Septiembre 20–26

Doktrina ken Katulagan 106–108

“Tapno Maluktan ti Langit”

Bayat ti panangbasam iti Doktrina ken Katulagan 106–8, ibilangmo dagiti naespirituan a padas a mabalin nga adda kadagiti miembro ti klasem bayat ti panagadalda kadagitoy a benneg. Bayat ti panagsaganam a mangisuro kadakuada, mabalin a makatulong nga ammuen no ania ti nasarakanda a napateg sakbay ti panagkikitayo.

Isuratmo dagiti Impresionmo

Yawis ti Panagbibinninglay

Awisem dagiti miembro ti klase a mangibinglay iti maysa a bersikulo manipud kadagitoy a benneg a mangisuro iti prinsipio a mabalin a mangpapigsa iti maysa a tao iti serbisioda iti Simbaan.

Isuro ti Doktrina

Doktrina ken Katulagan 106; 108

Iturong, paregtaen, ken suportaran ti Apo dagiti awaganna nga agserbi.

• Idi inadal dagiti miembro ti klase ti Doktrina ken Katulagan 106 ken 108 iti daytoy a lawas, mabalin a nasarakanda dagiti ragup ti balikas a nakatulong kadagiti agserserbi kadagiti takem iti Simbaan (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia)). Ibilang ti panangted kadagiti miembro ti klase iti gundaway a mangisurat kadagiti ragup ti balikas a nasarakanda kadagitoy a benneg iti pisarra ken panangidawat kadakuada a mangibinglay kadagiti nalawag a pannakaammo ken pannakaawatda. Ania dagiti padas a napasaranda a mainaig wenno mangipakita kadagitoy a nalawag a pannakaammo ken pannakaawat?

Doktrina ken Katulagan 107

Idauluan ti Apo ti Simbaanna babaen iti turay ti priesthood.

• Mabalinmo nga irugi ti panaglilinnawag maipapan kadagiti saad ti priesthood babaen ti panangawis iti klase a mangilista kadagiti gapu a pangtedan ti Apo kadatayo kadagiti propeta, apostol, ken dadduma pay a lider ti Simbaan. Nalabit a mabalin nga inayon dagiti miembro ti klase iti listaanda kalpasan ti panangbasada iti Doktrina ken Katulagan 107:18–20. Kalpasanna mabalinmo a bubosen ti oras a panangrebyu kadagiti pagrebbengan nga ited ti Apo kadagiti agig-iggem kadagiti sumaganad a saad: ti Umuna a Panguluen (dagiti bersikulo 9, 21–22, 65–66, 91–92), ti Sangapulo-ket-dua nga Aposttol (dagiti bersikulo 23–24, 33–35, 38, 58), ti Pitupulo (dagiti bersikulo 25–26, 34, 93–97), ken dagiti bishop (dagiti bersikulo 13–17, 68–76, 87–88). Ania ti maaramidtayo tapno maitandudotayo dagiti lidertayo babaen ti “panagtalek, pammati, ken [kar]kararag[tayo]”? (bersikulo 22).

• Kasano koma a sumungbattayo no agsaludsod ti maysa a gayyem a saantayo a kapada iti pammati, “Ania ti priesthood?” wenno “Ania dagiti tulbek ti priesthood?” Kasano a maapektuan dagiti pannursuro iti “Dagiti Mainayon a Resources” dagiti sungbattayo? Nalabit a masarakan pay dagiti miembro ti klase dagiti makatulong a nalawag a pannakaammo ken pannakaawat iti Doktrina ken Katulagan 107:1–4, 18–20 (kitaen met iti Napudno iti Pammati, 124–28). Kasano a tulongannatayo ti priesthood nga umawat kadagiti “kinadatdatlag ti pagarian” ken “maluktan ti langit [kadatayo]”? Kasano a tulongannatayo daytoy a “sagrapen ti pannakikaysa ken ti kaadda ti Dios nga Ama”? (bersikulo 19).

Doktrina ken Katulagan 107:27–31, 85

Iturayan ti Apo ti pagarianna babaen kadagiti konseho.

• Kinuna ni Presidente M. Russell Ballard, “Ammok a dagiti konseho ti wagas ti Apo ken pinarsuana ti amin a banag iti lubong babaen ti nailangitan a konseho” (“Family Councils,” Ensign wenno Liahona, Mayo 2016, 63). Kasano a matulonganyo dagiti sursuruanyo a makaawat no kasano ti aggiinnuman iti pagtaengan ken iti simbaan? Nalabit a mabalinmo nga idawat iti sumagmamano a miembro nga umay a nakasagana a mangibinglay kadagiti padasda iti simbaan wenno iti pagtaengan a nangyaplikaranda kadagiti prinsipio ti panagbalakad iti Doktrina ken Katulagan 107:27–31, 85 (wenno iti mensahe ni Presidente Ballard a naibasar iti ngato). Ibilang ti panangawis kadagiti miembro ti klase kabayatan ti lawas nga umayda a nakasagana a mangibinglay kadagiti kapanunotan maipapan iti no ania ti mamagbalin a nasamay iti maysa a konseho. Allukoyem dagiti miembro ti klase a mangilasin kadagiti prinsipio a masursuroda manipud iti daytoy a panaglilinnawag a mangtulongto kadakuada nga agbalin a nasamsamay bayat ti pannakiramanda iti masakbayan a pagtaengan ken kadagiti konseho iti simbaan.

  

  Ti panaggiinnuman ti maysa a wagas a pangileppasan ti Apo iti aramidna.

Dagiti Nainayon a Resources

Turay ti priesthood.

Insuro ni Presidente Dallin H. Oaks:

“Ditayo nasanay iti panangisarita maipapan kadagiti babbai nga addaan iti turay ti priesthood kadagiti takemda iti Simbaan, ngem ania a sabali a turay koma daytoy? No ti maysa a babai—agtutubo wenno nataengan—ket mai-set apart a mangikasaba iti ebanghelio kas maysa a full-time missionary, maikkan isuna iti turay ti priesthood a mangaramid iti pagrebbengan iti priesthood. Kasta met a no mai-set apart ti maysa a babai tapno agtrabaho kas maysa nga officer wenno mannursuro iti organisasion ti Simbaan iti babaen ti direksion ti maysa nga agig-iggem kadagiti tulbek ti priesthood. Asino man nga agtrabaho iti maysa a saad wenno takem nga immawat manipud iti maysa nga agig-iggem kadagiti tulbek ti priesthood ket aramatenna ti turay ti priesthood iti panangaramidna kadagiti naidutok a pagebbenganna” (“The Keys and Authority of the Priesthood,” Ensign wenno Liahona, Mayo 2014, 51).

Kinuna ni Presidente M. Russell Ballard:

“Managparabur ti Amatayo iti Langit iti bilegna. “Amin a lallaki ken amin a babbai ket makaala iti daytoy a bileg para iti tulong iti panagbiagda. Amin a nagaramid kadagiti sagrado a katulagan iti Apo ken mangdayaw kadagita a katulagan ket maikari nga umawat iti personal a paltiing, tapno mabendisionan iti panagserserbi dagiti anghel, tapno makisarita iti Dios, tapno umawat iti pakabuklan ti ebanghelio, ken, kangrunaanna, tapno agbalin nga agtawid kas ken ni Jesucristo iti amin nga adda iti Amatayo” (“Men and Women in the Work of the Lord,” New Era, Abr. 2014, 4–5).

Panangpadur-as iti Panangisurotayo

Tulongam dagiti sursuruam nga agpipinnaregta iti tunggal maysa. “Tunggal tao iti klasem ket nabaknang a paggapuan ti pammaneknek, nalawag a pannakaammo ken pannakaawat, ken padpadas iti panagbiag iti ebanghelio. Awisem ida nga agbibinninglay ken agpipinnaregta iti tunggal maysa” (Panangisuro iti Wagas ti Mangisalakan, 5).