Li xam chire li nima’ Missouri, xb’aan laj Bryan Mark Taylor

31 mayo–6 junio

Tzol’leb’ ut Sumwank 60–62

“Chixjunil li tz’ejwalej wan sa’ wuq’ ”

Li Elder Ronald A. Rasband kixye: “Chiqajunil tento taqakawob’resi qib’ sa’ musiq’ej toja’ ut naq taqakawob’resiheb’ li ani wankeb’ chiqasutam. K’oxlahomaqeb’ chi rajlal li loq’laj hu, ut chijultiko’q eere li k’oxlahom ut li eek’ahom nekek’ul naq nekerileb’ ru” (“Misachk sa’ lee ch’ool,” Jolomil ch’utub’aj-ib’ re noviembre 2016).

Tz’iib’a li nakak’oxla

Xkanab’ankileb’ chi wotzok

Naru nakatikib’ li aatinak rik’in xk’eeb’al xb’oqb’aleb’ li komon naq te’xsume junaq li patz’om malaj junaq na’leb’ li wan rilom rik’ineb’ li raqal sa’eb’ li loq’laj hu li xe’ril chaq ru sa’ kab’l. Qayehaq, naru taapatz’ reheb’ naq te’xye k’a’ruhaq xe’xtzol chiru li xamaan chirix li qaChoxahil Yuwa’ malaj chirix li Jesukristo.

Xk’utb’al li tzolʼlebʼ

Tzol’leb’ ut Sumwank 60:2–3, 7, 13–14; 62:3, 9

Li Qaawa’ nasaho’ xch’ool naq naqate li xtz’uumal qe re xwotzb’al li evangelio.

• Jo’ komon sa’ li Iglees, naqanaw naq li evangelio k’ojob’anb’il wi’chik a’an jun nimla b’ihomal li narosob’tesi xyu’ameb’ li ralal xk’ajol li Dios. Jo’kan ut, k’a’ut naq nokoxuwak chixwotzb’al lix nawom qach’ool rik’ineb’ li qas qiitz’in? K’oxla xkanab’ankileb’ li komon chixtz’iib’ankil chiru li pizarron junjunqeb’ xyaalal k’a’ut naq maare ink’a’ naqate li xtz’uumal qe re xwotzb’al li evangelio. Eb’ li komon naru te’ril ru Tzol’leb’ ut Sumwank 60:2–3, 7, 13–14; 62:3, 9 re xsik’b’aleb’ aatin malaj ch’ol aatin li tixwaklesi xch’ooleb’ chixwotzb’al li evangelio. Naru te’xtz’iib’a chiru li pizarron li te’xtaw. Maare junjunqeb’ li komon naru te’xwotz junaq xnumsihomeb’ b’ar wi’ xe’risi lix xiw ut xe’xwotz li evangelio rik’in anihaq.

• Sa’ Tzol’leb’ ut Sumwank 60–62, wankeb’ k’utum, chi ch’olob’anb’il jo’ ajwi’ chi k’utb’esinb’il, chirix xwotzb’al li evangelio. Re xtenq’ankileb’ li komon chixtawb’aleb’ li k’utum a’an, naru taakanab’eb’ chirilb’al ru li junjunq chi tasal a’an, ut te’xwotz li na’leb’ te’xtaw chirix xwotzb’al li evangelio. Naru nachaab’ilo’ li aatinak wi nekeril ru k’a’ruhaq chirixeb’ li chaab’il misioneer sa’ jalaneb’ chik raqal reheb’ li loq’laj hu (qayehaq, Hechos 8:27–40; Alma 19:16–17), ut tex’aatinaq chirix k’a’ru neketzol chirixeb’ a’an. Ma wankeb’ eetalil re li qayu’am li naru naqawotz? Ma naru junaq li komon chixch’olob’ankil chan ru naq kixnaw ru li evangelio xb’een wa ut k’a’ru kireek’a chirixeb’ li ke’tzolok re? Maare usaq choq’ reheb’ li komon xk’utb’esinkil chan ru naru “naqate li xtz’uumal qe” ut naqawotz li evangelio.

  

  Li Dios naraj naq taqawotz li evangelio rik’ineb’ li qas qiitz’in.

Tzol’leb’ ut Sumwank 60:2–4; 61:1–2, 20, 36–38; 62:1, 6

Eb’ li loq’laj hu nokohe’xtzol chirix li Jesukristo.

• Kanab’eb’ li komon chixtz’iib’ankil chiru li pizarron k’a’aq re ru xe’xtzol chirix li Kolonel chiru li xamaan a’in naq xe’rileb’ li tasal 60–62, rochb’eeneb’ li raqal b’ar natawman li na’leb’ xe’xtzol. Malaj naru te’ril ru Tzol’leb’ ut Sumwank 60:2–4; 61:1–2, 20, 36–38; 62:1, 6 re te’xsik’ k’a’ru nak’utman chirix li Kolonel. B’ar wankeb’ li seraq’ sa’ loq’laj hu malaj numsihom sa’ li qayu’am neke’xk’utb’esi lix k’anjel ut eb’ lix chaab’ilal li Kolonel chirix li k’a’ru xqatzol? (qayehaq, Jwan 8:1–11; Eter 2:14–15). Naru taakanab’eb’ li komon chixwotzb’al lix nawom xch’ooleb’ chirix li Jesukristo malaj chi k’oxlak xjuneseb’ chirix li k’a’ru xyaalal a’an choq’ reheb’.

Tzol’leb’ ut Sumwank 60:5; 61:22; 62:5–8

Li Qaawa’ naraj naq taqasik’ qab’e “jo’ naqak’oxla naq us.”

• Wi nakawaj, kanab’eb’ li komon chirilb’al ru Tzol’leb’ ut Sumwank 60:5; 61:22; 62:5–8 sa’ kok’ ch’uut malaj sa’ ka’kab’il, ut te’xwotz k’a’ru li esil naxk’e qe li Qaawa’ naq neke’reek’a. Jo’q’e hoonal reek’ahomeb’ naq tento te’sik’eb’ xb’e rik’in tz’aqal lix na’leb’eb’? Naru taawotz li raatin li Awa’b’ej Dallin H. Oaks, li wan sa’ “Xkomon chik li k’anjeleb’aal” jo’ xkomon li aatinak. Chan ru naq eb’ li na’b’ej yuwa’b’ej naru neke’xtenq’aheb’ li ralal xk’ajol chixtzolb’al li aajel ruhil na’leb’ a’an?

Xkomon chik li k’anjeleb’aal

K’anjelak jo’ chanru li qachaab’il k’a’uxl.

Li Awa’b’ej Dallin H. Oaks kixk’ut:

“Li qajom naq li Qaawa’ tooxb’eresi, a’an tz’aqal chaab’il, a’b’an tento junajinb’ilaq rik’in xtawb’al ru naq li qaChoxahil Yuwa’ nokoxkanab’ chixsik’b’al ru naab’al li k’a’aq re ru. Li qawankilal chixsik’b’ak qab’e a’an jun tenq’ re naq toochaab’ilo’q sa’ li ruchich’och’ a’in. Eb’ li kristiaan li neke’xyal xkanab’ankil sa’ ruq’ li Qaawa’ li sik’ok-u, ut neke’xtz’aama xb’eresinkil sa’ li junjunq chi sik’ok-u neke’xb’aanu, te’tawmanq sa’ jun hoonal b’ar wi’ neke’tijok re xpatz’b’al xb’eresinkileb’ ut moko neke’xk’ul ta. Qayehaq, mas nak’ulman a’an sa’eb’ li k’iila hoonal b’ar wi’ maak’a’ naxye k’a’ru taqasik’ ru, malaj naq a’ yaal li k’a’ru taqab’aanu ak naqanaw naq k’ulub’ej.

“Tento taqak’oxla li na’leb’ sa’ li qak’a’uxl, ut taqoksi li wankilal chi na’leb’ank li xk’ojob’ laj Yo’ob’tesinel sa’ li qach’ool. Chirix a’an tento tootijoq re xk’ulb’al qab’eresinkil, ut taqab’aanu li naxye wi naqak’ul. Wi ink’a’ naqak’ul jun li qab’eresinkil, tento taqab’aanu li k’a’ru chaab’il li na’leb’anb’il qab’aan” (“Nuestros puntos fuertes se pueden convertir en nuestra ruina,” Liahona, mayo 1995, 15).

Xchaab’ilob’resinkil li qak’utum

Tento taanaw ani yookeb’ chi nume’k sa’ ch’a’ajkilal. Maare ch’a’ajaq xk’eeb’al reetal lix ch’a’ajkilaleb’ li kristiaan nakatzoleb’. A’b’anan, rik’in xtenq’ li Musiq’ej ut eb’ laj jolominel aawe, naru nakanaw chan ru naru taaye’ laa wuq’ reheb’ li kristiaan a’an. (Chi’ilmanq Li k’utuk jo’ li Kolonel, 8–9.)