“Tebetembwa 6–12. Reirei ao Berita aika Tabu 98–101: ‘Tiiku n Rau ao n Ataia bwa Ngai te Atua,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Tebetembwa 6–12. Reirei ao Berita aika Tabu 98–101,” Nakomai, Iriirai—Ibukin te Reirei n Tabati: 2021
C. C. A. Christensen (1831–1912), Saints Driven from Jackson County Missouri, c. 1878, tempera on muslin, 77 ¼ × 113 inches. Brigham Young University Museum of Art, bwaintangira mairouia tibun C. C. A. Christensen aika ataei, 1970
Tebetembwa 6–12
Reirei ao Berita aika Tabu 98–101
“Tiiku n Rau ao n Ataia bwa Ngai te Atua”
Tera taian kakaewenako ke kakatai ae a rinanona kaain am kiraati? Tera taian reirei ao taeka ni karaunano man Reirei ao Berita aika Tabu 98–101 ae e kona ni buokiia?
Korei Am Namakin
Kaungaa te Tibwatibwa
Ko kona ni kaoiia kaain te kiraati bwa a na tibwa te bwai are a reiakina man Reirei ao Berita aika Tabu 98–101 are e buokiia man kakatai ke kakaewenako ake a tia ni kaitarai.
Reirei te Reirei
Reirei ao Berita aika Tabu 98:1–3, 11–16, 23–30, 37; 101:2–5, 9–16
Bwaai ni kabane a na kaai ni mwakuri ibukin ae raoiroi ibukira.
-
Bwainikirinakira ke kakaitara ake ti kaitarai n taai aikai tao a na bae ni kaokoro ma ake a kaitarai Aika Itiaki i Missouri n 1833, ma ana taeka n reirei te Uea n Reirei ao Berita aika Tabu 98 e bon kaineti naba nakoira. Ni buokiia kaain te kiraati n reiakinaki man te taeka n reirei aio, iangoia ni korei iaon te burakibooti titiraki aikai: N te aro raa ae te Uea e tangiriia Ana Aomata bwa a na taraa te kakaitara nakoia? Tera aron ara kaeka ae e tangiria te Uea bwa ti na kaeka iai nakon te bwainikirinaki? A kona kaain te kiraati ni mwakuri n aia kurubu ae e uarereke ni kakaea kaekaana n Reirei ao Berita aika Tabu 98:1–3, 11–16, 23–30 ao ngkanne maroroakinna bwa tera are a kunea. Tera koaua aika ti reiakin aika a kona ni buokiira n riki bwa taan irira raoi Iesu Kristo? Te rongorongo inanon “Bwaai n Ibuobuoki Riki Tabeua” e kona ni karekei riki iango nakon te marooro aei.
-
Inanon tain te bwainikirinaki ke te kataaki, te rongorongo man mwakoro 98 ao 101 e kona ni ibuobuoki: e na buokiira te Uea ngkana ti anga nanora bwa ti na Kakoauaa. Ni buokiia kaain te kiraati ni kunea te rongorongo aei ko kona ni korei ni karinanii kiibu aikai iaon te burakibooti ao kaoiia kaain te kiraati bwa a na rinei tabeua ni warekii: Reirei ao Berita aika Tabu 98:1–3, 11–12, 37; 101:2–5, 9–16. Tuangiia bwa a na tibwa te bwai are a kunea are e kakorakoraia bwa a na onimakina te Uea. Tera ae e reirei kiibu aikai bwa e kanga aron ae ti na kaki ara onimaki iroun te Uea? (Taraa naba Linda S. Reeves, “Claim the Blessings of Your Covenants,” Ensign ke Riaona, Nobembwa 2013, 118–20.)
Reirei Ao Berita aika Tabu 101:1–8, 43–62
Irakin ana taeka n reirei te Atua e buokiira ni kamanoira.
-
Ko na kanga ni buokiia kaain te kiraati ni kinaa te kamanomano are e roko ngkae ti “ongo bwanaan te Uea”? (kibu 7). Tao ko kona ni kaoiia tabeman kaain te kiraati ni karaoa te kaotioti iaon te kaikonaki inanon Reirei ao Berita aika Tabu 101:43–62 ngkae temanna kaain te kiraati e warekia ni kabaibati. Ko kona ngkanne ni maroroakin titiraki n aron aikai: Tao e na tera ae e tei ibukin bwaai aika a kakaokoro inanon te kaikonaki aei? Tera ae e karika te toro bwa e na bua te onaroka mai irouna? Tera ae ti reiakinna man te bwai are e karaoia te toro? Tera ae ti reiakinna ibukin te Uea man ana mwakuri te aomata ae kakanato? E na ibuobuoki naba ngkana e kabotauaki kiibu 1–8 ma kiibu 47–51 ao marooroakinna bwa ti na kanga n riki ni “kakaonimaki ao ni wanawana” n ara kekeiaki ni katea Tion inanon maiura n tatabemaniira, inanon mweengara, ao n te Ekaretia.
TamneiIesu KristoKabwarabwara man Kristo ao te Ataeinimwaane ae te Kaubwai, iroun Heinrich Hofmann
Bwaai n Ibuobuoki Riki Tabeua
Ni manga anga tabam are teuana e anaa te ninikoria ni Kiritian.
E reirei Unimwaane Robert D. Hales:
“Tabeman aomata a kairua n aia iango ae te kaeka n aki kakarongoa, te nimamanei, te kakabwarabure, ao kaotan te koaua ae mangori bon kaotan te n taninganinga ke te aki konabwai. Ma ‘tangiraia [ara] kairiribai, ao ni kakabwaiaia akana taetae buaka[ira], ao karaoan ae raoiroi nakoia naake a ribai[ra], ao tataro ibukiia akana a bwainikirin[ira]’ (Mataio 5:44) e anaa te onimaki, te korakora, ao, ae e moamoa riki, te ninikoria ni Kiritian. …
“Ngkana ti aki kaboa mwiin kaira—ngkana ti anga tabara are teuana ao n totokoa te namakin n uun—ngaira naba ti tei ma te Tia Kamaiu. Ti kaotaa nako Ana tangira, are bon ti ngaia te mwaaka are e kona n taobaraa te tia kairiribai ao ni kaekaia naake a ribaira n aki manga ribaiia. Aio e aki kaota te mamara. Anne bon te ninikoria ni Kiritian” (“Christian Courage: The Price of Discipleship,” Ensign ke Riaona, Nobembwa 2008, 72).
Te kabwarabure tiaki tarariaoan te bwai are e karaoaki.
E taku Unimwaane Kevin R. Duncan: Tariu ao mwaneu, taiaoka tai kamangaoa ami atatai. Te kabwarabure tiaki tarariaoan te bwai are e karaoaki. Ti aki butimwaai kabwarabwaraan katei aika buakaka ke ni kariaia tabeman bwa a na kateibuaka nakoira ibukin aia kangaanga, marakiia, ke mamaraia. Ma ti kona ni karekei atatai aika korakora ao te rau ngkana ti taraia man te taratara ae rababa riki. … Te kakabwarabure bon te reirei ni kamaiu ae mimotong. Ti aki kainnanoia bwa ti na rootaki uoua te tai. Ti kona ni kabwarabure” (“The Healing Ointment of Forgiveness,” Ensign ke Riaona, Meei 2016, 35).
Kanakoraoan Ara Anga reirei
Kairekerekeia te koraki ake a rinanon te kaangaanga. N tabetai kaain te kiraati ake a rinanon te kaangaanga a ti tangira kairakiia bwa aonga n namakina ae a tangiraki. Iangoia n tuangiia bwa a na butimwaea bukinaia inanon te reirei ae e na roko, kaoiia nakon te kiraati ke taraia bwa e na reke baoia nakon te taromauri. Tai bwaranano ngkana a aki kaeka inanon am moan tai ni karaoia (taraa Reirei n Ana Kawai te Tia Kamaiu, 8–9).