Templo iti Kirtland

Templo iti Kirtland, ni Jon McNaughton

Septiembre 27–Oktubre 3

Doktrina ken Katulagan 109–110

“Balaymo Daytoy, ti Lugar ti Kinasantom”

Dagiti Benneg 109 ken 110 mangiladawan iti sumagmamano kadagiti kasagraduan a pasamak ti Pannakaisubli. Penken a pangibinglayen dagiti miembro ti klase no ania iti panagkuna ken nariknada idi adalenda dagitoy a pasamak.

Isuratmo dagiti Impresionmo

icon iti panagbibinninglay

Yawis ti Panagbibinninglay

Impakdaar ti Apo nga “agsaknapto kadagiti ganggannaet a daga ti kinalatak daytoy a balay [ti Templo iti Kirtland]” (Doktrina ken Katulagan 110:10). Mabalinmo nga awisen dagiti miembro ti klase a mangibinglay iti maysa a banag a nasarakanda iti panagadalda a mariknada a nasken nga agsaknap kadagiti tao iti aglawlaw ti lubong.

icon iti panangisuro

Isuro ti Doktrina

Doktrina ken Katulagan 109; 110:1–10

Kayat ti Apo a bendisionannatayo iti nasantuan a balayna.

• Ti panagadal iti benneg 109 ket napintas a gundaway a pangtulong kadagiti miembro ti klase a mangpapigsa iti tarigagayda nga agdaydayaw iti templo. Mabalinda nga isurat iti pisarra dagiti numero ti sumagmamano a bersikulo a mangdakamat kadagiti bendision ti templo—kas dagiti bersikulo 12–13, 22–23, 24–28, 29–32. Mabalin a pumili dagiti miembro ti klase kadagiti bersikulo a basaen ken utobenda, saggaysa wenno kada grupo, ket kalpasanna gupgopen para iti klase ti bendision nga iladawan dagita a bersikulo. Mabalin nga ibinglay dagiti miembro a nakapanen iti templo no kasano a napadasandan dagitoy a bendision iti biagda.

  Mabalinyo pay a basaen wenno kantaen nga aggigiddan ti “The Spirit of God” (Hymns, no. 2), a nakanta iti dedikasion ti Templo iti Kirtland. Mabalin nga ilawlawag dagiti miembro ti klase dagiti bendision ti templo a nailadawan iti himno ket ibinglay dagiti ania man a mainaig a padas nga adda kadakuada, no maitutop.

• Ti panangawat kadagiti bendision iti templo ket agkasapulan iti sakripisio. Ania ti isuro ti Doktrina ken Katulagan 109:5 maipapan kadagiti sakripisio nga inaramid dagiti nagkauna a Santo a mangbangon iti Templo iti Kirtland? Nalabit a mabalin nga umay a nakasagana ti maysa a tao tapno agsarita maipapan kadagitoy a sakripisio (kitaen iti “A House for Our God,” Revelations in Context, 169–71). Ania dagiti sakripisio nga aramidentayo tapno umawat kadagiti bendision iti templo iti agdama? Nalabit nga agtallugod dagiti miembro ti klase a mangibinglay kadagiti padasda. Masarakan dagiti sumagmamano a moderno a pagarigan kadagiti video “Sealed Together: The Manaus Temple Caravan” ken “Temples Are a Beacon” (ChurchofJesusChrist.org).

• Ti panagadal iti panangiladawan ti nagungar a Mangisalakan iti Doktrina ken Katulagan 110:1–10 ket dakkel a wagas a mangbukel iti pammatitayo ken ni Jesucristo. Mabalin nga idawatmo kadagiti miembro ti klase a mangsapul iti imagery kadagitoy a bersikulo ket ibilang no ania ti isuro dagitoy nga imahen maipapan ken ni Jesucristo. Ania ti mabalin nga ibagi ti “aramid a puro balitok”? wenno ti timek a kas iti ”anasaas ti dakkel a danum”?

  uneg ti Templo iti Kirtland

  Addaan iti pulpito ti tunggal ungto ti Templo iti Kirtland para kadagiti lider iti priesthood.

Doktrina ken Katulagan 110:11–16

Dagiti tulbek iti priesthood a kasapulan tapno maipatungpal ti aramid ti Dios ket addan iti Simbaan iti agdama.

• Tapno matulongan a maawatan dagiti miembro ti klase dagiti tulbek iti priesthood nga impakumit da Moises, Elias, ken Elijah kada Joseph Smith ken Oliver Cowdery iti Templo iti Kirtland, mabalinmo nga awisen ida a mangbasa ken mangilawlawag iti palawag iti “Dagiti Nainayon a Resources,” a saggaysa wenno kada grupo. Apay a napateg dagitoy a tulbek iti biagtayo ita? Mabalin pay a nga idawat iti tunggal miembro ti klase a pumili iti maysa kadagiti propeta a nangikumit kadagita a tulbek—Moises, Elias, ken Elijah—ket agsursuro maipapan kenkuana manipud iti Bible Dictionary wenno Pangiwanwan iti Nasantuan a Kasuratan. Ania ti isuro kadatayo ti biag dagitoy a propeta maipapan kadagiti tulbek nga inkumitda? Daytoy ti makaiturong iti panaglilinnawag maipapan iti no ania ti namnamaen ti Apo nga aramidentayo itan nga addan dagitoy a tulbek iti daga.

dagiti nainayon a resources icon

Dagiti Nainayon a Resources

Mangipaay dagiti tulbek iti bileg ken turay para iti aramid ti Dios.

Inlawlawag ni Elder Quentin L. Cook:

“Saan a nalatak ti Templo iti Kirtland, agpada iti lokasion ken kadakkel. Ngem no maipanggep iti dakkel a kinapategna iti sangkataw-an, addaan daytoy iti agnanayon nga epektona. Insubli dagiti nagkauna a propeta dagiti tulbek iti priesthood para kadagiti agnanayon a pangisalakan nga ordinansa ti ebanghelio ni Jesucristo. Nagbunga daytoy iti napalaus a rag-o para kadagiti napudno a miembro.

“Mangipaay dagitoy a tulbek iti ‘bileg nga aggapu iti ngato’ [Doktrina ken Katulagan 38:38] para kadagiti nadiosan a naidutok a pagrebbengan a buklen ti umuna a panggep ti Simbaan. Iti dayta napintas nga aldaw ti Paskua ti Panagungar iti Templo ti Kirtland, tallo a tulbek ti naisubli:

“Umuna, nagparang ni Moises ket intalekna dagiti tulbek ti panaguummong ti Israel manipud iti uppat a paset ti daga, a daytoy ti aramid ti misionario.

“Maikadua, nagparang ni Elias ket inkumitna dagiti tulbek ti dispensasion ti ebanghelio ni Abraham, nga iramanna ti pannakaisubli ti katulagan ni Abraham [kitaen iti Abraham 2:8–11]. Insuro ni Presidente Russell M. Nelson a ti panggep dagiti tulbek ti katulagan ket mangisagana kadagiti miembro para iti pagarian ti Dios [kitaen iti “Covenants,” Ensign wenno Liahona, Nob. 2011, 88]. …

“Maikatlo, Nagpakita ken inkumit ni Elijah dagiti tulbek ti bileg ti panaglantip iti daytoy a dispensasion, a daytoy ti aramid iti pakasaritaan ti pamilia ken dagiti ordinansa iti templo a mangpabael iti pannakaisalakan para kadagiti sibibiag ken natay” (“Prepare to Meet God,” Ensign wenno Liahona, Mayo 2018, 114–15).

Panangpadur-as iti Panangisurotayo

Awisem ti Espiritu iti panangisurom. “Ti kangrunaan a panggep ti amin a banag nga aramiden ti maysa a mannursuro iti ebanghelio—tunggal saludsod, tunggal nasantuan a kasuratan, tunggal aktibidad,—ket mangawis iti Espiritu a mangpatibker iti pammati ken mangawis iti amin nga umasideg ken ni Cristo. … Ti sagrado a musika, dagiti nasantuan a kasuratan, dagiti balikas dagiti propeta iti ud-udina nga aldaw, dagiti panangipeksa iti ayat ken pammaneknek, ken dagiti kanito ti naulimek a panagutob ket makaawis amin iti kaadda ti Espiritu” (Panangisuro iti Wagas ti Mangisalakan,10).