin tera te Uea e tangiriko bwa ko na atai bwaai aikai?

Kiibu 117–26.Iangoa warekan kiibu aikai ma te tembora n am iango; tera ae ko kunea ikai are kona ni buokiko ni katauraoi n rin n ana auti te Uea?

Taraa naba D. Todd Christofferson, “Katauraoi imwain Okin te Uea,” Ensign ke Riaona, Meei 2019, 81–84; David A. Bednar, “Ukoukoura te Rabakau n te Onimaki,” Ensign, Tebetembwa. 2007, 61–68; Aika Itiaki, 1:164–66; “A School and an Endowment,” Revelations in Context, 174–82.

te aikaon ibukin te kamatebwai n te utu

Iango ibukin Kamatebwai ni Koroboki aika Tabu n te Utu ao te Bootaki n te Tairiki

Reirei ao Berita aika Tabu 88:14–33, 95–101.Tera ae ti reiakinna iaon te Mangauti man kiibu aikai? A kanga koaua aikai n kakairi nakon rinerine ake ti kakaraoi?

Reirei ao Berita aika Tabu 88:33.Kam kona ni waakina te marooro iaon te kibu aei man tuangakiia kaain te utu bwa a na marooroakini bwaintangira ake a tia n karekei—ake a karekei ma te kukurei ao ake ma te nanokawaki naba. Ti na kanga ni kaotia nakon te Uea bwa ti kimwareirei n te bwaintangira are bon te abanuea ae te teretio are E anganira? Bukin tera ti kimwareirei iroun “te tia anga te bwai n tangira”?

Reirei ao Berita aika Tabu 88:63, 68.Kiibu aikai iai inanoia tabeua taeka ni makuri ake a kona n kaungako n iangoi kawai aika tamaroa n anga reirei rongorongo ake n kiibu akanne nakoia natim. N aron te katooto, kam kona ni karaoa te takakaro ae te ikaraba ni marooroakina te kibun taeka ae “botumwaaka nukoukoraiao kam na kuneai ” (te kibu 63; manin te koroboki e kaairaki).

Reirei ao Berita aika Tabu 88:81.N te utu, katebenakoi tabeua kanikina n kauring i nanon ao i tinanikun mweenga, n aron kauring iaon bwainaoraki ke tuan te kawai ibukiia taan kabuti kaa. A kanga kauring aikai ni buokiira? Tera ae tangiria Tamara are i Karawa bwa ti na “kauringa [kaain] rarikira”?

Reirei ao Berita aika Tabu 88:119.Ni kaungaia am utu n karika mweengaia n aron are e kabwarabwaraki n te kibu 119, kataa ae ai aron aei: Korei mwakoro n taeka man te kibu aei iaon te beba, ao katoka iaon tamnein te tembora. Bootaki n wareka Reirei ao Berita aika Tabu 88:119 , ao tuangiia kaain te utu bwa a na kanakoi beeba akanne ngkana a ongo kibun taeka akanne n te kibu aei. Tera ae ti na karaoia n karika mweengara bwa ana “auti te Atua”? (te kibu 119).

Ibukin iango riki tabeua ibukin reireiaia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae tamaroa: “Nearer, My God, to Thee,” Anene n Taromauri, nambwa. 100.

Kanakoraoan Ara Anga reirei

Kariaia ataei bwa a na kaoti bwaai ake a karaoi man aia kakauiango. Ngkana ko kaoiia am ataei bwa a na karaoi bwaai tabeua aika irekereke ma te reirei n te euangkerio, ko aki tii buokiia bwa a na oota raoi riki n te reirei, ma ko anganiia naba te kauring n te bwai ae a tia n reiakinna (taraa Reirei n Ana Kawai te Tia Kamaiu 25).

Iesu ma Ana reirei

Iesu Kristo e anganiira te rau. I Katuka te Rau Iroumi, iroun Walter Rane