“Aokati 2–8. Reirei ao Berita aika Tabu 85–87: ‘Teei n Taabo aika Tabu,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Aokati 2–8. Reirei ao Berita aika Tabu 85–87,” Nakomai, Iriirai—Ibukin te Reirei n Tabati: 2021
Aokati 2–8
Reirei ao Berita aika Tabu 85–87
“Teei n Taabo Aika Tabu”
Tai namakina ae ko kua n rinanon kiibu nako—ke ni katoa mwakoro naba—man Reirei ao Berita aika Tabu n te Reirei n Tabati. Kariaia te Tamnei bwa e na kairiko, ao tatauraoi kaeka nakoia kaain te kirati ni bwaai ake a kunea bwa e kakaawaki nakon maiuia.
Korei Am Namakin
Kaungaa te Tibwatibwa
A kona kaain te kiraati n taraa Reirei ao Berita aika Tabu 85–87 ibukin te taeka ke kibun taeka ake a taraa ni kakaawaki nakoia (tao teuana are a tia ni kanikinaea inanon aia booki aika tabu). Tuangiia bwa a na korei aia taeka ke kibun taeka iaon te burakibooti, ao rinei tabeua ni marooroakin.
Reirei te Reirei
Reirei ao Berita aika Tabu 85:6
Uringnga bwa te tamnei e taetae n te “bwanaa ae maraaraa.”
-
N Reirei ao Berita aika Tabu 85:6, te Burabeti Iotebwa Timiti e kabongana te taetae ni kabwarabwara n taekinna bwa e kanga te Tamnei n taetae nakoina. Tera ae ti reiakinna ibukin te Tamnei ae Raoiroi man ana kabwarabwara? Ko na tuangiia kaain te kiraati bwa a na iangoi taai are ngke e taetae te Tamnei ae Raoiroi nakoia—a na kanga ni kabwarabwara te bwai are a rinanona? A kona ni kunei rakan kabwarabwara n taian karaki ni booki aika tabu n aron aikai: Ruka 24:32; Motiaea 5:2; Aramwa 32:28; Ereman 5:30; Reirei ao Berita aika Tabu 6:22–23; 11:12–13.
-
Ko kona n iangoa te bwai n reirei ma ana bwai ni kakairi are e na kamataata ana wirikiriki te Tamnei ae Raoiroi ae maraara ao n rau? Tao ko na bae ni katangi tabeua katangitang aika tabu ngke a rinnako kaain te kiraati inanon te ruu. A kona kaain te kiraati ni marooroakinna bwa tera aia namakin ae reke man te katangitang ao e na mwaitira te kaangaanga n ongora te katangitang ngkana a na iai bwanaa ni katabetabe. Aei e kona ni kaira te kabwarabwara ibukin taian bwai ni katabetabe inanon maiura are a tukiira mairoun te te bwanaa ae uarereke man rau. A kona kaain te kiraati n tibwaua te bwai are a karaoia ibukin karikirakean aia kakanamakin nakon te Tamnei—tabeua reirei a kona ni kuneaki inanon “Bwaai n Ibuobuoki Riki Tabeua.”
Reirei ao Berita aika Tabu 86:1–7
A ikotaki aika a raoiroi n te kabane ni bong.
-
Te waaki ni kakukurei ane imwiina e kona ni buokiia kaain te kiraati bwa a na mataata n te kanikina n te taetae ni kaikonaki ibukin te uita ao te titania: Ko kona ni korei kibun taeka ibukin kanikina man te taetae ni kaikonaki (n aron “te tia ununiki “taian titania a kariba te uita,” “a rikirake akanta,” ao “ikoikotaki uita” [kiibu 2–4, 7]) ao raitaeka aika a kona ni karaoaki (n aroia “Abotoro,” “Kitanan te Koaua,” “Kaokan Bwai,” ao “te mwakuri ni mitinare”) iaon mwakoroni beeba ao kanim iaon te burakibooti. Ngkanne a kona kaain te kiraati ni kaai ni mwakuri bwa a na katoatoai taian kanikina ma nanoia, ni kabonganai bwaai ake a reiakin man Reirei ao Berita aika Tabu 86:1–7 (a kona naba ni wareka Mataio 13:37–43). Bukin tera ngkai e kakaawaki iroun te Uea bwa e na maroroakina te kaotioti aei “nakoim ngkoe au tia mwakuri”? (te kibu 1). Baikara rongorongo ake ti karekei ake a irekereke ma ara mwakuri n ibuobuoki nakon te Uea? (taraa naba te kibu 11).
Reirei ao Berita aika Tabu 87:2, 6, 8
E kuneaki te rau n “n taabo aika tabu.”
Te tembora bon te tabo ae tabu ike ti kona n namakina iai ana tangira te Uea.
-
Ibukin buokaia kaain te kiraati bwa a na oota ni kainnanoan “teei … n taabo aika tabu,” ko na moanna man kaoakiia bwa a na korei ni karinani kaangaanga ake ti kaitarai ni boong aikai. A kona ni kunei tabeua katooto inanon Reirei ao Berita aika Tabu 87:2, 6. Ngkanne ko kona ni marooroakinna bwa e kanga ana kakao te Uea inanon te kibu 8 ni kona ni ibuobuoki ni kaangaanga aikai. Titiraki n aron aikai a kona n ibuobuoki:
Tera bonganan te taeka ae “teei” inanon te kibu aei?
Tera ae karika te tabo bwa e na tabu?
Tera ae kamwainga te aomata man te tabo ae tabu?
Ti na kanga ni kakoaua bwa ti aki kamwaingaki?
-
A na bae n anganano kaain te kiraati n tibwatibwa imarenaia iaon tabeua katooto iaon “taabo aika tabu” ao a kanga n riki bwa a tabu (ko na bae ni kabwarabwara bwa te tabo ae tabu e kona n raka riki nakon ae bon te tabo). Te witeo “Teei n Taabo aika Tabu” (ChurchofJesusChrist.org) e kona n anga iango aika a raka. Ngkai a tibwatibwa, kaungaiia bwa a na marooroakinna bukin tera ngkai a tabu taabo akanne irouia. A kanga taabo aika tabu aikai ni buokiira ni kunea te rau ribuakon kaangaangan boong aikai?
Bwaai n Ibuobuoki Riki Tabeua
Kakaea “te tai ae teimatoa man rau ni katoa bong.”
Titita Vicki F. Matsumori, te kauntira mai imwaaina n te Beretitentii ni Kabuta n te Moanrinan, e anga te reirei aei: “Ibukina bwa n angin te tai ao e kabwarabwaraaki te Tamnei bwa te bwanaa ae rau, man maaraara, e bon … kakaawaki bwa ti na karekea naba ara tai ae rau inanon maiura. E reireiniira te Uea bwa ti na ‘tei moa, ao n ataia ba te Atua Ngai’ [Taian Areru 46:10]. Ngkana ti katauraoa te tai ae teimatoa man rau ni katoa bong ngkana tiaki katabetabeaki man te terewition, kombiuta, taian takakaro n te witeo, ke bwai ni mwakuri aika maiu man te iti, ti butimwaea te bwanaa ae rau man maaraara n anganna ana tai ni katauraoi kaotioti aika onoti ao ni wirikiriki ni kairiiri, ni kakoaua, ao ni karaui nanora” (“Helping Others Recognize the Whisperings of the Spirit,” Ensign ke Riaona, Nob. 2009, 11).
Kanakoraoan ara Anga reirei
Katauraoi ma aomata n am iango. “E na riki am atatai irouia aomata bwa kairan am [katauraoi]. … Tia reirei aika a katotonga Kristo a aki tiku n aroia n anga reirei; ma a kabaeaki bwa a na buokiia aomata ni karikirakei aia onimaki iroun Iesu Kristo” (Reirei n Ana Kawai te Tia Kamaiu,7).