Sutq’iik sa’ ochoch, xb’aan laj Yongsung Kim

12–18 julio

Tzolʼlebʼ ut Sumwank 77–80

“Laa’in tink’am eeb’e cheru”

Jultikaq aawe naq eb’ li kok’ k’anjel sa’ li tusleb’ aatin a’in yal tenq’eb’. Naq nakatzol Tzol’leb’ ut Sumwank 77–80 rik’in tijok, li Musiq’ej tatxb’eresi chixnawb’al chan ru naru nakatzoleb’ li komon chi chaab’il.

Tz’iib’a li nakak’oxla

Xkanab’ankileb’ chi wotzok

Maare junjunqeb’ li komon te’ruuq chixwotzb’al lix k’oxlahomeb’ wi nakapatz’ reheb’ chi rub’elaj. Aatinaheb’ junjunqeb’ re a’an wiib’ oxib’ kutan rub’elaj li tzolok re xpatz’b’al reheb’ ma naru te’chalq chi kawresinb’il re xwotzb’al k’a’ruhaq li nawulak chiruheb’ sa’ Tzol’leb’ ut Sumwank 77–80.

Xk’utb’al li tzolʼlebʼ

Tzolʼlebʼ ut Sumwank 77

Li Dios naxk’utb’esiheb’ lix muqmuukil na’leb’ reheb’ li neke’xyal xq’e chixsik’b’al.

• Eb’ li komon naru neke’xwotz li na’leb’ neke’xtaw chirixeb’ li eetalil wankeb’ sa’ li hu Apokalipsis naq neke’xtzol li tasal 77 chiru li xamaan a’in. Li aatinak chirixeb’ li sumehom kixk’ul laj Jose Smith naru natenq’an sa’ li aatinak chirix chan ru naq eb’ li komon naru neke’xsik’ xna’leb’eb’ naq neke’xtzoleb’ li loq’laj hu. K’a’ru naqatzol chirixeb’ li patz’om kiroksi laj Jose Smith? Eb’ li komon maare neke’raj xwotzb’al xnumsihomeb’ b’ar wi’ naq lix patz’omeb’ chirix li evangelio kixtenq’aheb’ chixk’ulb’al xkomon xna’leb’eb’.

Tzol’leb’ ut Sumwank 78:17–19

Li Qaawa’ tixk’am qab’e.

• Re xtikib’ankil li aatinak chirix Tzol’leb’ ut Sumwank 78:17–18, naru taak’ut xjalam-uuch junjunqeb’ li komon sa’ li tzoleb’aal naq toj kok’aleb’ chaq (patz’ reheb’ rub’elaj naq te’xk’am xjalam-uucheb’ sa’ li tzoleb’aal). Kanab’eb’ li komon chixq’ehinkil ani li wan sa’ li junjunq chi jalam-uuch. Eb’ li komon xe’xk’am chaq xjalam-uuch naru neke’aatinak chirix chan ru naq jalaneb’ chalen naq ke’risi chaq li jalam-uuch a’an. Chirix a’an, eb’ li komon naru te’ril ru Tzol’leb’ ut Sumwank 78:17–19 ut te’xtz’ileb’ rix junjunq patz’om jo’eb’ a’in: Chan ru naq chanchano li kok’al choq’ re li Qaawa’? B’ar xcha’al li qawanjik naraj a’an naq chanchanaqo li kok’al (chi’ilmanq Mosiah 3:19), ut b’ar xcha’al li qayu’am naraj naq took’iiq wi’? K’a’ru li na’leb’ naxk’e qe sa’eb’ li raqal a’an re qatenq’ankil chi k’iik?

  Re xteeb’al xk’a’uxleb’ li komon chirix chan ru naq li Qaawa’ naru “naxk’am qab’e chiqu” (raqal 18), naru taawotz li na’leb’ wan sa’ “Xkomon chik li k’anjeleb’aal.”

Tzol’leb’ ut Sumwank 79–80

Li b’oqleb’ re k’anjelak chiru li Dios mas aajel wi’chik chiru li na’ajej b’ar nokok’anjelak.

• Maare wankeb’ kristian sa’ li tzoleb’aal li xe’lukta xch’ool naq xe’xk’ul junaq xb’oqb’al sa’ li teep malaj sa’ li uq’ej, malaj chirix li na’ajej b’ar wi’ ke’b’oqe’ chi k’anjelak jo’ misioneer. Maare junjunqeb’ re a’an neke’raj xwotzb’al lix numsihomeb’. Chan ru naq li na’leb’ naxk’e li Qaawa’ sa’ Tzol’leb’ ut Sumwank 80:3 naru nokoxtenq’a sa’eb’ li hoonal a’an? K’a’ru naraj naxye li ch’ol aatin “maak’a’ na’ajman wi’ ”? K’a’ru naraj naxye li ch’ol aatin “ink’a’ naru nekexsach”? K’a’ru li mas aajel wi’chik ru choq’ re li Qaawa’ chirix li qab’oqb’al? Maare usaq raj rilb’al lix k’oxlahom li Elder David A. Bednar chirix li tasal 80 li natawman sa’ li raatin “B’oqb’il sa’ li k’anjel” (Jolomil ch’utub’aj-ib’ re mayo 2017).

• Eb’ li k’utb’esinb’il na’leb’ li neke’tawman sa’eb’ li tasal 79 ut 80 ke’k’eeman choq’ reheb’ li kristiaan b’oqb’ileb’ chixjultikankil li evangelio, a’b’an wankeb’ na’leb’ chi sa’ li naru neke’k’anjelak qe chiqajunil naq nokok’anjelak chiru li Qaawa’. Re xtenq’ankileb’ li komon chixtawb’aleb’ li na’leb’ a’an, naru taakanab’eb’ chixk’oxlankil naq wan jun ramiiweb’ li toje’ x’ok chaq sa’ li Iglees ut toje’ xk’ul jun xb’oqb’al. Kanab’eb’ li komon chixtz’iib’ankil jun hu re xwaklesinkil xch’ool ut xk’eeb’al xna’leb’, ut kanab’eb’ chiroksinkileb’ ch’ol aatin wankeb’ sa’ li tasal 79 ut 80. Chirix a’an, junjunq reheb’ li komon naru te’xwotz li k’a’ru xe’xtz’iib’a.

  

  Li Qaawa’ nasaho’ xch’ool naq nokok’anjelak chiru a’an ut chiruheb’ li qas qiitz’in.

Xkomon chik li k’anjeleb’aal

Li Qaawa’ tooxb’eresi rik’in li Santil Musiq’ej.

Li Awa’b’ej Henry B. Eyring kixwotz jun xnumsihom b’ar wi’ kitijok re xk’ulb’al xb’eresinkil sa’ jun li sik’ok-u aajel ru ut kixtzol b’eresiik xb’aan li Qaawa’:

“Kintijok, a’b’an chiru k’iila hoor moko kink’ul ta insumenkil. B’ayaq chik ma nasaqew, kichal jun week’ahom. Mas wi’chik chiru naq toj ka’ch’inin chaq, kiweek’a naq chanchanin jun ch’ina al. Li waam ut lin k’a’uxl ke’k’ojla. Kiweek’a tuqtuukilal sa’ lin ch’ool.

“Kisach b’ayaq inch’ool naq kintaw wib’ chi tijok chi jo’ka’in:, “At inChoxahil Yuwa’, maak’a’ na’ajman wi’ li k’a’ru nawaj. Maak’a’ chik na’ajman re li nawaj. Ka’ajwi’ nawaj naq taab’aanumanq laa wajom. Ka’ajwi’ nawaj a’an. B’aanu usilal, ye we li k’a’ru tento tinb’aanu.”

“Sa’ li hoonal a’an, kich’ana inch’ool jo’ maajun wa week’ahom chaq. Ut kink’ul li esil ut kinnaw chi tz’aqal b’ar nachal chaq. Kinnaw chi saqen ru li k’a’ru tento tinb’aaanu. Moko kink’ul ta junaq yeechi’ihom xb’aan a’an. Ka’ajwi’ lin nawom chirix naq laa’in jun ch’ina al li kiyeeman re b’ar wan li b’e nak’amok b’ar wi’ li Qaawa’ naraj naq tinxik” (“Como un niño,” Liahona, mayo 2006, 16).

Xchaab’ilob’resinkil li qak’utum

Oksiheb’ li loq’laj hu xb’een wa. Xb’een wa chiru xsik’b’al jalan chik li hu, tzoleb’ ut tz’ileb’ rix chi yalb’il aaq’e li loq’laj hu. Wi nakab’aanu, li Musiq’ej taaruuq tatxtenq’a chixjultikankil li k’a’ru xatzol naq yookat chi k’utuk (chi’ilmanq Li k’utuk jo’ li Kolonel, 12).