“Aokati 23–29. Reirei ao Berita aika Tabu 93: ‘Karekea Bwaninina,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Aokati 23–29. Reirei ao Berita aika Tabu 93,” Nakomai, Iriirai—Ibukin te Reirei n Tabati
I Nora Natin te Aomata n Tei n Angatain te Atua, iroun Walter Rane
Aokati 23–29
Reirei ao Bertia aika Tabu 93
“Karekea Bwaninina”
Aomata aika ko reireinia bon naati n tamnei mwaane ao aine irouia aia Karo i Karawa ao iai aia konabwai ae tabu. Imwiin Kamatebwaian Reirei ao Berita aika Tabu 93, tera ae ko kaungaaki ni karaoia n buokiia n rikirake n te “oota ma te koaua”? (kibu 36).
Korei Am Namakin
Kaungaa te Tibwatibwa
Korea iaon te burakibooti N Reirei ao Berita aika Tabu 93, Iesu Kristo e kaoira bwa … Kaoia kaain te kiraati bwa a na anga kawai n kabwanina te kibuntaeka anne.
Reirei te Reirei
Ti taromauriia te Atua te Tama ao Natina, Iesu Kristo.
-
N aia kamatebwai n Reirei ao Bertia aika Tabu 93, kaain te kiraati tao a tia ni kunei koaua ibukin Tamara are i Karawa ao Iesu Kristo. Kaoiia kaain te kiraati bwa a na tibwaua te bwai are a kunea. Ko kona naba n tibwatibwa te kiraati nakon kurubu ao angania kurubu nako tabeua kurubu bwa a na kamatebwaia. Kurubu nako a kona n tibwai nakon te kiraati baike a reiakinna ibukin “aron te taromauri, ao … tera ae [ti] taromauriia” (kibu 19).
Reirei ao Bertia aika Tabu 93:1–39
Ti kona n “karekea bwaninin te [Atua] , ao n kamimitongaki.”
Ti kona ni kareka ootan te Atua ngkan ti kawakin Ana tua ao ti reirei mai Irouna.
-
Reirei ao Berita aika Tabu 93 iai inanona koaua aika bati ibukin arora ae akea tokina ao ara konabwai n aroia natin te Atua. Tabeman kaain te kiraati tao a tia n kunei koaua akanne inanon aia kamatebwai n mwakoro 93 ni mwengaia (taraa kabwarabwara n te wiki aei n Nakomai, Iriirai—Ibukiia Aomata n Tatabemaniia ao Utu). Uakanne a kona n tibwauai baike a kunei, ao kam kona n noori koaua ake tabeua n te kiraati. A na kanga koaua aikai n roota arora nakoia aomata i rarikira—ke bon nakoira?
-
Aio naba teuana te kawai n reiakina arora ae akea tokina ao ara konabwai: a kona kaain te kiraati n botaki n wareka kibu 24 ao korei teniua atuu iaon te burakibooti Arora ae ngkai, Arora ngkoa, ao Arora ae na roko. Imwin ko kona n bwenaua te kiraati nakon teniua te kurubu ao tuangiia kurubu nako bwa a na wareka Reirei ao Berita aika Tabu 93:6–39, ni kakaei koaua ibukin arora ae akea tokina ngkai, ngkoananoa ao ae na roko. Kurubu nako a kona ni korei baike a kunei iaan atuu akekei. A kanga koaua aikai n roota aron karaoan ara rinerine?
Reirei ao Berita aika Tabu 93:40–50
Ti tuangaki bwa ti na “bairea raoi oin [ara] auti.”
-
Te tua bwa ko na “bairea raoi oin am auti” (kibu 43) e aki nanonaki ibukin bairean kabwate ao nnen kunnikai ma ibukin te anga reirei—ao kamatebwaian—“te oota ao te koaua” (kibu 42). Tao a kona kain te kiraati n tibwauaia bwa a kanga n kataia n ira te reirei aei. Tera tabeua kakaewenako ae a kaitarai? Tera koaua ao reirei n Reirei ao Berita aika Tabu 93 ae kona n ibuobuoki?
-
Bwa mwakoron am marooro n kiibu aikai, kaain te kiraati a kona ni wareki mwakoron ana marooro Henry B. Eyring “Te Mweenga Are Maeka iai Tamnein te Uea” (Ensign ke Riaona, Meei 2019, 22–25) ao n tibwauai nonoori aika irekereke nakon koaua n Reirei ao Berita aika Tabu 93:40–50. (Taraa naba te kibuntaeka n “Bwaai ni Ibuobuoki riki Tabeua.”)
Bwaai n Ibuobuoki Riki Tabeua
“Taraia bwa a botumwaaka riki ao n tabeainga n te mwenga.”
Unimwaane David A. Bednar e reirei:
“Inanon au aobiti bon iai te korobanna ae tamnein te onaroka ibukin te wiita. Te korobanna aei e riki man win kaai n korobanna—akea teuana ae kabareka ao aio e bon kabwakanano ao e anainano. Ni koauana, ngkana ko kaaniko ma te tamnei, te bwai ae ko na nooria bon te been ae baabobo ao e kooora man buraun aika aki baireaki raoi ao n aki kantara. Ma, ngkana ko tabe n keerikaki n raroa nako ma te tamnei, mwin win kaai n korobonna akekei a botaki ao n kabobonga tamnein te onaroka n wiita ae mainaina are bangaki. Kaai n korobanna teuana ma teuana a botaki n karika te korobanna ae kantara man tamaroa.
“Tataro n utu ni kabane, mwakoron nako kamatebwaian koroboki aika tabu n te utu, ao bootakin te utu n te tairiki bon mwin kaai n korobanna iaon tamneira. Akea te tai teuana ae na tara n rangin ni katekenano ke n ururungaki. Ao n aron been ake a baabobo n koora n buraun n kanakoraoia ibon imarenaia ao n karika te korobanna ae akea n ai arona, ara botumwaaka ni karaoi baika uarereke e na korakora mwina nakon tamneira. ‘Mangaia are, tai kua ni karaoan ae raoiroi, bwa kam kawenea aan te mwakuri ae korakora. Ao man bwaai aika uarereke e kaoti te bwai ae korakora’ (R&B 64:33). Te botumwaaka bon botona ngkai ti kawenea aan te mwakuri ae korakora n maiura n tatabemaniira ao ngkai ti botumwaaka riki ao n tabeaianga n oin mwengara” (“Botumwaaka ao n Tabeaianga riki n te Mwenga,” Ensign ke Riaona, Nobembwa. 2009, 19–20).
Kanakoraoan Ara Anga reirei
Kaota te tangiria. “E bon nakon te bwai ae ko rinanona, kaotan te tangira nakoia ake ko reireiniia tao e nanonaki n ae ko anga am kaunganano, ko tabe ibukin aroia, kakauongo raoi nakoia, ko kairekerekeia inanon am reirei, karaoi mwakuri ni ibuobuoki nakoia, ke n ti kamauriia ma nanom ngkana ko kaitibo ma ngaiia” (Reirei n Ana Kawai te Tia Kamaiu, 6).