lallaki nga addaan karison

C. C. A. Christensen (1831–1912), Kampo ti Zion, c. 1878, tempera on muslin, 78 × 114 inches. Brigham Young University Museum of Art, sagut dagiti appoko ni C. C. A. Christensen, 1970

Septiembre 13–19

Doktrina ken Katulagan 102–105

“Kalpasan ti Adu a Panagtutuok … Umay ti Bendision”

Bayat ti panagsaganam a mangisuro iti Doktrina ken Katulagan 102–5, dumngeg kadagiti pannignay ti Espiritu. Mabalin nga iturongnaka kadagiti prinsipio a saan a nadakamat iti daytoy a balabala a mangbendisionto kadagiti tao a sursuruam.

Isuratmo dagiti Impresionmo

icon iti panagbibinninglay

Yawis ti Panagbibinninglay

Mabalin nga isurat dagiti miembro ti klase ti maysa wenno dua a bersikulo manipud iti Doktrina ken Katulagan 102–5 a masarakanda a napateg iti bukodda. Kalpasanna mabalinda ti makisinnukat iti bersikulo iti sabali a miembro ti klase ket paglilinnawagan iti tunggal maysa no ania ti nasursuroda manipud kadagitoy a bersikulo.

icon iti panangisuro

Isuro ti Doktrina

Doktrina ken Katulagan 103; 105

Dagiti pannuboktayo ti mangisuro kadatayo kadagiti napapateg a leksion ken mangtedda kadatayo iti padas.

• Bayat ti panagadal dagiti miembro ti klase kadagiti benneg 103 ken 105 iti daytoy a lawas, mabalin a nasarakanda dagiti prinsipio a makatulong kadatayo bayat dagiti panawen ti pannubok wenno oposision, paibinglay kadakuada no ania ti nasarakanda. Wenno mabalinmo ida nga awisen a mangsapul kadagiti kasta a prinsipio iti Doktrina ken Katulagan 103:5–7, 12, 36; 105:5–6, 9–12, 18–19 (kitaen met iti “Dagiti Nainayon a Resources”). Ania ti isingasing dagitoy a bersikulo maipapan iti no kasano a makapagrespondetayo no maipasango iti kinarigat? wenno pannakaupay? Mabalin nga agtallugod dagiti miembro ti klase a mangibinglay iti padpadas a pakaisangbayan dagiti bendision “kalpasan ti adu a panagtutuok” (Doktrina ken Katulagan 103:12).

• No mariknam a makatulong ti sumagmamano a pagtaudan ti pakasaritaan wenno personal a pakaammuan maipapan iti Kampo ti Zion, mabalinmo ti mangawis iti maysa a tao a mangrebyu iti maysa kadagiti sumaganad a resources sakbay ti klase ket mangibinglay biit no ania ti masursuroda: Saints, 1:194–206; “The Acceptable Offering of Zion’s Camp” (Revelations in Context, 213–18); wenno “Voices of the Restoration: Zion’s Camp” (iti balabala iti daytoy a lawas Umaykayo, Sumurot Kaniak—Para kadagiti Indibidual ken Pamilia). No makapagdaliasattayo nga agsubli ita ket makasarita ti Kampo ti Zion, ania koma ti mabalin nga isaotayo a mangparegta kadakuada? Ania koma ti mabalin nga isaoda a mangparegta kadatayo?

  bassit a karayan

  Nagtalinaed ti Kampo ti Zion iti igid ti Little Fishing River, a nailadawan ditoy.

Doktrina ken Katulagan 104:11–18

Tunggal maysa kadatayo ket “agaywan kadagiti naindagaan a bendision.”

• Tapno matulongan dagiti miembro ti klase a mangaramat iti biagda dagiti pannursuro iti Doktrina ken Katulagan 104:11–18, mabalinmo nga awisen ida a mangipapan a mapanda mangitalek iti maysa a napateg a banag iti panangaywan ti sabali a tao. Ania koma ti isaoda iti dayta a tao? Ania koma ti namnamaenda kenkuana? Kalpasanna mabalin a basaen dagiti miembro ti klase ti Doktrina ken Katulagan 11–18 tapno takuaten no ania ti intalek ti Apo iti panangaywantayo ken no ania ti namnamaenna kadatayo. Kasano a mabalin nga apektuan dagitoy a bersikulo ti wagas a panagpanunottayo maipapan iti lubong, dagiti bendisiontayo, wenno dagiti tao iti aglawlawtayo?

• Tapno matulongan a maipaawat a nasaysayaat kadagiti miembro ti klase “ti wagas … ti Apo [nga] impaulog[na] a mangted iti kasapulan dagiti santo[na]” (Doktrina ken Katulagan 104:16), ibilang ti panangipabuya iti video “The Labor of His Hands” (ChurchofJesusChrist.org). Maibatay iti masursurotayo manipud iti a daytoy video ken Doktrina ken Katulagan 104:11–18, ania ti wagas ti Apo iti panangted iti kasapulan dagiti Santona? Mabalinmo pay nga ibinglay daytoy a palawag ni Presidente Marion G. Romney: “Ti Apo … maaywananna dagiti [napanglaw] nga awan tulongtayo no daytoy ti panggepna nga aramiden a kasta. … Ngem kasapulantayo daytoy a padas; gapu ta babaen laeng ti panagsursurotayo no kasano nga aywanantayo ti tunggal maysa a mapadur-astayo iti kaunggantayo ti ayat a kas ken ni Cristo ken ti ayo a kasapulan a mangpaikari kadatayo nga agsubli iti sidongna” (“Living Welfare Principles,” Ensign, Nob. 1981, 92). Ikkam dagiti miembro ti klase iti sumagmamano a minuto a mangisurat kadagiti impresionda maipapan no kasano a makatulongda a mangted kasapulan dagiti dadduma iti wagas ti Apo.

dagiti nainayon a resources icon

Dagiti Nainayon a Resources

Ti pangpatarnaw a bileg dagiti pannubok.

Insuro ni Elder Orson F. Whitney: “Awan ti saem a sagabaentayo, awan ti pannubok a pagpasarantayo ti masayang. Daytoy ti makatulong iti edukasiontayo, iti pannakapadur-as dagiti kasta a kababalin kas panaganus, pammati, kinatibker ken panagpakumbaba. Amin a sagabaentayo ken amin nga ibturantayo, nangnangruna no ibturantayo daytoy a siaanus, mangsukog kadagiti kinataotayo, mangpatarnaw kadagiti pusotayo, mangpadakkel kadagiti kararuatayo, ken mamagbalin kadatayo a nadungdungngo ken ad-adda a managparabur, ad-adda a maikari a maawagan nga annak ti Dios … ken babaen iti panagladingit ken panagsagaba, panagbannog ken panagtutuok, a magun-odtayo ti edukasion nga immayantayo ditoy tapno gun-oden ken mamagbalinto kadatayo nga ad-adda a kas iti Ama ken Inatayo iti langit” (iti Spencer W. Kimball, Faith Precedes the Miracle [1972], 98).

Kinuna ni Elder David A. Bednar: “Iti maysa a punto iti tunggal biagtayo, maawistayonto nga agmartsa iti bukodtayo a Kampo iti Zion. Agdudumanto ti oras dagiti awis, aggigiddiatto dagiti naipangpangruna a lapped a mabalin a masarangettayo iti panagdaliasat. Ngem ti agdama ken di agbalbaliw a sungbattayo iti daytoy saan a maliklikan nga awag ket mangtedto iti kamaudianan iti sungbat iti saludsod ‘Asino ti adda iti sibay ti Apo?’” (“On the Lord’s Side: Lessons from Zion’s Camp,” Ensign, Hulio 2017, 35).

Panangpadur-as iti Panangisurotayo

Makitinnulongka kadagiti miembro ti pamilia. Gapu ta ti pagtaengan ti sentro ti panagbiag ken pagsursuruan iti ebanghelio, dagiti panagkagumaanam a mangpatibker iti maysa a miembro ti klase ket agbalinto a kasamayan no makitinnulongka kadagiti … miembro ti pamilia[na]” (Panangisuro iti Wagas ti Mangisalakan, 8–9).