Condado Daviess, Missouri

14–20 junio

Tzol’leb’ ut Sumwank 64–66

“Li Qaawa’ naxpatz’ li aamej, ut li k’a’uxlej li k’eek’o xch’ool”

Chiru li xamaan a’in, sa’ li tzolok xab’aanu, k’oxla rik’in tijok k’a’ru li na’leb’ re Tzol’leb’ ut Sumwank 64–66 tixtenq’aheb’ li komon chixnimob’resinkil lix paab’aaleb’ ut lix nawomeb’.

Tz’iib’a li nakak’oxla

Xkanab’ankileb’ chi wotzok

Re xwaklesinkileb’ xch’ool li komon chixwotzb’al k’a’ruhaq wan xyaalal choq’ reheb’ li xe’xtaw sa’eb’ li loq’laj hu chiru li xamaan a’in, naru nakakanab’eb’ chixtz’ilb’aleb’ rix li ch’a’ajkilal neke’qanumsi rajlal kutan. Chirix a’an kanab’eb’ chixwotzb’al jun raqal re Tzol’leb’ ut Sumwank 64–66 li neke’xk’oxla naq naru natenq’an sa’eb’ li ch’a’ajkilal a’an.

Xk’utb’al li tzolʼlebʼ

Tzol’leb’ ut Sumwank 64:1–11

Teneb’anb’il sa’ qab’een xkuyb’aleb’ xmaak chixjunil li kristiaan.

• Maare nak’anjelak reheb’ li komon aatinak chirix k’a’ut naq mas ch’a’aj xkuyb’aleb’ xmaak li qas qiitz’in—ut chan ru naq xe’numta sa’ xb’een li ch’a’ajkilal a’an. Naru neke’ril ru Tzol’leb’ ut Sumwank 64:1–11 re xsik’b’aleb’ li na’leb’ li taamusiq’anq reheb’ chixtzolb’al kuyuk maak. K’a’ru naqatzol chirix li Kolonel sa’eb’ li raqal a’an? Re xk’utb’esinkileb’ rosob’tesihom li kuyuk maak, naru taawotz li seraq’ chirix laj Morrell Bowen li wan sa’ li aatin kixwotz li Elder Jeffrey R. Holland “Li k’anjel re k’amok-ib’ wi’chik sa’ usilal” (Jolomil ch’utub’aj-ib’ re noviembre 2018) malaj li video “El perdón aligeró mi carga” (ChurchofJesusChrist.org). Maare wan jun komon li naraj xwotzb’al junaq seraq’ chirix chan ru naq xkuyuk maak malaj xk’ul xkuyb’al xmaak. Chan ru naq lix wankil li kuyuk maak kirosob’tesiheb’ li kristiaan sa’eb’ li seraq’ a’an?

Tzol’leb’ ut Sumwank 64:31–34

Li Qaawa’ naxpatz’ li “qaam ut li qak’a’uxl li k’eek’o xch’ool.”

• Li Qaawa’ ink’a’ naraj naq “toolub’q”; a’b’anan, ak re naq eb’ li kristiaan li neke’xyal xq’e chi tz’aqal—maare junjunqeb’ ajwi’ sa’ laa tzoleb’aal—“neke’lub’ sa’ xb’aanunkil li us.” K’a’ut naq nak’ulman li lub’k a’an? K’a’ru li na’leb’ naqataw sa’ Tzol’leb’ ut Sumwank 64:31–34 li naru nokoxtenq’a chixyalb’al qaq’e chi ink’a’ toolub’q?

• Re xtz’aqob’resinkil ru li aatinak, naru taak’ut xjalam-uuch k’a’ruhaq nim ut chaab’il li yiib’anb’il chiru k’iila chihab’ rik’in “li k’a’ru ka’ch’in”—jo’ jun jalam-uuch rik’in tusb’il kok’ pek malaj junaq nimla kab’l. B’ar wankeb’ junjunq reetalil li “xnimal ru k’anjel” xk’ehom qe li Qaawa’? K’a’ru li k’a’ru ka’ch’in naru naqab’aanu anajwan re xk’eeb’al xk’ojob’ankil li k’anjel a’an?

• Re xtenq’ankileb’ li komon chixtz’ilb’al rix Tzol’leb’ ut Sumwank 64:34, naru taatz’iib’a aamej ut k’a’uxlej li k’eek’o xch’ool chiru li pizarron. Eb’ li komon naru neke’xtz’iib’a rub’eleb’ li aatin a’an li neke’xk’oxla naq naraj naxye xk’eeb’al re li Qaawa’ li qaam ut li qak’a’uxl li k’eek’o xch’ool. Re xsik’b’al k’a’ru xyaalalileb’ li aatin a’an, chi’ilmanq li raatin li Elder Donald L. Hallstrom sa’ “Xkomon chik li k’anjeleb’aal.” Junjunqeb’ raqal sa’eb’ li loq’laj hu jo’eb’ a’in naru ajwi’ neke’tenq’an: Mosiah 7:33; Eter 4:15; Tzolʼlebʼ ut Sumwank 43:34; Moises 7:18; Jose Smith—Resilal 1:19.

Tzol’leb’ ut Sumwank 65

Li rawa’b’ejihom li Dios sa’ xb’een li ruchich’och naxkawresi li ruchich’och’ choq’ re lix k’ulunik wi’chik li Kolonel.

• Tzol’leb’ ut Sumwank 65 naxk’e jun musiq’ejil ch’olob’ahom chirix lix k’anjel lix Iglees li Qaawa’ sa’ roso’jikeb’ li kutan. Re xtenq’ankileb’ li komon chirilb’al lix tz’aqonikeb’ sa’ li k’anjel a’an, naru taakanab’eb’ chirilb’al ru li tasal 65 re xsik’b’al xsumenkileb’ li patz’om jo’eb’ a’in: K’a’ru naraj li Qaawa’ naq taa’uxq rik’in li rawa’b’ejihom sa’ li ruchich’och’? K’a’ru naraj a’an naq tinb’aanu re tenq’ank? Naru ajwi’ taawoksi li raatin li Awa’b’ej Dallin H. Oaks li wan sa’ “Xkomon chik li k’anjeleb’aal.” Eb’ li komon naru neke’xye chan raj ru te’xsumeheb’ lix patz’om li Awa’b’ej Oaks.

Xkomon chik li k’anjeleb’aal

“Li aamej ut li k’a’uxlej li k’eek’o xch’ool.”

Li Elder Donald L. Hallstrom kixye li na’leb’ a’in jo’ xch’olob’ankileb’ li aatin “li aamej ut li k’a’uxlej li k’eek’o xch’ool”:

“Li aamej a’an reetalil li rahok ut li teneb’ank-ib’. Naqab’aanu li mayejak ut neke’qak’am li riiq li ani neke’qara li ink’a’ raj chik taqakuy xb’aan junaq chik na’leb’. Wi maak’a’ li rahok, lix teneb’ankil qib’ nak’os. …

“Naq wan “jun qak’a’uxl li k’eek’o xch’ool” naxk’utb’esi lix yalb’al qaq’e ut li xnimal qanawom ut li qajom re xsik’b’al lix chaab’il na’leb’ li Dios. Naxjultika naq li tzolok li taqab’aanu chiru chixjunil li qayu’am tento naq a’anaq chirix li k’a’ru nakana chi junelik. Naraj naxye naq tento k’eek’ooq qach’ool chirab’inkil li raatin li Dios ut chixpaab’ankil” (“The Heart and a Willing Mind,” Ensign, junio 2011, 31–32).

Li kawresink-ib’ choq’ re li xkab’ xk’ulunik li Qaawa’.

“K’a’ raj ru taak’ulmanq wi ta wulajaq raj lix k’ulunik li Jesukristo? Wi ta naqanaw raj naq wulaj taqataw qib’ rik’in li Qaawa’—maare xb’aan raj li qakamik malaj lix k’ulunik a’an—k’a’ raj ru taqab’aanu anajwan? K’a’ raj ru tento taqaxootoni? K’a’ raj ru taqakanab’ xb’aanunkil? K’a’ raj ru li ch’a’ajkilal taqatuqub’ ru? Ani raj taqakuy xmaak? K’a’ raj ru li taqach’olob’ xyaalal?” (Dallin H. Oaks, “La preparación para la segunda venida,” Liahona, mayo 2004, 9).

Xchaab’ilob’resinkil li qak’utum

Xtawb’al qakawilal rik’in li Kolonel. “Sa’ xyalb’al aaq’e chi wank ut chi k’utuk jo’ li Kolonel, wan naq tatpalto’q. Mika’ch’ino’ aach’ool; kanab’ b’an naq laa maak ut lix q’unil aametz’ew tatxsutq’isi rik’in laa Choxahil Yuwa’ ut li Kolonel” (Li k’utuk jo’ li Kolonel, 14).