Dagiti Santo nga agtartaray nga umadayo iti grupo a mangriribuk

C. C. A. Christensen (1831–1912), Dagiti Santo a Napapanaw manipud iti Jackson County Missouri, c. 1878, tempera on muslin, 77 ¼ × 113 pulgada. Brigham Young University Museum of Art, sagut dagiti appoko ni C. C. A. Christensen, 1970

Septiembre 6–12

Doktrina ken Katulagan 98–101

“Agtalnakayo ket Ammuenyo a Siak ti Dios”

Ania dagiti kita ti karit wenno pannubok a pagpaspasaran dagiti miembro ti klasem? Ania dagiti balikas a pangbalakad ken pangliwliwa iti Doktrina ken Katulagan 98:–101 a makatulong kadakuada?

Isuratmo dagiti Impresionmo

icon iti panagbibinninglay

Yawis ti Panagbibinninglay

Nalabit a makaibinglay dagiti miembro ti klase iti maysa a banag a nasarakanda manipud iti Doktrina ken Katulagan 98–101 a mangtulong kadakuada iti pannubok wenno karit a pakaipaspasanguanda.

icon iti panangisuro

Isuro ti Doktrina

Doktrina ken Katulagan 98:1–3, 11–16, 23–30, 37; 101:2–5, 9–16

Mabalin nga agkaykaysa dagiti pannuboktayo para iti pagimbagantayo.

• Ti pannakaidadanes wenno oposision a pakaipaspasanguantayo ita ket mabalin a maigidiat iti nakaipasanguan dagiti Santo iti Missouri idi 1833, ngem ti balakad ti Apo iti Doktrina ken Katulagan 98 ket maar-aramat pay laeng. Tapno matulongan dagiti miembro ti klase a masursuruan manipud iti daytoy a balakad, ibilangmo ti panangisurat kadagiti saludsod kas iti sumaganad iti pisarra: Iti ania a wagwagas a kayat ti Apo a panangibilang dagiti Santo iti oposision? Kasano ti kayat ti Apo a panagrespondetayo iti pannakaidadanes? Mabalin nga agtrabaho dagiti miembro ti klase iti babassit a grupo tapno mangsapul kadagiti sungbat iti Doktrina ken Katulagan 98:1–3, 11–16, 23–30 ket kalpasanna ilawlawag no ania ti masursuroda. Ania dagiti kinapudno a masursurotayo a makatulong kadatayo nga agbalin a nasaysayaat a disipulo ni Jesucristo? Mabalin a makanayon iti daytoy a panaglilinnawag dagiti palawag iti “Dagiti Nainayon a Resources.”

• Iti panawen ti pannakaidadanes wenno pannubok, daytoy a mensahe manipud kadagiti benneg 98 ken 101 ti makatulong: tulongannatayto ti Apo no natallugodtayo nga agtalek Kenkuana. Tapno matulongan dagiti miembro ti klase a mangsapul iti daytoy a mensahe, mabalinmo nga isurat ti sumaganad a listaan dagiti bersikulo iti pisarra ket awisem dagiti miembro ti klase a mangpili iti sumagmamano a basaenda: Doktrina ken Katulagan 98:1–3, 11–12, 37; 101:2–5, 9–16. Kiddawem kadakuada nga ibinglayda no ania ti masarakanda a mangallukoy kadakuada nga agtalek iti Apo. Ania ti isuro dagitoy a bersikulo maipapan no kasano nga itedtayo ti panagtalektayo iti Apo? (Kitaen met iti Linda S. Reeves, “Claim the Blessings of Your Covenants,” Ensign wenno Liahona, Nob. 2013, 118–20.)

Doktrina ken Katulagan 101:1–8, 43–62

Ti panangsurot iti balakad iti Apo ket makatulong nga agtalinaedtayo a natalged.

• Kasano a matulongam dagiti miembro ti klase a mangilasin iti talged a sumangbay no “dumngegtayo iti timek ti Apo”? (bersikulo 7). Nalabit a mabalinmo nga awisen ti sumagmamano a miembro ti klase a mangyakem iti pangngarig iti Doktrina ken Katulagan 101:43–62 bayat ti panangbasa iti napigsa ti sabali pay a miembro ti klase iti daytoy. Kalpasanna mabalinyo a paglilinnawagan dagiti saludsod kas kadagitoy: Ania dagiti mabalin a nadumaduma nga elemento nga ibagi ti pangngarig? Ania ti gapu a napukaw dagiti katulongan ti bangkag? Ania dagiti adalen a masursurotayo manipud kadagiti aramid dagiti katulongan? Ania ti masursurotayo maipapan iti Apo manipud kadagiti aramid ti natakneng a tao? Mabalin pay a makatulong nga idasig dagiti bersikulo 1–8 kadagiti bersikulo 47–51 ket paglilinnawagan no kasano a makapagbalintayo a “napudno ken masirib” kadagiti panagkagumaantayo a mangbangon iti Zion iti bukodtayo a biag, kadagiti pagtaengantayo, ken kas maysa a Simbaan.

  Jesucristo

  Detalye manipud iti Ni Cristo ken ti Nabaknang nga Agtutubo nga Agturay, ni Heinrich Hofmann

dagiti nainayon a resources icon

Dagiti Nainayon a Resources

Agkasapulan iti nakristianuan a tured ti panangpatungpa iti sabali pay a pingping.

Insuro ni Elder Robert D. Hales:

“Sibibiddut nga ipagarup ti sumagmamano a tao a nakapuy wenno nakapsut dagiti panagresponde kas iti panagulimek, kinaemma, kinamanagpakawan, ken panangiburay iti napakumbaba a pammaneknek. Ngem ti,‘ayaten[tayo] dagiti kabusor[tayo], bendisionan[tayo] ida a mangilunod kada[tayo], ken agaramid[tayo] iti naimbag kadagiti manggurgura kada[tayo] ket ikarkararagan[tayo] dagiti mangidadanes [kadatayo]’ (Mateo 5:44) agkasapulan iti pammati, pigsa, ken kangrunaan iti amin, nakristianuan a tured. …

“No saantayo nga agibales—no ipatungpatayo ti sabali pay a pingping ket saantayo a gumurgura—makipagtakdertayo pay iti Mangisalakan. Ipakitatayo ti ayatna, a daytoy ti kakaisuna a bileg a mabalin a mangparmek iti kabusor ken mangsungbat kadagiti mamabpabasol kadatayo a saantayo a mangpabpabasol kadakuada kas supapak. Saan a pagkapsutan dayta. Dayta ti nakristianuan a tured” (“Christian Courage: The Price of Discipleship,” Ensign wenno Liahona, Nob. 2008, 72).

Ti mamakawan ket saan a pananganamong iti aramid ti tao.

Kinuna ni Elder Kevin R. Duncan: “Kakabsat, saanyo koma a di maawatan daytoy. Ti mamakawan ket saan a pananganamong iti aramid ti tao. Ditayo irasonan ti dakes nga ugali wenno palugodan dagiti dadduma a mangtrato kadatayo iti dakes gapu kadagiti panagkarigatan, pagsaeman, wenno pagkapsutanda. Ngem mabalintayo a gun-oden ti dakdakkel a pannakaawat ken kappia no kitaentayo nga addaan iti nalawlawa a pannirigan. Ti panangpakawan ket nagloriaan, ken pagpaimbag a prinsipio. Saantayo a kasapulan ti agbalin a biktima iti mamindua. Mabalintayo ti mamakawan” (“The Healing Ointment of Forgiveness,” Ensign wenno Liahona, Mayo 2016, 35).

Panangpadur-as iti Panangisurotayo

Iramanmo dagiti tao nga agkarkarigatan. No dadduma kasapulan laeng dagiti mangikarkarigatan a miembro ti klase a maibilangda tapno mariknada a maipatpategda. Ibilang ti panangidawat kadakuada nga umawat iti naidutok nga aramiden iti umay nga adalen, a mangaw-awis kadakuada iti klase, wenno panangsigurado nga adda pamuspusanda tapno makapan iti simbaan. Saanka a sumuko no saanda nga agresponde kadagiti panagkagumaanmo iti damo (kitaen iti Panangisuro iti Wagas ti Mangisalakan, 8–9).