Li muheb’aal, xb’aan li xShaelynn Abel

5–11 julio

Tzolʼlebʼ ut Sumwank 76

“Nimaq ru lix q’ajkamunkileb’ ut chi junelik taawanq lix loq’aleb’ ”

Jo’eb’ li k’iila k’utb’esinb’il matk’ neke’seraq’iman sa’eb’ li loq’laj hu, li k’utb’esinb’il matk’ wan sa’ li tasal 76 kik’ulman naq laj Jose Smith ut laj Sidney Rigdon “yookeb’ chi k’oxlak chirixeb’ ” li loq’laj hu (raqal 19). Laa’at ajwi’ naru nakak’ul k’utb’esinb’il na’leb’—aana’leb’ ajwi’ re chan ru k’utuk—naq yooqat chi k’oxlak chirix Tzol’leb’ ut Sumwank 76.

Tz’iib’a li nakak’oxla

Xkanab’ankileb’ chi wotzok

Re xtenq’ankileb’ li komon chi aatinak chirix li xe’ril ru sa’ Tzol’leb’ ut Sumwank 76, naru taakanab’eb’ chixk’oxlankil naq jun ramiiweb’ jalan xpaab’aal naxpatz’ k’a’ru naqapaab’ chirix li yu’am chirix li kamk. B’ar wan reheb’ li raqal sa’ li tasal 76 te’xwotz raj rik’in li ramiiweb’? Eb’ li komon naru te’xwotz k’a’ruhaq wan sa’ li “Eb’ li xyaab’ kuxej re li k’ojob’ank wi’chik: Eb’ li ch’olob’ahom chirix “li k’utb’esinb’il matk’ ” ” li xwulak chiruheb’.

Xk’utb’al li tzolʼlebʼ

Tzolʼlebʼ ut Sumwank 76

Li kolb’a-ib’ nachal sa’ xk’ab’a’ li Jesukristo, li Ralal li Dios.

• Naab’aleb’ li kristiaan, naq neke’xk’oxla li tasal 76, neke’xk’oxla li k’uub’anb’il na’leb’ re li kolb’a-ib’ ut eb’ li oxib’ chi choxahil awa’b’ejihom. Chan ru naru taatenq’aheb’ li komon chirilb’al naq lix ch’oolil li k’utb’esinb’il na’leb’ a’in, a’an li Jesukristo? Naru taakanab’eb’ li komon chixwotzb’al junaq raqal xe’xtaw sa’ li tasal 76 li xkawob’resi lix paab’aaleb’ chirix li Jesukristo. Wi neke’raj xtenq’ankil rik’in a’an, naru taak’eheb’ li raqal a’in reheb’: 1–5, 20–24, 39–43, 69, 107–108.

• Re xtenq’ankileb’ li komon chixk’eeb’aleb’ reetal xjalanileb’ li kristiaan li neke’ok sa’ li junjunq chi awa’b’ejihom re loq’alil, tz’iib’a chiru li pizarron Choxahil, raqal 50–70, 92–96; Terrestil, raqal 71–79, 97; ut Teleestil, raqal 81–90, 98–106, 109–112. Eb’ li komon naru te’xsik’ ru jun ch’uut reheb’ li k’iila raqal, ut te’xsik’ ch’ol aatin li te’xch’olob’ lix wanjik li Jesukristo rik’ineb’ li kristiaan neke’k’uluk re li awa’b’ejihom li xe’ril ru resil. K’a’ru neke’xk’ut chiqu eb’ li ch’ol aatin a’an chirix li wank choq’ xtzolom li Jesukristo? Chan ru naru naqakawob’resi li qawanjik rik’in a’an ut rik’in li qaYuwa’? Chan ru naq neke’xye’ li ruq’eb’ qe? K’a’ru naraj naxye wank chi “kaw qach’ool rik’in li yaal ch’olob’anb’il chirix li Jesus”? (raqal 79).

  

  Laj Jose Smith kixk’ul li k’utb’esinb’il na’leb’ chirixeb’ li loq’alil sa’ jun na’ajej jo’ a’in.

Tzol’leb’ ut Sumwank 76:5–10, 113–118

Eb’ lix muqmuukil na’leb’ li Dios “ka’ajwi’ naru xtawb’al ru xb’aan lix wankil li Loq’laj Musiq’ej.”

• Maare taawulaq raj chiruheb’ li komon xnawb’al naq moko chixjunileb’ ta li komon re li Iglees ke’xk’ulub’a sa’ junpaat li k’utb’esinb’il na’leb’ wan sa’ li tasal 76. Qayehaq, laj Brigham Young kixye: “Li k’a’ru k’aynaqin wi’ tz’aqal jalan chiru li k’utb’esinb’il matk’ naq xwab’i xb’een sut, naxka’pak’ali tz’aqal rib’ ut naxjali ru li k’a’ru intzolom chaq. Kinye, Oyb’eni. Ink’a’ kintz’eqtaana, a’b’an moko kintaw ta ru.” Kixch’olob’ naq tento “kink’oxla ut kintijok, kiwil ru ut kink’oxla, toj reetal naq kintaw ru chi tz’aqal injunes wib’ ” (sa’ La visión,” Revelaciones en contexto, 150). K’a’ru naqatzol rik’in li k’a’ru kixnumsi a’an li naru nokoxtenq’a naq li Dios tixk’utb’esiheb’ k’a’aq re ru jalan chiru li k’a’ru naqataw ru anajwan? K’a’ru naxk’ut chiqu Tzol’leb’ ut Sumwank 76:5–10, 113–118 chirix chan ru naru naqak’ul “li muqmuukil na’leb’ re li rajom xch’ool” li Dios? (raqal 10).

Tzol’leb’ ut Sumwank 76:50–70, 92–95

Li Dios naraj naq chixjunileb’ li ralal xk’ajol te’saho’q xch’ool sa’ li choxahil awa’b’ejihom rik’in a’an.

• Choq’ reheb’ junjunq kristiaan, maare ch’a’ajaq malaj titz’k xk’oxlankil chixjunil li k’a’ru na’ajman ru re xk’ulb’al li choxahil awa’b’ejihom. K’oxla chan ru naru taatenq’aheb’ li komon chixtawb’al xyo’onihomeb’ “sa’ xk’ab’a’ li Jesus, aj b’aanunel uuchil” (raqal 69). Qayehaq, naru taakanab’eb’ chirilb’aleb’ ru li raqal 50–70 ut 92–95. Kanab’eb’ chixch’olob’ankil chan ru naru neke’xsume anihaq li tixye, “Xyu’aminkil li evangelio sa’eb’ li kutan a’in mas ch’a’aj; ink’a’ ninnaw ma na’ajman ru” malaj “Moko mas chaab’ilin ta choq’ re li choxahil awa’b’ejihom.” K’a’ raj ru naru naqaye re xmusiq’ankil malaj xwaklesinkil xch’ool li kristiaan a’an?

Xchaab’ilob’resinkil li qak’utum

Jayali aawib’ rik’in li Kolonel ut lix tzol’leb’. “Junelik taapatzʼ aawibʼ, “Chan ru naq li kʼaʼru yookin chixkʼutbʼal tixtenqʼahebʼ li komon saʼ lin tzolebʼaal chixnimobʼresinkil lix paabʼaal chirix li Kristo, chixjalbʼalebʼ xkʼaʼuxl, chixbʼaanunkil ut chixpaabʼankil li sumwank rikʼin li Dios, ut chixkʼulbʼal li Santil Musiqʼej?” ” (Li k’utuk jo’ li Kolonel, 20).