21–27 junio

Tzol’leb’ ut Sumwank 67–70

“Wan xloq’al … jo’ xb’ihomal chixjunil li Ruchich’och’ ”

Li kawresink-ib’ re k’utuk moko ka’ajwi’ ta naraj naxye xk’oxlankil k’a’ru taaye ut k’a’ru taab’aanu jo’ aj k’utunel. Naru ajwi’ nakak’oxla k’a’ru naru neke’xb’aanu li neke’tzolok re xtzolb’aleb’ rib’ chirib’ileb’ rib’. Chan ru taak’e xb’oqb’aleb’ li komon chixwotzb’aleb’ lix numsihom malaj lix k’oxlahomeb’ naq neke’rileb’ ru li raqal a’in sa’ li loq’laj hu?

Tz’iib’a li nakak’oxla

Xkanab’ankileb’ chi wotzok

Naru taatz’iib’a chiru li pizarron Li xamaan a’in, li Qaawa’ kixk’ut chiwu … ut taakanab’eb’ li komon chixtz’aqob’resinkil ru li ch’ol aatin rik’in k’a’ru xe’xtzol.

Xk’utb’al li tzolʼlebʼ

Tzol’leb’ ut Sumwank 67:1–9

Eb’ li k’utb’esinb’il na’leb’ k’eeb’ileb’ rik’in laj Jose Smith tz’aqal yaaleb’ ut neke’chal chaq rik’in li Dios.

• Xtawb’al ru li esilal chirix Tzol’leb’ ut Sumwank 67 naru nak’anjelak sa’ li aatinak chirix li tasal. Maare jun li komon naru naxseraq’i chi k’osb’il ru k’a’ru yoo chaq chi k’ulmank naq kik’eeman li k’utb’esinb’il na’leb’ a’in (chi’ilmanq xjolomil Tzol’leb’ ut Sumwank 67; Santos, 1:143–145). Wi ta koowan raj sa’ li ch’utam b’ar wi’ ki’ux aatinak chirix xpuktesinkileb’ li k’utb’esinb’il na’leb’, k’a’ut raj naq taqasik’ ru xpuktesinkil? K’a’ raj ru naru naqaye reheb’ li kristiaan li yookeb’ chaq xk’a’uxl chirix lix paaltil laj Jose Smith naq na’aatinak? K’a’ru naxk’ut chiqu li tasal 67 chirixeb’ li profeet ut li k’utb’esinb’il na’leb’? Eb’ li komon naru ajwi’ te’xye chan ru naq neke’xnaw xjuneseb’ rib’ naq eb’ li k’utb’esinb’il na’leb’ a’in tz’aqaleb’ yaal.

Tzol’leb’ ut Sumwank 68:1–6

Eb’ li musiq’anb’il aatin neke’xye lix moos li Qaawa’, a’aneb’ raatin li Qaawa’.

• Re xtenq’ankileb’ li komon chi aatinak chirix Tzol’leb’ ut Sumwank 68:1–6, naru taakanab’eb’ chirilb’aleb’ ru li raqal a’an sa’ kok’ ch’uut ut chixwotzb’al chirib’ileb’ rib’ li yaal neke’xtzol chirixeb’ lix k’utum lix moos li Qaawa’. Kanab’eb’ li kok’ ch’uut chixwotzb’al chirib’ileb’ rib’ chan ru naq neke’xnaw naq li na’leb’ nak’utman sa’ li raqal 4 tz’aqal yaal. Eb’ li komon naru te’xwotz xnumsihomeb’ b’ar wi’ xe’aatinak malaj xe’k’utuk “jo’ chanru eek’asinb’ileb’ xb’aan li Santil Musiq’ej” (raqal 3), ut chirix chan ru naq li Qaawa’ kiwan rik’ineb’ ut ke’kole’ rix (chi’ilmanq li raqal 6).

• Wi taawaj aatinak chirix chan ru naq nak’anjelek li neke’xye li raqal a’an sa’ lix k’utumeb’ lix moos li Qaawa’ sa’ li jolomil ch’utub’aj-ib’, naru taawoksi li raatin li Elder Jeffrey R. Holland li wan sa’ “Xkomon chik li k’anjeleb’aal.” Eb’ li komon naru ajwi’ te’xwotzeb’ aatin xe’yeeman sa’ li jolomil ch’utub’aj-ib’ li neke’tenq’ank reheb’ chixkawob’resinkil lix paab’aaleb’ chirix li tzol’leb’ natawman sa’eb’ li raqal a’in.

Tzol’leb’ ut Sumwank 68:25–31

Eb’ li na’b’ej yuwa’b’ej tento sa’ xb’eeneb’ xtzolb’aleb’ li ralal xk’ajol.

• Ma wankeb’ na’b’ej yuwa’b’ej malaj li okeb’ re choq’ na’b’ej yuwa’b’ej sa’ li tzoleb’aal? Maare taak’anjelaq raj reheb’ li na’leb’ kixk’e li Qaawa’ reheb’ li na’b’ej yuwa’b’ej li wan sa’ li tasal 68. Qayehaq, junjunqeb’ na’b’ej yuwa’b’ej naru neke’xsik’ ru junaq na’leb’ sa’eb’ li raqal 25–28 ut te’aatinaq chirix chan ru naq neke’xyal xk’utb’aleb’ li k’a’aq re ru a’an chiruheb’ li ralal xk’ajol (sa’eb’ li raqal 29–31 wankeb’ ajwi’ junjunq na’leb’ aajeleb’ ru). Malaj ut, eb’ li komon naru ajwi’ neke’aatinak chirix chan ru naq eb’ lix na’ xyuwa’ ke’xk’ut chaq li na’leb’ re li evangelio chiruheb’.

  K’a’ut naq li ochoch a’an tz’aqal li chaab’il na’ajej re xtzolb’al li evangelio? K’a’ raj ru taqaye reheb’ li na’b’ej yuwa’b’ej li neke’reek’a naq ink’a’ neke’ru malaj neke’tawa chixtzolb’aleb’ li ralal xk’ajol?

  

  Li Qaawa’ xk’e reheb’ li na’b’ej yuwa’b’ej li teneb’ank naq te’xtzoleb’ li ralal xk’ajol.

Tzol’leb’ ut Sumwank 70:1–4

Toxqaq’axtesi resileb’ li k’utb’esinb’il na’leb’ li xk’ehom chaq qe li Qaawa’.

• Li Qaawa’ kixk’e reheb’ junjunq komon winq li mertoomil sa’ xb’eeneb’ li k’utb’esinb’il na’leb’ re xk’amb’aleb’ aran Missouri ut rilb’al lix puktesinkileb’. Chan ru naru naqeek’a naq laa’o mertoom reheb’ li k’utb’esinb’il na’leb’? K’a’ chik ru re li na’leb’ chirix li mertoomil naru nak’anjelak choq’ qe sa’ li tasal a’in?

Xkomon chik li k’anjeleb’aal

Li Dios nokoraatina sa’eb’ li kutan a’in.

Li Elder Jeffrey R. Holland kixwotz chan ru naq li na’leb’ nak’utman sa’ Tzol’leb’ ut Sumwank 68:4 nak’anjelak sa’ li jolomil ch’utub’aj-ib’: “Nintz’aama eere naq chiruheb’ li kutan chalkeb’ re texk’oxlaq, moko ka’ajwi’ ta chirixeb’ li aatin xerab’i, chirix b’an ajwi’ li xchaq’alil ru li jolomil ch’utub’aj-ib’—li k’a’ru naqak’oxla naq naraj neke’xye li jolomil ch’utub’aj-ib’ a’in jo’ aj santil paab’anel sa’ roso’jikeb’ li kutan, ut li neke’qab’oq wi’ li ruchich’och’ chirab’inkil ut chirilb’al. Naqach’olob’ xyaalal chiru li junjunq chi tenamit, junkab’al, aatinob’aal, ut teepal naq moko ka’ajwi’ ta yo’yo li Dios, na’aatinak b’an ajwi’ sa’eb’ li hoonal a’in ut sa’eb’ li qakutankil, li na’leb’ xerab’i a’an, rub’el xb’eresihom li Santil Musiq’ej, “li rajom li Dios, … li raatin li Dios, … li xyaab’ xkux li Dios, ut lix wankilal li Dios choq’ re li kolb’a-ib’ ” ” [Tzol’leb’ ut Sumwank 68:4]” (“Un estandarte a las naciones,” Liahona, mayo 2011, 111).

Xchaab’ilob’resinkil li qak’utum

Xtenq’ankileb’ li komon sa’ li tzoleb’aal chixwaklesinkil rib’ chirib’ileb’ rib’. “Rik’in li junjunq li wan sa’ laa tzoleb’aal naru natawman li xnawom ch’oolej, li chaab’il na’leb’, ut li k’a’ru nak’ulman rik’in xyu’aminkil li evangelio. B’oqeb’ chi wotzok ut chixwaklesinkil rib’ chirib’ileb’ rib’ ” (Li k’utuk jo’ li Kolonel, 5).