Oktubre 4–10

Doktrina ken Katulagan 111–114

“Ibilinkonto Amin a Banag a Para iti Pagimbaganyo”

Bayat ti panangbasam iti Doktrina ken Katulagan 111–14, ibilang nga isurat dagiti naespirituan a kinapudno a kayat ti Apo a maawatan dagiti miembro ti klase. Tulongannakanto ti Espiritu Santo a mangtarabay kenka a mangammo no ania dagiti prinsipio nga ipamaysam.

Isuratmo dagiti Impresionmo

Yawis ti Panagbibinninglay

Ibilang ti panangidrowing iti kahon ti kinabaknang [treasure chest] iti pisarra. Mabalin nga isurat dagiti miembro ti klase iti pisarra dagiti bersikulo manipud kadagiti benneg 111–14 a nakasarakanda iti maysa a banag nga ibilangda a “dakkel a kinabaknang” (Doktrina ken Katulagan 111:2). Paibinglay iti sumagmamano a miembro no ania ti nasarakanda a napateg kadagita a bersikulo.

Isuro ti Doktrina

Doktrina ken Katulagan 111

Ti Apo mabalinna nga “ibilin ti amin a banag a para iti pagimbagan[tayo].”

• Makatulong ti balakad ti Apo iti Doktrina ken Katulagan 111 kadagiti miembro ti klase no agdanagda maipapan kadagiti temporal ken naespirituan a pakaseknan, kas met laeng iti panangtulong daytoy ken ni Joseph Smith kadagiti pakaseknanna maipapan iti Zion. Mabalinmo a rugian ti panangilawlawag iti daytoy a benneg babaen panangawis kadagiti miembro ti klase a mangilista iti pisarra dagiti banag a pagdanaganda wenno dagiti tao nga am-ammoda. Kalpasanna, sipapanunot kadagita a pakaseknan, mabalinda a sukisoken ti benneg 111 para iti balakad ken liwliwa nga ited ti Apo a mangtulong kadatayo. Mabalin nga ibinglay dagiti miembro ti klase no kasano a nakatulong kadakuada ti Mangisalakan idi namatida Kenkuana.

• Nalabit addaan iti padpadas dagiti miembro a kas ken ni Joseph—idi nariknada nga inawat ida ti Apo iti laksid dagiti “kinamaag[da]” (Doktrina ken Katulagan 111:1). Kasano a mangipagwadan ti padasda kadagiti kinapudno a naisuro iti Doktrina ken Katulagan 111? Kas pagarigan, kaano a nariknada a ti Apo “binilinna amin a banag a para iti pagimbaganda”? (bersikulo 11). Ania ti maisuro dagitoy a padas kadakuada maipapan iti Mangisalakan ken maipapan iti bagbagida?

Doktrina ken Katulagan 112:3–15, 22

Iturongto ti Apo dagiti sipapakumbaba nga agkagumaan a manggun-od iti pagayatanna.

• Tapno matulongan a paglilinnawagan dagiti miembro ti klase no ania ti isuro ti benneg 112 maipapan iti panagpakumbaba, ibilang ti panangbingay iti klase iti tallo a grupo. Ikkam ti tunggal grupo iti maysa kadagiti sumaganad a saludsod nga utobenda bayat ti panagrebyuda kadagiti bersikulo 3–15 ken 22: Ania ti panagpakumbaba? Kasano nga agbalintayo a napakpakumbaba? Ania dagiti bendision a naikari kadagiti napakumbaba? Ikkam ti klase iti gundaway a mangibinglay kadagiti sungbatda. Makagun-od dagiti grupo kadagiti nayon a nalawag a pannakaammo ken pannakaawat babaen ti panangbasa iti palawag ni Elder Quentin L. Cook iti “Dagiti Nainayon a Resources” wenno ti benneg a napauluan iti “Humility” iti Preach My Gospel (dagiti panid 126–27). Apay a napateg ti panagpakumbaba iti panangaramid iti trabaho ti Apo?

  

  No napakumbabatayo, tarabayennatayonto ti Apo ken sungbatanna dagiti kararagtayo.

Doktrina ken Katulagan 112:12–26

Dagiti pudno a napasurot [converted] ti makaam-ammo ken ni Jesucristo.

• Ti kinapudno a timmalllikud ti sumagmamano nga Apostol idi 1837 iti propeta ket nasayaat a palagip nga iti laksid ti pannakaawagtayo wenno no kasano ti kadakkel ti ammotayo maipanggep iti ebanghelio, nasken a saggaysa a penkentayo a pudno a napasurottayo [converted]. Ti panangbasa iti balakad nga inted ti Apo ken ni Thomas B. Marsh a mangtulong kenkuana a mamagkaykaysa iti Korum dagiti Sangapulo-ket-dua ket mangted iti klasem kadagiti nalawag a pannakaammo ken pannakaawat iti no ania ti kayat a sawen ti pannakapasurot [conversion]. Nalabit a mabalin a basaen dagiti miembro ti klase ti Doktrina ken Katulagan 112:12–26 a pampanunotenda ti maysa a miembro ti pamilia wenno gayyem—maysa a tao a mabalin a mangikarkarigatan a mangpapigsa iti pammatida. Ania dagiti kinapudno kadagitoy a bersikulo a mayunay-unay dagiti miembro ti klase a mangtulong iti dayta a tao nga agbalin nga ad-adda a napasurot [converted]? Ikkam dagiti miembro ti klase iti gundaway a mangutob no ania ti maaramidda a mangpapigsa iti bukodda a pannakapasurot [conversion] iti Apo.

Dagiti Nainayon a Resources

Ti kababalin a kas ken ni Cristo ti panagpakumbaba.

Insuro ni Elder Quentin L. Cook:

“Daksanggasat, iti aldawtayo iti dumani amin a paset ti gimong, makitatayo a maipaspasindayaw ti kinapateg ti bagi ken kinatangig idinto a madildilllaw ti panagpakumbaba ken kaadda ti sungsungbatan iti Dios. Adu iti kagimongan ti saan a makaawat uray kadagiti kangrunaan a kinapudno ken saan a makaawat no apay nga addatayo iti daytoy a daga. Ti pudno a panagpakumbaba, a kasapulan tapno magun-od ti panggep ti Apo para kadatayo, ket manmano a madlaw.

“Napateg a maawatan ti kalawa ti sakup ti kinapakumbaba, kinalinteg, kinatao, ken kinasaririt ni Cristo, kas naipagwadan kadagiti nasantuan a kasuratan. Minamaag a mangtagibassit iti panagkasapulan iti panagtultuloy a panagkagumaan para kadagitoy a kalidad ken kababalin a kas ken ni Cristo iti aginaldaw a batayan, nangnangruna iti kinapakumbaba. …

“Idi Hulio 23, 1837, nakipagkita ni Propeta Joseph ken ni Elder Thomas B. Marsh, Presidente ti Korum dagiti Sangapulo-ket-dua. Makita a naupay ni Elder Marsh ta nangawag ti Propeta iti dua a miembro ti korumna a mapan iti Inglateria a saanna a kinonsulta isuna. Idi agkita da Joseph ken Elder Marsh, nailemmeng ti ania man a sakit ti nakem, ket immawat ti Propeta iti nakaskasdaaw a paltiing. Daytoy itan ti maika-112 a benneg ti Doktrina ken Katulagan. Mangted daytoy iti saan a nakapappapati a direksion manipud iti langit no maipanggep iti panagpakumbaba ken aramid ti misionario. Bersikulo 10 mabasa ti, ‘Agpakumbabaka; ket kibinennakanto nga iturong ti Apo a Diosmo, ket itdennanto kenka ti sungbat dagiti kararagmo’ [Doktrina ken Katulagan 112:10; nainayon ti panangyunay-unay]” (“The Eternal Everyday,” Ensign wenno Liahona, Nob. 2017, 51–52).

Panangpadur-as iti Panangisurotayo

Agpokus kadagiti tao. “Ti wagas a pannakilangenmo kadagiti tao ket kapada ti pateg dagiti isursurom kadakuada. No dadduma ti pannakakumikomtayo iti panangidatag iti maysa nga adalen ket mabalin a makalapped kadatayo iti panangipeksa iti ayattayo para kadagiti sursuruantayo. … Ibilangmo no kasano a makapagpokuska iti no ania dagiti banag a kaskenan” (Panangisuro iti Wagas ti Mangisalakan,6).